کی تلاش کا نتیجه | موضو - نظم, صفحہ zahmat

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "zahmat"

نظم کے متعلقہ نتیجہ "zahmat"

نظم

کیوں زیاں کار بنوں سود فراموش رہوں
فکر فردا نہ کروں محو غم دوش رہوں
نالے بلبل کے سنوں اور ہمہ تن گوش رہوں
ہم نوا میں بھی کوئی گل ہوں کہ خاموش رہوں
جرأت آموز مری تاب سخن ہے مجھ کو
شکوہ اللہ سے خاکم بدہن ہے مجھ کو
ہے بجا شیوۂ تسلیم میں مشہور ہیں ہم
قصۂ درد سناتے ہیں کہ مجبور ہیں ہم
ساز خاموش ہیں فریاد سے معمور ہیں ہم
نالہ آتا ہے اگر لب پہ تو معذور ہیں ہم
اے خدا شکوۂ ارباب وفا بھی سن لے
خوگر حمد سے تھوڑا سا گلہ بھی سن لے
تھی تو موجود ازل سے ہی تری ذات قدیم
پھول تھا زیب چمن پر نہ پریشاں تھی شمیم
شرط انصاف ہے اے صاحب الطاف عمیم
بوئے گل پھیلتی کس طرح جو ہوتی نہ نسیم
ہم کو جمعیت خاطر یہ پریشانی تھی
ورنہ امت ترے محبوب کی دیوانی تھی
ہم سے پہلے تھا عجب تیرے جہاں کا منظر
کہیں مسجود تھے پتھر کہیں معبود شجر
خوگر پیکر محسوس تھی انساں کی نظر
مانتا پھر کوئی ان دیکھے خدا کو کیونکر
تجھ کو معلوم ہے لیتا تھا کوئی نام ترا
قوت بازوئے مسلم نے کیا کام ترا
بس رہے تھے یہیں سلجوق بھی تورانی بھی
اہل چیں چین میں ایران میں ساسانی بھی
اسی معمورے میں آباد تھے یونانی بھی
اسی دنیا میں یہودی بھی تھے نصرانی بھی
پر ترے نام پہ تلوار اٹھائی کس نے
بات جو بگڑی ہوئی تھی وہ بنائی کس نے
تھے ہمیں ایک ترے معرکہ آراؤں میں
خشکیوں میں کبھی لڑتے کبھی دریاؤں میں
دیں اذانیں کبھی یورپ کے کلیساؤں میں
کبھی ایفریقا کے تپتے ہوئے صحراؤں میں
شان آنکھوں میں نہ جچتی تھی جہانداروں کی
کلمہ پڑھتے تھے ہمیں چھاؤں میں تلواروں کی
ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے
تھی نہ کچھ تیغ زنی اپنی حکومت کے لیے
سر بکف پھرتے تھے کیا دہر میں دولت کے لیے
قوم اپنی جو زرو و مال جہاں پر مرتی
بت فروشی کے عوض بت شکنی کیوں کرتی
ٹل نہ سکتے تھے اگر جنگ میں اڑ جاتے تھے
پاؤں شیروں کے بھی میداں سے اکھڑ جاتے تھے
تجھ سے سرکش ہوا کوئی تو بگڑ جاتے تھے
تیغ کیا چیز ہے ہم توپ سے لڑ جاتے تھے
نقش توحید کا ہر دل پہ بٹھایا ہم نے
زیر خنجر بھی یہ پیغام سنایا ہم نے
تو ہی کہہ دے کہ اکھاڑا در خیبر کس نے
شہر قیصر کا جو تھا اس کو کیا سر کس نے
توڑے مخلوق خدا وندوں کے پیکر کس نے
کاٹ کر رکھ دئیے کفار کے لشکر کس نے
کس نے ٹھنڈا کیا آتشکدۂ ایراں کو
کس نے پھر زندہ کیا تذکرۂ یزداں کو
کون سی قوم فقط تیری طلب گار ہوئی
اور تیرے لیے زحمت کش پیکار ہوئی
کس کی شمشیر جہانگیر جہاں دار ہوئی
کس کی تکبیر سے دنیا تری بیدار ہوئی
کس کی ہیبت سے صنم سہمے ہوئے رہتے تھے
منہ کے بل گر کے ہو اللہ احد کہتے تھے
آ گیا عین لڑائی میں اگر وقت نماز
قبلہ رو ہو کے زمیں بوس ہوئی ہوئی قوم حجاز
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے
محفل کون و مکاں میں سحر و شام پھرے
مئے توحید کو لے کر صفت جام پھرے
کوہ میں دشت میں لے کر ترا پیغام پھرے
اور معلوم ہے تجھ کو کبھی ناکام پھرے
دشت تو دشت ہیں دریا بھی نہ چھوڑے ہم نے
بحر ظلمات میں دوڑا دئیے گھوڑے ہم نے
صفحۂ دہر سے باطل کو مٹایا ہم نے
نوع انساں کو غلامی سے چھڑایا ہم نے
تیرے کعبے کو جبینوں سے بسایا ہم نے
تیرے قرآن کو سینوں سے لگایا ہم نے
پھر بھی ہم سے یہ گلہ ہے کہ وفادار نہیں
ہم وفادار نہیں تو بھی تو دل دار نہیں
امتیں اور بھی ہیں ان میں گنہ گار بھی ہیں
عجز والے بھی ہیں مست مئے پندار بھی ہیں
ان میں کاہل بھی ہیں غافل بھی ہیں ہشیار بھی ہیں
سیکڑوں ہیں کہ ترے نام سے بے زار بھی ہیں
رحمتیں ہیں تری اغیار کے کاشانوں پر
برق گرتی ہے تو بے چارے مسلمانوں پر
بت صنم خانوں میں کہتے ہیں مسلمان گئے
ہے خوشی ان کو کہ کعبے کے نگہبان گئے
منزل دہر سے اونٹوں کے حدی خوان گئے
اپنی بغلوں میں دبائے ہوئے قرآن گئے
خندہ زن کفر ہے احساس تجھے ہے کہ نہیں
اپنی توحید کا کچھ پاس تجھے ہے کہ نہیں
یہ شکایت نہیں ہیں ان کے خزانے معمور
نہیں محفل میں جنہیں بات بھی کرنے کا شعور
قہر تو یہ ہے کہ کافر کو ملیں حور و قصور
اور بے چارے مسلماں کو فقط وعدۂ حور
اب وہ الطاف نہیں ہم پہ عنایات نہیں
بات یہ کیا ہے کہ پہلی سی مدارات نہیں
کیوں مسلمانوں میں ہے دولت دنیا نایاب
تیری قدرت تو ہے وہ جس کی نہ حد ہے نہ حساب
تو جو چاہے تو اٹھے سینۂ صحرا سے حباب
رہرو دشت ہو سیلی زدۂ موج سراب
طعن اغیار ہے رسوائی ہے ناداری ہے
کیا ترے نام پہ مرنے کا عوض خواری ہے
بنی اغیار کی اب چاہنے والی دنیا
رہ گئی اپنے لیے ایک خیالی دنیا
ہم تو رخصت ہوئے اوروں نے سنبھالی دنیا
پھر نہ کہنا ہوئی توحید سے خالی دنیا
ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے جام رہے
تیری محفل بھی گئی چاہنے والے بھی گئے
شب کی آہیں بھی گئیں صبح کے نالے بھی گئے
دل تجھے دے بھی گئے اپنا صلہ لے بھی گئے
آ کے بیٹھے بھی نہ تھے اور نکالے بھی گئے
آئے عشاق گئے وعدۂ فردا لے کر
اب انہیں ڈھونڈ چراغ رخ زیبا لے کر
درد لیلیٰ بھی وہی قیس کا پہلو بھی وہی
نجد کے دشت و جبل میں رم آہو بھی وہی
عشق کا دل بھی وہی حسن کا جادو بھی وہی
امت احمد مرسل بھی وہی تو بھی وہی
پھر یہ آرزدگئ غیر سبب کیا معنی
اپنے شیداؤں پہ یہ چشم غضب کیا معنی
تجھ کو چھوڑا کہ رسول عربی کو چھوڑا
بت گری پیشہ کیا بت شکنی کو چھوڑا
عشق کو عشق کی آشفتہ سری کو چھوڑا
رسم سلمان و اویس قرنی کو چھوڑا
آگ تکبیر کی سینوں میں دبی رکھتے ہیں
زندگی مثل بلال حبشی رکھتے ہیں
عشق کی خیر وہ پہلی سی ادا بھی نہ سہی
جادہ پیمائی تسلیم و رضا بھی نہ سہی
مضطرب دل صفت قبلہ نما بھی نہ سہی
اور پابندی آئین وفا بھی نہ سہی
کبھی ہم سے کبھی غیروں سے شناسائی ہے
بات کہنے کی نہیں تو بھی تو ہرجائی ہے
سر فاراں پہ کیا دین کو کامل تو نے
اک اشارے میں ہزاروں کے لیے دل تو نے
آتش اندوز کیا عشق کا حاصل تو نے
پھونک دی گرمئ رخسار سے محفل تو نے
آج کیوں سینے ہمارے شرر آباد نہیں
ہم وہی سوختہ ساماں ہیں تجھے یاد نہیں
وادیٔ نجد میں وہ شور سلاسل نہ رہا
قیس دیوانۂ نظارۂ محمل نہ رہا
حوصلے وہ نہ رہے ہم نہ رہے دل نہ رہا
گھر یہ اجڑا ہے کہ تو رونق محفل نہ رہا
اے خوشا آں روز کہ آئی و بصد ناز آئی
بے حجابانہ سوئے محفل ما باز آئی
بادہ کش غیر ہیں گلشن میں لب جو بیٹھے
سنتے ہیں جام بکف نغمۂ کو کو بیٹھے
دور ہنگامۂ گلزار سے یکسو بیٹھے
تیرے دیوانے بھی ہیں منتظر ہو بیٹھے
اپنے پروانوں کو پھر ذوق خود افروزی دے
برق دیرینہ کو فرمان جگر سوزی دے
قوم آوارہ عناں تاب ہے پھر سوئے حجاز
لے اڑا بلبل بے پر کو مذاق پرواز
مضطرب باغ کے ہر غنچے میں ہے بوئے نیاز
تو ذرا چھیڑ تو دے تشنۂ مضراب ہے ساز
نغمے بیتاب ہیں تاروں سے نکلنے کے لیے
طور مضطر ہے اسی آگ میں جلنے کے لیے
مشکلیں امت مرحوم کی آساں کر دے
مور بے مایہ کو ہمدوش سلیماں کر دے
جنس نایاب محبت کو پھر ارزاں کر دے
ہند کے دیر نشینوں کو مسلماں کر دے
جوئے خوں می چکد از حسرت دیرینۂ ما
می تپد نالہ بہ نشتر کدۂ سینۂ ما
بوئے گل لے گئی بیرون چمن راز چمن
کیا قیامت ہے کہ خود پھول ہیں غماز چمن
عہد گل ختم ہوا ٹوٹ گیا ساز چمن
اڑ گئے ڈالیوں سے زمزمہ پرداز چمن
ایک بلبل ہے کہ ہے محو ترنم اب تک
اس کے سینے میں ہے نغموں کا تلاطم اب تک
قمریاں شاخ صنوبر سے گریزاں بھی ہوئیں
پتیاں پھول کی جھڑ جھڑ کے پریشاں بھی ہوئیں
وہ پرانی روشیں باغ کی ویراں بھی ہوئیں
ڈالیاں پیرہن برگ سے عریاں بھی ہوئیں
قید موسم سے طبیعت رہی آزاد اس کی
کاش گلشن میں سمجھتا کوئی فریاد اس کی
لطف مرنے میں ہے باقی نہ مزہ جینے میں
کچھ مزہ ہے تو یہی خون جگر پینے میں
کتنے بیتاب ہیں جوہر مرے آئینے میں
کس قدر جلوے تڑپتے ہیں مرے سینے میں
اس گلستاں میں مگر دیکھنے والے ہی نہیں
داغ جو سینے میں رکھتے ہوں وہ لالے ہی نہیں
چاک اس بلبل تنہا کی نوا سے دل ہوں
جاگنے والے اسی بانگ درا سے دل ہوں
یعنی پھر زندہ نئے عہد وفا سے دل ہوں
پھر اسی بادۂ دیرینہ کے پیاسے دل ہوں
عجمی خم ہے تو کیا مے تو حجازی ہے مری
نغمہ ہندی ہے تو کیا لے تو حجازی ہے مری

علامہ اقبال

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال

نظم

تم روٹھ چکے دل ٹوٹ چکا اب یاد نہ آؤ رہنے دو
اس محفل غم میں آنے کی زحمت نہ اٹھاؤ رہنے دو
یہ سچ کہ سہانے ماضی کے لمحوں کو بھلانا کھیل نہیں
یہ سچ کہ بھڑکتے شعلوں سے دامن کو بچانا کھیل نہیں
رستے ہوئے دل کے زخموں کو دنیا سے چھپانا کھیل نہیں
اوراق نظر سے جلووں کی تحریر مٹانا کھیل نہیں
لیکن یہ محبت کے نغمے اس وقت نہ گاؤ رہنے دو
جو آگ دبی ہے سینے میں ہونٹوں پہ نہ لاؤ رہنے دو
جاری ہیں وطن کی راہوں میں ہر سمت لہو کے فوارے
دکھ درد کی چوٹیں کھا کھا کر لرزاں ہیں دلوں کے گہوارے
انگشت بہ لب ہیں شمس و قمر حیران و پریشاں ہیں تارے
ہیں باد سحر کے جھونکے بھی طوفان مسلسل کے دھارے
اب فرصت ناؤ نوش کہاں اب یاد نہ آؤ رہنے دو
طوفان میں رہنے والوں کو غافل نہ بناؤ رہنے دو
مانا کہ محبت کی خاطر ہم تم نے قسم بھی کھائی تھی
یہ امن و سکوں سے دور فضا پیغام سکوں بھی لائی تھی
وہ دور بھی تھا جب دنیا کی ہر شے پہ جوانی چھائی تھی
خوابوں کی نشیلی بد مستی معصوم دلوں پر چھائی تھی
لیکن وہ زمانہ دور گیا اب یاد نہ آؤ رہنے دو
جس راہ پہ جانا لازم ہے اس سے نہ ہٹاؤ رہنے دو
اب وقت نہیں ان نغموں کا جو خوابوں کو بیدار کریں
اب وقت ہے ایسے نعروں کا جو سوتوں کو ہشیار کریں
دنیا کو ضرورت ہے ان کی جو تلواروں کو پیار کریں
جو قوم و وطن کے قدموں پر قربانی دیں ایثار کریں
روداد محبت پھر کہنا اب مان بھی جاؤ رہنے دو
جادو نہ جگاؤ رہنے دو فتنے نہ اٹھاؤ رہنے دو
میں زہر حقیقت کی تلخی خوابوں میں چھپاؤں گا کب تک
غربت کے دہکتے شعلوں سے دامن کو بچاؤں گا کب تک
آشوب جہاں کی دیوی سے یوں آنکھ چراؤں گا کب تک
جس فرض کو پورا کرنا ہے وہ فرض بھلاؤں گا کب تک
اب تاب نہیں نظارے کی جلوے نہ دکھاؤ رہنے دو
خورشید محبت کے رخ سے پردے نہ اٹھاؤ رہنے دو
ممکن ہے زمانہ رخ بدلے یہ دور ہلاکت مٹ جائے
یہ ظلم کی دنیا کروٹ لے یہ عہد ضلالت مٹ جائے
دولت کے فریبی بندوں کا یہ کبر اور نخوت مٹ جائے
برباد وطن کے محلوں سے غیروں کی حکومت مٹ جائے
اس وقت بہ نام عہد وفا میں خود بھی تمہیں یاد آؤں گا
منہ موڑ کے ساری دنیا سے الفت کا سبق دہراؤں گا

عامر عثمانی

نظم

آسماں بادل کا پہنے خرقۂ دیرینہ ہے
کچھ مکدر سا جبین ماہ کا آئینہ ہے
چاندنی پھیکی ہے اس نظارۂ خاموش میں
صبح صادق سو رہی ہے رات کی آغوش میں
کس قدر اشجار کی حیرت فزا ہے خامشی
بربط قدرت کی دھیمی سی نوا ہے خامشی
باطن ہر ذرۂ عالم سراپا درد ہے
اور خاموشی لب ہستی پہ آہ سرد ہے
آہ جولاں گاہ عالمگیر یعنی وہ حصار
دوش پر اپنے اٹھائے سیکڑوں صدیوں کا بار
زندگی سے تھا کبھی معمور اب سنسان ہے
یہ خموشی اس کے ہنگاموں کا گورستان ہے
اپنے سکان کہن کی خاک کا دل دادہ ہے
کوہ کے سر پر مثال پاسباں استادہ ہے
ابر کے روزن سے وہ بالائے بام آسماں
ناظر عالم ہے نجم سبز فام آسماں
خاک بازی وسعت دنیا کا ہے منظر اسے
داستاں ناکامئ انساں کی ہے ازبر اسے
ہے ازل سے یہ مسافر سوئے منزل جا رہا
آسماں سے انقلابوں کا تماشا دیکھتا
گو سکوں ممکن نہیں عالم میں اختر کے لیے
فاتحہ خوانی کو یہ ٹھہرا ہے دم بھر کے لیے
رنگ و آب زندگی سے گل بدامن ہے زمیں
سیکڑوں خوں گشتہ تہذیبوں کا مدفن ہے زمیں
خواب گہ شاہوں کی ہے یہ منزل حسرت فزا
دیدۂ عبرت خراج اشک گلگوں کر ادا
ہے تو گورستاں مگر یہ خاک گردوں پایہ ہے
آہ اک برگشتہ قسمت قوم کا سرمایہ ہے
مقبروں کی شان حیرت آفریں ہے اس قدر
جنبش مژگاں سے ہے چشم تماشا کو حذر
کیفیت ایسی ہے ناکامی کی اس تصویر میں
جو اتر سکتی نہیں آئینۂ تحریر میں
سوتے ہیں خاموش آبادی کے ہنگاموں سے دور
مضطرب رکھتی تھی جن کو آرزوئے ناصبور
قبر کی ظلمت میں ہے ان آفتابوں کی چمک
جن کے دروازوں پہ رہتا ہے جبیں گستر فلک
کیا یہی ہے ان شہنشاہوں کی عظمت کا مآل
جن کی تدبیر جہانبانی سے ڈرتا تھا زوال
رعب فغفوری ہو دنیا میں کہ شان قیصری
ٹل نہیں سکتی غنیم موت کی یورش کبھی
بادشاہوں کی بھی کشت عمر کا حاصل ہے گور
جادۂ عظمت کی گویا آخری منزل ہے گور
شورش بزم طرب کیا عود کی تقریر کیا
دردمندان جہاں کا نالۂ شب گیر کیا
عرصۂ پیکار میں ہنگامۂ شمشیر کیا
خون کو گرمانے والا نعرۂ تکبیر کیا
اب کوئی آواز سوتوں کو جگا سکتی نہیں
سینۂ ویراں میں جان رفتہ آ سکتی نہیں
روح مشت خاک میں زحمت کش بیداد ہے
کوچہ گرد نے ہوا جس دم نفس فریاد ہے
زندگی انساں کی ہے مانند مرغ خوش نوا
شاخ پر بیٹھا کوئی دم چہچہایا اڑ گیا
آہ کیا آئے ریاض دہر میں ہم کیا گئے
زندگی کی شاخ سے پھوٹے کھلے مرجھا گئے
موت ہر شاہ و گدا کے خواب کی تعبیر ہے
اس ستم گر کا ستم انصاف کی تصویر ہے
سلسلہ ہستی کا ہے اک بحر نا پیدا کنار
اور اس دریائے بے پایاں کی موجیں ہیں مزار
اے ہوس خوں رو کہ ہے یہ زندگی بے اعتبار
یہ شرارے کا تبسم یہ خس آتش سوار
چاند جو صورت گر ہستی کا اک اعجاز ہے
پہنے سیمابی قبا محو خرام ناز ہے
چرخ بے انجم کی دہشت ناک وسعت میں مگر
بیکسی اس کی کوئی دیکھے ذرا وقت سحر
اک ذرا سا ابر کا ٹکڑا ہے جو مہتاب تھا
آخری آنسو ٹپک جانے میں ہو جس کی فنا
زندگی اقوام کی بھی ہے یوں ہی بے اعتبار
رنگ ہائے رفتہ کی تصویر ہے ان کی بہار
اس زیاں خانے میں کوئی ملت گردوں وقار
رہ نہیں سکتی ابد تک بار دوش روزگار
اس قدر قوموں کی بربادی سے ہے خوگر جہاں
دیکھتا بے اعتنائی سے ہے یہ منظر جہاں
ایک صورت پر نہیں رہتا کسی شے کو قرار
ذوق جدت سے ہے ترکیب مزاج روزگار
ہے نگین دہر کی زینت ہمیشہ نام نو
مادر گیتی رہی آبستن اقوام نو
ہے ہزاروں قافلوں سے آشنا یہ رہ گزر
چشم کوہ نور نے دیکھے ہیں کتنے تاجور
مصر و بابل مٹ گئے باقی نشاں تک بھی نہیں
دفتر ہستی میں ان کی داستاں تک بھی نہیں
آ دبایا مہر ایراں کو اجل کی شام نے
عظمت یونان و روما لوٹ لی ایام نے
آہ مسلم بھی زمانے سے یوں ہی رخصت ہوا
آسماں سے ابر آزاری اٹھا برسا گیا
ہے رگ گل صبح کے اشکوں سے موتی کی لڑی
کوئی سورج کی کرن شبنم میں ہے الجھی ہوئی
سینۂ دریا شعاعوں کے لیے گہوارہ ہے
کس قدر پیارا لب جو مہر کا نظارہ ہے
محو زینت ہے صنوبر جوئبار آئینہ ہے
غنچۂ گل کے لیے باد بہار آئینہ ہے
نعرہ زن رہتی ہے کوئل باغ کے کاشانے میں
چشم انساں سے نہاں پتوں کے عزلت خانے میں
اور بلبل مطرب رنگیں نوائے گلستاں
جس کے دم سے زندہ ہے گویا ہوائے گلستاں
عشق کے ہنگاموں کی اڑتی ہوئی تصویر ہے
خامۂ قدرت کی کیسی شوخ یہ تحریر ہے
باغ میں خاموش جلسے گلستاں زادوں کے ہیں
وادی کہسار میں نعرے شباں زادوں کے ہیں
زندگی سے یہ پرانا خاک داں معمور ہے
موت میں بھی زندگانی کی تڑپ مستور ہے
پتیاں پھولوں کی گرتی ہیں خزاں میں اس طرح
دست طفل خفتہ سے رنگیں کھلونے جس طرح
اس نشاط آباد میں گو عیش بے اندازہ ہے
ایک غم یعنی غم ملت ہمیشہ تازہ ہے
دل ہمارے یاد عہد رفتہ سے خالی نہیں
اپنے شاہوں کو یہ امت بھولنے والی نہیں
اشک باری کے بہانے ہیں یہ اجڑے بام و در
گریۂ پیہم سے بینا ہے ہماری چشم تر
دہر کو دیتے ہیں موتی دیدۂ گریاں کے ہم
آخری بادل ہیں اک گزرے ہوئے طوفاں کے ہم
ہیں ابھی صد ہا گہر اس ابر کی آغوش میں
برق ابھی باقی ہے اس کے سینۂ خاموش میں
وادئ گل خاک صحرا کو بنا سکتا ہے یہ
خواب سے امید دہقاں کو جگا سکتا ہے یہ
ہو چکا گو قوم کی شان جلالی کا ظہور
ہے مگر باقی ابھی شان جمالی کا ظہور

علامہ اقبال

نظم

ہوئی پھر امتحان عشق کی تدبیر بسم اللہ
ہر اک جانب مچا کہرام دار و گیر بسم اللہ
گلی کوچوں میں بکھری شورش زنجیر بسم اللہ
در زنداں پہ بلوائے گئے پھر سے جنوں والے
دریدہ دامنوں والے پریشاں گیسوؤں والے
جہاں میں درد دل کی پھر ہوئی توقیر بسم اللہ
ہوئی پھر امتحان عشق کی تدبیر بسم اللہ
گنو سب داغ دل کے حسرتیں شوقیں نگاہوں کی
سر دریا پرستش ہو رہی ہے پھر گناہوں کی
کرو یارو شمار نالۂ شبگیر بسم اللہ
ستم کی داستاں کشتہ دلوں کا ماجرا کہیے
جو زیر لب نہ کہتے تھے وہ سب کچھ برملا کہیے
مصر ہے محتسب راز شہیدان وفا کہیے
لگی ہے حرف نا گفتہ پہ اب تعزیر اللہ
سر مقتل چلو بے زحمت تقصیر بسم اللہ
ہوئی پھر امتحان عشق کی تدبیر بسم اللہ

فیض احمد فیض

نظم

بربط دل کے تار ٹوٹ گئے
ہیں زمیں بوس راحتوں کے محل
مٹ گئے قصہ ہائے فکر و عمل!
بزم ہستی کے جام پھوٹ گئے
چھن گیا کیف کوثر و تسنیم
زحمت گریہ و بکا بے سود
شکوۂ بخت نا رسا بے سود
ہو چکا ختم رحمتوں کا نزول
بند ہے مدتوں سے باب قبول
بے نیاز دعا ہے رب کریم
بجھ گئی شمع آرزوئے جمیل
یاد باقی ہے بے کسی کی دلیل
انتظار فضول رہنے دے
راز الفت نباہنے والے
بار غم سے کراہنے والے
کاوش بے حصول رہنے دے

فیض احمد فیض

نظم

دیکھو غریب کتنی زحمت اٹھا رہا ہے
گلیوں میں بھیڑ والی رکشا چلا رہا ہے
محروم ہے اگرچہ دنیا کی نعمتوں سے
ہر بوجھ زندگی کا ہنس کر اٹھا رہا ہے
برسات میں بھی دیکھو پھرتا ہوا سڑک پر
رکشا بھی بھیگتا ہے خود بھی نہا رہا ہے
گرمی کی دھوپ میں بھی رکتا نہیں ہے گھر میں
پر پیچ راستوں کے پھیرے لگا رہا ہے
سردی سے کانپتا ہے کپڑے پھٹے ہوئے ہیں
ٹھنڈی ہوا سے خود کو کیسے بچا رہا ہے
مستی میں دوڑتا ہے رکشا لیے سڑک پر
نغمہ کوئی سریلا اب گنگنا رہا ہے
رکشے کے پیڈلوں پر رکھے ہیں پاؤں دونوں
آنکھیں ہیں راستے پر گھنٹی بجا رہا ہے
ماں باپ منتظر ہیں گھر پر سبھی کے عادلؔ
بچوں کو اب وہ لینے اسکول جا رہا ہے

عادل اسیر دہلوی

نظم

جہاں میں ہر طرف ہے علم ہی کی گرم بازاری
زمیں سے آسماں تک بس اسی کا فیض ہے جاری
یہی سرچشمۂ اصلی ہے تہذیب و تمدن کا
بغیر اس کے بشر ہونا بھی ہے اک سخت بیماری
بناتا ہے یہی انسان کو کامل ترین انساں
سکھاتا ہے یہی اخلاق و ایثار و روا داری
یہی قوموں کو پہنچاتا ہے بام اوج و رفعت پر
یہی ملکوں کے اندر پھونکتا ہے روح بیداری
اسی کے نام کا چلتا ہے سکہ سارے عالم میں
اسی کے سر پہ رہتا ہے ہمیشہ تاج سرداری
اسی کے سب کرشمے یہ نظر آتے ہیں دنیا میں
اسی کے دم سے رونق عالم امکاں کی ہے ساری
یہ لا سلکی، یہ ٹیلیفون یہ ریلیں، یہ طیارے
یہ زیر آب و بالائے فلک انساں کی طراری
حدود استوا قطبین سے یوں ہو گئے مدغم
کہ ہے اب ربع مسکوں جیسے گھر کی چار دیواری
سمندر ہو گئے پایاب صحرا بن گئے گلشن
کیا سائنس نے بھی اعتراف عجز و ناچاری
بخار و برق کا جرار لشکر ہے اب آمادہ
اگلوا لے زمین و آسماں کی دولتیں ساری
غرض چاروں طرف اب علم ہی کی بادشاہی ہے
کہ اس کے بازوؤں میں قوت دست الٰہی ہے
نگاہ غور سے دیکھو اگر حالات انسانی
تو ہو سکتا ہے حل یہ عقدۂ مشکل بہ آسانی
وہی قومیں ترقی کے مدارج پر ہیں فائق تر
کہ ہے جن میں تمدن اور سیاست کی فراوانی
اسی کے زعم میں ہے جرمنی چرخ تفاخر پر
اسی کے زور پر مریخ کا ہمسر ہے جاپانی
اسی کی قوت بازو پہ ہے مغرور امریکہ
اسی کے بل پر لڑکی ہو رہی ہے رستم ثانی
اشارے پر اسی کے نقل و حرکت ہے سب اٹلی کی
اسی کے تابع فرمان ہیں روسی و ایرانی
اسی کے جنبش ابرو پہ ہے انگلینڈ کا غرہ
اسی کے ہیں سب آوردے فرانسیسی و البانی
کوئی ملک اب نہیں جن میں یہ جوہر ہو نہ رخشندہ
نہ غافل اس سے چینی ہیں نہ شامی ہیں نہ افغانی
بغیر اس کے جو رہنا چاہتے ہیں اس زمانے میں
سمجھ رکھیں فنا ان کے لیے ہے حکم ربانی
زمانہ پھینک دے گا خود انہیں قعر ہلاکت میں
وہ اپنے ہاتھ سے ہوں گے خود اپنی قبر کے بانی
زمانے میں جسے ہو صاحب فتح و ظفر ہونا
ضروری ہے اسے علم و ہنر سے بہرہ ور ہونا
ترقی کی کھلی ہیں شاہراہیں دہر میں ہر سو
نظر آتا ہے تہذیب و تمدن سے جہاں مملو
چلے جاتے ہیں اڑتے شہسواران فلک پیما
خراج تہنیت لیتے ہوئے کرتے ہوئے جادو
گزرتے جا رہے ہیں دوسروں کو چھوڑتے پیچھے
کبھی ہوتا ہے صحرا مستقر ان کا کبھی ٹاپو
کمر باندھے ہوئے دن رات چلنے پر ہیں آمادہ
دماغ افکار سے اور دل وفور شوق سے ملول
الگ رہ کر خیال زحمت و احساس راحت سے
لگے ہیں اپنی اپنی فکر میں با خاطر یکسو
مگر ہم ہیں کہ اصلاً حس نہیں ہم کو کوئی اس کی
ہمارے پائے ہمت ان مراحل میں ہیں بے قابو
جہاں پہلا قدم رکھا تھا روز اولیں ہم نے
نہیں سرکے اس اپنے اصلی مرکز سے بقدر مو
یہ حالت ہے کہ ہم پر بند ہے ہر ایک دروازہ
نظر آتا نہیں ہرگز کوئی امید کا پہلو
مگر واحسرتا پھر بھی ہم اپنے زعم باطل میں
سمجھتے ہیں زمانے بھر سے آگے خود کو منزل میں
ضرورت ہے کہ ہم میں روشنی ہو علم کی پیدا
نظر آئے ہمیں بھی تاکہ اصل حالت دنیا
ہمیں معلوم ہو حالات اب کیا ہیں زمانے کے
ہمارے ساتھ کا جو قافلہ تھا وہ کہاں پہنچا
جو پستی میں تھے اب وہ جلوہ گر ہیں بام رفعت پر
جو بالک بے نشاں تھے آج ہے ان کا علم برپا
ہماری خوبیاں سب دوسروں نے چھین لیں ہم سے
زمانے نے ہمیں اتنا جھنجھوڑا کر دیا ننگا
روا داری، اخوت، دوستی، ایثار ،ہمدردی
خیال ملک و ملت، درد قوم، اندیشۂ فردا
یہ سب جوہر ہمارے تھے کبھی اے واۓ محرومی
بنے ہیں خوبیٔ قسمت سے جو اب غیر کا حصا
اگر ہو جائیں راغب اب بھی ہم تعلیم کی جانب
تو کر سکتے ہیں اب بھی ملک میں ہم زندگی پیدا
بہت کچھ وقت ہم نے کھو دیا ہے لیکن اس پر بھی
اگر چاہیں تو کر دیں پیش رو کو اپنے ہم پسپا
نکما کر دیا ہے کاہلی نے گو ہمیں لیکن
رگوں میں ہے ہماری خون ابھی تک دوڑتا پھرتا
کوئی مخفی حرارت گر ہمارے دل کو گرما دے
ہمارے جسم میں پھر زندگی کی روح دوڑا دے
وطن والو بہت غافل رہے اب ہوش میں آؤ
اٹھو بے دار ہو عقل و خرد کو کام میں لاؤ
تمہارے قوم کے بچوں میں ہے تعلیم کا فقداں
یہ گتھی سخت پیچیدہ ہے اس کو جلد سلجھاؤ
یہی بچے بالآخر تم سبھوں کے جانشیں ہوں گے
تم اپنے سامنے جیسا انہیں چاہو بنا جاؤ
بہت ہی رنج دہ ہو جائے گی اس وقت کی غفلت
کہیں ایسا نہ ہو موقع نکل جانے پہ پچھتاؤ
یہ ہے کار اہم دو چار اس کو کر نہیں سکتے
خدا را تم بھی اپنے فرض کا احساس فرماؤ
یہ بوجھ ایسا نہیں جس کو اٹھا لیں چار چھ مل کر
سہارا دو، سہارا دوسروں سے اس میں دلواؤ
جو ذی احساس ہیں حاصل کرو تم خدمتیں ان کی
جو ذی پروا ہیں ان کو جس طرح ہو اس طرف لاؤ
غرض جیسے بھی ہو جس شکل سے بھی ہو یہ لازم ہے
تم اپنے قوم کے بچوں کو اب تعلیم دلواؤ
اگر تم مستعدی کو بنا لو گے شعار اپنا
یقیں جانو کہ مستقبل ہے بے حد شاندار اپنا
خداوندا! دعاؤں میں ہماری ہو اثر پیدا
شب غفلت ہماری پھر کرے نور سحر پیدا
ہمارے سارے خوابیدہ قویٰ بے دار ہو جائیں
سر نو ہو پھر ان میں زندگی کی کر و فر پیدا
ہمیں احساس ہو ہم کون تھے اور آج ہم کیا ہیں
کریں ماحول ملکی کے لیے گہری نظر پیدا
ملا رکھا ہے اپنے جوہر کامل کو مٹی میں
ہم اب بھی خاک سے کر سکتے ہیں لعل و گہر پیدا
اگر چاہیں تو ہم مشکل وطن کی دم میں حل کر دیں
ہزاروں صورتیں کر سکتے ہیں ہم کارگر پیدا
بظاہر گو ہم اک تودہ ہیں بالکل راکھ کا لیکن
اگر چاہیں تو خاکستر سے کر دیں سو شرر پیدا
وطن کا نکبت و افلاس کھو دیں ہم اشارے میں
جہاں ٹھوکر لگا دیں ہو وہیں سے کان زر پیدا
ہم اس منزل کے آخر پر پہنچ کر بالیقیں دم لیں
اگر کچھ تازہ دم ہو جائیں اپنے ہم سفر پیدا
جو کوشش متحد ہو کر کہیں اک بار ہو جائے
یقیں ہے ملک کی قسمت کا بیڑا پار ہو جائے

احمق پھپھوندوی

نظم

بس ایک خندۂ بے باک ہی سے کیا ہوگا
لہو کی زحمت اقدام بھی ضروری ہے
ذرا سی جرأت ادراک ہی سے کیا ہوگا

مصطفی زیدی

نظم

دوں گا نہ زحمت
کر لی ہے نیت
سحری میں امی مجھ کو جگانا

عطاء الرحمٰن طارق

نظم

سب سے ملنے کی زحمت اٹھاتی نہیں
ایرے غیرے کو خاطر میں لاتی نہیں

آل احمد سرور

نظم

اس کنبہ پرور دنیا میں بیکس کی حمایت کون کرے
جب غاصب منصف بن جائیں انصاف کی زحمت کون کرے

ابوالفطرت میر زیدی

نظم

آج ہم نے مہ و انجم کو بھی زحمت دی ہے
آسمانوں سے اتارا ہے تمہاری خاطر

انجم اعظمی

نظم

نہیں یہ عہد اور ہے ساقی
اہل یورپ کا دور ہے ساقی
کی ہے کوشش انہوں نے خاطر خواہ
پائی ہے مدتوں میں ہند کی راہ
کر کے زحمت جو آئے اتنی دور
محض ترویج بادہ تھی منظور
جو مسلماں ہیں امت انگریز
مے کشی سے انہیں نہیں پرہیز
بادہ خواری کا شغل گھر گھر ہے
اور تاڑی تو شیر مادر ہے
پہلے پاسی چمار پیتے تھے
مردم بے وقار پیتے تھے
اب تو اہل علوم پیتے ہیں
ماحیان رسوم پیتے ہیں

نظم طبا طبائی

نظم

مشاعرے میں جو شاعر بلائے جاتے ہیں
بڑے سلیقے سے بودم بنائے جاتے ہیں
وصول ہوتے ہیں پہلے یہ نامہ و پیغام
کہ اے شہنشہ اقلیم حافظؔ و خیامؔ
ہماری بزم ادب کا ہے جشن سالانہ
جلی ہے شمع سخن رقص میں ہے پروانہ
گھٹا جو شعروں کی چاروں طرف سے آئی ہے
وہ فلم کے بھی ستارے سمیٹ لائی ہے
گزشتہ سال سنا جس نے آپ کو یہ کہا
نہ شعلے میں یہ کرشمہ، نہ برق میں ادا
اور اب کے سال بھی خود دیکھ لیں گے یہ سرکار
کہ گونجتے ہیں عقیدت سے کوچہ و بازار
روانہ کر دیں کرائے کی گر ضرورت ہے
''وہ آئیں گھر میں ہمارے خدا کی قدرت ہے''
ہمارے شہر میں اردو ادب کا دنگل ہے
یہ شہر شعر کا اور شاعروں کا جنگل ہے
اب اس پہ شاعر شیریں نوا کو ہے یہ گماں
کہ میرے شعلے سے روشن ہوئی ہے شمع بیاں
ادھر سے منتظم اک سوچ اور بچار میں ہے
اسے خبر ہے کہ شاعر کس انتظار میں ہے
بلانے کے لیے اصرار بھی وہ کرتا ہے
کرایہ لے کہ نہ پھر آئے اس سے ڈرتا ہے
بنا کے لکھتا ہے دعوت کا اس طرح مکتوب
مشاعرے میں دیا جائے گا جو ہے مطلوب
غرض بلاتے ہیں وہ شاعروں کو حیلے سے
پیام آتے ہیں احباب کے وسیلے سے
جو شعر سننے کو اپنے گھروں سے آتے ہیں
وہ سب بٹیر لڑانے کا لطف اٹھاتے ہیں
وہ جانتے ہیں کہ شاعر ہے ایک مرغ عجیب
اگر گلا ہے تو شاعر، نہیں گلا تو ادیب
یہ سوچتا ہے چلو قسمت آزما دیکھیں
سلوک ہوتا ہے اوروں کے ساتھ کیا دیکھیں
بہت سے اور بھی شاعر وہاں پر آئیں گے
چلو کہ مرگ رقیباں کا لطف اٹھائیں گے
ہیں کچھ پلے ہوئے شاعر کچھ ان میں خود رو ہیں
پرانے گھاگ ہیں کچھ ان میں شاعر نو ہیں
وہ دیدنی ہے اگر ہو کچھ ان میں ہنگامہ
کہ اس اکھاڑے کا ہر پہلواں ہے علامہ
ستاتے رہتے ہیں شاعر کو ایسے اندیشے
یہاں تلک کہ نکل آئیں رشتے اور ریشے
تعلقات سے آخر کو ہو کے وہ مجبور
مشاعرے کو چلا جیسے کام پر مزدور
کسی سے قرض لیا اور کسی کی منت کی
غرض کہ شاعر آتش نوا نے رحلت کی
پھنسا ہے اس لیے پھندے میں شاعر سادہ
کہ منتظم بھی تھے ہشیار یہ بھی آمادہ
وہ آ گیا ہے اٹھا کر ہزار دشواری
چلے جلو میں اسے لے کے اس کے درباری
کسی کے ہاتھ میں پان اور کسی کے ہاتھ میں ہار
ہر اک یہ کہتا ہے زحمت بہت ہوئی سرکار
مشاعرے میں قدم رنجہ آپ فرمائیں
تو اہل ذوق نشستوں میں آ کے بھر جائیں
تڑپ رہے تھے جو سننے کے واسطے اشعار
مشاعرے کے لیے ان کے پاس ہیں درکار
ٹکٹ خرید کے جو اہل ذوق آئے ہیں
وہ آخری صفوں میں خود بخود سمائے ہیں
معززین جو ذوق ادب سے خالی ہیں
ریزرو ان کے لیے اگلی صف کرا لی ہیں
یہ اس لیے کہ نظر میں وہ آپ کی بھی رہیں
جو شعر وہ نہ سمجھ پائیں آپ وہ نہ پڑھیں
مشاعرے میں خواتین بنتی ہیں سوئیٹر
سنبھل کے بیٹھے ہیں شاعر کی تاک میں ہوٹر
پڑھا مشاعرہ شاعر نے اہتمام کے ساتھ
غزل سنائی ترنم کی دھوم دھام کے ساتھ
کسی نے واہ کہا اور کسی نے ہوٹ کیا
مشاعرے کو یہ سمجھا کہ میں نے لوٹ لیا
اسی پہ پھولا ہوا ہے واہ واہ ہوئی
تمام رات کٹی نیند بھی تباہ ہوئی
یہ محفل آ ہی گئی روز و شب کی سرحد پر
جناب صدر بھی اب سو چکے ہیں مسند پر
جو سامعین ہیں ان پر بھی نیند طاری ہے
سواری اس کو ملی جس پہ فضل باری ہے
جو منتظم تھے ستاروں کے ساتھ ڈوب گئے
گئے وہ شاعروں سے چھپ کے اور خوب گئے
نمود صبح سے جب منتشر ہوئی محفل
اکیلا رہ گیا شاعر غریب شہر و خجل
مشاعرہ بہ جز انداز ہاؤ ہو کیا ہے
''تمہارے شہر میں غالبؔ کی آبرو کیا ہے''

سید محمد جعفری

نظم

میں اپنی قیمتی چیزیں بھی اکثر بھول جاتی ہوں
کہیں بھی جا کے ٹھہروں میں
کسی کے پاس بھی جاؤں
کبھی ٹیرس کبھی آنگن کبھی کمرے میں بھی اکثر
کچھ اپنی پچھلی یادوں کو کبھی کچھ چاند راتوں کو
اور اکثر ادھ بنے سے کچھ ادھورے خواب کے گچھے
وہیں پر چھوڑ آتی ہوں
میں اکثر بھول جاتی ہوں
وہ جو میں آخری موسم میں تم سے ملنے آئی تھی
تو کچھ تارے چنبیلی کی بہت تھوڑی سی وہ خوشبو
محبت کے سنہری نرم ریشم سے بنے بے ساختہ جملے
یہیں پر رہ گئے میرے
یہاں دیوار پر میں نے چمکتا چاند چھوڑا تھا
ہنسی کے موتیوں کی ایک مالا تھی جو تم نے گفٹ میں دی تھی
یہیں پر رہ گئی وہ بھی
میں ٹھہروں گی نہیں مجھ کو بس اپنی قیمتی چیزیں ہی لینی ہیں
تمہیں زحمت بہت ہوگی مگر یہ سب مجھے دے دو
تمہارے پاس تو دنیا کے اب سارے خزانے ہیں
میں خالی ہاتھ بیٹھی ہوں یہی میرا اثاثہ ہے

سیما غزل

نظم

گھر بھر سوتا ہے ایک بیتاب
آہیں بھر کر تڑپ رہا ہے
بھولے بھی آنکھ کو نہیں خواب
ظلمت شب کی عجب بلا ہے

عظیم الدین احمد

نظم

اس کی آنکھوں نے مجھ سے سبھی کہہ دیا
اس نے ہونٹوں کو ہلنے کی زحمت نہ دی

عدیل زیدی

نظم

مشقت مبارک رہے زاہدوں کو
یہ زحمت مبارک رہے زاہدوں کو
یہ عشرت مبارک رہے زاہدوں کو
یہ جنت مبارک رہے زاہدوں کو
کہ ان کا میں بس سامنا چاہتا ہوں

اصغر حسن مجیبی

نظم

رات کا وقت ہے
کوئی آہٹ نہ کر
بات جو بھی ہو من میں وہ من میں ہی رکھ
بول دینے سے تکلیف گھٹتی نہیں
بلکہ بٹ جاتی ہے اور
بڑھ جاتی ہے
رات کے وقت تو چپ ہی رہنا مناسب ہے کہنا نہیں
ایک بھی بات مجھ پر جو بھاری پڑے
کوئی بھی بات جو مجھ کو سونے نہ دے
اور سن بات سن
میرے سن لینے سے یہ پریشانیاں حل نہ ہوں گی کبھی
میں تیرا ایک معمولی عاشق ہی ہوں چارہ گر بھی نہیں
کوئی ایسی پریشانی ہو جس کا حل
میرے سینہ سے لگتے ہی مل جائے گا تو ہی زحمت اٹھا
مجھ کو بس وہ بتا جس میں جسموں کی تاثیر کام آ سکے
اس برہنہ بدن پر بدن کی ہی تدبیر کام آ سکے
اور یہ ممکن نہ ہو تو وہی بات ہے
رات کا وقت ہے

نویش ساہو

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے