Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "'tilak'"

Nazm MATCHES FOR "'tilak'"

Nazm

khel

kisii ke sar pe chuTiyaa rakh de.n
maathe uupar tilak sajaa.e.n
kisii ke chhoTe se chehre par
moTii sii daa.Dhii phailaa.e.n
kuchh din in se jii bahlaa.e.n
aur ye jab maile ho jaa.e.n
daa.Dhii choTii tilak sabhii ko
to.D-pho.D ke gaD-maD kar de.n
milii-julii ye miTTii phir se
alag alag saa.ncho.n me.n bhar de.n
na.e na.e aakaar banaa.e.n

Nida Fazli
Nazm

duniya ko kahan tak jaana hai

duniyaa ko kahaa.n tak jaanaa hai
ye kitnaa ba.Daa afsaana hai
sab kaan lagaa.e baiThe hai.n
aur raat saraktii jaatii hai
ye raat kahaa.n tak jaanii hai
kuchh is kaa or-o-chhor nahii.n
ye raat samundar hai jis me.n
aavaaz bahut hai rone kii
bas duur tilak taariikii hai
kuchh duur zaraa sii raushaniyaa.n
phir taariikii phir raushaniyaa.n
ye raat balaa kii maayaa hai
jo kuchh kaa kuchh kar detii hai
aa.nkho.n ko jagaatii hai barso.n
phir nii.nd kaa dhakkaa detii hai
phir KHvaab dikhaatii hai barso.n
phir KHvaabo.n se chau.nkaatii hai
ye khel bhayaanak raato.n kaa
insaan kii nannhii zaato.n kaa
KHush honaa aur dahal jaanaa
phir aa.nsuu aa.nsuu gal jaanaa
is khel me.n jo bhii haar gayaa
phir muTThii se sansaar gayaa
is khel me.n pha.nsnaa hai pyaare
bas haath me.n jitnii miTTii hai
us miTTii se sansaar banaa
use apne aa.nsuu kaa paanii
use apne hijr kii garmii de
use mausam mausam narmii de
ise apne a.ng lagaa pyaare
use apne rang lagaa pyaare
duniyaa ko kahaa.n tak jaanaa hai
ye kitnaa ba.Daa afsaana hai
ye bhed na ko.ii jaan sakaa
is bhed kaa chakkar bhaarii hai

Farhat Ehsas
Nazm

jap

aa mere andar aa
pavitra mahraan ke paanii
ThanDe miiThe maTyaale paanii
maTiyaale jiivan rang jal
dho de saaraa krodh kapaT
shahro.n kii dishaa.o.n kaa sab chhal
yuu.n sii.nch mujhe kar de merii miTTii jal-thal
tire tal kii kaalii chiknii miTTii se
maathe par tilak lagaa.uu.n
haath jo.D Da.nDvat karuu.n
o man ke bhed se gahre
haule haule saa.ns khii.nchte
om samaan amar
o mahaan saagar
mai.n utrii tere ThanDe jal me.n kamar kamar
tere ThanDe miiThe mehrbaan paanii se mu.nh dho luu.n
aur dho luu.n aa.nsuu
khaare aa.nsuu
tere miiThe paanii se dho luu.n
o mahaan maTiyaale saagar aa
sun mirii kathaa
mai.n ba.Dii abhaagan bhaag meraa
bedard haath me.n rahaa sadaa
TuuTaa meraa miTTii se naata
kaise TuuTaa
ik aa.ndhii ba.Dii bhayaanak laal chu.Dail
mujhe le u.Dii
uThaa kar paTkaa us ne kahaa.n se kahaa.n
tere charno.n me.n siis jhukaatii ek akelii jaan
mere saath meraa ko.ii miit nahii.n
ko.ii rang ruup ko.ii priit nahii.n
mirii an-ga.Dh phiikii murjhaatii bolii me.n ko.ii sa.ngiit nahii.n
mirii pii.Dhiyo.n ke biite yug mere saath nahii.n
bas ik nirda.ii dharam hai
jis kaa bharam nahii.n
vo dharam jo kahtaa hai miTTii mirii bairan hai
jo mujhe sikhaataa hai saagar meraa dushman hai
haa.n duur kahii.n
aakaash kii uu.nchaa.ii se pare
rahtaa hai KHudaa
itnaa ruukhaa
miTTii se jo.D nahii.n jis kaa
sab naate priit aur bair ke us kii kaaran mai.n kaise jo.Duu.n
mai.n miTTii meraa janam miTTii
mai.n miTTii ko kaise chho.Duu.n
o maTiyaale balvaan mahaa-saagar
mai.n ukh.Dii dhartii se
bhagvaan miraa ras suukh gayaa
phir bhii suntii huu.n apne lahuu me.n biite samay kii narm dhamak
vo samay jo mere janam se pahle biit gayaa
mere kaano.n me.n
ik shor hai jhar-jhar bahte naddii naalo.n kaa
aur ko.ii mahak ba.Dii be-kal hai
jo guu.nj banii mirii chhaatii se Takraatii hai
o mahaan saagar
jiivan-ras de
apne tal me.n jal-paudaa ban kar ja.D lene de
sadaa jiye
o mahaan saagar sindhuu
tuu sadaa jiye
aur ji.e.n tire paanii me.n phisaltii machhliyaa.n
shaant sukhii yuu.nhii
tire paanii me.n naav khete
tire baalak sadaa ji.e.n
o paalan-haar hamaare
dhartii ke rakhvaale
ann-daataa
tirii dhartii
narm retiilii mehrbaan sindh kii dhartii
sadaa jiye

Fahmida Riaz
Nazm

silsile sawalon ke

hazaaro.n sadiyaa.n guzar chukii hai.n
kisii samay me.n vo thii satvantii
kahii.n saavitrii
kahii.n thii miiraa
har ek yug me.n
aqiidato.n kii lahar me.n bhiigii
tapasyaa ke sehr me.n gum-sum
rivaayato.n ke nashe me.n Duubii
tumhaare qadmo.n kii gard ko vo tilak banaatii
diye jalaatii thii naqsh-e-paa par
janam janam kaa aTuuT rishta
nibaahe jaatii
hazaaro.n sadiyo.n safar kiyaa hai
nazar jamaa.e
tumhaare piichhe
tumhaare dukh par dukhii hu.ii hai
tumhaare sukh par sukhii hu.ii hai
magar bataa.o
hazaaro.n sadiyo.n ke darmiyaa.n ko.ii aisaa lamha
jo tum ne is ke liye jiyaa ho
sivaa.e aa.nsuu ke ko.ii jugnuu
kabhii jo aa.nchal me.n ja.D diyaa ho
puraane bargad pe ek dhaagaa
kahii.n to us ke bhii naam kaa ho
a.ndherii taaqo.n pe us kii KHaatir
rakhaa hu.aa bhii to ik diyaa ho
nahii.n hai kuchh bhii
kahii.n nahii.n hai
vo apnii taariiKH me.n tumhaaraa
likhe bhii gar naam
kis tarah se

Kahkashan Tabassum
Nazm

dar-madh-am

ab jo nazar uThaa ke udhar se idhar tilak
dekhaa to aam-vaam kaa qissa tamaam hai

Khalid Mahmood
Nazm

qaumi tarana

pyaaraa hindustaan hamaaraa pyaaraa hindostaan
jaan fidaa hai is par apnii dil is par qurbaan
mulk nahii.n ye hai jannat kaa dilkash ek makaan
pyaaraa hindustaan hamaaraa pyaaraa hindostaan
pyaare pyaare dariyaa is ke pyaarii pyaarii nahre.n
pyaare pyaare chashme is ke pyaarii pyaarii lahre.n
pyaare pyaare manzar pyaarii pyaarii is kii shaan
pyaaraa hindustaan hamaaraa pyaaraa hindustaan
pyaarii khetii-baa.Dii pyaarii pyaarii paidaavaar
pyaarii pyaarii aab-o-havaa hai pyaarii is kii bahaar
dil me.n hamaare rahtaa hai har vaqt isii kaa dhyaan
pyaaraa hindustaan hamaaraa pyaaraa hindustaan
pyaaraa pyaaraa din hai is kaa pyaarii pyaarii raat
pyaaraa shaam-o-sahar kaa jalva pyaarii har ik baat
pyaare pyaare nazzaaro.n kii pyaarii pyaarii kaan
pyaaraa hindustaan hamaaraa pyaaraa hindustaan
pyaare phal pyaarii tarkaarii pyaare is ke phuul
pyaare aam aur jaamun is ke pyaare niim babuul
pyaare Galle pyaare meve pyaare pyaare dhaan
pyaaraa hindustaan hamaaraa pyaaraa hindostaan
pyaarii garmii pyaarii sardii pyaarii har barsaat
pyaarii har har baat hai is kii pyaarii har har ghaat
pyaarii hai har ik adaa pyaaraa har ek nishaan
pyaaraa hindustaan hamaaraa pyaaraa hindustaan
'iqbaal' aur 'tagore' se shaa.ir p-c-re se faazil
v-c-raaman shaah sulaimaa.n j-c-bos se kaamil
'gaa.ndhii' aur 'jinnaah' se leader 'zaakir' se vidvaan
pyaaraa hindustaan hamaaraa pyaaraa hindustaan
'jauhar' 'ansaarii' 'ajmal' 'aazaad' 'javaahar-laal'
'daadaa-bhaa.ii' 'daas' 'tilak' 'gokhel' se nek-KHisaal

Mohammad Shafiuddin Nayyar
Nazm

marsiya baal-ganga-dhar-tilak

maut ne raat ke parde me.n kiyaa kaisaa vaar
raushani-e-sub.h vatan kii hai ki maatam kaa Gubaar

Chakbast Braj Narayan
Nazm

hamein nabud mat karna

agarche suut se takle ne dhaage ko na khii.nchaa thaa
mire reshe bunat ke marhale me.n the
rage.n maa.n kii duriido.n se na bichh.Dii thii.n
mai.n apne jism se kuchh faasle par thaa
magar mere aqiide kaa ta.ayyun karne vaalo.n ne
mire maslak ke baare me.n
jo sochaa thaa use tajsiim kar Daalaa
mai.n jis dam apne hone par utar aayaa
mujhe taqsiim kar Daalaa
kisii ne mere maathe par tilak daaGaa
saliibo.n ko mirii chhaatii pe khii.nchaa
aur kaano.n me.n azaa.n bhar dii
phir is ke ba.ad
peshaanii pe a.ngaare
saliibe.n apne siine par
samaa.at par namiida za.ng ke taale sambhaale
mai.n ne saarii umr
duniyaa ke tasarruf me.n guzaarii hai
mirii fitrat simaTnaa aur
qismat TuuT jaanaa hai
mai.n paara huu.n
mujhe duniyaa masaltii hai
nafii isbaat kii zarbe.n
mujhe taqsiim kartii hai.n
bikhartaa huu.n
mire zarre thirakte hai.n
to kahte hai.n
hame.n naabuud mat karnaa
ki jab taqsiim hone kaa amal mumkin nahii.n rahtaa
to phir zarra
zaraa bhar choT khaane par
dhamaake ko ugaltaa hai
dhamaake ko samajhte ho
dhamaaka jis se harf-e-kun Tapaktaa hai
hame.n naabuud mat karnaa

Syed Mubarak Shah
Nazm

zindabaad ai watan

tujh pe gaa.ndhii javaahar ne rakkhii nazar
terii 'hasrat' 'tilak' ne sadaa lii KHabar
jaan de ke hu.e tujh pe laakho.n amar
indaraa ne sa.nvaaraa thaa tujh ko magar

Fazal Haq Azimabadi
Nazm

main KHud se mayus nahin hun

mai.n KHud se maayuus nahii.n huu.n
insaa.n se maayuus huu.n tho.Daa
dhartii par aane se pahle
vo aur mai.n saath rahaa karte the
jannat me.n
lekin is ko sadiyaa.n biitii.n
ab us se meraa kyaa rishta
vaise vo bhii mujh jaisaa hai
merii tarah khaataa piitaa chaltaa phirtaa hai
ham dono.n ham-shakl hai.n itne
kuchh bhii kare vo
chaa.nd pe jaa.e dhartii par
ja.ng kare aur KHuun bahaa.e
aa.nch mire daaman par aa.e
ham dono.n ham-shakl hai.n lekin
kyaa mai.n apnii maa.n bahno.n ko
chauraahe par na.ngaa kar saktaa huu.n
vo kartaa hai
vo pistaane.n jin se mai.n ne duudh piyaa
balvaan banaa huu.n
jin par mai.n ne sher kahe
tasviire.n banaa.ii.n
kyaa mai.n un ko kaaT ke
kutto.n ko khilvaa saktaa huu.n
kahte hai.n khilvaayaa us ne
kyaa mai.n nisvaanii paikar ko
jo meraa mauzuu-e-suKHan hai
phuul se komal
chaa.nd se shiital
kii botal
jo merii biivii kaa badan hai us ko
Tuk.De Tuk.De kar saktaa huu.n
us ne kiyaa hai
kyaa mai.n apnii beTii se mu.nh kaalaa kar ke
apne bhaa.ii-bando.n ham-jinso.n ko
buDDho.n javaano.n maasuumo.n ko
zinda jalaa kar
phaa.nsii ke taKHte pe cha.Dhaa kar
un ke lahuu kaa tilak lagaa kar
muu.nchh pe taav de saktaa huu.n
us ne diyaa hai
mai.n KHud se maayuus nahii.n huu.n
insaa.n se maayuus huu.n tho.Daa
aaj hii saare aKHbaaro.n me.n KHabar chhapii hai
is dhartii ke ik hisse gujraat me.n us ne
mere mu.nh par thuuk diyaa hai

Sulaiman Areeb Haidarabadi
Nazm

ek nazm

raat a.ndherii kaalaa baadal duur tilak viiraanii
ek akelii kashtii jis ke niiche gahraa paanii
lahro.n kii phunkaar ke aage kashtii kaa man Dole
shivaa samundar ke siine pe barkhaa motii role
duur kisii viiraan jaziire uupar ulluu bole
ulluu kii aavaaz ko sun ke jaag uThii purvaa.ii
raat kaa desii shaalaa o.Dhe pe.D se milne aa.ii
shaaKH pe aTkii Daal pe maTkii patto.n pe lahraa.ii
baat nahii.n thii utnii jitnii phail ga.ii rusvaa.ii

Najma Saqib
Nazm

ghar wapsi

Topii jane.uu Tiika maalaa chhaap tilak kii jhuuTii haalaa
hai.n ye sab baazaar kii chiize.n naqlii aur bekaar kii chiize.n
tan man me.n gar ko.Dh hu.aa hai kab us ko resham ne Dhakaa hai
phiikaa hai har ek libaas dil me.n agar nahii.n vishvaas
kaalii safed agar hai.n nazre.n jiivan pe lagtii hai.n qaide.n
phiike phiike chaa.nd sitaare indr-dhanush ke rang bhii saare
aisaa hai par meraa ghar
jis me.n nahii.n diivaar yaa dar
kirno.n kaa saayaa pa.Dtaa hai
insaa.n bas insaa.n rahtaa hai
meraa ghar hai ruuh mirii
rasta manzil sabhii vahii

Ashok Lal
Nazm

piryaa darshani indara gandhi

ik la.Dkii thii kitnii pyaarii
indaraa us kaa naam
us kaa bachpan naT-khaT chanchal shor machaataa guzraa
us kaa azm qadam qadam par laavaa bin kaa biphraa
ik la.Dkii thii kitnii pyaarii
indaraa us kaa naam
us ke andar kitne tuufaano.n kii rang bharii shaktii thii
us ke andar maanavtaa kii aag ubaltii rahtii thii
ik la.Dkii thii kitnii pyaarii
indaraa us kaa naam
saamraaj se Takraa.ii thii jab us kii baanar senaa
sukh ke din biitii.n sab ke aazaadii ho din rainaa
ik la.Dkii thii kitnii pyaarii
indaraa us kaa naam
'gaa.ndhii' aur 'nehruu' kii viraasat us beTii ke naam aa.ii
is miTTii se tilak rachaa.o jis dhartii ke kaam i
ik la.Dkii thii kitnii pyaarii
indaraa us kaa naam
bachcho karo parnaam

Sitvat Rasool
Nazm

wajib-ul-qatl

maah-e-kaamil hairat kii tasviir ho jaise
hadd-e-chaah-e-naKHshab aalamgiir ho jaise
holii ke ra.ngo.n kaa dhoka
chehro.n par tahriir ho jaise
bhiigii raat me.n aab-e-shar-a.ngez ke maare
mast sitaare
apnii chaale.n chuuk rahe hai.n
dahliizo.n par pighlii sham.e.n
niile baadal ke parde me.n ojhal hote
aa.nkh ke taare Dhuu.nD rahii hai.n
aa.iino.n se naalaa.n naqsh se aarii chehre
jazbo.n ke uqdo.n me.n uljhe
muurtiyo.n kii maalaa japte
kaan me.n halqe Daale
gerve baadal pahne naach rahe hai.n
laal tilak me.n aa.nkh ugaa.e
sham.e.n thaame chob uThaa.e
yak-ra.ngii dastaare.n jubbe gumbad o.Dhe
sadiyo.n kii diivaar pe rote
raqs-e-vahshat kaa zahraab u.nDel rahe hai.n
naa-biinaa.ii ke paiGambar
ra.ng rachaatii
maut kii bolii bol rahe hai.n
chiiKH rahe hai.n
in ke pairaahan ko dekho
chehre dekho aa.nkhe.n dekho
dekho sab haatho.n ko dekho
jis par rang nazar aa jaa.e
jaan se jaa.e

Faisal Azeem
Nazm

maskan

aa
ki is dil me.n tere liye hai bahut sii jagah
ye to dono.n ko ma.aluum hai
aarzuu.o.n kii kasrat se ta.ngii kaa maaraa hu.aa
hasrato.n se pareshaan hai
us kii bosiidgii ke gavaah
mohabbat vafaa dushmanii buGz kiina hasad
ye jahaa.n muKHtasar
aur to izz-o-jal
phir bhii itnaa yaqii.n kar hii saktaa hai tuu
ye vo ghar hai ki jis me.n agar tuu biraaje
ye teraa bane
aur tab tak rahegaa baseraa tiraa
jab tilak tuu ise
apne rahne ke qaabil samajhtaa rahe!

Shahnaz Nabi
Nazm

aahaT

tanhaa.ii ke sahraa.o.n me.n
chalte chalte
ab to merii
aa.nkho.n kii viiraan galii se
paa.nv ke chhaale
bah nikle hai.n
ik muddat se jism kii dhartii
pyaasii hai suukhe ke kaaran
jiivan ke a.ndhiyaare path par
duur tilak sannaaTaa saa hai
qadmo.n kii aahaT bhii nahii.n hai

Aslam Aazad
Nazm

chashm-e-bad-dur

naagahaa.n goyaa azaan-e-fajr
kaano.n me.n pa.Dii
mai.n dau.D kar
mandir kii sii.Dhii par cha.Dhaa
Topii utaarii
KHaak jhaa.Dii dvaar se
aur sehn ko KHaalii kiyaa har KHaar se
phir sajda-e-haq kaa bajaa laanaa hu.aa
siine ke andar qalb kaa aanaa hu.aa
ik shankh guu.njaa
mai.n haram kii samt lapkaa
daaKHle ke vaqt
maathe par tilak khii.nchaa
buland aavaaz me.n
jai ho kaa jab naa'ra lagaayaa
aasmaa.n ko ek malbe kii tarah bikhraa hu.aa paayaa

Shahram Sarmadi
Nazm

ashnan

jab nuur ke parde se haTaa parda-e-zulmaat
jab sub.h ke maathe se miTii gard-e-KHuraafaat
pau phuuTne vaalii thii to mashriq thaa hinaa.ii
milne ko thii duniyaa ko shu.aa.o.n kii badhaa.ii
sahmii hu.ii utrii to thii aakaash se shabnam
Guncho.n ko tabassum kaa vo paiGaam thii taaham
kaliyo.n ko jo badmast havaa chuum rahii thii
is chhe.D par har shaaKH-e-chaman jhuum rahii thii
chi.Diyo.n kii chahak duur se detii thii sunaa.ii
u.Dne kii jasaarat abhii un me.n na thii aa.ii
sabza kahii.n chup-chaap guhar rol rahaa thaa
gul ha.ns ke kahii.n band-e-qabaa khol rahaa thaa
fitrat ke pujaarii bhii bahut jaag chuke the
sairo.n ke liye log bhii kuchh bhaag chuke the
taqdiis ke paaband bhii gangaa ke kinaare
jaate the kahii.n tez kahii.n sust bechaare
puujaa ko.ii kartaa thaa tilak ko.ii banaataa
jal haath me.n letaa ko.ii maathe pe lagaataa
itne me.n numaayaa.n hu.aa ik paikar-e-nuurii
qadmo.n me.n shafaq jis ke pa.Dii bahr-e-huzuurii
saa.nche me.n Dhale jaise ki andaam the saare
lapke vo qadam chuumne bahte hu.e dhaare
bojhal thii palak nii.nd ke be-saaKHta-pan se
chhuTtii thii kiran jaise ki har muu-e-badan se
thaalii jo uThaa.e thii to dil vaalo.n ko mahmez
mahjuub hu.aa dekh ke KHurshiid-e-sahar-KHez
saarii kii sa.nbhaale hu.e chuTkii se thii chuunan
ba.Dhtii thii use dekh ke har qalb kii dha.Dkan
dariyaa me.n dhare paa.nv ba.De naaz-o-adaa se
pariyaa.n sii lapakne lagii.n paanii kii ridaa se
ruk ruk ke jo do-chaar qadam aur ba.Dhaa.e
chuunan ko sa.nbhaale hu.e thaalii ko uThaa.e
nazraana diyaa phuul kaa amvaaj ko us ne
thaalii ko liyaa KHaadima-e-KHaas ne ba.Dh ke
phir aab-e-muqaddas me.n jo Dubkii sii lagaa.ii
badlii sii zaraa der ko mahtaab pe chhaa.ii
paanii se parii par ko jhaTaktii hu.ii niklii
andaam-e-gul-andaam se lipTii hu.ii saarii
motii se baraste the har ik muu-e-siyah se
shabnam ke vo qatre the ka.nval par jo pa.De the
vo mast-e-KHiraam aa.ii usii taur ga.ii bhii
par barq-e-tapaa.n KHirman-e-hastii par girii bhii

Rizwanullah
Nazm

lokmanya-tilak

maaya-e-hindostaa.n thaa baal-gangaa-dhar-tilak
is chaman kaa baaGbaa.n thaa baal-gangaa-dhar-tilak
KHush-kalaam-o-KHush-bayaa.n thaa baal-gangaa-dhar-tilak
mehrbaa.n thaa raazdaa.n thaa baal-gangaa-dhar-tilak
kaun bhaarat kii KHabar le us ke mar jaane ke baa'd
paarsaa thaa paarsaa thaa baal-gangaa-dhar-tilak
be-riyaa thaa be-riyaa thaa baal-gangaa-dhar-tilak
rahnumaa thaa rah-numaa thaa baal-gangaa-dhar-tilak
peshvaa thaa peshvaa thaa baal-gangaa-dhar-tilak
kaun bhaarat kii KHabar le us ke mar jaane ke baa'd
mulk kii ruuh-e-ravaa.n thaa baal-gangaa-dhar-tilak
baa'is-e-aaraam-e-jaa.n thaa baal-gangaa-dhar-tilak
har kisii kaa qadr-daa.n thaa baal-gangaa-dhar-tilak
is zamii.n par aasmaa.n thaa baal-gangaa-dhar-tilak
kaun bhaarat kii KHabar le us ke mar jaane ke baa'd
iftiKHaar-e-hind thaa vo baal-gangaa-dhar-tilak
jaa.n-nisaar-e-hind thaa vo baal-gangaa-dhar-tilak
nau-bahaar-e-hind thaa vo baal-gangaa-dhar-tilak
paas-daar-e-hind thaa vo baal-gangaa-dhar-tilak
kaun bhaarat kii KHabar le us ke mar jaane ke baa'd
mard-e-maidaan-e-siyaasat baal-gangaa-dhar-tilak
baa-muravvat baa-mohabbat baal-gangaa-dhar-tilak
saahab-e-iqbaal-o-shaukat baal-gangaa-dhar-tilak
paak-suurat paak-siirat baal-gangaa-dhar-tilak
kaun bhaarat kii KHabar le us ke mar jaane ke baa'd
har gha.Dii siina-sipar thaa baal-gangaa-dhar-tilak
kitnaa be-KHauf-o-KHatar thaa baal-gangaa-dhar-tilak
dil-jalo.n se baa-KHabar thaa baal-gangaa-dhar-tilak
sab kaa manzuur-e-nazar thaa baal-gangaa-dhar-tilak
kaun bhaarat kii KHabar le us ke mar jaane ke baa'd
ziinat-e-baaG-e-vatan thaa baal-gangaa-dhar-tilak
ik phalaa-phuulaa chaman thaa baal-gangaa-dhar-tilak
nauha-KHvaan-o-naa'ra-zan thaa baal-gangaa-dhar-tilak
vaaqif-e-ranj-o-mehan thaa baal-gangaa-dhar-tilak
kaun bhaarat kii KHabar le us ke mar jaane ke baa'd
rahnumaa.ii kar gayaa vo baal-gangaa-dhar-tilak
sar par ehsaa.n dhar gayaa vo baal-gangaa-dhar-tilak
kab kisii se Dar gayaa vo baal-gangaa-dhar-tilak
marne vaalaa mar gayaa vo baal-gangaa-dhar-tilak
kaun bhaarat kii KHabar le us ke mar jaane ke baa'd
kaash phir duniyaa me.n aa.e baal-gangaa-dhar-tilak
shakl phir apnii dikhaa.e baal-gangaa-dhar-tilak
aur phir giitaa sunaa.e baal-gangaa-dhar-tilak
'bismil' aa kar phir na jaa.e baal-gangaa-dhar-tilak
kaun bhaarat kii KHabar le us ke mar jaane ke baa'd

Bismil Allahabadi
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now