Search result for "be-yaar" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "be-yaar"

Nazm MATCHES FOR "be-yaar"

Nazm

ek lamhe ki dastan

chamak
meraa tasavvur
KHushiyo.n kaa jho.nkaa
lams-e-ruKH-e-gul
raahat-e-shab-e-mahtaab
farhat-e-sub.h-e-bahaar
naGmagii
bhuuk
dard kii kasak
Gam-e-bechaargii azm-e-javaa.n
suurat-haa-e-yaaraan-e-be-yaar
ehsaas-e-silsila-haa-e-makr-o-fareb
naqsh-haa-e-kashmakash-e-marg-o-ziist
karb-e-KHaak-e-hiroshima
idraak-e-rag me.n ye chubhte hu.e laakho.n nashtar
shiddat-e-dard
tuu
mai.n
har ko.ii jo nigah-o-dil me.n aa.e
roTii
atom-bomb
tuu
mai.n
dhu.ndalkaa
lamhe kii maut
ek aur lamhe kii jalvagarii
umr yuu.n hii tamaam hotii hai

Daud Ghazi

Nazm

ek dua

raat se pahle mujhe faisla karnaa hai ko.ii
raat aa.egii to phir saath hii aa jaa.e.nge
saare andeshe mire aur mire vasvase sab
dahrii soche.n mirii
saath tazabzub meraa
raat kaa sehr-o-fusuu.n
mujhe be-yaar-o-madadgaar saa kar Daalegaa
mujhe kar degaa vo kamzor bhii aur buzdil bhii
mire ma.abuud
aaj ke din ko Thahar jaane ke ahkaam sunaa

Shabnam Shakeel

Nazm

sham ka raqs

yak-ba-yak
dhuup niiche girii
jaise chiinii kii ik tashtarii haath KHaamosh saa.at ke aage larazne lagaa
aur kahne se ho.nTo.n ke andar
chhupii barq aa kar chamakne lagii
aashiyaa.n jal gayaa

Aslam Emadi

Nazm

kasila zaiqa

ba-yak-jumbish
mirii aa.nkho.n ko patthar kar diyaa jis ne
vo KHanjar kaash
siine me.n mire paivast ho jaataa

Wali Alam Shaheen

Nazm

safar ke waqt

vo 'jaun' jo nazar aataa hai us kaa zikr nahii.n
tum apne 'jaun' kaa jo tum me.n hai bharam rakhnaa
ajiib baat hai jo tum se kah rahii huu.n mai.n
KHayaal meraa ziyaada aur apnaa kam rakhnaa
ho tum balaa ke baGaavat-pasand talKH-kalaam
KHud apne haq me.n ik aazaar ho ga.e ho tum
tumhaare saare sahaaba ne tum ko chho.D diyaa
mujhe qalaq hai ki be-yaar ho ga.e ho tum

Jaun Eliya

Nazm

jawahar-lal nehru

yak-ba-yak kyaa hu.aa
Gam kii chhaa.ii ghaTaa
desh rone lagaa
amn kaa devtaa
raah me.n kho gayaa

Takmiil Rizvi Lakhnavi

Nazm

ba-yaad-e-aKHtar shirani

fazaa-e-ishq ko maatam-gusaar chho.D gayaa
jahaa.n me.n naqsh-e-vafaa yaadgaar chho.D gayaa

Nayyar Wasti

Nazm

ba-yaad-e-jigar

har taraf thii tirii pukaar jigar
har jagah thaa tuu naGma-baar jigar
umr bhar to tujhe qaraar na thaa
aaKHirash aa gayaa qaraar jigar
suunii suunii sii hai har ik mahfil
uj.Dii uj.Dii sii hai bahaar jigar
jab mohabbat kaa zikr aa.egaa
aa.egaa yaad baar-baar jigar
rashk karte the phuul gulshan me.n
tujh ko kaa.nTo.n se thaa vo pyaar jigar
shaa.erii tujh pe naaz kartii thii
aur tuu us pe thaa nisaar jigar
be-KHudii tujh ko zeb detii thii
thaa KHudii kaa tuu raazdaar jigar
har adaa terii ehtiraam-talab
har Gazal terii shaahkaar jigar
tujh se sher-o-adab kii azmat thii
har jagah tuu thaa baa-vaqaar jigar
shaGl-e-mai bhii tiraa misaalii thaa
azm-e-tauba bhii yaadgaar jigar
kis ko rote hai.n jaam-o-paimaana
allah allah tiraa vaqaar jigar
allah allaah terii haq-go.ii
tujh pe rahmat hazaar baar jigar
tere dil me.n thaa vo Gam-e-insaa.n
jis kii har samt hai pukaar jigar
har dukhii dil kii tarjumaanii kii
thaa sabhii kaa tuu Gam-gusaar jigar
nasl-o-qaum-o-vatan ke hangaame
the bahut tujh ko naagavaar jigar
tere paiGaam tak na pahu.nche jo
vo siyaasat hai KHaam-kaar jigar
chhuu ga.e the jinhe.n qadam tere
raaste hai.n vo yaadgaar jigar
sho.ala-e-tuur aatish-e-gul hai.n
laakh firdaus darkinaar jigar
allah allah vo azm-e-haj teraa
rahmat-e-haq se ham-kanaar jigar
aur vo na.at-e-pur-KHuluus tirii
vo tirii ruuh kii pukaar 'jigar'
sharm-e-isyaa.n dil-e-tapiida par
vo bharosa vo inhisaar jigar
vo lataafat ki diida-o-dil kaa
gosha gosha hai pur-bahaar jigar
vo jagah bhii hai pyaar ke qaabil
jis jagah hai tiraa mazaar jigar
bhuul saktaa nahii.n tujhe ko.ii
yuu.n to shaa.ir hai.n be-shumaar jigar

Mustafa Rahi

Nazm

ba-yaad-e-mahrum

ho kar vo rahaa arsh ki jo thaa maqsuum
har qalb hai is vaqt haziin-o-maGmuum
marhuum ko Dhuu.nDte hai.n duniyaa vaale
marhuum se ho ga.ii hai duniyaa mahruum

Arsh Malsiyani

Nazm

zindan ki ek sham

shaam ke pech-o-KHam sitaaro.n se
ziina ziina utar rahii hai raat
yuu.n sabaa paas se guzartii hai
jaise kah dii kisii ne pyaar kii baat
sehn-e-zindaa.n ke be-vatan ashjaar
sar-niguu.n mahv hai.n banaane me.n
daaman-e-aasmaa.n pe naqsh-o-nigaar
shaana-e-baam par damaktaa hai
mehrbaa.n chaa.ndnii kaa dast-e-jamiil
KHaak me.n ghul ga.ii hai aab-e-nujuum
nuur me.n ghul gayaa hai arsh kaa niil
sabz gosho.n me.n niil-guu.n saa.e
lahlahaate hai.n jis tarah dil me.n
mauj-e-dard-e-firaaq-e-yaar aa.e

Faiz Ahmad Faiz

Nazm

chal yar chalen

chal yaar chale.n alfaaz kii duniyaa se baahar
jahaa.n KHaamoshii ke Dere ho.n
jahaa.n lab par chup ke taale huu.n
jahaa.n aa.nkh zabaa.n kaa kaam kare
jahaa.n a.ng.Daa.ii me.n baate.n ho.n
jahaa.n harf faqat be-ma.anii ho.n
jahaa.n ishq kaa rang ruuhaanii ho
jahaa.n ruuhe.n jism tabdiil kare.n
jahaa.n ghanghor ghaTaa ho saavan kii
jahaa.n bhaado.n barkhaa chhaatii ho
jahaa.n nahre.n ruup kii bahtii ho.n
jahaa.n ThanDii dhuup kii chaadar ho
jahaa.n husn ho taKHt-nashii.n sanam
chal yaar chale.n us paar chale.n
ye duniyaa ab nahii.n raas hame.n

Amin Kunjahi

Nazm

be-niyazi

yaar hamaarii fikr na karnaa
apnii socho

Mahrukh Ali Mahi

Nazm

ek shikwa

mai.n Gam-e-jahaa.n se ghabraa ke bas itnaa chaahtaa thaa
ko.ii chaaraagar na hotaa ko.ii Gam-gusaar hotaa
miraa haal-e-zaar sun kar kisii dil ko rahm aataa
mirii be-qaraariyo.n par ko.ii be-qaraar hotaa
jo zaraa sii der ko bhii mai.n judaa kisii se rahtaa
to zaraa sii der me.n bhii miraa intizaar hotaa
idhar apnii kaamyaabii se ye hotii merii haalat
Gam-e-hijr to na hotaa Gam-e-vasl-e-yaar hotaa
magar is ko kyaa karuu.n mai.n ki nasiib me.n likhaa thaa
tire baKHt-e-bad na hote to tujhe qaraar hotaa

Jaleel Qidwai

Nazm

dildar dekhna

tuufaa.n ba-dil hai har ko.ii dildaar dekhnaa
gul ho na jaa.e mish.al-e-ruKHsaar dekhnaa
aatish ba-jaa.n hai har ko.ii sarkaar dekhnaa
lau de uThe na turra-e-tarraar dekhnaa
jazb-e-musaafiraan-e-rah-e-yaar dekhnaa
sar dekhnaa, na sa.ng, na diivaar dekhnaa
kuu-e-jafaa me.n qaht-e-KHariidaar dekhnaa
ham aa ga.e to garmi-e-baazaar dekhnaa
us dil-navaaz shahr ke atvaar dekhnaa
be iltifaat bolnaa, bezaar dekhnaa
KHaalii hai.n garche masnad o mimbar, niguu.n hai KHalq
ro.ab-e-qabaa o haibat-e-dastaar dekhnaa
jab tak nasiib thaa tiraa diidaar dekhnaa
jis samt dekhnaa, gul-o-gulzaar dekhnaa
phir ham tamiiz-e-roz-o-mah-o-saal kar sake.n
ai yaad-e-yaar phir idhar ik baar dekhnaa

Faiz Ahmad Faiz

Nazm

marg-e-soz-e-mohabbat

aa.o ki marg-e-soz-e-mohabbat manaa.e.n ham
aa.o ki husn-e-maah se dil ko jalaa.e.n ham
KHush huu.n firaaq-e-qaamat-o-ruKHsaar-e-yaar se
sarv-o-gul-o-saman se nazar ko sataa.e.n ham
viiraanii-e-hayaat ko viiraan-tar kare.n
le naaseh aaj teraa kahaa maan jaa.e.n ham
phir oT le ke daaman-e-abr-e-bahaar kii
dil ko manaa.e.n ham kabhii aa.nsuu bahaa.e.n ham
suljhaa.e.n be-dilii se ye uljhe hu.e savaal
vaa.n jaa.e.n yaa na jaa.e.n na jaa.e.n ki jaa.e.n ham
phir dil ko paas-e-zabt kii talqiin kar chuke.n
aur imtihaan-e-zabt se phir jii churaa.ii.n ham
aa.o ki aaj KHatm hu.ii daastaan-e-ishq
ab KHatm-e-aashiqii ke fasaane sunaa.e.n ham

Faiz Ahmad Faiz

Nazm

tapish-e-ishq ya tir ki garmi

jis kisii ne in dino.n ko.ii davaa iijaad kii
bas ye samjho us ne ik bastii na.ii aabaad kii
pho.D kar sar jail me.n be-chaara majnuu.n mar gayaa
aur sadaa.e.n har taraf hai.n yaar zindabaad kii
kyaa bataa.uu.n ai tabiibo ishq kii tum ko tapish
bas samajh lo jaise garmii tiir aur KHurdaad kii
liijiye aa.e hai.n majnuu.n mujh ko dene dars-e-ishq
aap kii suurat to dekho hat tire ustaad kii
qarz to be-shak liyaa par ham ne kis kis se liyaa
yaad kuchh aataa nahii.n ye kaifiyat hai yaad kii
qais aaKHir mar gayaa soz-e-daruun-e-ishq se
khaa ga.ii afsos us paude ko garmii khaad kii
dekhnaa aaKHir sar-e-baazaar rusvaa kar diyaa
roz vaa.iz tum du.aa maa.ngaa karo aulaad kii
maadar-e-giitii ne 'ismat' kuchh mirii parvaa na kii
saas kartii hai KHushaamad kahte hai.n daamaad kii

ismatullah ismat beg

Nazm

kahan hai aa ja

raahat-e-banda-e-be-daam kahaa.n hai aa jaa
paikar-e-husn sar-e-baam kahaa.n hai aa jaa
raunaq-e-bazm hai o jaam kahaa.n hai aa jaa
ziinat-e-jalva-gah-e-aam kahaa.n hai aa jaa
ai umiid-e-dil-e-naa-kaam kahaa.n hai aa jaa
terii furqat KHalal-andaaz-e-sukuun-e-paiham
terii furqat dil-e-maayuus pe ik turfa sitam
terii furqat sabab-e-kaavish-o-bedaarii-e-Gam
tuu nahii.n hai to phir aaraam kahaa.n hai aa jaa
shaahid-e-aur-e-siyah-baKHt o shab-e-taar huu.n mai.n
KHuugar-e-naala-e-lazzat-kash-e-aavaaz huu.n mai.n
daam-e-tuufaan-e-havaadis me.n giraftaar huu.n mai.n
roz-o-shab muntazir-e-diid-e-ruKH-e-yaar huu.n mai.n
dil hai vaqf-e-Gam-e-aalaam kahaa.n hai aa jaa
sho.ala-e-bar-kaf-e-gul daaG-e-jigar tere baGair
KHaar-bardosh hai daamaan-e-nazar tere baGair
KHuu.n-fishaa.n hai shab-e-Gam diida-e-tar tere baGair
chalan aataa hii nahii.n shaam-o-sahar tere baGair
muntazir huu.n sahar-o-shaam kahaa.n hai aa jaa
daur-e-taariikii-e-Gam se shab-e-tanhaa.ii se
dam-ba-dam josh-e-junuu.n kii sitam-aaraa.ii se
ka.aba-o-dair-o-kaliisaa kii jabii.n-saa.ii se
KHauf-e-majbuurii-o-naakaamii-o-rusvaa.ii se
ishq hai larza-bar-andaam kahaa.n hai aa jaa
muntashir hone lagii anjuman-e-naaz-e-hayaat
ban gayaa KHvaab har ik manzar-e-aaGaaz-e-hayaat
dam-shikasta saa nazar aane lagaa saaz-e-hayaat
ab ko.ii dam me.n hu.aa jaataa hai vaa raaz-e-hayaat
aa gayaa naza.a kaa ha.ngaam kahaa.n hai aa jaa

Shakeel Badayuni

Nazm

ai ruKH-e-yar idhar dekh zara

ham ki vaamaandagi-e-shauq kaa lamha le kar
aa ga.e hai.n tire paikar ke ujaalo.n ke qariib
kitnii sadiyo.n kii masaafat le kar
ek darmaa.nda tahii-dast musaafir kii tarah
aa ke Thahre hai.n tire pyaar ke bargad niiche
ham ki mas.huur tilismaat-kade hai.n tere
terii aa.nkho.n tere ho.nTo.n terii zulfo.n ke asiir
terii tamannaa ke faqiir
muntazir hai.n ki tire jism kaa partav ubhre
aur raushan ho.n taKHayyul kii vo raahe.n jin par
kab se phailii hu.ii gumnaam sii taariikii hai
yuu.n simaT jaa.e mire baKHt pe utrii hu.ii raat
nuur chhan kar tire paikar kii tunuk-taabii se
merii be-nuur sii duniyaa ko munavvar kar de
mere KHvaabo.n ko haqiiqat kar de
ai ruKH-e-yaar idhar dekh zaraa
mere dil-daar idhar dekh zaraa
jis kaa ik umr tamannaa.ii rahaa
apne gul-rang se jalvo.n ke tufail
mujh ko vo kaif vo ra.anaa.ii de
ek be-naam se rishte ko paziiraa.ii de
ab to ik lams-e-masiihaa.ii de
ham ko ai jaan-e-jahaa.n itnii ijaazat de de
jis gha.Dii shaam Dhale
terii gesuu kii tarah shab kii hasii.n zulf khule
tere aa.nchal kaa kinaara le kar
ek be-naam sahaaraa le kar
apnii betaab tamannaa.o.n kii girhe.n khole.n
tere zaanuu pe ye sar rakh ke
do aa.nsuu ro le.n

Salman Basit

Nazm

tauq-o-dar ka mausam

KHushaa nazaara-e-ruKHsaar-e-yaar kii saa.at
KHushaa qaraar-e-dil-e-be-qaraar kaa mausam

Faiz Ahmad Faiz

Nazm

aah be-tasir

abhii ham aah-e-be-taasiir kii taasiir dekhe.nge
abhii taqdiir se uljhii hu.ii tadbiir dekhe.nge
bahut dushvaar hai daaman chhu.Daa kar yuu.n nikal jaanaa
qayaamat tak vo merii KHaak daaman-giir dekhe.nge
tire gesuu ke saudaa.ii tirii zulfo.n ke diivaane
sahar tak KHvaab me.n u.Dtii hu.ii zanjiir dekhe.nge
hamaare saamne tum ho tumhaare saamne ham hai.n
na dekhii thii na dekhii hai na ye tasviir dekhe.nge
hamaarii KHaak u.D kar aastaan-e-yaar tak pahu.nche
kabhii aisii bhii gardish gardish-e-taqdiir dekhe.nge
agar fursat milii ham ko zamaane kii kashaakash se
tujhe bhii ek din ai aah-e-pur-taasiir dekhe.nge

Sakeena Mahmood

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now