Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "KHilqat"

Nazm MATCHES FOR "KHilqat"

Nazm

KHamosh aawaz

bolo tum ko kaise rokuu.n
duniyaa sau ilzaam dharegii
aise paagal pyaar ko saathii
saarii KHilqat naam dharegii

Jan Nisar Akhtar
Nazm

aaj ek harf ko phir DhunDta phirta hai KHayal

aaj har sur se har ik raag kaa naataa TuuTaa
Dhuu.nDtii phirtii hai mutrib ko phir us kii aavaaz
joshish-e-dard se majnuu.n ke garebaa.n kii tarah
chaak-dar-chaak hu.aa aaj har ik parda-e-saaz
aaj har mauj-e-havaa se hai savaalii KHilqat
laa ko.ii naGma ko.ii saut tirii umr daraaz
nauha-e-Gam hii sahii shor-e-shahaadat hii sahii
suur-e-mahshar hii sahii baa.ng-e-qayaamat hii sahii

Faiz Ahmad Faiz
Nazm

kar gae kuch kahan

maa.e.n rakkhe.ngii tire naam pe aulaad kaa naam
baap beTo.n ke liye terii bayaaze.n le.nge
jin pe qadGan hai vo ash.aar pa.Dhegii KHilqat
aur TuuTe hu.e dil tujh ko salaamii de.nge

Ahmad Faraz
Nazm

mujhe sochne de

merii naakaam mohabbat kii kahaanii mat chhe.D
apnii maayuus uma.ngo.n kaa fasaana na sunaa
zindagii talKH sahii zahr sahii sam hii sahii
dard o aazaar sahii jabr sahii Gam hii sahii
lekin is dard-o-Gam o jabr kii vus.at ko to dekh
zulm kii chhaa.nv me.n dam to.Dtii KHilqat ko to dekh
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D
jalsa-gaaho.n me.n ye dahshat-zada sahme amboh
rahguzaaro.n pe falaakat-zada logo.n ke giroh
bhuuk aur pyaas se pazh-murda siyah-faam zamii.n
tiira-o-taar makaa.n muflis o biimaar makii.n
nau-e-insaa.n me.n ye sarmaaya o mehnat kaa tazaad
amn o tahziib ke parcham tale qaumo.n kaa fasaad
har taraf aatish o aahan kaa ye sailaab-e-aaziim
nit-na.e tarz pe hotii hu.ii duniyaa taqsiim
lahlahaate hu.e kheto.n pe javaanii kaa samaa.n
aur dahqaan ke chhappar me.n na battii na dhu.aa.n
ye falak-bos mile.n dilkash o siimii.n baazaar
ye Galaazat pe jhapaTte hu.e bhuuke naadaar
duur saahil pe vo shaffaaf makaano.n kii qataar
sarsaraate hu.e pardo.n me.n simaTte gulzaar
dar-o-diivaar pe anvaar kaa sailaab-e-ravaa.n
jaise ik shaa.er-e-mad.hosh ke KHvaabo.n kaa jahaa.n
ye sabhii kyuu.n hai ye kyaa hai mujhe kuchh sochne de
kaun insaa.n kaa KHudaa hai mujhe kuchh sochne de
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D

Sahir Ludhianvi
Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

aaj tanhai ne thoDa sa dilasa jo diya

aaj tanhaa.ii ne tho.Daa saa dilaasa jo diyaa
kitne ruuThe hu.e saathii mujhe yaad aa.e hai.n
mausam-e-vasl kii kirno.n kaa vo amboh ravaa.n
jis ke hamraah kisii zohra-jabii.n kii Dolii
aise utrii thii ki jaise ko.ii aayat utre
hijr kii shaam ke bikhre hu.e kaajal kii lakiir
jis ne aa.nkho.n ke gulaabo.n pe shafaq chhi.Dkii thii
jaise KHushbuu kisii jangal me.n barahna Thahre
KHilqat-e-shahr kii jaanib se malaamat kaa azaab
jis ne akasr mujhe hone kaa yaqii.n baKHshaa thaa
dast-e-a.adaa.e.n vo khi.nchtii hu.ii tohmat kii kamaa.n
baarish-e-sa.ng me.n khultii hu.ii tiiro.n kii dukaa.n
mehrbaa.n dost rifaaqat kaa bharam rakhte hu.e
ajnabii log dil-o-jaa.n me.n qadam rakhte hu.e
aaj tanhaa.ii ne tho.Daa saa dilaasa jo diyaa
kitne ruuThe hu.e saathii mujhe yaad aa.e hai.n
ab na pindaar-e-vafaa hai na mohabbat kii jazaa
dast-e-a.adaa kii kashish hai na rafiiqo.n kii sazaa
taKHta-e-daar na mansab na adaalat kii KHalish
ab to ik chiiKH sii ho.nTo.n me.n dabii rahtii hai
raas aa.egaa kise dasht-e-balaa mere ba.ad
kaun maa.ngegaa uja.Dne kii du.aa mere ba.ad
aaj tanhaa.ii ne tho.Daa saa dilaasa jo diyaa

Mohsin Naqvi
Nazm

yahan se shahr ko dekho

yahaa.n se shahr ko dekho to saarii KHilqat me.n
na ko.ii saahab-e-tamkii.n na ko.ii vaali-e-hosh
har ek mard-e-javaa.n mujrim-e-rasan-ba-guluu
har ik hasiina-e-raanaa, kaniiz-e-halqa-bagosh

Faiz Ahmad Faiz
Nazm

raat

gayaa din hu.ii shaam aa.ii hai raat
KHudaa ne ajab shai banaa.ii hai raat
na ho raat to din kii pahchaan kyaa
uThaa.e maza din kaa insaan kyaa
hu.ii raat KHilqat chhuTii kaam se
KHamoshii sii chhaa.ii sar-e-shaam se
lage hone ab hot baazaar band
zamaane ke sab kaar behvaar band
musaafir ne din bhar kiyaa hai safar
sar-e-shaam manzil pe kholii kamar
daraKHto.n ke patte bhii chup ho ga.e
havaa tham ga.ii pe.D bhii so ga.e
a.ndheraa ujaale pe Gaalib hu.aa
har ik shaKHs raahat kaa taalib hu.aa
hu.e raushan aabaadiyo.n me.n charaaG
hu.aa sab ko mehnat se haasil faraaG
kisaan ab chalaa khet ko chho.D kar
ki ghar me.n kare chain se shab basar
Gariib aadmii jo ki mazduur hai.n
mashaqqat se jin ke badan chuur hai.n
vo din bhar kii mehnat ke maare hu.e
vo maa.nde thake aur haare hu.e
nihaayat KHushii se ga.e apne ghar
hu.e baal bachche bhii KHush dekh kar
ga.e bhuul sab kaam-dhandhe kaa Gam
savere ko uTThe.nge ab taaza-dam
kahaa.n chain ye baadshah ko nasiib
ki jis be-Gamii se hai.n sote Gariib

Ismail Merathi
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

saDak

sa.Dak masaafat kii ujlato.n me.n
ghire hu.e sab musaafiro.n ko
ba-Gaur fursat se dekhtii hai
kisii ke chehre pe surKH vahshat chamak rahii hai
kisii ke chehre se zard hairat chhalak rahii hai
kisii kii aa.nkhe.n harii-bharii hai.n
kabiir had se ubhar rahaa hai
saGiir qad se guzar rahaa hai
kisii kaa tyre kisii ke pahiye ko khaa rahaa hai
kisii kaa juutaa kisii kii chappal chabaa rahaa hai
kisii ke pairo.n me.n aa rahaa hai kisii kaa bachcha
kisii kaa bachcha kisii ke shaane pe jaa rahaa hai
ko.ii Thikaane pe ko.ii khaane pe jaa rahaa hai
habiib dast-e-raqiib thaame
Gariib-KHaane pe jaa rahaa hai
amiir pi.njra banaa rahaa hai
Gulaam kartab dikhaa rahaa hai
aur apne beTe ke saath chhat par
amiin kunDaa lagaa rahaa hai
nizaam Taa.nga chalaa rahaa hai
kisii kalaa.ii pe jagmagaatii hu.ii gha.Dii hai
magar abhii vo rukii hu.ii hai
kisii ke chehre pe baara bajne me.n paa.nch second rah ga.e hai.n
kisii kii haathii-numaa prado
sa.Dak se aise guzar rahii hai
sivaa.e is ke kahii.n bhii jaise ko.ii nahii.n ho
kisii kii mo.nchhe.n jhukii hu.ii hai.n
kisii kii baa.nchhe.n khilii hu.ii hai.n
kisii kii taxi kisii kii foksii milii hu.ii hai.n
kisii ke lab aur kisii kii aa.nkhe.n silii hu.ii hai.n
kisii ke kap.De phaTe hu.e hai.n
kisii kii pag.Dii chamak rahii hai
kisii kii ra.ngat kisii kii Topii u.Dii hu.ii hai
shariif nazre.n uThaa uThaa kar
kamaan jismo.n pe apnii vahshat ke tiir kab se chalaa rahaa hai
naziir nazre.n churaa rahaa hai
nafiis apne cluff kii shikno.n ko ro rahaa hai
hakiim apne matab ke shiisho.n ko dho rahaa hai
kisii kii aa.nkho.n ke dhu.ndle shiisho.n me.n us ke maazii kii jhalkiyaa.n hai.n
kisii kii aa.nkho.n me.n aane vaale hasiin lamho.n kii mastiyaa.n hai.n
kisii kii aa.nkho.n me.n rat-jago.n kii kuchh arGavaanii sii Doriyaa.n hai.n
kisii ke kaa.ndhe pe us ke KHvaabo.n kii boriyaa.n hai.n
kabaa.D-KHaane pe baasii Tuk.Do.n kii or kitaabo.n kii boriyaa.n hai.n
buzurg bargad ke niiche buu.Dhaa kha.Daa hu.aa hai
aur us ke haatho.n me.n tape lipTii hu.ii chha.Dii hai
police kii gaa.Dii pikiT lagaa kar
sa.Dak pe tirchhii kha.Dii hu.ii hai
aur ek mazduur apnaa daaman uThaa.e be-bas kha.Daa hu.aa hai
aur ik sipaahii ki us ke nefe me.n u.ngliyo.n ko ghumaa rahaa hai
vahii.n pe shaahid siyaah chashma lagaa ke KHud ko chhupaa rahaa hai
news channel kii chhoTii gaa.Dii ba.Dii KHabar kii talaash me.n hai
do sabzii vaale bhii apnii pherii lagaa rahe hai.n
to phuul vaale ke sar pe phuulo.n kii Tokarii hai
kisii kii aa.nkho.n me.n naukrii hai
kisii kii aa.nkho.n me.n chhokrii hai
vaqaar sar ko jhukaa rahaa hai
faraaz khaa.ii me.n jaa rahaa hai
to giilii cigarette ke kash lagaa kar
navaab rickshaw chalaa rahaa hai
saliim kannii ghumaa rahaa hai
vakiil vardii me.n jaa rahaa hai
zamiir baGle.n bajaa rahaa hai
aur ek vaa.iz bataa rahaa hai
KHudaa ko naaraaz karne vaale jahannamii hai.n
KHudaa ko raazii karo KHudaaraa
KHudaa ko raazii karo KHudaaraa
aur us ke aage nasiir akmal kamaal shaadaab Gulaam saare
nazar jhukaa.e kha.De hu.e hai.n
ki chashm-e-biinaa agar kahii.n hai
to samjho paataal tak ga.Dhii hai
kisii ko a-c KHariidnaa hai
kisii ko pii sii KHariidnaa hai
kisii kii bas aur kisii kii bii-sii nikal rahii hai
aqiila KHaala ke dono.n haatho.n me.n aaTh thaile laTak rahe hai.n
aur aate jaate sabhii musaafir
unhe.n musalsal khaTak rahe hai.n
ziyaa a.ndhere me.n jaa rahaa hai
gulaab kachraa jalaa rahaa hai
aziim makkhii a.Daa rahaa hai
kaliim guTkaa chabaa rahaa hai
to ghanTa-package pe jaane kab se
fahiim gappe.n la.Daa rahaa hai
sabaq musaavaat kaa sikhaane
vaziir gaa.Dii me.n jaa rahaa hai
sanaa nidaa ko na.e latiife sunaa rahii hai
hinaa hathelii ko takte takte puraane raste se aa rahii hai
aur apnii bhaavaj kaa haath thaame
zubaida check-up ko jaa rahii hai
vo apnii nazre.n kabhii idhar ko kabhii adhar ko gumaa rahii hai
magar ko.ii shai use musalsal bulaa rahii rahii hai
ajiib ujlat ajiib vahshat ajiib Gaflat kaa maajraa hai
kahuu.n mai.n kis se mire KHudaayaa ye kaisii KHilqat kaa maajraa hai
ki apnii mastii me.n mast ho kar
ye sab musaafir guzar rahe
na.e musaafir ubhar rahe hai.n
sa.Dak jahaa.n thii vahii.n kha.Dii hai
magar haqiiqat bahut ba.Dii hai
sa.Dak pe billii marii pa.Dii hai

Imran Shamshad Narmi
Nazm

shahr-ashob

ai shahr-e-rasan-basta
kyaa ye tirii manzil hai
kyaa ye tiraa haasil hai
ye kaun saa manzar hai
kuchh bhii to nahii.n khultaa
kyaa teraa muqaddar hai
taqdiir-e-fasiil-e-shahr katba hai ki gul-dasta
ai shahr-e-rasan-basta
ab ko.ii bhii KHvaabo.n par iimaan nahii.n rakhtaa
kis raah pe jaanaa hai kis raah nahii.n jaanaa pahchaan nahii.n rakhtaa
shaa.er ho ki suurat-gar baaGo.n kii charaaGo.n kii bastii ke sajaane kaa saamaan nahii.n rakhtaa
jis samt nazar kiije aa.nkho.n me.n dar aate hai.n aur KHuun rulaate hai.n
yaado.n se bhare daaman laasho.n se bharaa rasta
ai shahr-e-rasan-basta
muddat hu.ii logo.n ko chup maar ga.ii jaise
Thukraa.ii hu.ii KHilqat jiine kii kashaakash me.n jii haar ga.ii jaise
har saa.ns KHajil Thahrii bekaar ga.ii jaise
ab Gam kii hikaayat ho yaa lutf kii baate.n ho.n ko.ii bhii nahii.n rotaa ko.ii bhii nahii.n ha.nstaa
ai shahr-e-rasan-basta

Iftikhar Arif
Nazm

mazdur

apnii KHilqat ko gunaaho.n kii sazaa samjhe hu.e
aadmii hone ko la.anat aur balaa samjhe hu.e

Seemab Akbarabadi
Nazm

KHakam-ba-dahan

mai.n aazim-e-mai-KHaanaa thii kal raat ki dekhaa
ik kuucha-e-pur-shor me.n as.haab-e-tariiqat
the dast o girebaa.n
KHaakam-ba-dahan pech amaamo.n ke khule the
fatvo.n kii vo bochhaa.D ki tabqaat the larzaa.n
dastaan-e-mubaarak me.n thii.n riishaan-e-mubaarak
muu-haa-e-mubaarak the fazaa.o.n me.n pareshaa.n
kahte the vo baaham ki hariifaan-e-siyah-ruu
kuffaar hai.n bad-KHuu
zindiiq hai.n mal.uun hai.n bante hai.n musalmaa.n
haatif ne kahaa ro ke ki ai rab-e-samaavaat!
laa-raib saraasar hai.n bajaa dono.n ke fatvaat
KHilqat hai bahut un ke azaabo.n se hiraasaa.n
ab un kii ho.n amvaat!

Fahmida Riaz
Nazm

diwali

raam ke hijr me.n ik roz bharat ne ye kahaa
qalb-e-muztar ko shab-o-roz nahii.n chain zaraa
dil me.n armaa.n hai ki aa jaa.e.n vatan me.n raghubir
yaad me.n un kii kaleje me.n chubhe hai.n nashtar
ko.ii bhaa.ii se kahe zaKHm-e-jigar bhar de.n miraa
KHaana-e-dil ko ziyaarat se munavvar kar de.n
raam aa.e.n to diye ghii ke jalaa.uu.n ghar ghar
diip-maalaa kaa samaa.n aaj dikhaa.uu.n ghar ghar
teG-e-furqat se jigar paash hu.aa jaataa hai
dil Gam-e-ra.nj se paamaal hu.aa jaataa hai
daaG hai.n mere jale dil pe hazaaro.n laakho.n
Gam ke nashtar jo chale dil pe hazaaro.n laakho.n
kah rahe the ye bharat jabki sirii-raam aa.e
dhuum duniyaa me.n machii nuur ke baadal chhaa.e
arsh tak farsh se jai jai kii sadaa jaatii thii
KHurramii ashk har ik aa.nkh se barsaatii thii
jalva-e-ruKH se hu.aa raam ke aalam raushan
pur umiido.n ke gulo.n se hu.aa sab kaa daaman
mohnii shakl jo raghubir kii nazar aatii thii
aa.nkh taaziim se KHilqat kii jhukii jaatii thii
muddato.n baa'd bharat ne ye nazaara dekhaa
kaamyaabii ke falak par thaa sitaara chamkaa
dil KHushii se kabhii pahluu me.n uchhal pa.Dtaa thaa
ho mubaarak ye kabhii mu.nh se nikal pa.Dtaa thaa
hote raushan hai.n charaaG aaj jahaa.n me.n yaksaa.n
gul hu.aa aaj hii par ek charaaG-e-taabaa.n
hai muraad us se vo bhaarat kaa charaaG-e-raushan
naam hai jis kaa dayaanand jo thaa faKHr-e-vatan
jis dayaanand ne bhaarat kii palaT dii qismat
jis dayaanand ne duniyaa kii badal dii haalat
jis dayaanand ne gulzaar banaa.e ja.ngal
jis dayaanand ne qaumo.n me.n machaa dii halchal
aaj vo hind kaa afsos dulaaraa na rahaa
Gam-nasiibo.n ke liye ko.ii sahaaraa na rahaa
yaad hai us kii zamaane me.n har ik suu jaarii
us kii furqat kii lagii teG jigar par kaarii
dil ye kahtaa hai ki is vaqt zabaane.n khole.n
aa.o mil mil ke dayaanand kii ham jai bole.n

Aaftab Rais Panipati
Nazm

TuT baTuT ne khir pakai

juu.n-hii dastarKHvaan lagaayaa
gaa.nv kaa gaa.nv dau.Daa aaya
saarii KHilqat dau.Dii aa.ii
TuuT baTuuT ne khiir pakaa.ii

Sufi Ghulam Mustafa Tabassum
Nazm

baDe shahar ka KHwab

lamha lamha ulajhte rahe
sachche jhuuTe sapno.n se
ba.De shahar kaa KHvaab liye, har pal nayaa azaab liye
bhaagte rahe tamaam umr, pesh-e-nazar saraab liye
laa-haasilii kaa KHvaab liye
gho.De ke aage ghaas ho jaise
har saa.ns na.ii aas ho jaise
jiine kii uma.ng me.n
marte rahe, marte rahe
jannat paa.nv kii chho.D ke, ThanDak gaa.nv kii chho.D ke
ruuh jaltii rahii tamaam umr, badan kii chitaa me.n
zindagii azaab liye
ba.De shahar kaa KHvaab liye
jalte rahe, tapte rahe, ba.De ban.ne ke firaaq me.n
shortcut lete rahe
raato.n-raat, amiir ban.ne kii taak me.n
ham chalte rahe, chalte rahe
ba.De shahar kii chaah me.n, jaane kaise kaise gunaah kiye
yahaa.n tak ki aa.nkhe.n hamaarii pathraa ga.ii.n, paa.nv hamaare shal hu.e
insaaniyat ham se chhin ga.ii, ham darindo.n ke misl hu.e
KHushiyo.n kii talaash me.n, ham jiite-jii laash hu.e
is qadar behis-o-bad-havaas hu.e, ham KHud se hii udaas hu.e
ba.Daa shahr ba.Daa shahr, ba.Daa shahr ba.Daa shahr
be-iimaaniyo.n kii Dagar, bad-unvaaniyo.n kaa nagar
sach hai terii chaah me.n, jaane kitne tabaah hu.e
saaraa gaa.nv apno.n se KHaalii ho gayaa
maatamii fazaa me.n, ab har taraf hasrat-o-yaas hai
phir bhii ba.De shahar kii pyaas hai ki kabhii bujhtii nahii.n
ek KHilqat hai ki kabhii ruktii nahii.n!
ek hijrat hai ki kabhii ruktii nahii.n!
zindagii kisii se haar jaa.e, ye kabhii mumkin nahii.n
zindagii kisii se maat khaa.e, ye bhii ab mumkin nahii.n
zindagii ruktii nahii.n!!
zindagii jhuktii nahii.n!!

Perwaiz Shaharyar
Nazm

tajdid-e-amal

uTh az-sar-e-nau dahr ke haalaat badal Daal
tadbiir se taqdiir ke din-raat badal Daal
phir dars-e-musaavaat kii haajat hai jahaa.n ko
aaqaa.ii-o-KHidmat ke KHitaabaat badal Daal
kaalaa ho ki goraa ho KHudaa ek hai sab kaa
qaumiyyat-e-bejaa kii rivaayaat badal Daal
chiinii ho ki hindii ho baraabar ke hai.n bhaa.ii
vataniyyat-e-mahduud ke vahmaat badal Daal
kul chhoTe-ba.De aadam-e-KHaakii ke hai.n farzand
har nasl se bezaar ho har zaat badal Daal
aKHlaaq me.n taaqat hai fuzuu.n teG-o-sinaa.n se
paikaar ke ye aahanii aalaat badal Daal
kyaa zulm hai insaan ho insaan kaa dushman
mardaan-e-havas-kaar kii aadaat badal Daal
mehnat se bhii mazduur ko roTii nahii.n miltii
is banda-e-majbuur ke auqaat badal Daal
aapas me.n ye har roz kii KHuu.n-reziyaa.n kab tak
KHud-saaKHta maz.hab kii rusuumaat badal Daal
hurriyat-e-kaamil kaa vo e.ajaaz dikhaa tuu
duniyaa-e-Gulaamii ke tilismaat badal Daal
KHilqat ko bulaa shirk se tauhiid kii jaanib
piiro.n kii faqiiro.n kii karaamaat badal Daal
ta.aliim pe mauquuf hai raanaa.i-e-afkaar
behuuda kitaabo.n kii KHuraafaat badal Daal
kar fikr-e-amal zikr-e-KHat-o-KHaal abas hai
ai 'faiz' zaraa apne KHayaalaat badal Daal

Faiz Ludhianvi
Nazm

safir-e-laila-2

nazar uThaa.o safiir-e-lailaa bure tamaasho.n kaa shahr dekho
ye meraa qarya ye vahshato.n kaa amiin qarya
tumhe.n dikhaa.uu.n
ye sehan-e-masjid thaa yaa.n pe aayat-farosh baiThe du.aa.e.n KHilqat ko bechte the
yahaa.n adaalat thii aur qaazii amaan dete the rahzano.n ko
aur is jagah par vo KHaan-qaahe.n thii.n aab o aatish kii manDiyaa.n thii.n
jahaa.n pe amrad-parast baiThe safaa-e-dil kii namaaze.n pa.Dh kar
KHayaal-e-duniyaa se jaa.n haTaate
safiir-e-lailaa mai.n kyaa bataa.uu.n ki ab to sadiyaa.n guzar chukii hai.n
magar suno ai Gariib-e-saaya ki tum shariifo.n ke raaz-daa.n ho
yahii vo din the mai.n bhuul jaa.uu.n to mujh pe laanat
yahii vo din the safiir-e-lailaa hamaarii bastii me.n chhe taraf se fareb utre
daro.n se aage gharo.n ke biicho.n phir us se chuulho.n kii haa.nDiyo.n me.n
javaan-o-piir-o-zanaan-e-qarya KHushii se raqsaa.n
tamaam raqsaa.n
hujuum-e-tiflaa.n thaa yaa tamaashe the bozno.n ke
ki ko.ii diivaar-o-dar na chho.Daa
vo un pe cha.Dh kar shariif chehro.n kii gardano.n ko phalaa.ngte the
Daraaz-qaamat lahiim baune
razaa-e-baaham se kolhu.o.n me.n jute hu.e the
KHraaste the vo zard Galla to us ke pisne se KHuun bahtaa thaa pattharo.n se
magar na aa.nkhe.n ki dekh paa.ii.n na un kii naake.n ki suu.nghte vo
faqat vo bailo.n kii chakkiyaa.n thii.n saro.n se KHaalii
fareb khaate the KHuun piite the aur niinde.n thii.n bajju.o.n kii
safiir-e-lailaa ye daastaa.n hai isii kha.nDar kii
isii kha.nDar ke tamaash-biino.n fareb-KHurdo.n kii daastaa.n hai
magar suno ajnabii shanaasaa
kabhii na kahnaa ki mai.n ne qarno.n ke faaslo.n ko nahii.n sameTaa
fasiil-e-qarya ke sar pe phe.nkii ga.ii kamande.n nahii.n utaarii.n
tumhe.n dikhaa.uu.n tabaah bastii ke ek jaanib buland Tiila
buland Tiile pe baiThe baiThe havannaqo.n-saa
kabhii to rotaa thaa apnii aa.nkho.n pe haath rakh kar kabhii musalsal mai.n uu.nghtaa thaa
mai.n uu.nghtaa thaa ki saa.ns le luu.n
magar vo chuulho.n pe haa.nDiyo.n me.n fareb pakte
siyaah saa.npo.n kii aisii kaayaa-kalap hu.ii thii ki merii aa.nkho.n pe jam ga.e the
so yaa.n pe baiThaa mai.n aane vaale dhu.e.n kii talKHii bataa rahaa thaa
KHabar ke aa.nsuu bahaa rahaa thaa
magar mai.n tanhaa safiir-e-lailaa
faqat KHayaalo.n kii baadshaahii mirii viraasat
tamaam qarye kaa ek shaa.ir tamaam qarye kaa ik la.ii.n thaa
yahii sabab hai safiir-e-lailaa mai.n yaa.n se niklaa to kaise ghuTno.n ke bal uThaa thaa
nasiib-e-hijrat ko dekhtaa thaa
safar kii saKHtii ko jaantaa thaa
ye sabz qariyo.n se sadiyo.n piichhe kii manzilo.n kaa safar thaa mujh ko
jo gard-e-sahraa me.n lipTe KHaaro.n kii tez noko.n pe jald karnaa thaa aur
vo aisaa safar nahii.n thaa jahaa.n pe saa.e kaa rizq hotaa
jahaa.n havaa.o.n kaa lams miltaa
farishte aavaaz-e-al-amaa.n me.n mire liye hii
ajal kii rahmat ko maa.ngte the
yahii vo lamhe the jab shafaq ke taviil Tiilo.n pe chalte chalte
mai.n dil ke zaKHmo.n ko saath le kar
safar ke parbat se paar utraa

Ali Akbar Natiq
Nazm

meri holi

ik na.ii duniyaa kii KHilqat hai mirii taKH.iil me.n
jo mu.aavin ho sake insaan kii takmiil me.n
ehtimaam-e-zindagii jis me.n ba-taur-e-KHaas ho
aasmaa.n jis kaa mohabbat ho zamii.n iKHlaas ho

Seemab Akbarabadi
Nazm

diwali ki sham

chhup gayaa KHurshiid-e-taabaa.n aa.ii diivaalii kii shaam
har taraf jashn-e-charaaGaa.n kaa hai kaisaa ehtimaam
Dev.Dhiyo.n par shaadyaane aish ke bajne lage
aur ra.ngii.n qumqumo.n se baam-o-dar sajne lage
itr-o-ambar se havaa hai kis qadar mahkii hu.ii
KHushnumaa mahtaabiyo.n se hai fazaa dahkii hu.ii
phuljha.Dii se phuul yuu.n jha.Dte hai.n jaise kahkashaa.n
har taraf phailaa fazaa me.n hai paTaaKHo.n kaa dhu.aa.n
kyaa maze kii aatish-afshaanii hai agnii-baan kii
dekh kar ash-ash kare jis ko nazar insaan kii
hai.n sitaaro.n kii ye la.Diyaa.n yaa charaaGo.n kii qataar
kuucha-o-baazaar ke diivaar-o-dar hai.n nuur-baar
ba.Dh rahaa hai suurat-e-sailaab logo.n kaa hujuum
har dukaa.n par gaahako.n kaa shor-o-Gul hai bil-umuum
raushnii ban kar KHushii har samt hai chhaa.ii hu.ii
ek KHilqat jis ke jalvo.n kii tamaashaa.ii hu.ii

Mohammad Siddiq Muslim
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now