Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "biga.dte"

Nazm MATCHES FOR "biga.dte"

Nazm

hasan kuza-gar (1)

jahaa.n-zaad me.n aaj terii galii me.n
yahaa.n raat kii sard-guu.n tiirgii me.n
tire dar ke aage kha.Daa huu.n
sar-o-muu pareshaa.n
dariiche se vo qaaf kii sii tilismii nigaahe.n
mujhe aaj phir jhaa.nktii hai.n
zamaana, jahaa.n-zaad vo chaak hai jis pe miina-o-jaam-o-subuu
aur faanuus-o-gul-daa.n
ke maanind bante biga.Dte hai.n insaa.n
mai.n insaa.n huu.n lekin
ye nau saal jo Gam ke qaalib me.n guzre!
hasan kuuza-gar aaj ik toda-e-KHaak hai jism
me.n nam kaa asar tak nahii.n hai
jahaa.n-zaad baazaar me.n sub.h attaar-yuusuf
kii dukkaan par terii aa.nkhe.n
phir ik baar kuchh kah ga.ii hai.n
un aa.nkho.n kii taabinda shoKHii
se uTThii hai phir toda-e-KHaak me.n nam kii halkii sii larzish
yahii shaayad us KHaak ko gil banaa de!

Noon Meem Rashid
Nazm

jahan zad

ye masaafat ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai nigaahe.n uThaa
dekh to mai.n jahaa.n zaad terii tire saamne huu.n
magar tuu ne sach hii kahaa thaa
zamaana jahaa.n zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n

Ishrat Afreen
Nazm

gham-gusari

dost maayuus na ho
silsile bante biga.Dte hii rahe hai.n akasr

Ahmad Rahi
Nazm

qaid-e-azam

aadam kii taariiKH ke siine me.n Duube hai.n
kitne suuraj kitne chaa.nd
kaise kaise rang the miTTii se phuuTe
mauj havaa ke bante aur biga.Dte rasto.n me.n Thahre
aur KHaak hu.e
niile aur athaah samundar ke ho.nTo.n kii pyaas bane
aane vaale din kii aa.nkho.n me.n lahraatii aas bane
kaise kaise rang the jo miTTii se chamke
aur chamak kar pa.D ga.e maa.nd

Amjad Islam Amjad
Nazm

mahbuba ke liye aaKHiri nazm

pahle jitnii baate.n thii.n vo tum se thii.n
tere hii naam kii ek radiif se saare qaafiye
bante aur biga.Dte the
mai.n apne andhe haatho.n se
tere jism ke pur-asraar zamaano.n kii tahriire.n pa.Dh letaa thaa
aur phir achchhii achchhii nazme.n gha.D letaa thaa
tuu bhii to kaaGaz ke phuulo.n kii maanind
har mausam me.n khil jaatii thii
or mai.n hijr-o-visaal kii KHushkii aur tarii par
tere liye har haal me.n zinda rah letaa thaa
apne liye bhii terii taraf se
saarii baate.n kah letaa thaa
terii suurat mere hone aur na hone
jaagne sone kii is dhuup aur chhaa.nv me.n
ek hii jaisii rahtii thii
aur merii saa.nso.n kaa baKHt tumhaare hii palluu se ba.ndhaa thaa
lekin ab to terii saa.Dii ke sab lahariye
mere jism ko Das bhii chuke hai.n
ab to jaa.o
merii puraanii nazmo.n kii almaarii me.n aaraam se jaa kar so jaa.o
kyuu.nki mai.n ab apne aap se baate.n karnaa chaahtaa huu.n

Sarmad Sahbai
Nazm

mohabbat

tumhe.n july kii unniisvii.n taptii jhulastii dopahar ab yaad kab hogii
ki jis kii hiddate.n kitne mahiino.n baa'd tak
ham ne badan ke har dariiche par likhii mahsuus kii thii.n
aur unhe.n nazme.n samajh kar gungunaayaa thaa
tumhaare jism kii pagDanDiyo.n par chalte chalte ek aisaa mo.D aayaa thaa
jahaa.n auhaam ilhaamii nazar aate hai.n
aur imkaan naakaamii mohabbat zabt aavaaze.n samundar dard ban jaate hai.n
saare KHvaab palko.n kii harii shaaKHo.n se jhuule lene lagte hai.n
simaT aate hai.n saare hijr aa.nkho.n me.n
vahii.n us mo.D par pahlii dafa mai.n ne ye samjhaa
ruuh maadda hai
ki is kii ik kamiiyyat hai hajm hai bojh rakhtii hai
aur us kaa bhii badan hotaa hai
jis me.n nanhe nanhe aa.iine yaaquut ke maanind bante aur biga.Dte hai.n

Atif tauqeer
Nazm

ye teri aankhen

behad KHuubsuurat hai.n ye terii aa.nkhe.n
pal rahe hai.n in me.n Dhero.n KHvaab
kuchh TuuTte hai.n TuuT kar kuchh na.e bante hai.n
ik ajab saa nuur hai in bante biga.Dte KHvaabo.n me.n
ye terii aa.nkhe.n hai.n yaa hai puurii kahkashaa.n

Utkarsh Musafir
Nazm

tumhaari manzil kahin nahin hai

ki jo banaane kii aarzuu me.n bigaa.Dte hai.n
vo haath hii bebasii ke pinjre me.n band hai.n
un udaas rasto.n pe chalne vaalo
mujhe bhii hamraah le ke chalnaa
ki mai.n akelaa kahaa.n rahuu.ngaa

Fayyaz tahseen
Nazm

jahan-zad

ai hasan-kuuzaa-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar
is rifaaqat kii dahliiz tak aa.ii huu.n
ai hasan kaash tuu jaan saktaa
ki is sahn-e-KHaana se dahliiz tak ke safar me.n
jahaa.n-zaad ko kyo.n zamaane lage hai.n
hasan
is safar me.n jahaa.n-zaad ko ek ik gaam par
vaqt ke taaziyaane lage hai.n
hasan
vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khilaa hai
havaa se vo ha.ns kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai
magar dekh mujh ko
ki mai.n ne yahaa.n Thiik nau saal tak
phuul kaa.Dhe hai.n KHvaabo.n ke bistar pe lekin
abhii tak ko.ii in pe soyaa nahii.n
phuul taaza shagufta aur aazurda hai.n
mai.n ne nau saal suurat-garii kii hai tere har ik lams kii
raat bhar mai.n ne aa.nkhe.n bhigo.ii hai.n kuuzo.n me.n aur sub.h-dam
halq ko tar kiyaa aa.nsu.o.n se bahut
ye masaafat
ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai
nigaahe.n uThaa
dekh to mai.n jahaa.n-zaad terii tire saamne huu.n
magar tuu ne sach hii kahaa thaa
zamaana jahaa.n-zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n
so ab ham jo sadiyo.n kii lambii masaafat se lauTe hai.n
tuu apne ranjuur kuuzo.n me.n juujhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakkhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mire aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mire aur tire darmiyaa.n nau baras jis ne laa kar bichhaa.e
ye nau saal kis tarh mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras
jo mire aur tire darmiyaa.n vaqt kii kirchiyaa.n hai.n
zamaana bhii kaisii 'ajab kahkashaa.n hai
ye duniyaa-e-sayyaargaa.n hai ki jis me.n
hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu
sau tarah guftuguu kii
zihaanat ke putle mohabbat ke KHaaliq
faqat ye bataa de
ki tere 'anaasir ke ajzaa-e-tarkiibii me.n
vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n
aur haqiiqat me.n ko.ii nahii.n thaa
tiraa vaahima
mere lab mere gesuu se lipTaa rahaa thaa
labiib ek saayaa
jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii
hasan mai.n tire saamne aa.ina thii
tire hijr aur vasl kaa aa.ina
inhimaak-o-ta'alluq kii miTTii se guu.ndhe hu.e jism ko
terii aa.nkho.n kii hiddat ne chamkaayaa thaa
terii KHalvat kii hairat ne vo rang-o-roGan kiye the
ki aa.iine shashdar kha.De rah ga.e the
magar terii KHalvat kii hairat me.n vahshat kaa jo shaa.iba thaa
nigaaho.n se merii kahaa.n chhup sakaa thaa
mire aur tire darmiyaa.n vasl kii har gha.Dii me.n
na jaane kahaa.n se
vahii soKHta-baKHt terii
ki jo jaa.n-fishaanii ke sho'lo.n se dahke hu.e
zindagii ke abad-taab tannuur par
u.ngliyaa.n tere bachcho.n kii thaame kha.Dii
bhuuk se barsar-e-jang thii
jis ke nazdiik ye
tere kuuze tiraa fan tirii aag sab
merii aa.nkhe.n mire phuul aur KHvaab sab
zindagii ke abad-taab tannuur kii raakh the
terii is soKHta-baKHt ko kyaa KHabar
jab zamii.n apne mehvar kii tajdiid me.n
harf-e-laa se guzar jaa.egii
to hazaaro.n baras baa'd bhii
ye azal ke gharo.ndo.n kii miTTii me.n madfuun
phuul aur buuTe ye kuuze
aur un me.n unhii qaaf aa.nkho.n se chhalke hu.e
surKH paanii kii talchhaT
kisii kuuza-gar ke javaa.n lams se jii uThe to
jahaa.n-zaad us ke liye phir janam legii
aur nau baras raqs karte guzar jaa.e.nge
terii is soKHta-baKHt ko kyaa KHabar
vo raat
vo halab kii kaarvaa.n-saraa kaa hauz
jis ko mai.n ne jism-o-jaa.n kii KHushbu.e.n kashiid kar ke
qatra-qatra nau baras me.n aa.nsu.o.n se pur kiyaa
vo ek raat sirf ek raat me.n
tamaam KHushk ho gayaa
ham apne vasl kii tamaazato.n me.n aise jal-bujhe
ki raakh tak nahii.n bachii
ye ek jaa.n kii tishnagii
mujhe tujhe ba-yak-zamaa.n
bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii 'aurate.n jahaan-zaad
aisii uljhane.n hai.n jin ko aaj tak ko.ii nahii.n suljhaa sakaa
ki 'aurato.n kii saaKHt hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud-e-niil
is zamii.n kii god me.n
azal ke harf-giir taabnaak KHvaab ke liye
kahii.n bhii kuchh raqam nahii.n
ai hasan
chaak par se zaraa apnii nazre.n haTaa
tuu mire nau baras tak banaa.e ga.e phuul to dekh le
phuul taaza shagufta aur aazurda hai.n
yuu.n na ho ki inhe.n
bhuuk aur muflisii ke sataa.e hu.e
mere bachche bhii niilaam kar aa.e.n jaa kar kahii.n
tere kuuzo.n ke maanind baGdaad me.n
ai hasan
daaman-e-vaqt par jitne phuul aur buuTe saje hai.n
jahaa.n-zaad kii zaKHmii poro.n ne
rang un me.n apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iiyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n
hasan ye mohabbat
ki jis ko tirii soKHta-baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki 'aurat mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
ise ek ghar se uThaa kar
kisii duusre ghar kaa maalik banaayaa
ki 'aurat faqat ek patthar kii muurat
ye tasviir-e-hairat
yuu.nhii chup kha.Dii hai
yuu.nhii chup rahegii
magar yuu.n nahii.n hai
hasan tuu ne dekhaa
ki mai.n qaid-e-auhaam o band-e-rivaayaat me.n
buu.Dhe 'attaar yuusuf kii dukkaan par
apnii aa.nkhe.n tujhe nazr kartii rahii
buu.Dhaa 'attaar vo kiimiyaa-gar
ki jis ne zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan
mere ek ik dariiche pe
kohna rivaayaat o zaalim 'aqaa.ed kaa jangal ugaa thaa
hasan
kaash tuu merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke
kaT kaT ke girtaa rahaa thaa

Ishrat Afreen
Nazm

maTi tere rang hain gahre

mai.n raakh zada muskuraahaT jantii huu.n
khi.nchtii hai.n lakiire.n
aur nuquush biga.Dte chale jaate hai.n
tumhaarii muskuraahaT kii taraavat kyo.n nahii.n jaatii
ye to aur hii rang kaa gaaraa hai
kis ne guu.ndhii hai merii miTTii
ra.ng hii nahii.n badaltaa
mai.n apne rang me.n
tumhaaraa rang milaatii huu.n
na mai.n rahtii huu.n
aur na tum
aave kaa KHaalii-pan qahqahe lagaane lagtaa hai
Dhale Dhalaa.e
tarshe tarshaa.e
tumhe.n pahchaan.naa mushkil to nahii.n
magar merii pore.n
tumhe.n pahchaan.ne se qaasir hai.n
tumhaaraa vajuud kis miTTii se banaa hai
gaare kii khan-khanaahaT hii nahii.n jaatii

Arifa Shahzad
Nazm

koi basti ki mujh mein basti hai

mai.n aaKHir kis kii jaagat jaagtaa huu.n
papoTo.n me.n ye kis paanii kaa namkin zaa.iqa hai
mirii putlii me.n kis kii raat hai
aur qarniya me.n kaun se yug kaa saveraa hai
ye din bhar kaun
mizhgaanii kivaa.Do.n ko musalsal kholtaa aur band kartaa hai
mirii taar-e-nazar par baiTh kar
aaKHir zamaane me.n nazar kis kii utartii hai
mai.n aa.nkho.n se ye kis manzar ke andar bhaagtaa huu.n
mai.n aaKHir kis kii jaagat jaagtaa huu.n?
bhalaa mai.n kis kaa sonaa so rahaa huu.n
ye reg-KHvaab par bante biga.Dte kyaa nishaa.n hai.n
mire andar to jitne qaafile chalte hai.n
saare ajnabii hai.n
mai.n har ik KHvaab me.n ko.ii shanaasaa Dhuu.nDtaa huu.n
ye kaisii aurte.n hai.n
jo sar me.n ret kaa afshaa.n bhare
mujh ko jaka.Dtii hai.n
jo baad-az-iKHtalaat aaho.n se chiiKHo.n se pighal kar
ret ho jaatii hai.n giilii ret me.n!!
ye bachche kis sadii ke hai.n
jo apne qahqaha-aavar khilaune mere haatho.n me.n
thamaa kar bhaag jaate hai.n
ye kis maabad ke jogii hai.n
sahiifo.n kii zabaa.n me.n bolte hai.n
in ke farGul pha.D.pha.Daate hai.n
havaa me.n riish u.Dtii hai
ye mai.n kis kii KHushii ko ha.ns rahaa huu.n
kis kaa ronaa ro rahaa huu.n
bhalaa mai.n kis kaa sonaa so rahaa huu.n?

Waheed Ahmad
Nazm

bachchon ka club

ik aisaa zamaana guzraa hai jab apnaa sahaaraa ko.ii na thaa
ma.njhdaar me.n apnii kashtii thii mahfuuz kinaaraa ko.ii na thaa
sad shukr ke vo din biit ga.e jab kuucha-gardii karte the
ab apne club ke kaamo.n me.n ham vaqt guzaaraa karte hai.n
tafriih ke saare kaamo.n me.n jab ro.De sab aTkaate the
jab khel kaa naam aa jaataa thaa bal tevrii par pa.D jaate the
ab apne saare buzurgo.n ko shiishe me.n utaaraa karte hai.n
sad shukr ke vo din biit ga.e jab kuucha-gardii karte the
ab apne club ke kaamo.n me.n ham vaqt guzaaraa karte hai.n
ye library apnii hai ye bank kaa kaam hamaaraa hai
ye reading room hamaaraa hai ye park hamaaraa apnaa hai
ham apne biga.Dte kaamo.n ko KHud aap sa.nvaaraa karte hai.n
sad shukr ke vo din biit ga.e jab kuucha-gardii karte the
ab apne club ke kaamo.n me.n ham vaqt guzaaraa karte hai.n
school me.n din bhar pa.Dh likh kar jab shaam ko ham ghar aate hai.n
phir apne club me.n jaate hai.n aur apnaa jii bahlaate hai.n
zehno.n ko jo shal kar detaa hai vo bojh utaaraa karte hai.n
sad shukr ke vo din biit ga.e jab kuucha-gardii karte the
ab apne club ke kaamo.n me.n ham vaqt guzaaraa karte hai.n

Syeda Farhat
Nazm

taaruf

in se miliye ye hai.n aslam gaamaa ke ustaad hai.n
daaraa singh aur bholuu ke bhii daa.o sab in ko yaad hai.n
maktab aur mohalle me.n ye har bachche se la.Dte hai.n
jis se KHafagii ho jaatii hai us par KHuub biga.Dte hai.n
in se sab Darte hai.n jaise ye bijlii kaa taar hai.n
in se sab bezaar hai.n
in se miliye bhuul bhulakka.D log sab in ko kahte hai.n
aadat se majbuur bichaare kho.e kho.e rahte hai.n
paise saudaa taKHtii basta ye jo kuchh bhii paate hai.n
maktab me.n baazaar me.n yaa raste me.n gum kar aate hai.n
lekin da.avaa ye karte hai.n ham sab se hoshyaar hai.n
in se sab bezaar hai.n
in se miliye raam bharose jaise filmii hero hai.n
saalaana exam me.n in ke har parche me.n zero hai.n
lekin kitnii hii filmo.n kii inhe.n kahaanii yaad hai
is nagrii kaa har qissa har baat zabaanii yaad hai
raam bharose nahii.n ye filmii duniyaa kaa aKHbaar hai.n
in se sab bezaar hai.n

Murtaza Sahil Tasleemi
Nazm

ajib log

ajiib log hai.n
sahraa me.n shahr me.n ghar me.n
sulagtii ret pe ThiThure hu.e samundar me.n
KHalaa me.n chaa.nd kii banjar zamii.n ke siine par
jo sub.h o shaam kii be-rabt raah me.n chup-chaap
ta.alluqaat kii taamiir karte rahte hai.n
havaa ke dosh pe tuufaan zalzala sailaab
diyaa-salaa.ii kii tiilii pe tank atom bam
ko.ii juluus ko.ii poster ko.ii taqriir
umaDtii bhii.D kaa har vote ko.ii ballot box
phisaltii kursii kaa jaaduu baso.n kii lambii queue,
kahii.n pe sehn me.n gobar kahii.n pe gaa.e kaa sar
har ek gosha hai shamshaan qabr hai bistar
akelaa phirtaa hai sunsaan shahr me.n curfew
qariib ghuur pe chiTh.Do.n me.n jism ke Tuk.De
mahaktii raat se janmii hu.ii fasurda-sub.h
biga.Dte bante hu.e zaaviye khisaktii ii.nT
tamaam silsile be-rabt munqate rishte
magar vo dau.Dte pairo.n pe uThte ba.Dhte haath
har ek jabr se be-KHauf be-niyaazaana
jo sub.h o shaam kii be-rabt raah me.n chup-chaap
ta.alluqaat kii taamiir karte rahte hai.n
ajiib log hai.n

Shahid Mahuli
Nazm

ba-wafa

shajar hijrat nahii.n karte
biga.Dte mausamo.n ruuThii ghaTaa.o.n
duur hote paaniyo.n tak se kabhii
nafrat nahii.n karte
ye apnii ijtimaa.ii qatl-gaaho.n kaa
tamaashaa dekhte hai.n par
na.e sarsabz maidaano.n
KHunuk jhiilo.n ke mutalaashii nahii.n hote
zamii.n se apnii paivasta tanaabe.n khii.nch kar u.Dne nahii.n lagte
shajar hijrat nahii.n karte

Hasan Shahnawaz Zaidi
Nazm

tulua se pahle

kabhii
yuu.n hii
kisii shab chaa.ndnii kaa haath lagte hii
binaa dastak ke khul jaataa hai ik kamre kaa darvaaza
dariicho.n se ko.ii mad.hosh-kun KHushbuu nikaltii hai
fazaa me.n muskuraatii hai
hayuule se ka.ii pardo.n pe bante hai.n biga.Dte hai.n
ko.ii mauhuum aahaT phail jaatii hai samaa.at par
kitaabe.n jaag uThtii hai.n ko.ii safhe ulaTtaa hai
havaa me.n sarsaraate hai.n adhuurii nazm ke Tuk.De
fazaa me.n tairte hai.n har taraf bhaTke hu.e misre
kahii.n maddham suro.n kaa saaz ko.ii chhe.D detaa hai
a.ndhere ke samundar me.n ko.ii bajraa saa chaltaa hai
puraane giit bahte hai.n
udaasii taal detii hai
kabhii shiisho.n pe halkii niilguu.n lahre.n machaltii hai.n
kisii aavaaz kaa saaya khulii khi.Dkii me.n aataa hai
kiran ko.ii zaraa saa jhilmilaa kar TuuT jaatii hai
samajh me.n kuchh nahii.n aataa
a.ndhere me.n bikhartaa kyaa hai kyaa tartiib paataa hai

Hamida Shaheen
Nazm

shahr-e-KHamoshan ko dekh kar

nahii.n ye Dher miTTii ke sabaq-aamoz-e-ibrat hai.n
karuu.n ai ham-nashii.n kyuu.nkar na in se istifaada mai.n
nishaan-e-raftgaa.n mai.n ne har ik manzil me.n paayaa hai
isii ibrat-kade ne kyaa KHayaal un kaa jamaayaa hai
qayaas apnaa kiyaa un par jo mai.n ne ai shariif insaa.n
nazar aayaa mujhe un me.n ko.ii KHandaa.n ko.ii giryaa.n
yahaa.n mazluum hii rahte nahii.n hai.n balki zaalim bhii
nazar pahluu-ba-pahluu aate hai.n mahkuum-o-haakim bhii
na dekhaa tum ne shaayad un ko ab tak chashm-e-ibrat se
KHudaa-raa lo sabaq kuchh bhii to in alvaah-e-turbat se
humaayuu.n hai yahaa.n aasuuda vo qabr-e-halaakuu hai
sunaa hai ye ko.ii murshid hai aur vo ek Daaku hai
vo shah-zor aaj bekas hai.n jo kamzoro.n se la.Dte the
KHudaa jaane ki ahl-e-hilm se kyuu.nkar biga.Dte the
karo yaad un buzurgo.n ko sharaafat jin pe hai naazaa.n
na bhuulo un ko bhii jo the sipah-saalaar-e-sharbaazaa.n
nigaaho.n me.n unhe.n rakkho ubharnaa hai agar tum ko
KHayaalo.n me.n unhe.n parkho sa.nvarnaa hai agar tum ko

Ali Manzoor Hyderabadi
Nazm

tanhai

miTte ubharte chehro.n ke dariyaa me.n
bante biga.Dte rishto.n ke tuufaan ke biich
ek jaziira hai ki jahaa.n par
KHud ko Dhuu.nD nikaalaa mai.n ne
KHud ko chahakte dekhaa mai.n ne
KHud ko mahakte paayaa mai.n ne
dar na dariicha
diivaar na chhat
mujh se milne aa sakte ho jab chaaho
par yaad rahe
tum ko apnaa jism utaar ke aanaa hogaa saahil par

V. Sudhakar Rao
Nazm

visal

suno
merii mohabbat ko.ii maut nahii.n
jis kaa zaa.iqa chakhnaa tum par laazim ho
merii mohabbat to aashiqo.n ke shamshaan ghaaT par
ugaa vo saaya-daar pe.D hai
jis kii Daalo.n par ajnabii parinde apnaa ghar banaate hai.n
aur jis kii ja.Do.n me.n mere ham-nafas
apnii vahshato.n kii jhulastii raakh Daalte hai.n
tum jo mere ham-zaad ho
tumhaare liye to merii mohabbat zindagii hai
jis me.n maanind-e-gulzaar taKHliiq kaa har pahluu
tumhaaraa intizaarii rahtaa hai
tum jo mere ham-raqs ho
tum kyo.n apne mehvar se dast-bardaar hote ho
ki tumhaare aisaa karne se
mere nizaam-e-shaKHsii kaa tavaazun biga.Dne lagtaa hai
aur biga.Dte zaaviyo.n se jo manzar
merii aa.nkhe.n dekhtii hai.n
us me.n israafiil apne narsinghe kii samt durust kartaa hai
aur izraa.iil ek azm-e-aziim se apne par tolne lagtaa hai
be-shak kullu nafsin zaa.iqat-ul-maut
kullu nafsin zaa.iqat-ul-maut
magar merii mohabbat ko.ii maut nahii.n
jis kaa zaa.iqa chakhnaa tum par laazim ho

Komal Raja
Nazm

rasad-gah

KHirad ke gumbado.n me.n sargiraa.n
aflaak kii vus'at
sitaaro.n aur sayyaaro.n kii Tolii
fasiil-e-dahr me.n bante biga.Dte
ye siyah rauzan
mai.n un ke paar jaanaa chaahtaa huu.n

Abid Raza
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now