Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "bhugatnaa"

Nazm MATCHES FOR "bhugatnaa"

Nazm

daraKHt-e-zard

magar naazir hamaaraa soKHta-sulb aaKHirii nassaab ab marne hii vaalaa hai
bas ik pal haf sadii kaa faisla karne hii vaalaa hai
suno 'zaryuun' bas tum hii suno ya.anii faqat tum hii
vahii raahat me.n hai jo aam se hone ko apnaa le
kabhii ko.ii bhii par ho ko.ii 'bahman' yaar yaa 'zenuu'
tumhe.n bahkaa na paa.e aur bairuunii na kar Daale
mai.n saarii zindagii ke dukh bhugat kar tum se kahtaa huu.n
bahut dukh degii tum me.n fikr aur fan kii numuu mujh ko
tumhaare vaaste behad sahuulat chaahtaa huu.n mai.n
davaam-e-jahl o haal-e-istiraahat chaahtaa huu.n mai.n
na dekho kaash tum vo KHvaab jo dekhaa kiyaa huu.n mai.n
vo saare KHvaab the qassaab jo dekhaa kiyaa huu.n mai.n
KHaraash-e-dil se tum be-rishta be-maqduur hii Thahro
mire jahmiim-e-zaat-e-zaat se tum duur hii Thahro
ko.ii 'zaryuun' ko.ii bhii clerk aur ko.ii kaarinda
ko.ii bhii bank kaa afsar senator ko.ii paavanda
har ik haivaan-e-sarkaarii ko TaTTuu jaantaa huu.n mai.n
so zaahir hai ise shai se ziyaada maantaa huu.n mai.n
tumhe.n ho sub.h-dam taufiiq bas aKHbaar pa.Dhne kii
tumhe.n ai kaash biimaarii na ho diivaar pa.Dhne kii
ajab hai 'sartre' aur 'ressel' bhii aKHbaar pa.Dhte the
vo maaluumaat ke maidaan ke shauqiin buu.Dhe the
nahii.n ma.aluum mujh ko aam shahrii kaise hote hai.n
vo kaise apnaa banjar naam banjar-pan me.n bote hai.n
mai.n ''urr'' se aaj tak ik aam shahrii ho nahii.n paayaa
isii baa.is mai.n huu.n amboh kii lazzat se be-maaya
magar tum ik do-paaya raast qaamat ho ke dikhlaanaa
suno raa.e-dahinda bin hu.e tum baaz mat aanaa
faqat 'zaryuun' ho tum ya.anii apnaa saabiqaa chho.Do
faqat 'zaryuun' ho tum ya.anii apnaa laahiqaa chho.Do
magar mai.n kaun jo chaahuu.n tumhaare baab me.n kuchh bhii
bhalaa kyuu.n ho mire ehsaas ke asbaab me.n kuchh bhii
tumhaaraa baap ya.anii mai.n abas mai.n ik abas-tar mai.n
magar mai.n ya.anii jaane kaun achchhaa mai.n saraasar mai.n
mai.n kaasa-baaz o kiina-saaz o kaasa-tan huu.n kuttaa huu.n
mai.n ik na.ngiin-e-buudash huu.n pa tum to sirr-e-mun.am ho
tumhaaraa baap ruuhul-quds thaa tum ibn-e-maryam ho

Jaun Eliya
Nazm

bachchon ki tauba

ham ne bakrii ke bachcho.n ko kamro.n me.n nachaanaa chho.D diyaa
naaraaz na ho ammii ham ne har shauq puraanaa chho.D diyaa
daddy ke suiT pahan kar ham sofo.n par dance nahii.n karte
saare ghar kii buniyaado.n ko ab ham ne hilaanaa chho.D diyaa
daadaa abbaa kaa ab chashma bakre ko nahii.n pahnaate ham
naanaa abbaa kii laThiyaa ab ham ne chhupaanaa chho.D diyaa
bandar ko sehraa baa.ndh ke ham duulhaa na banaa.e.nge ammii
ab ghuu.nghaT kaa.Dh bandariyaa ko Dolii me.n biThaanaa chho.D diyaa
nadiyaa ke gahre paanii me.n khaa.e na ka.ii din se Gote
ghar hii me.n pa.De ab sa.Dte hai.n nadiyaa pe nahaanaa chho.D diyaa
ab sabr ke miiThe phal aahe.n bhar bhar kar khaate hai.n
maalan ko banaa baiThe KHaala maalii ko rulaanaa chho.D diyaa
ghar me.n baiThe saadhuu ban kar ab ilm kii maalaa japte hai.n
KHargosho.n ke piichhe jangal me.n kutto.n ko bhagaana chho.D diyaa
pinjro.n me.n band jo rahtii thii.n vo phir se u.Daa de.n sab chi.Diyaa.n
murGo.n me.n sulh karaate hai.n murGo.n ko la.Daanaa chho.D diyaa
ab ham ne kabhii khaanaa khaa kar kap.Do.n se haath nahii.n po.nchhe
dekho ka.ii din se dhobii ne ronaa chillaanaa chho.D diyaa
har ek baGaavat chho.Dii hai har ek sharaarat ruKHsat hai
ab ghar me.n farishte aate hai.n shaitaan ne aanaa chho.D diyaa
ham se phir bhii naaraaz ho kyo.n kyaa tum sautelii ammii ho
apne in pyaare bachcho.n ko ab mu.nh bhii lagaanaa chho.D diyaa
jin aa.nkho.n me.n roz sharaarat thii in aa.nkho.n me.n aa.nsuu ab dekho
in aap kii pyaarii aa.nkho.n ko ab ham ne rulaanaa chho.D diyaa
hai ghar kii fazaa sahmii sahmii Gamgiin hai.n bachcho.n ke chehre
kab ha.ns ke kahuu.ngii ai bachcho kyo.n ham ko sataanaa chho.D diyaa

Raja Mehdi Ali Khan
Nazm

ek manzum KHat

KHud-kushii kar rahe ho
karo
note bhii likh ke jaa.oge
vo bhii likho
haa.n magar ik ba.Daa mas.ala hai
ki jaldii me.n likkhe hu.e note me.n
tum jo bachpan se ab tak bhugat aa.e ho
sab nahii.n aa.egaa

Shoaib Kiani
Nazm

jashn-e-azadi

chaaval aur gandum na kuchh faulaad paidaa kiijiye
nisf darjan kam se kam aulaad paidaa kiijiye
mas.ale phir aap laa-ta.adaad paidaa kiijiye
maahir-e-mansuuba-ba.ndii ko bhagaanaa chaahiye
dosto! yuu.n jashn-e-aazaadii manaanaa chaahiye?

Sarfaraz Shahid
Nazm

tumhaare liye meri aaKHiri nazm

bichha.Dte rasto
kisii ke naqsh-e-qadam pe likkhii
mohabbato.n kaa KHayaal karnaa
kabhii a.ndhere me.n dhuup nikle to
chaa.ndnii se savaal karnaa
vo aadmii jo havaa se KHushbuu nithaar letaa thaa
ab kahaa.n hai
dhue.n ko vaapas jo sho.alagii me.n utaar letaa thaa
ab kahaa.n hai
vo apnii vahshat ke bal pe zinda
vafaa ke mausam kaa ik parinda
jo dil ke pinjre me.n be-gunaahii bhugat rahaa hai
sukuu.n na aa.e to us se milnaa
kabhii mohabbat me.n Garq ho kar
vo apnii nazro.n se dekhtaa hai
dilo.n ko duniyaa se farq ho kar

Ikram Basra
Nazm

telewision

television ahd-e-haazir kaa ik aflaatuun hai
lag gayaa hai jo hamaare mu.nh ko ye vo KHuun hai
is tarah television kaa har drama ho gayaa
jaise laazim shervaanii par pajaama ho gayaa
ishtihaar is tarah laazim hai KHabar-naame ke ba.ad
jaise ful-stop kii maujuudgii comme ke ba.ad
ik Daraama nashr hotaa hai jo aadhii raat me.n
vo bahut maqbuul hai is ahd ke jinnaat me.n
jis jagah Time bachaa tho.Daa saa gaanaa de diyaa
raat ke baara-baje qaumii taraana de diyaa
mahfil-e-she.arii ko aadhii raat me.n bhugtaa diyaa
bhairvii.n kaa raag paune-nau-baje chipkaa diyaa
aaj phir fannii KHaraabii ho ga.ii do-chaar baar
intizaar o intizaar o intizaar o intizaar
television ho gayaa sa.ngiin biivii kii tarah
aur biivii ho ga.ii ra.ngiin T.V kii tarah

Khalid Irfan
Nazm

waqt ki ret pe

vaqt kii ret pe suuraj ne lahuu thuukaa phir
saa.ate.n ko.Daa ke daaGo.n me.n nahaa kar niklii.n
machhliyaa.n lams ke haatho.n me.n gha.Dii bhar na rukii.n
haDDiyaa.n KHvaab ke kutto.n ne chabaa.ii.n shab bhar
hijrate.n apne muqaddar me.n lahuu-chehra hai.n
kaun KHamyaaza bhugatne kii salaaKHe.n chaaTe
kaun zanjiir ke halqo.n me.n samundar baa.ndhe
kaun lafzo.n ke mazaaro.n pe na.e phuul rakhe
kaun saayo.n ko talaashe yahaa.n qindiil liye
abrha ka.aba kii diivaar ke saa.e me.n jale
kaa.nch kii chuu.Diyaa.n bajtii hai.n lahuu kii tah me.n

Adil Mansuri
Nazm

aaram hai hamara

uThe jo fitna-e-taaza use dabaanaa hai
sitam-taraaz ko maidaan se bhagaana hai
abhii to hamle kaa badla tujhe chukaanaa hai
na laa zabaan pe aaraam kaa tuu naam abhii
muhaafiz-e-vatan aaraam hai haraam abhii

Qais Jalandhari
Nazm

salamat sabucha tera saqiya

qalam ko bachaa
harf-e-haq kii sazaa
bhugatne kii KHaatir sadaa
saaqiyaa
salaamat sabuucha tiraa

Shafiq Fatima Shera
Nazm

chah-e-babil

vo jo chaah-e-baabil me.n
baalo.n kii Dorii par
laTak laTak kar
sazaa-e-umr-e-daraaz
bhugat rahe hai.n
un se puuchho
husn-o-shabaab kaa nasha kyaa hai
un se puuchho
barbat-o-naahiid
raqs-o-suruur kyaa hai
un se puuchho
shab-e-aish-o-nishaat kyaa hai
in be-chaaro.n se kyaa puuchhte ho
jo naa-karda gunaaho.n kii hasrat liye
sazaa-e-umr-e-tamaam
bhugat rahe hai.n

Ashraf Rafi
Nazm

maqam-e-saKHt par nigah

mai.n ek musht-e-be-zarar
KHud apne KHaandaa.n ke makr ko bhugat chukaa
barat chukaa huu.n
apne aaKHirii kariim saa.ns ko
nigal chukaa
siyah dino.n kii dhuul mai.n
uThaa chukaa
ahaata-e-vujuud se
uge hazaar rang ke hazaar phuul mai.n
nahii.n tyaagnaa nahii.n
vujuud apnaa mai.n ne is tarah
mai.n apnii raakh apne haath se nahii.n u.Daa.uu.ngaa
kha.De rahe.nge log
yuu.nhii saf-ba-saf
kisii ke haath mai.n na aa.uu.ngaa
kafan ko o.Dh kar ba.Dhaa hu.aa huu.n mai.n
kafan ko o.Dh kar nahii.n maruu.ngaa mai.n
kisii ke qutb-e-munjamid me.n
apne aap ko nahii.n hai gaalnaa mujhe
jo asl sat hai asl zar hai
biich me.n kahii.n chamaktii ret kii tarah pa.Daa hu.aa
nahii.n nikaalnaa mujhe

Iqtidar Javed
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now