Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "Darne"

Nazm MATCHES FOR "Darne"

Nazm

watan mein wapsi

kal vo milii jo bachpan me.n mere bhaa.ii se khelaa kartii thii
jaane tab kyaa baat thii us me.n mujh se bahut hii Dartii thii
par kyaa hu.aa? vo kahaa.n ga.ii? ab kaun ye baate.n jaantaa hai
kab itnii duurii se ko.ii shaklo.n ko pahchaantaa hai
lekin ab jo milii hai mujh se aisaa kabhii na dekhaa thaa
us ko itnii chaah thii merii mai.n ne kabhii na sochaa thaa
naam bhii us ne bachche kaa mere hii naam pe rakkhaa thaa
phir kahii.n us se bichha.D na jaa.uu.n aaise mujh ko taktii thii
ko.ii gahrii baat thii jii me.n jise vo kah bhii na saktii thii
aisii chup aur paagal aa.nhke.n damak rahii thii.n shiddat se
mai.n to sach-much Darne lagaa thaa is KHaamosh mohabbat se

Muneer Niyazi
Nazm

kasrat-e-aulad

sard aa.he.n dekh kar begam ko ham bharne lage
muskuraa kar dekhne se in ke ham Darne lage

Nashtar Amrohvi
Nazm

radif aur qafiye

ha.nsii kal se mujhe is baat par hai aa rahii KHaaluu
ki KHaala kah rahii thii.n aap kaa hai qaafiya aaluu
usii din se bahut Darne lagaa huu.n aap se KHaala
jab ammii ne bataayaa aap kaa hai qaafiya bhaalaa
agar puuchhe ko.ii kyaa qaafiya hai aap kaa phuppii
to fauran saamne rakh duu.ngaa laa kar tel kii kuppii
agar shaa.ir kahe.n be-qaafiya hai lafz-e-bahno.ii
mire bahno.ii sar par shaa.iro.n ke maarnaa Do.ii
agar puuchhe ko.ii kyaa qaafiya hai aap kaa daadii
to malmal phe.nk denaa o.Dh lenaa sar pe tum khaadii
bahut hai ghuumne kaa shauq tum ko ai ba.De bhayyaa
na maaro to bataa duu.n hai tumhaaraa qaafiya pahiyaa
tum apnaa qaafiya KHud ban ga.ii ho ai merii aapaa
nazar lag jaa.egii tum sar pe rakh kar ho ho Taapaa
tumhaaraa qaafiya ko.ii nahii.n hai ai nahiif ammii
yahii achchhaa hai tum chupke se ban jaa.o radiif ammii

Raja Mehdi Ali Khan
Nazm

pesh lafz ek mohabbat name ka

kamre kii siilan se uktaa kar
kahii.n chalii ga.ii hai
mere hisse kii dhuup
bandhan se Darne vaalii chi.Diyaa
u.D rahii hai khokhle aakaash me.n

Nomaan Shauque
Nazm

nek parwin

ye zaruurii nahii.n
tum jis parviin kii talaash me.n ho
vo nek bhii ho
aksar zindagii ke saath
qadam se qadam milaa kar chalne vaalii la.Dkiyaa.n
piichhe rah jaatii hai.n
aur chhipkilii aur cockroach se
Darne vaalii la.Dkiyaa.n
mohabbat kii dau.D me.n avval aa jaatii hai.n

Sahar Ali
Nazm

jadu

zindagii
hamvaar
raaste par
gird-o-pesh se be-niyaaz
ravaa.n thii
achaanak
raahguzar
naa-hamvaar hu.ii
qadam girte sambhalte
la.Dkha.Daate
ba.Dhne lage
aa.nkhe.n
kuchh kuchh bolne
bahut kuchh samajhne lagii.n
aur tab Darne bhii lagii.n
ye kis ne
jaaduu kar diyaa
mujh par

Anwari Begum
Nazm

Dar

showroomo.n se
Darne vaale
achchhe logo
fooTpaatho.n par bikne vaalii
saarii chiize.n
mah.ngii bhii hai.n
ghaTiyaa bhii hai.n
ye jo dil me.n Dar hai
is ko patthar kar lo
is patthar se showroomo.n ke shiishe to.Do
rang-bira.ngii saarii KHushiyaa.n ghar le aa.o
in KHushiyo.n ke rang ba.De pakke hote hai.n
ye bhiigii aa.nkho.n se bhii ha.nste rahte hai.n

Shakeel Azmi
Nazm

mazhabi peshwa

KHudaa aur us ke insaaf se Darne vaale
KHataa-posh kamzor dil
vajuud aur naa-vajuud kaa
munaazra karne vaale
shikaariyo.n se behtar hai.n
ki un ke paas
KHauf-zada hone ke liye
ko.ii KHudaa
maujuud nahii.n hotaa
vo maz.hab kii musaavaat
tohfo.n se zarb de kar
maslahato.n me.n taqsiim karte hai.n
aur farz kiye ga.e KHudaa ko
bhuuk kaa kulliya lagaa kar
sikke ke baraabar le aate hai.n

Bushra Saeed
Nazm

hatak

girdaab ba.Dhaa
aur ha.nsii kaa halqa ta.ng hu.aa
mai.n kaa.np uTThaa
mai.n Darne lagaa
tab mai.n ne aachaanak
phaile hu.e aakaash kii jaanib
rahm talab nazro.n se dekhaa
taaro.n ne aakaash ko chhalnii kar Daalaa thaa
chaa.nd udha.Dtii ha.nsii kaa favvaara saa ban kar
naach rahaa thaa

Wazir Agha
Nazm

bhaari basta

chhuTTii kii ghanTii bajte hii
chappal merii nekar kii jebo.n me.n hotii thii
basta ka.ndhe par phe.nke
taKHtii lahraataa bhaag nikaltaa thaa
phir ye gho.De-sho.De mere aage bachche hote the
par mere bachche
ilm kii DugDugii
jaahil ke haath aa jaa.e
to baste bhaartii ho jaate hai.n
itne bhaarii ho jaate hai.n
chhuTTii kii ghanTii se ghuTne baj uThte hai.n
phir sar ba.Dh jaate hai.n
qad chhoTe rah jaate hai.n
aur insaan kaa bachcha gho.Do.n se Darne lagtaa hai

Husain Abid
Nazm

taaqub

shab-o-roz
jaane mujhe kyuu.n ye ehsaas hai
ko.ii mere ta.aaqub me.n ba.Dhtaa chalaa aa rahaa hai
mai.n KHud hii in bhaarii qadmo.n kii aavaaz ke bojh
se dab rahaa huu.n
ki mai.n apne hii dast-o-baazuu me.n ab lamha lamha simaTne lagaa huu.n!
mai.n ab KHud hii me.n zarra zarra bikharne lagaa huu.n!
me.n ab apnii hamsaa.egii se bhii Darne lagaa huu.n!
me.n shaayad! KHud apnii sadaa ke ta.aaqub me.n chalne lagaa huu.n
ki
tashkiik aur laa-yaqiinii
ke dhu.ndle manaazir liye aa.nkh me.n
aap apne lahuu ke dahakte jahannam me.n
jalne lagaa huu.n!
mire haafize me.n ta.aaqub kii ko.ii bhayaanak kahaanii hai
mahfuuz shaayad!

Farooque Muztar
Nazm

shri-kirishna

dab ga.e miT ga.e maGruur ubharne vaale
naam sun sun ke tiraa Darte the Darne vaale

Bismil Allahabadi
Nazm

chaudhwin ka chand

mai.n qamrii mahiine ke aaKHirii ayyaam me.n
chaudhvii.n ke chaa.nd par
ek nazm likhuu.ngaa
aur nazm me.n likhuu.ngaa
ki kis tarah ek nauzaa.ida chaa.nd
ba.Dhte ba.Dhte
chaudhvii.n kaa chaa.nd ho jaataa hai
nazm ke likhe jaane se
ko.ii nayaa chaa.nd yaqiinan
vaqt se pahle nahii.n niklegaa
vo apnii sadiyo.n puraanii rivaayat kaa paasbaan hai
vo merii nazm kii KHaatir
apnii rivaayat nahii.n to.Degaa
lekin
mai.n phir bhii nazm likhuu.ngaa
ki log
inhii aaKHirii ayyaam ke a.ndhere se Darne na lage.n
aur is a.ndhere ko
apnaa daa.imii muqaddar na maan le.n
ki log ghabraa jaate hai.n
aaj ke manaazir se
mai.n likhuu.ngaa aur is tarah likhuu.ngaa
ki vo jinho.n ne chaudhvii.n ke chaa.nd ko dekhaa hai
vo us ke istiqbaaliya naGme gaane lage.n
us ke KHair-maqdam me.n palke.n bichhaa de.n
aur jinho.n ne chaudhvii.n ke chaa.nd ko nahii.n dekhaa
aur paidaa hu.e hai.n guzishta chaudah pa.ndrah ayyaam me.n
yaa ki bas qissa sune hai.n buu.Dho.n se
vo us ke tajassus me.n KHushii se kuudne phaa.ndne lage.n
mai.n likhuu.ngaa
vo nazm ki jis ko sun kar log
ye aaKHirii siyaah ayyaam bhii KHushii se guzaar de.n
aur un kii ye KHushii dekh kar
tamaam taariikii par ghup a.ndheraa chhaa jaa.e
itnaa a.ndheraa ki ek nau-zaa.ida chaa.nd phir
merii nazm sun.ne ke liye nikal aa.e

Farhan Khan
Nazm

hamwar

naqsh miTtaa hai
to miT jaa.e
qadam hai.n saabit
mauj sarkash hai agar
ham bhii bahut ziddii hai.n
roz ik naqsh nayaa sabt kare.nge yuu.nhii
par agar kaT bhii ga.e
hausla shahpar hogaa
jaarii taKH.iil kii parvaaz rahegii yuu.nhii
ham nahii.n dariyaa.o.n ke anjaam se Darne vaale
raasta kar ke samundar ko guzar jaa.e.nge

Tabassum Azmi
Nazm

gharib naujawan

har-dam sa.nvarne vaalo
phuulo.n pe marne vaalo
kaa.nTo.n se Darne vaalo
bach kar guzarne vaalo
ik bad-nasiib huu.n mai.n
ya.anii Gariib huu.n mai.n

Sahar Rampuri
Nazm

farda

aabla-paa.ii se Darne vaale
tujh ko manzil ke nishaa.n tak na mile.nge hargiz
ham-safar
rok na qadmo.n ko kabhii
tere paa.o.n ke nuquush
saahib-e-fardaa ho.nge

Mohammad Abdul Qadir Adeeb
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

zindagi se Darte ho

zindagii se Darte ho!
zindagii to tum bhii ho zindagii to ham bhii hai.n!
zindagii se Darte ho?
aadmii se Darte ho?
aadmii to tum bhii ho aadmii to ham bhii hai.n
aadmii zabaa.n bhii hai aadmii bayaa.n bhii hai
us se tum nahii.n Darte!
harf aur ma.anii ke rishta-haa-e-aahan se aadmii hai vaabasta
aadmii ke daaman se zindagii hai vaabasta
us se tum nahii.n Darte
''an-kahii'' se Darte ho
jo abhii nahii.n aa.ii us gha.Dii se Darte ho
us gha.Dii kii aamad kii aagahii se Darte ho

Noon Meem Rashid
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now