Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dai"

Nazm MATCHES FOR "dai"

Nazm

banjara-nama

har manzil me.n ab saath tire ye jitnaa Deraa-Daa.nDaa hai
zar daam-diram kaa bhaa.nDaa hai banduuq sipar aur khaa.nDaa hai
jab naayak tan kaa nikal gayaa jo mulko.n mulko.n haa.nDaa hai
phir haa.nDaa hai na bhaa.nDaa hai na halvaa hai na maa.nDaa hai
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

gandhi-jayanti par

uThii chaaro.n taraf se jab ki zulm-o-jabr kii aa.ndhii
payaam-e-amn le kar aa ga.e ruuh-e-zamaa.n gaa.ndhii
bane hindostaa.n ke vaaste vo rahbar-e-kaamil
tavassul se unhii ke paa.ii ham ne apnii KHud manzil
hu.ii raushan ujaale se dayaar-e-hind kii vaadii
jalaa.ii is tarah kii aap ne ik sham-e-aazaadii
unhii ne jabr se a.ngrez ke ham ko chhu.Daayaa thaa
sadaaqat kaa sharaafat kaa hame.n rasta bataayaa thaa
dikhaa.ii raah vo ham ko jo gautam ne dikhaa.ii thii
bataa.ii baat vo phir se jo iisaa ne bataa.ii thii
uKHuvvat ke vo dariyaa the mohabbat ke vo saahil the
ahinsaa ke vo daa.ii the vo yak-jehtii ke qaa.il the
sabaq phir se pa.Dhaayaa thaa jahaa.n-bhar ko bhalaa.ii kaa
zamaana aaj bhii mashkuur hai us haq ke daa.ii kaa
Gariibo.n kii nahiifo.n kii hamesha dast-giirii kii
na parvaa kii musiibat kii na parvaa kii asiirii kii
hamaare dil munavvar kar diye nuur-e-mohabbat se
hu.e aagaah ahl-e-dahr ramz-e-aadamiyat se
vatan ke aasmaa.n par ek raKHshanda sitaare the
hame.n ye faKHr hai ahl-e-jahaa.n gaa.ndhii hamaare the

kanval Dibaivi
Nazm

aadmi

hai aadmii hazaaro.n kaa aur ek paa.ii kaa
aadhaa hai apnii maa.n kaa to aadhaa hai daa.ii kaa
pesha bhii aadmii ne sambhaalaa gadaa.ii kaa
da.avaa bhii aadmii ne kiyaa hai KHudaa.ii kaa
goraa bhii aadmii hai to kaalaa bhii aadmii
buzdil bhii aadmii hai jiyaalaa bhii aadmii

Syed Mohammad Jafri
Nazm

qabil ka saya

magar is daur me.n ko.ii KHudaa aisaa nahii.n kartaa
ki ab shahro.n kii haalat agle sahraa.o.n se behtar hai
ki ab shahro.n me.n maar o azhdar o kargas nahii.n milte
kutub-KHaano.n me.n afkaar-o-aqaa.ed jalva-farmaa hai.n
hazaaro.n dars-gaahe.n daa.ii-e-aqdaar-e-insaa.n hai.n
siyah sa.Dko.n pe kaare.n hai.n fazaa.o.n me.n hai.n tayyaare
imaaraat-e-buland apne falak-paimaa dariicho.n se
mako.Do.n kii tarah chalte hu.e jismo.n ko taktii hai.n
hamaare shahr maaman hai.n hamaare shahr gulshan hai.n
ab in shahro.n me.n farsuuda KHudaa kii kyaa zaruurat hai

Sahar Ansari
Nazm

mera pasandida manzar

mujhe un vaadiyo.n me.n sair kii KHvaahish nahii.n baaqii
mujhe un baadalo.n se raaz kii baate.n nahii.n karnii
mujhe un dhund kii chaadar me.n ab lipTe nahii.n rahnaa
mujhe us aalam-e-yaKH-bastagii se kuchh nahii.n kahnaa
mujhe mauhuum lafzo.n kaa shanaasaa.ii nahii.n ban.naa
mujhe is kaar-e-pur-asraar kaa daa.ii nahii.n ban.naa
mai.n KHvaabo.n ke dariicho.n me.n kha.Daa rahne se qaasir huu.n
mai.n zinda zindagii kii saa.ato.n kaa ek shaa.ir huu.n
mujhe ik lahlahaate jhuulte paikar kii KHvaahish hai
mujhe in manzaro.n me.n aise ik manzar kii KHvaahish hai

Prem Kumar Nazar
Nazm

bu-ali andar-ghubar-e-naqa gum

mai.n agar shaa.ir thaa maulaa to mirii ohda-baraa.ii kyaa thii aaKHir
shaa.irii me.n mutakaffil thaa to ye kaisii naa-munaasib ehtimaalii
kyaa karuu.n mai.n
band kar duu.n apnaa baab-e-lafz-o-ma.anii
aur kahf ke Gaar me.n jhaa.nkuu.n jahaa.n baiThe hu.e
as.haab ma.abuud-e-haqiiqii kii ibaadat me.n magan hai.n
aur sag-e-taazii saa chaukiidaar un ke paas baiThuu.n
vahdat-o-tauhiid kaa paiGaam sun kar
vird kii suurat use dohraataa jaa.uu.n
puuchhtaa huu.n
kyaa mirii mashq-e-suKHan tauhiid kii azalii shanaasaa
o qarz ke bigtaashan kii daa.ii nahii.n hai
mai.n to raasul-maal saaraa peshgii hii de chukaa huu.n
qarz kii vaapas adaa.ii me.n
mire alfaaz kaa saaraa zaKHiira luT chukaa hai
sher ko harf-o-nidaa me.n Dhaalnaa
tasbiih-o-tahliil-o-ibaadat se kahaa.n kamtar hai maulaa
shaa.irii juzvest-az-paiGambarii kis ne kahaa thaa
mai.n to itnaa jaantaa huu.n
merii tamjiid-o-parastish lafz kii qiraat me.n Dhaltii hai
to phir taKHliiq kaa vaazeh amal tasbiih yaa maalaa ke manko.n kii tarah hai

Satyapal Anand
Nazm

aadhi baat

puurii baat kahne kii kab mujhe ijaazat hai
puurii baat sun.ne kii aap ko kyaa zaruurat hai
aap ilm ke daa.ii
aap soch ke rahbar
aap hii mohabbat ke qaa.ede banaate hai.n
aap hii rifaaqat ke sab hunar bataate hai.n
aap ke tabassum ko mai.n ne gar kabhii khojaa
pichhle kitne janmo.n ke ishq ke kha.nDar nikle
aa.n-janaab ke saare
dard mo'atabar nikle
aap muskuraate hai.n muskuraate rahiye to
puurii baat kahne kii kab mujhe ijaazat hai
mai.n ki ek aurat huu.n
yaa ki phir mohabbat huu.n
aadhii baat kahtii huu.n
puuraa dukh uThaatii huu.n

Uzma Naqvi
Nazm

mubarak ho

aachaanak
KHud me.n ye kaisii tabdiiliyaa.n mahsuus kar rahaa huu.n mai.n
mere baal daraaz aur ghane ho ga.e hai.n
mai.n ab do choTiyaa.n baa.ndhne lagaa huu.n
merii aa.nkhe.n pahle se ziyaada maKHmuur ho ga.ii hai.n
vo ab dekhne ke bajaa.e ziyaada rone lagii hai.n
mere ho.nT kohre kii ThanD kii tarah safed pa.D ga.e hai.n
vo ab bolne ke bajaa.e ziyaada kapkapaane lage hai.n
meraa siina pahle sapaaT thaa
ab is par do uThaane.n uTh aa.ii hai.n
duudh sii ko.ii shai is me.n ThaaThe.n maarne lagii hai
mai.n pahle qamiis aur painT pahantaa thaa
ab mai.n shalvaar aur jampar pahan.ne lagaa huu.n
lagtaa hai abhii gyaarah september hii ko mai.n
Gusl-e-janaabat se faariG hu.aa huu.n
aachaanak
achaanak KHud me.n ye kaisii tabdiiliyaa.n
mahsuus kar rahaa huu.n mai.n
abhii abhii tho.Dii der pahle mujhe ek zabardast qai hu.ii thii
daa.ii aa.ii thii
us ne meraa jampar utaar ke merii kokh ke
merii kokh par
ThanDaa Thaar qabr saa haath rakh ke kahaa thaa
mubaarak ho tum maa.n ban.ne vaale ho

Salahuddin Parvez
Nazm

tartib-yafta qari se

tartiib-yaafta qaarii se
nazme.n KHaana-ba-dosh aurte.n hai.n
ye daa.ii kii madad ke binaa bhii
bachche jan saktii hai.n

Nighat Sahiba
Nazm

Dubte suraj ki sargoshi

Dher kirchiyo.n ke
aa.nkh me.n hai.n lekin
aa.ine nauhaa
har kisii qalam kii dastaras se baahar
raushnii ke ghar me.n
tiirgii kaa patthar
kis taraf se aayaa
kaun hai vo aaKHir
jo pas-e-tamaashaa muskuraa rahaa hai
ik savaal hotii hai
zindagii nagar kii
surKHiyaa.n KHabar kii khojtii hai lekin
KHvaab ke safar kii saa.ato.n pe qadGan
soch rehn-e-sar hai
nii.nd kii sahar jo
qarya-e-tamannaa luuT le gayaa
us ke naqsh-e-paa bhii
chun liye havaa ne
munsifii ke daa.ii
be-yaqiin mausam baa.nTte hai.n ghar ghar
aur haDDiyo.n ke naa-tavaa.n se panjar
surKH battiyo.n ke KHauf kii sa.Dak par
siren bajaatii ek naa-gahaanii
taa-abad ta.aaqub
KHatm hai kahaanii

Saeed Ahmad
Nazm

maine shairi likkhi

sukuut-e-shab me.n KHayaalaat kii ravaanii me.n
jo lafz mai.n ne likhe the na.ii kahaanii me.n
mai.n aise lafzo.n ko paaband karne aayaa huu.n
sutuur-e-haq kaa mai.n taavaan bharne aayaa huu.n
suKHan-varii kii nazaakat se huu.n nahii.n vaaqif
munaafiqo.n kii siyaasat se huu.n nahii.n vaaqif
jo mere dil me.n hai us ko kalaam kartaa huu.n
mai.n apne 'ishq ko valiyo.n ke naam kartaa huu.n
ye kaise hogaa ki mai.n bhe.Diyo.n se Dar jaa.uu.n
mirii sarisht me.n shaamil hai la.D ke mar jaa.uu.n
mai.n siina Tho.nk ke kahtaa huu.n karbalaa.ii huu.n
mai.n huu.n payambar-e-haq amn kaa mai.n daa’ii huu.n
mai.n manzaro.n ko badalne kii taab rakhtaa huu.n
mai.n apnii jholii me.n chand aise KHvaab rakhtaa huu.n
likhaariyo.n kaa jo mela hai mai.n ne parkhaa hai
qalam amaanat-e-rab hai unhe.n KHabar hii nahii.n
inhe.n numaa.ishii shohrat se itnii raGbat hai
hai raat zulm kii aur vaa’da-e-sahar hii nahii.n
junuun-e-'ishq kaa fuqdaan kyo.n hu.aa in me.n
jo in ke man me.n sadaaqat nahii.n to kuchh bhii nahii.n
miraa qalam to hai ehsaas-e-dard se bojhal
nahii.n hai 'azmat-e-insaan agar to kuchh bhii nahii.n
jo mai.n ne dekhaa hai raah-e-vafaa me.n vo sun lo
zaraa saa ek diyaa hai jo TimTimaataa hu.aa
ye baad-o-baaraa.n kii ik zarb sah na paa.egaa
a.ndheraa maut kii suurat me.n phail jaa.egaa
so is se pahle ruke kaarvaan-e-she'r-o-suKHan
so is se pahle ruke merii saa.ns aur dha.Dkan
qalam kii khaa.ii qasam mai.n ne aagahii likkhii
KHudaa-e-vaahid-o-bartar kii bartarii likkhii
ye saaraa khel tamaashaa ye zindagii likkhii
ye be-sabaatii likhii apnii bebasii likkhii
suKHan-varii hii to 'baasit' hai meraa vasf-e-digar
so mai.n ne she'r kahaa mai.n ne shaa'irii likkhii

Basit Jaleeli
Nazm

bhali si ek shakl thi

mohabbato.n kii vus.ate.n
hamaare dast-o-paa me.n hai.n
bas ek dar se nisbate.n
sagaan-e-baa-vafaa me.n hai.n

Ahmad Faraz
Nazm

raqib se!

tuu ne dekhii hai vo peshaanii vo ruKHsaar vo ho.nT
zindagii jin ke tasavvur me.n luTaa dii ham ne
tujh pe uTThii hai.n vo kho.ii hu.ii saahir aa.nkhe.n
tujh ko ma.aluum hai kyuu.n umr ga.nvaa dii ham ne

Faiz Ahmad Faiz
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

dastur

mai.n bhii KHaa.if nahii.n taKHta-e-daar se
mai.n bhii mansuur huu.n kah do aGyaar se
kyuu.n Daraate ho zindaa.n kii diivaar se
zulm kii baat ko jahl kii raat ko
mai.n nahii.n maantaa mai.n nahii.n jaantaa

Habib Jalib
Nazm

mujhe ab Dar nahin lagta

kisii ke duur jaane se
ta.alluq TuuT jaane se
kisii ke maan jaane se
kisii ke ruuTh jaane se
mujhe ab Dar nahii.n lagtaa
kisii ko aazmaane se
kisii ke aazmaane se
kisii ko yaad rakhne se
kisii ko bhuul jaane se
mujhe ab Dar nahii.n lagtaa
kisii ko chho.D dene se
kisii ke chho.D jaane se
naa sham.a ko jalaane se
naa sham.a ko bujhaane se
mujhe ab Dar nahii.n lagtaa
akele muskuraane se
kabhii aa.nsuu bahaane se
naa is saare zamaane se
haqiiqat se fasaane se
mujhe ab Dar nahii.n lagtaa
kisii kii naa-rasaa.ii se
kisii kii paarsaa.ii se
kisii kii bevafaa.ii se
kisii dukh intihaa.ii se
mujhe ab Dar nahii.n lagtaa
naa to is paar rahne se
naa to us paar rahne se
naa apnii zindagaanii se
naa ik din maut aane se
mujhe ab Dar nahii.n lagtaa

Mohsin Naqvi
Nazm

aaj bazar mein pa-ba-jaulan chalo

chashm-e-nam jaan-e-shoriida kaafii nahii.n
tohmat-e-ishq-e-poshiida kaafii nahii.n
aaj baazaar me.n paa-ba-jaulaa.n chalo
dast-afshaa.n chalo mast o raqsaa.n chalo
KHaak-bar-sar chalo KHuu.n-ba-daamaa.n chalo
raah taktaa hai sab shahr-e-jaanaa.n chalo
haakim-e-shahr bhii majma-e-aam bhii
tiir-e-ilzaam bhii sang-e-dushnaam bhii
sub.h-e-naashaad bhii roz-e-naakaam bhii
un kaa dam-saaz apne sivaa kaun hai
shahr-e-jaanaa.n me.n ab baa-safaa kaun hai
dast-e-qaatil ke shaayaa.n rahaa kaun hai

Faiz Ahmad Faiz
Nazm

nisar main teri galiyon ke

bujhaa jo rauzan-e-zindaa.n to dil ye samjhaa hai
ki terii maa.ng sitaaro.n se bhar ga.ii hogii
chamak uThe hai.n salaasil to ham ne jaanaa hai
ki ab sahar tire ruKH par bikhar ga.ii hogii
Garaz tasavvur-e-shaam-o-sahar me.n jiite hai.n
giraft-e-saaya-e-diivaar-o-dar me.n jiite hai.n

Faiz Ahmad Faiz
Nazm

subh-e-azadi (August-47)

ye daaG daaG ujaalaa ye shab-gaziida sahar
vo intizaar thaa jis kaa ye vo sahar to nahii.n
ye vo sahar to nahii.n jis kii aarzuu le kar
chale the yaar ki mil jaa.egii kahii.n na kahii.n
falak ke dasht me.n taaro.n kii aaKHirii manzil
kahii.n to hogaa shab-e-sust-mauj kaa saahil
kahii.n to jaa ke rukegaa safiina-e-Gam dil
javaa.n lahuu kii pur-asraar shaah-raaho.n se
chale jo yaar to daaman pe kitne haath pa.De
dayaar-e-husn kii be-sabr KHvaab-gaaho.n se
pukaartii rahii.n baahe.n badan bulaate rahe
bahut aziiz thii lekin ruKH-e-sahar kii lagan
bahut qarii.n thaa hasiinan-e-nuur kaa daaman
subuk subuk thii tamannaa dabii dabii thii thakan

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now