Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dev-haikal"

Nazm MATCHES FOR "dev-haikal"

Nazm

pam ke peD se guftugu

aur thak haar kar vaapsii me.n
sarakte hu.e ek patthar se bachte hu.e
is taraf mai.n ne dekhaa
to aisaa lagaa
ye pahaa.Dii kisii dev-haikal farishte kaa juutaa hai
tum kattha.ii chhaal ke ta.ng moze me.n
ek pair Daale
ye juutaa pahan.ne kii koshish me.n la.ngDaa rahe...
duusrii Taa.ng shaayad
kisii aalamii ja.ng me.n u.D ga.ii hai

Saqi Faruqi
Nazm

shitab

jab raat bhiig jaatii hai
to us kaa nam
kor-basar KHvaabo.n ke suukhe labo.n tak pahu.nchtaa hai
aur tishna-kaam KHvaabo.n kaa dam TuuTne se zaraa pahle
un ko zindagii kii naved sunaataa hai
KHvaab jab maut ke dahaane se palaT kar aate hai.n
to zindagii un ke rag-o-pai me.n sur.at se dau.Dtii hai
mahmez-e-shauq me.n vo apnii be-basarii ko faraamosh kiye
tez-raftaarii kii aaKHirii mumkina had ko chhuute hu.e
ta.abiir kii manzil tak pahu.nchnaa chaahte hai.n
maut kaa saham un ke a.asaab shal kiye detaa hai
be-basarii unhe.n nazar nazar bhaTkaatii hai
zindagii kii be-sabaatii kaa KHauf
dev-haikal jallaad kii suurat mujassam ho kar
un kii shaah-rag dabochne ke darpe hotaa hai
vo jaante hai.n
ki chaah kar bhii is giraft se
der tak aur duur tak aazaad nahii.n rah sakte
usii KHauf ke zer-e-asar
mayassar vaqt me.n
vo sadiyo.n ko lamho.n me.n jii lenaa chaahte hai.n
aur lamho.n se sadiyaa.n kashiid karnaa chaahte hai.n

Neelam Malik
Nazm

mujhe sharmindagi mahsus nahin hoti

jo sadiyaa.n bichha.D chukii hai.n
mai.n un me.n zinda rahtii huu.n
aur mujhe ko.ii sharmindagii mahsuus nahii.n hotii
sa.Dko.n par taa.nge kii Taapo.n kii sadaa ab bhii suntii huu.n
jaise mahv-e-safar huu.n
aur havaa mere kaano.n me.n kuchh raaz kahtii hai
phir kisii gaa.Dii ke horn kii sadaa par
chau.nk jaatii huu.n
mai.n ja.ngalo.n ko taaraaj kar ke sa.Dke.n bante dekhtii huu.n
aur be-jaan badan liye
ja.ngalo.n ke nishaan Dhuu.nDhtii chalii jaatii huu.n
ye raato.n-raat concrete se bante hu.e dev-haikal pul
sa.Dko.n ko kushaada karne kii KHvaahish me.n
ta.ng hotaa hu.aa arsa-e-hayaat
taraqqii kii aa.D me.n
ruuh ko ghaayal karne vaale saude
qatra qatra zindagii piine vaale
bebasii se duhaa.ii dete hu.e anginat log
jin kii chhoTii chhoTii KHushiyo.n ko rau.ndte hu.e
ba.De ba.De bulldozer
aur ab to gutter kii tarah
uble pa.De traffic ke is ta.affun-zada hujuum me.n
kahii.n paTrii kii saa.nse.n bhii ukha.D rahii hai.n
rail-gaa.Dii kaa engine jaane kahaa.n rah gayaa hai
chup-chaap bichh.Dii sadiyo.n me.n panaah lete hu.e
mujhe sharmindagii mahsuus nahii.n hotii

Aliya Mirza
Nazm

auj-bin-unuq

jaan lekin us qavii-haikal kii us ke gardan-o-sar me.n na thii
jaan thii TaKHno.n me.n us kii
us ke TaKHne
sard aur mahfuuz tah-KHaane kii tah se tho.Daa uupar
duur tak phaile hu.e be-ruuh saahil par ayaa.n the
aur vahii.n ik dil-zada bezaar 'muusaa'
shahr kii sab se ba.Dii hotel kii chhat ko chhuu na sakne se KHafiif
naa-balad TaKHno.n kii kamzorii se dev-e-asr kii
apne imkaa.n aur iraade ke asaa kii zarb se naa-aashnaa
niim-murda sard be-his ret par soyaa hu.aa thaa

Abdul Ahad Saaz
Nazm

aisa kash abhi ho jae

belo.n par toffee khil jaa.e
chaa.e coffee nal se aa.e
biscuit Daalii Daalii jhuule
bachcha bachcha jis ko chhuu le
bagiyaa hogii kitnii pyaarii
laDDuu ho.n jab kyaarii kyaarii
buu.nde.n Tapke buu.ndii.n ban kar
barfii phaile ghar kii chhat par
halve kaa baadal ghar aa.e
aisaa kaash kabhii ho jaa.e
pe.Do.n par pe.De lag jaa.e.n
jab chaahe.n ham to.D ke khaa.e.n
har jaanib sohan halva ho
baaluushaahii kaa jalva ho
jharnaa KHair kaa bahtaa jaa.e
KHuub jalebii tairtii aa.e
berii par jab maare.n patthar
khiil bataashe Tapke.n din bhar
bachcha khaa.e buu.Dhaa khaa.e
aisaa kaash kabhii ho jaa.e
qulfii kaa miinaar kha.Daa ho
har taare me.n cake ju.Daa ho
nikle.n jab sa.Dko.n par ghar se
motii-chuur ke laDDuu barse
miiThe duudh kii barsaate.n ho.n
peThe kii sab sauGaate.n ho.n
faaluude se hauz bharaa ho
lassii kaa dariyaa bahtaa ho
baarish aa kar ras barsaa.e
aisaa kaash kabhii ho jaa.e
nafrat ho ka.Dvii bolii se
ulfat ho har ham-jolii se
shiirii.n kar de.n duniyaa saarii
pyaar se bhar de.n duniyaa saarii
duniyaa me.n har kaam ho shiirii.n
avval aaKHir naam ho shiirii.n
sab se 'haidar' bolo miiThaa
miiThaa khaa kar bolo miiThaa
shiiriinii ho.nTo.n par chhaa.e
aisaa kaash abhii ho jaa.e

Haidar Bayabani
Nazm

mulamma ki anguThi

chaa.ndii kii a.nguuThii pe jo sone kaa cha.Dhaa jhol
ochhii thii lagii bolne itraa ke ba.Daa bol
ai dekhne vaalo tumhii insaaf se kahnaa
chaa.ndii kii a.nguuThii bhii hai kuchh gahno.n me.n gahnaa
chaa.ndii kii a.nguuThii ke na mai.n saath rahuu.ngii
vo aur hai mai.n aur ye zillat na sahuu.ngii
mai.n qaum kii uu.nchii huu.n ba.Daa meraa gharaanaa
vo zaat kii ghaTiyaa hai nahii.n us kaa Thikaanaa
merii sii kahaa.n chaashnii meraa saa kahaa.n ra.ng
vo mol me.n aur tol me.n mere nahii.n paassa.ng
merii sii chamak us me.n na merii sii damak hai
chaa.ndii hai ki hai raa.ng mujhe is me.n bhii shak hai
ye sunte hii chaa.ndii kii a.nguuThii bhii ga.ii jal
allaah-re mulamme kii a.nguuThii tere chhal-bal
sone kii mulamme pe na itraa merii pyaarii
do din me.n bha.Dak us kii utar jaa.egii saarii
kuchh der haqiiqat ko chhupaayaa bhii to phir kyaa
jhuuTo.n ne jo sachcho.n ko cha.Dhaayaa bhii to phir kyaa
mat bhuul kabhii asal tuu apnii arii ahmaq
jab taav diyaa jaa.egaa ho jaa.egaa mu.nh faq
sachche kii to izzat hii ba.Dhegii jo kare.n jaa.nch
mash.huur masal hai ki nahii.n saa.nch ko kuchh aa.nch
khone ko kharaa ban ke nikharnaa nahii.n achchhaa
chhoTe ko ba.Daa ban ke ubharnaa nahii.n achchhaa

Ismail Merathi
Nazm

yaad-e-aligarh

vo chaa.e kii pyaalii pe yaaro.n ke jalse
vo sardii kii raate.n vo zulfo.n ke qisse
kabhii tazkire husn-e-sho.ala-ruKHaa.n ke
mohabbat hu.ii thii kisii ko kisii se
har ik dil vahaa.n thaa nazar kaa nishaana
bahut yaad aataa hai guzraa zamaana
bahut apnaa andaaz thaa laa-ubaalii
kabhii the jalaalii kabhii the jamaalii
kabhii baat me.n baat yuu.nhii nikaalii
sar-e-raah ko.ii qayaamat uThaa lii
kisii ko la.Daanaa kisii ko bachaanaa
bahut yaad aataa hai guzraa zamaana
kabhii sachchii baato.n ko jhuuTaa bataayaa
kabhii jhuuTii baato.n ko sach kar dikhaayaa
kabhii raaz-e-dil kah ke us ko chhupaayaa
kabhii dosto.n me.n yuu.nhii kuchh u.Daayaa
bataa kar chhupaanaa chhupaa kar bataanaa
bahut yaad aataa hai guzraa zamaana
kabhii bazm-e-ahbaab me.n sho.ala-afshaa.n
kabhii union me.n the shamshiir-e-burraa.n
kabhii bazm-e-vaa.iz me.n the paa-ba-jaulaa.n
badalte the har roz taqdiir-e-dauraa.n
jahaa.n jaisii Daflii vahaa.n vaisaa gaanaa
bahut yaad aataa hai guzraa zamaana
zamaana thaa vo ek haivaaniyat kaa
vo daur-e-malaamat thaa shaitaaniyat kaa
hame.n dard thaa ek insaaniyat kaa
uThaa.e alam ham the haqqaaniyat kaa
ba.Dhe jaa rahe the magar baaGiyaana
bahut yaad aataa hai guzraa zamaana
muqaabil me.n aa.e jasaarat thii kis ko
ko.ii rok de ba.Dh ke himmat thii kis ko
pukaare ko.ii ham ko taaqat thii kis ko
ki har bul-havas ko the ham taaziyaana
bahut yaad aataa hai guzraa zamaana
KHayaalaat-e-pur-shauq kaa silsila thaa
badal de.n zamaane ko vo hausla thaa
har ik dil me.n paidaa nayaa valvala thaa
har ik gaam ahbaab kaa qaafila thaa
idhar da.avaa karnaa udhar kar dikhaanaa
bahut yaad aataa hai guzraa zamaana
vo shah-raah-e-marrice ke pur-pech chakkar
vo shamshaad building pe ik shor-e-mahshar
vo mub.ham sii baate.n vo poshiida nashtar
vo be-fikr duniyaa vo lafzo.n ke daftar
ki jin kaa siraa thaa na ko.ii Thikaana
bahut yaad aataa hai guzraa zamaana
kisii ko hu.ii thii kisii se mohabbat
ko.ii kar rahaa thaa kisii kii shikaayat
Garaz roz Dhaatii thii taaza qayaamat
kisii kii shabaahat kisii kii malaamat
kisii kii tasallii kisii kaa sataanaa
bahut yaad aataa hai guzraa zamaana
ko.ii Gam-zada thaa ko.ii ha.ns rahaa thaa
ko.ii husn-e-naahiid par mar miTaa thaa
ko.ii chashm-e-nargis kaa biimaar saa thaa
ko.ii bas yuu.nhii taaktaa jhaa.nktaa thaa
kabhii choT khaanaa kabhii muskuraanaa
bahut yaad aataa hai guzraa zamaana
vo har january me.n numaa.ish ke charche
vo pur-shauq aa.nkhe.n vo hairaan jalve
vo chakkar pe chakkar the baara-darii ke
vo hasrat ki sau baar mil kar bhii milte
hazaaro.n bahaano.n kaa vo ik bahaanaa
bahut yaad aataa hai guzraa zamaana
vo ruKH aaftaabii pe abruu hilaalii
vo timsaal-e-siimii.n vo husn-misaalii
shaguufo.n me.n khelii gulaabo.n me.n paalii
vo KHud ik adaa thii adaa bhii niraalii
nigaahe.n bachaa kar nigaahe.n milaa kar
bahut yaad aataa hai guzraa zamaana
vo har-chand mujh ko nahii.n jaantii thii
magar merii nazro.n ko pahchaantii thii
agarche mire dil me.n vo bas ga.ii thii
magar baat bas dil kii dil me.n rahii thii
magar aaj ahbaab se kyaa chhupaanaa
bahut yaad aataa hai guzraa zamaana
vo ik shaam barsaat kii din Dhalaa thaa
abhii raat aa.ii na thii jhuTpuTaa thaa
vo baad-e-bahaarii se ik gul khilaa thaa
dha.Dakte hu.e dil se ik dil milaa thaa
nazar sun rahii thii nazar kaa fasaana
bahut yaad aataa hai guzraa zamaana
javaanii adaa.o.n me.n bal khaa rahii thii
kahaanii nigaaho.n me.n lahraa rahii thii
mohabbat mohabbat ko samjhaa rahii thii
vo chashm-e-tamannaa jhukii jaa rahii thii
qayaamat se pahle qayaamat vo Dhaanaa
bahut yaad aataa hai guzraa zamaana
hame.n biitii baate.n jo yaad aa rahii thii.n
vo maKHmuur nazre.n jo sharmaa rahii thii.n
bahut aql-e-saada ko bahkaa rahii thii.n
ba.Dii be-niyaazii se farmaa rahii thii.n
unhe.n yaad rakhnaa hame.n bhuul jaanaa
bahut yaad aataa hai guzraa zamaana
ab vo uma.nge.n na dil me.n muraade.n
ab rah ga.ii.n chand maazii kii yaade.n
ye jii chaahtaa hai unhe.n bhii bhalaa de.n
Gam-e-zindagii ko kahaa.n tak du.aa de.n
haqiiqat bhii ab ban ga.ii hai fasaana
bahut yaad aataa hai guzraa zamaana
aligarh hai ba.Dh kar hame.n kul jahaa.n se
hame.n ishq hai apnii urdu zabaa.n se
hame.n pyaar hai apne naam-o-nishaa.n se
yahaa.n aa ga.e ham na jaane kahaa.n se
qasam de ke ham ko kasii kaa bulaanaa
bahut yaad aataa hai guzraa zamaana
mohabbat se yaksar hai anjaan duniyaa
ye viiraan bastii pareshaan duniyaa
kamaal-e-KHirad se ye hairaan duniyaa
KHud apne kiye par pashemaan duniyaa
kahaa.n le ke aayaa hame.n aab-o-daana
bahut yaad aataa hai guzraa zamaana

Aabidullah Ghazi
Nazm

ek kahani

mai.n kahaanii ke mahal me.n utartii ga.ii
pariyaa.n dev Gulaam saheliyaa.n shahzaade
titliyaa.n bha.nvre favvaare
hasiin nazaare devtaa kii mohabbat
raakshas kii sharaarat
pata hii nahii.n chalaa
kab maa.n kii aavaaz Duubtii chalii ga.ii
kab mujhe nii.nd lag ga.ii
ab jaagne lagii huu.n
to hairat me.n huu.n
ki mai.n kahaanii me.n huu.n
yaa kahaanii mujh me.n

Shaista Yusuf
Nazm

fareb-e-nazar

mujhe hairat hai
kahte ho ki
haathii ek hii paa.nv kaa maalik hai
jise thaame hu.e baiThe ho
apne dono.n haatho.n se
uThaa kar phe.nk de Gusse ke 'aalam me.n to jaanoge
ki vo paa.nv nahii.n KHurtuum hai us kaa

Hameed Almas
Nazm

mehndi

mai.n us ke naam kii meh.ndii
sajaa kar apne haatho.n par
unhe.n taa-der taktii huu.n
ki jitnaa pyaar vo kartaa hai rang utnaa hii gahraa ho
magar ye dekh kar hairaan hotii huu.n
na-jaane kyuu.n
mire haatho.n pe har meh.ndii kaa rang kachchaa hii aataa hai

Urooj Zehra Zaidi
Nazm

shayad

kuchh der ko
purse ka.ndhe se utaaro
gaa.Dii kii chaabii
itnii hifaazat se rakho
ki Dhuu.nDne me.n vaqt lage
majbuuran ruknaa pa.De
aa.o
in lamho.n me.n ghar kar le.n
vo jo tum ko na kar sake.n
aaj kar Daalo
barso.n ke KHvaab
dimaaG jo ek lamha me.n
KHvaab kartaa hai
haqiiqat kar Daalo
in.aam me.n jo mile
kokh me.n sadiyo.n baad
janm dene ko chhupaa rakhnaa
aane vaale vaqto.n me.n
shaayad ham
sirf ajaa.ib gharo.n me.n mile.n

Eruj Mubarak
Nazm

naya sal

maa.n ne bachche ko ye samjhaayaa bahut der talak
ai na.e saal tire jashn-e-tarab kaa matlab
saal-e-nau
ya.anii ki KHushiyo.n kaa hai ik sail-e-ravaa.n
ab na iflaas ke aa.nsuu ho.nge
aur ho.nge na kisii shahr me.n
dahshat ke nishaa.n
ruKH-e-ma.asuum pe hairat kii lakiire.n ubhrii.n
aur phir Duub ga.ii.n
maa.n ne shaayad abhii aKHbaar nahii.n dekhaa hai

Syed Abbas Raza Tanweer
Nazm

kenchuli

KHudaavandaa
mirii maj.huul fitrat par
ma.nDhii hai ke.nchulii kaisii
ki jis par naaKHun-e-tadbiir kaa jaaduu nahii.n chaltaa
sabhii aalaat-e-jarraahii ko mai.n ne aazmaayaa hai
magar vo ke.nchulii hai hastii-e-KHud kii ajab aashiq
chipak kar rah ga.ii hai jo
mire ThanDe masaamo.n se
KHudaavandaa
mirii maj.huul fitrat ko
haqiiqat aashnaa kar de
saraapaa aa.iina kar de

Khawar Naqeeb
Nazm

sud-o-ziyan

apne KHvaabo.n ko jo ta.abiir nahii.n de paataa
jo badal saktaa nahii.n un ko haqiiqat me.n kabhii
vo yahaa.n raa.nda-e-dargaah Thahar jaataa hai
aise afraad ki jo
KHvaab kii ta.abiir pe hote hai.n musir
kaash bas itnii haqiiqat hii se vaaqif ho jaa.e.n
kam nahii.n KHvaab kii ta.abiir se kuchh qiimat-e-KHvaab
lazzat-e-KHvaab

Shabnam Shakeel
Nazm

zid nahin karte meri jaan

mai.n bandii qurbaan
zid nahii.n karte merii jaan
khel khilaune kaaTh ke baune
sab ke sab hairaan
zid nahii.n karte merii jaan
ronii suurat kyaa soche.nge
ghar aa.e mehmaan
zid nahii.n karte merii jaan
daadii ne farmaa.ish puurii kar dii
aan kii aan
zid nahii.n karte merii jaan
lo baiThak me.n dau.D ke de aa.o
daadaa ko paan
ab to ha.ns do merii jaan

Ataur Rahman Tariq
Nazm

maTi kahe kumhaar se

kuuza-gar
roz-o-shab
raqs karte hu.e chaak par
giilii miTTii kaa tuuda huu.n mai.n
teraa zauq-e-nazar
teraa dast-e-hunar
jaisii hai.at mujhe chaahe de
haa.n magar
teraa fan bhii
parakh ke 'amal se nahii.n baalaa-tar
yaad itnaa rahe
kuuza-gar

Shadab Razi
Nazm

hamesha der kar deta hun

hamesha der kar detaa huu.n mai.n har kaam karne me.n
zaruurii baat kahnii ho ko.ii va.ada nibhaanaa ho
use aavaaz denii ho use vaapas bulaanaa ho
hamesha der kar detaa huu.n mai.n
madad karnii ho us kii yaar kii Dhaaras ba.ndhaanaa ho
bahut deriina rasto.n par kisii se milne jaanaa ho
hamesha der kar detaa huu.n mai.n
badalte mausamo.n kii sair me.n dil ko lagaanaa ho
kisii ko yaad rakhnaa ho kisii ko bhuul jaanaa ho
hamesha der kar detaa huu.n mai.n
kisii ko maut se pahle kisii Gam se bachaanaa ho
haqiiqat aur thii kuchh us ko jaa ke ye bataanaa ho
hamesha der kar detaa huu.n mai.n har kaam karne me.n.....

Muneer Niyazi
Nazm

KHwahish

maah-o-saal se tho.Daa haT ke
dasht aur dar se duur
hijr visaal kii zad se baahar
raat aur din ke paar
kabhii fursat se mil yaar

Salman Haider
Nazm

KHushamad

mai.n kaar-e-jahaa.n se nahii.n aagaah valekin
arbaab-e-nazar se nahii.n poshiida ko.ii raaz
kar tuu bhii hukuumat ke vaziiro.n kii KHushaamad
dastuur nayaa aur na.e daur kaa aaGaaz
maa'luum nahii.n hai ye KHushaamad ki haqiiqat
kah de ko.ii ulluu ko agar raat kaa shahbaaz

Allama Iqbal
Nazm

in logon se KHwabon mein milna hi achchha rahta hai

tho.Dii der ko saath rahe kisii dhu.ndle shahr ke naqshe par
haath me.n haath diye ghuume kahii.n duur daraaz ke raste par
be-parda asthaano.n par do u.Dte hu.e giito.n kii tarah
Gusse me.n kabhii la.Dte hu.e kabhii lipTe hu.e pe.Do.n kii tarah
apnii apnii raah chale phir aaKHir shab ke maidaa.n me.n
apne apne ghar ko jaate do hairaa.n bachcho.n kii tarah

Muneer Niyazi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now