Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "fasaad"

Nazm MATCHES FOR "fasaad"

Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

dosti ka hath

guzar ga.e ka.ii mausam ka.ii rute.n badlii.n
udaas tum bhii ho yaaro udaas ham bhii hai.n
faqat tumhii.n ko nahii.n ra.nj-e-chaak-daamaanii
ki sach kahe.n to dariida-libaas ham bhii hai.n

Ahmad Faraz
Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

mujhe sochne de

merii naakaam mohabbat kii kahaanii mat chhe.D
apnii maayuus uma.ngo.n kaa fasaana na sunaa
zindagii talKH sahii zahr sahii sam hii sahii
dard o aazaar sahii jabr sahii Gam hii sahii
lekin is dard-o-Gam o jabr kii vus.at ko to dekh
zulm kii chhaa.nv me.n dam to.Dtii KHilqat ko to dekh
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D
jalsa-gaaho.n me.n ye dahshat-zada sahme amboh
rahguzaaro.n pe falaakat-zada logo.n ke giroh
bhuuk aur pyaas se pazh-murda siyah-faam zamii.n
tiira-o-taar makaa.n muflis o biimaar makii.n
nau-e-insaa.n me.n ye sarmaaya o mehnat kaa tazaad
amn o tahziib ke parcham tale qaumo.n kaa fasaad
har taraf aatish o aahan kaa ye sailaab-e-aaziim
nit-na.e tarz pe hotii hu.ii duniyaa taqsiim
lahlahaate hu.e kheto.n pe javaanii kaa samaa.n
aur dahqaan ke chhappar me.n na battii na dhu.aa.n
ye falak-bos mile.n dilkash o siimii.n baazaar
ye Galaazat pe jhapaTte hu.e bhuuke naadaar
duur saahil pe vo shaffaaf makaano.n kii qataar
sarsaraate hu.e pardo.n me.n simaTte gulzaar
dar-o-diivaar pe anvaar kaa sailaab-e-ravaa.n
jaise ik shaa.er-e-mad.hosh ke KHvaabo.n kaa jahaa.n
ye sabhii kyuu.n hai ye kyaa hai mujhe kuchh sochne de
kaun insaa.n kaa KHudaa hai mujhe kuchh sochne de
apnii maayuus uma.ngo.n kaa fasaana na sunaa
merii naakaam mohabbat kii kahaanii mat chhe.D

Sahir Ludhianvi
Nazm

hubb-e-watan

ahl-e-daulat kaa sun chuke tum haal
ab suno ruu.edaad-e-ahl-e-kamaal
faazilo.n ko hai faazilo.n se inaad
pandito.n me.n pa.De hu.e hai.n fasaad
hai tabiibo.n me.n nok-jhok sadaa
ek se ek kaa hai thuuk judaa
rahne do ahl-e-ilm hai.n is tarah
pahalvaano.n me.n laag ho jis tarah
iiduu vaalo.n kaa hai agar paTThaa
sheKHuu vaalo.n me.n jaa nahii.n saktaa
shaa.iro.n me.n bhii hai yahii takraar
KHushnaveso.n ko hai yahii aazaar
laakh neko.n kaa kyuu.n na ho ik nek
dekh saktaa nahii.n hai ek ko ek
is pe turra ye hai ki ahl-e-hunar
duur samjhe hu.e hai.n apnaa ghar
milii ik gaa.nTh jis ko haldii kii
us ne samjhaa ki mai.n huu.n pansaarii
nusKHa ik tib kaa jis ko aataa hai
sage-bhaa.ii se vo chhupaataa hai
jis ko aataa hai phuu.nknaa kushta
hai hamaarii taraf se vo guu.ngaa
jis ko hai kuchh ramal me.n maaluumaat
vo nahii.n kartaa siidhe mu.nh se baat
baap bhaa.ii ho yaa ki ho beTaa
bhed paataa nahii.n munajjam kaa
kaam ka.ndle kaa jis ko hai ma.aluum
hai zamaane me.n us kii buKHl kii dhuum
al-Garaz jis ke paas hai kuchh chiiz
jaan se bhii sivaa hai us ko aziiz
qaum par un kaa kuchh nahii.n ehsaa.n
un kaa honaa na honaa hai yaksaa.n
sab kamaalaat aur hunar un ke
qabr me.n un ke saath jaa.e.nge
qaum kyaa kah ke un ko ro.egii
naam par kyuu.n ki jaan kho.egii
tarbiyat-yaafta hai.n jo yaa.n ke
KHvaah b-a ho.n is me.n yaa m.a
bharte hubb-e-vatan kaa go dam hai.n
par muhibb-e-vatan bahut kam hai.n
qaum ko un se jo umiide.n thii.n
ab jo dekhaa to sab Galat niklii.n
history un kii aur geography
saat parde me.n mu.nh diye hai pa.Dii
band us qufl me.n hai ilm un kaa
jis kii kunjii kaa kuchh nahii.n hai pataa
lete hai.n apne dil hii dil me.n maze
goyaa guu.nge kaa gu.D hai.n khaa.e hu.e
karte phirte hai.n sair-e-gul tanhaa
ko.ii paas un ke jaa nahii.n saktaa
ahl-e-insaaf sharm kii jaa hai
gar nahii.n buKHl ye to phir kyaa hai
tum ne dekhaa hai jo vo sab ko dikhaa.o
tum ne chakhaa hai jo vo sab ko chakhaa.o
ye jo daulat tumhaare paas hai aaj
ham-vatan is ke hai.n bahut mohtaaj
mu.nh ko ek ik tumhaare hai taktaa
ki nikaltaa hai mu.nh se aap ke kyaa
aap shaa.ista hai.n to apne liye
kuchh suluuk apnii qaum se bhii kiye
mez kursii agar lagaate hai.n aap
qaum se puuchhiye to pun hai na paap
mu.nDaa juutaa gar aap ko hai pasand
qaum ko is se faa.eda na gazand
qaum par karte ho agar ehsaa.n
to dikhaa.o kuchh apnaa josh-e-nihaa.n
kuchh dino.n aish me.n KHalal Daalo
peT me.n jo hai sab ugal Daalo
ilm ko kar do kuu-ba-kuu arzaa.n
hind ko kar dikhaa.o englistaa.n

Altaf Hussain Hali
Nazm

jaun-eliya se aaKHri mulaqat

vo ek tarz-e-suKHan kii KHushbuu
vo ek mahkaa hu.aa takallum
labo.n se jaise gulo.n kii baarish
ki jaise jharnaa saa gir rahaa ho
ki jaise KHushbuu bikhar rahii ho
ki jaise resham ulajh rahaa ho
ajab balaaGat thii guftuguu me.n
ravaa.n thaa dariyaa fasaahato.n kaa
vo ek maktab thaa aagahii kaa
vo ilm-o-daanish kaa mai-kada thaa
vo qalb aur zehn kaa tasaadum
jo guftuguu me.n ravaa.n-davaa.n thaa
vo us ke alfaaz kii ravaanii
vo us kaa ruk ruk ke baat karnaa
vo sho.ala-e-lafz aur ma.aanii
kahii.n lapaknaa kahii.n Thaharnaa
Thahar ke phir vo kalaam karnaa
bahut se jazbo.n kii parda-daarii
bahut se jazbo.n ko aam karnaa
jo mai.n ne puuchhaa
guzishta shab ke mushaa.ere me.n bahut se shaidaa.ii muntazir the
mujhe bhii ye hii pata chalaa thaa ki aap tashriif laa rahe hai.n
magar hu.aa kyaa
zaraa tavaqquf ke baa'd bole nahii.n gayaa mai.n
na jaa sakaa mai.n
suno hu.aa kyaa
mai.n KHud ko maa.il hii kar na paayaa
ye merii haalat merii tabii.at
phir us pe merii ye bad-mizaajii-o-bad-havaasii
ye vahshat-e-dil
miyaa.n haqiiqat hai ye bhii sun lo ki ab hamaare mushaa.ere bhii
nahii.n hai.n un vahshato.n ke haamil
jo merii taqdiir ban chukii hai.n
jo merii tasviir ban chukii hai.n
jo merii taqsiir ban chukii hai.n
phir ik tavaqquf
ki jis tavaqquf kii kaifiyat par garaa.n samaa.at guzar rahii thii
us ek saa.at kaa haath thaame ye ik vazaahat guzar rahii thii
adab-farosho.n ne jaahilo.n ne mushaa.ere ko bhii ik tamaasha banaa diyaa hai
Gazal kii taqdiis luuT lii hai adab ko mujraa banaa diyaa hai
suKHan-varo.n ne bhii jaane kyaa kyaa hamaare hisse me.n rakh diyaa hai
sitam to ye hai ki chiiKH ko bhii suKHan ke zumre me.n rakh diyaa hai
ilaahii tauba
samaa.ato.n me.n KHaraashe.n aane lagii hai.n ab aur shigaaf zehno.n me.n pa.D ga.e hai.n
miyaa.n hamaare qadam to kab ke zamii.n me.n KHiffat se ga.D ga.e hai.n
KHamoshiyo.n ke dabiiz kohre se chand lamho.n kaa phir guzarnaa
vo jaise KHud ko udaasiyo.n ke samundaro.n me.n talaash karnaa
vo jaise phir surma.ii ufuq par sitaare alfaaz ke ubharnaa
ye zindagii se jo be-niyaazii hai kis liye hai
ye roz-o-shab kii jo bad-havaasii hai kis liye hai
bas itnaa samjho
ki KHud ko barbaad kar chukaa huu.n
suKHan to aabaad KHair kyaa ho
magar jahaa.n dil dha.Dak rahe ho.n vo shahr aabaad kar chukaa huu.n
bachaa hii kyaa hai
thaa jis ke aane kaa KHauf mujh ko vo ek saa.at guzar chukii hai
vo ek saf.ha ki jis pe likkhaa thaa zindagii ko vo kho chukaa hai
kitaab-e-hastii bikhar chukii hai
pa.Dhaa thaa mai.n ne bhii zindagii ko
magar tasalsul nahii.n thaa us me.n
idhar-udhar se yahaa.n vahaa.n se ajab kahaanii ga.Dhii ga.ii thii
samajh me.n aa.ii na is liye bhii ke darmiyaa.n se pa.Dhii ga.ii thii
samajhtaa kaise
na falsafii mai.n na ko.ii aalim
uquubato.n ke safar pe niklaa mai.n ik sitaara huu.n aagahii kaa
ajal ke haatho.n me.n haath Daale ik isti.aara huu.n zindagii kaa
itaab naazil hu.aa hai jis par mai.n vo hii ma.atuub aadmii huu.n
sitamgaro.n ko talab hai jis kii mai.n vo hii matluub aadmii huu.n
kabhii mohabbat ne ye kahaa thaa mai.n ek mahbuub aadmii huu.n
magar vo zarb-e-jafaa pa.Dii hai ki ek mazruub aadmii huu.n
mai.n ek bekal saa aadmii huu.n bahut hii bojhal saa aadmii huu.n
samajh rahii hai ye duniyaa mujh ko mai.n ek paagal saa aadmii huu.n
magar ye paagal ye niim-vahshii KHirad ke maaro.n se muKHtalif hai
jo kahnaa chaahaa thaa kah na paayaa
kahaa gayaa jo use ye duniyaa samajh na paa.ii
na baat ab tak kahii ga.ii hai
na baat ab tak sunii ga.ii hai
sharaab-o-sh.er-o-shu.uur kaa jo ik ta'alluq hai us ke baare me.n raa.e kyaa hai
sunaa hai ham ne ki aap par bhii bahut se fatve lage hai.n lekin
sharaab-noshii haraam hai to
ye mas.ala bhii ba.Daa ajab hai
mai.n ek mai-kash huu.n ye to sach hai
magar ye mai-kash kabhii kisii ke lahuu se sairaab kab hu.aa hai
hamesha aa.nsuu piye hai.n us ne hamesha apnaa lahuu piyaa hai
ye bahs chho.Do haraam kyaa hai halaal kyaa hai azaab kyaa hai savaab kyaa hai
sharaab kyaa hai
aziyyato.n se najaat hai ye hayaat hai ye
sharaab-o-shab aur shaa.irii ne ba.Daa sahaaraa diyaa hai mujh ko
sambhaal rakkhaa sharaab ne aur rahii hai mohsin ye raat merii
isii ne mujh ko diye dilaase sunii hai is ne hii baat merii
hamesha mere hii saath jaagii hamesha mere hii saath so.ii
mai.n KHush hu.aa to ye muskuraa.ii mai.n ro diyaa to ye saath ro.ii
ye sher-go.ii hai KHud-kalaamii kaa ik zariiya
isii zariiye isii vasiile se mai.n ne KHud se vo baate.n kii hai.n
jo duusro.n se mai.n kah na paayaa
haraam kyaa hai halaal kyaa hai ye sab tamaashe hai.n muftiyo.n ke
ye saare fitne hai.n maulvii ke
haraam kar dii thii KHud-kushii bhii ki apnii marzii se mar na paa.e
ye mai-kashii bhii haraam Thahrii ki ham ko apnaa lahuu bhii piine kaa haq nahii.n hai
ki apnii marzii se ham ko jiine kaa haq nahii.n hai
kise bataa.e.n
zamiir-o-zarf-e-bashar pe mauquuf hai.n masaa.il
samundaro.n me.n u.nDel jitnii sharaab chaahe
na harf paanii pe aa.egaa aur na us kii taqdiis KHatm hogii
to mai-kashii ko haraam kahne se pahle dekho
ki piine vaale kaa zarf kyaa hai hai.n kis ke haatho.n me.n jaam-o-miinaa
ye nukta-sanjii ye nukta-daanii jo maulvii kii samajh me.n aatii to baat bantii
na diin-o-maz.hab ko jis ne samjhaa na jis ne samjhaa hai zindagii ko
tahuuraa piine kii baat kar ke haraam kahtaa hai mai-kashii ko
jo diin-o-maz.hab kaa zikr aayaa to mai.n ne puuchhaa
ki is havaale se raa.e kyaa hai
ye KHud-parastii KHudaa-parastii ke darmiyaa.n kaa jo faasla hai
jo ik KHalaa hai ye kyaa balaa hai
ye diin-o-maz.hab faqat kitaabe.n
ba-juz kitaabo.n ke aur kyaa hai
kitaabe.n aisii jinhe.n samajhne kii koshishe.n kam hai.n aur ziyaada pa.Dhaa gayaa hai
kitaabe.n aisii ki aam insaa.n ko in ke pa.Dhne kaa haq hai lekin
inhe.n samajhne kaa haq na hargiz diyaa gayaa hai
ki in kitaabo.n pe diin-o-maz.hab ke Thekedaar ijaara-daaro.n kii dastaras hai
isii liye to ye diin-o-maz.hab fasaad-o-fitna bane hu.e hai.n
ye diin-o-maz.hab
jo ilm-o-hikmat ke saath ho to sukuun hogaa
jo dastaras me.n ho jaahilo.n kii junuun hogaa
ye ishq kyaa hai ye husn kyaa hai
ye zindagii kaa javaaz kyaa hai
ye tum ho jii jii ke mar rahe ho ye mai.n huu.n mar mar ke jii rahaa huu.n
ye raaz kyaa hai
hai kyaa haqiiqat majaaz kyaa hai
sivaa.e KHvaabo.n ke kuchh nahii.n hai
ba-juz saraabo.n ke kuchh nahii.n hai
ye ik safar hai tabaahiyo.n kaa udaasiyo.n kii ye rahguzar hai
na is ko duniyaa kaa ilm ko.ii na is ko apnii ko.ii KHabar hai
kabhii kahii.n par nazar na aa.e kabhii har ik shai me.n jalva-gar hai
kabhii ziyaa.n hai kabhii zarar hai
na KHauf is ko na kuchh KHatar hai
kabhii KHudaa hai kabhii bashar hai
hu.aa haqiiqat se aashnaa to ye suu-e-daar-o-rasan gayaa hai
kabhii ha.nsaa hai ye zer-e-KHanjar kabhii ye suulii pe ha.ns diyaa hai
kabhii ye gulnaar ho gayaa hai sinaa.n pe guftaar ho gayaa hai
kabhii hu.aa hai ye Garq-e-dariyaa
kabhii ye taqdiir-e-dasht-o-sahraa
raqam hu.aa hai ye aa.nso.o.n me.n
kabhii lahuu ne hai is ko likkhaa
hikaayat-e-dil hikaayat-e-jaa.n hikaayat-e-zindagii yahii hai
agar saliiqe se likkhii jaa.e ibaarat-e-zindagii yahii hai
ye husn hai us dhanak kii suurat
ki jis ke ra.ngo.n kaa falsafa hii kabhii kisii par nahii.n khulaa hai
ye falsafa jo fareb-e-paiham kaa silsila hai
ki is ke ra.ngo.n me.n ik ishaara hai be-ruKHii kaa
ik isti.aara hai zindagii kaa
kabhii alaamat hai shoKHiyo.n kii
kabhii kinaaya hai saadgii kaa
badalte mausam kii kaifiyat ke hai.n rang pinhaa.n isii dhanak me.n
kashish sharaarat-o-jaazbiyyat ke shoKH ra.ngo.n ne is dhanak ko ajiib paikar ataa kiyaa hai ik aisaa manzar ataa kiyaa hai
ki jis ke sehr-o-asar me.n aa kar
lahuu bahut aa.nkhe.n ro chukii hai.n bahut to biinaa.ii kho chukii hai.n
basaarte.n kyaa basiirate.n bhii to aql-o-daanaa.ii kho chukii hai.n
na jaane kitne hii rang maKHfii hai.n is dhanak me.n
bas ek ra.ng-e-vafaa nahii.n hai.n
is ek ra.ngat kii aarzuu ne lahuu rulaayaa hai aadmii ko
yahii bataayaa hai aagahii ko
ye ik chhalaavaa hai zindagii kaa
hasiin dhoka hai zindagii kaa
magar muqaddar hai aadmii kaa
fareb-e-gandum samajh me.n aayaa to mai.n ne jaanaa
ye ishq kyaa hai ye husn kyaa hai
ye ek laGzish hai jis ke dam se hayaat-e-nau kaa bharam khulaa hai

Tariq Qamar
Nazm

east india company ke farzandon se KHitab

kis zabaa.n se kah rahe ho aaj tum saudaagaro
dahr me.n insaaniyat ke naam ko uu.nchaa karo
jis ko sab kahte hai.n hitler bhe.Diyaa hai bhe.Diyaa
bhe.Diye ko maar do golii pa.e-amn-o-baqaa
baaG-e-insaanii me.n chalne hii pe hai baad-e-KHizaa.n
aadamiyyat le rahii hai hichkiyo.n par hichkiyaa.n
haath hai hitler kaa raKHsh-e-KHud-sarii kii baag par
teG kaa paanii chhi.Dak do germany kii aag par
saKHt hairaa.n huu.n ki mahfil me.n tumhaarii aur ye zikr
nau-e-insaanii ke mustaqbil kii ab karte ho fikr
jab yahaa.n aa.e the tum saudaagarii ke vaaste
nau-e-insaanii ke mustaqbil se kiyaa vaaqif na the
hindiyo.n ke jism me.n kyaa ruuh-e-aazaadii na thii
sach bataa.o kyaa vo insaano.n kii aabaadii na thii
apne zulm-e-be-nihaayat kaa fasaana yaad hai
company kaa phir vo daur-e-mujrimaana yaad hai
luuTte phirte the jab tum kaarvaa.n-dar-kaarvaa.n
sar-barahna phir rahii thii daulat-e-hindostaa.n
dast-kaaro.n ke a.nguuThe kaaTte phirte the tum
sard laasho.n se ga.Dho.n ko paaTte phirte the tum
san.at-e-hindostaa.n par maut thii chhaa.ii hu.ii
maut bhii kaisii tumhaare haat kii laa.ii hu.ii
allaah allaah kis qadar insaaf ke taalib ho aaj
miir-ja.afar kii qasam kyaa dushman-e-haq thaa 'siraaj'
kyaa avadh kii begamo.n kaa bhii sataanaa yaad hai
yaad hai jhaa.nsii kii raanii kaa zamaana yaad hai
hijrat-e-sultaan-e-dehlii kaa samaa.n bhii yaad hai
sher-dil 'Tiipuu' kii KHuunii.n daastaa.n bhii yaad hai
tiisare faaqe me.n ik girte hu.e ko thaamne
kas ke tum laa.e the sar shaah-e-zafar ke saamne
yaad to hogii vo maTiyaa-burj kii bhii daastaa.n
ab bhii jis kii KHaak se uThtaa hai rah rah kar dhu.aa.n
tum ne qaisar-e-baaG ko dekhaa to hogaa baarhaa
aaj bhii aatii hai jis se haa.e 'aKHtar' kii sadaa
sach kaho kyaa haafize me.n hai vo zulm-e-be-panaah
aaj tak ragoon me.n ik qabr hai jis kii gavaah
zehn me.n hogaa ye taaza hindiyo.n kaa daaG bhii
yaad to hogaa tumhe.n jallianwala-bagh bhii
puuchh lo is se tumhaaraa naam kyuu.n taabinda hai
'dyer'-e-gurg-e-dahan-aaluud ab bhii zinda hai
vo 'bhagat-singh' ab bhii jis ke Gam me.n dil naashaad hai
us kii gardan me.n jo Daalaa thaa vo phandaa yaad hai
ahl-e-aazaadii rahaa karte the kis hanjaar se
puuchh lo ye qaid-KHaano.n ke dar-o-diivaar se
ab bhii hai mahfuuz jis par tantana sarkaar kaa
aaj bhii guu.njii hu.ii hai jin me.n ko.Do.n kii sadaa
aaj kashtii amn ke amvaaj par khete ho kyuu.n
saKHt hairaa.n huu.n ki ab tum dars-e-haq dete ho kyuu.n
ahl-e-quvvat daam-e-haq me.n to kabhii aate nahii.n
''bankii'' aKHlaaq ko KHatre me.n bhii laate nahii.n
lekin aaj aKHlaaq kii talqiin farmaate ho tum
ho na ho apne me.n ab quvvat nahii.n paate ho tum
ahl-e-haq raushan-nazar hai.n ahl-e-baatin kor hai.n
ye to hai.n aqvaal un qaumo.n ke jo kamzor hai.n
aaj shaayad manzil-e-quvvat me.n tum rahte nahii.n
jis kii laaThii us kii bhai.ns ab kis liye kahte nahii.n
kyaa kahaa insaaf hai insaa.n kaa farz-e-avvalii.n
kyaa fasaad-o-zulm kaa ab tum me.n kas baaqii nahii.n
der se baiThe ho naKHl-e-raastii kii chhaa.nv me.n
kyaa KHudaa-naa-karda kuchh moch aa ga.ii hai paa.nv me.n
guu.nj Taapo.n kii na aabaadii na viiraane me.n hai
KHair to hai asp-e-taazii kyaa shifaa-KHaane me.n hai
aaj kal to har nazar me.n rahm kaa andaaz hai
kuchh tabii.at kyaa nasiib-e-dushmanaa.n naa-saaz hai
saa.ns kyaa ukh.Dii ki haq ke naam par marne lage
nau-e-insaa.n kii havaa-KHvaahii kaa dam bharne lage
zulm bhuule raagnii insaaf kii gaane lage
lag ga.ii hai aag kyaa ghar me.n ki chillaane lage
mujrmo.n ke vaaste zebaa nahii.n ye shor-o-shain
kal 'yaziid' o 'shimr' the aur aaj bante ho 'husain'
KHair ai saudaagaro ab hai to bas is baat me.n
vaqt ke farmaan ke aage jhukaa do gardane.n
ik kahaanii vaqt likkhegaa na.e mazmuun kii
jis kii surKHii ko zaruurat hai tumhaare KHuun kii
vaqt kaa farmaan apnaa ruKH badal saktaa nahii.n
maut Tal saktii hai ab farmaan Tal saktaa nahii.n

Josh Malihabadi
Nazm

muslim umma ka America se shikwa

aa ke is mulk me.n rishte hii faqat jo.De hai.n
bam to kyaa ham ne paTaaKHe bhii nahii.n chho.De hai.n

Khalid Irfan
Nazm

mujhe le chal

jahaa.n aabaad ye naapaak shahristaa.n nahii.n hote
fasaadii fitna-parvar aur zaliil insaa.n nahii.n hote
ye insaa.n haa.n ye haivaa.n bad-tar az-shaitaa.n nahii.n hote
fasaad-o-shar jahaa.n sote hai.n KHvaabo.n ke mazaaro.n me.n!
mirii 'salmaa'! mujhe le chal tuu un ra.ngii.n nazaaro.n me.n!

Akhtar Shirani
Nazm

guru-nanak dev ji

tire jamaal se ai aaftaab-e-nankaana
nikhar nikhar gayaa husn-e-shu.uur-e-rindaana
kuchh aise rang se chhe.Daa rabaab-e-mastaana
ki jhuumne lagaa ruuhaaniyat kaa mai-KHaana
tirii sharaab se mad.hosh ho ga.e mai-KHvaar
du.ii miTaa ke ham aaGosh ho ga.e mai-KHvaar
tiraa payaam thaa Duubaa hu.aa tabassum me.n
bharii thii ruuh-e-lataafat tire takallum me.n
navaa-e-haq kii kashish thii tire tarannum me.n
yaqii.n kii sham.a jalaa.ii shab-e-tavahhum me.n
dilo.n ko haq se ham-aaha.ng kar diyaa tuu ne
gulo.n ko guu.ndh ke yak-ra.ng kar diyaa tuu ne
tirii navaa ne diyaa nuur aadamiyat ko
miTaa ke rakh diyaa hirs-o-havaa kii zulmat ko
dilo.n se duur kiyaa siim-o-zar kii raGbat ko
ki paa liyaa thaa tire dil ne haq kii daulat ko
hujuum-e-zulmat-e-baatil me.n haq-panaahii kii
faqiir ho ke bhii duniyaa me.n baadshaahii kii
tirii nigaah me.n qur.aan-o-diid kaa aalam
tiraa KHayaal thaa raaz-e-hayaat kaa mahram
har ek gul pe Tapaktii thii pyaar kii shabnam
ki bas gayaa thaa nazar me.n bahisht kaa mausam
nafas nafas me.n kalii ra.ng-o-buu kii Dhaltii thii
nasiim thii ki farishto.n kii saa.ns chaltii thii
tirii sharaab se baabaa fariid the sarshaar
tire KHuluus se be-KHud the suufiiyaan-e-kibaar
kahaa.n kahaa.n nahii.n pahu.nchii tire qadam kii bahaar
tire amal ne sa.nvaare jahaan ke kirdaar
tirii nigaah ne sahbaa-e-aagahii de dii
bashar ke haath me.n qindiil-e-zindagii de dii
tire payaam se aisii kii thii masiihaa.ii
tire suKHan me.n habiib-e-KHudaa kii raanaa.ii
tire kalaam me.n gautam kaa nuur-e-daanaa.ii
tire taraane me.n murlii kaa lahn-e-yaktaa.ii
har ek nuur nazar aayaa tere paikar me.n
tamaam nik.hate.n simTii hai.n ik gul-e-tar me.n
jahaa.n jahaa.n bhii gayaa tuu ne aagahii baa.nTii
a.ndherii raat me.n chaahat kii raushnii baa.nTii
ataa kiyaa dil-e-bedaar zindagii baa.nTii
fasaad-o-ja.ng kii duniyaa me.n shaa.ntii baa.nTii
bahaar aa.ii khilii pyaar kii kalii har suu
tire nafas se nasiim-e-sahar chalii har suu
razaa-e-haq ko najaat-e-bashar kahaa tuu ne
ta.a.iinaat-e-KHudii ko zarar kahaa tuu ne
vafaa-nigar ko haqiiqat-nigar kahaa tuu ne
zuhuur-e-ishq ko sachchii sahar kahaa tuu ne
jahaan-e-ishq me.n kuchh besh-o-kam kaa farq na thaa
tirii nigaah me.n dair-o-haram kaa farq na thaa
bataayaa tuu ne ki irfaa.n se aashnaa honaa
kabhii na aashiq-e-duniyaa-e-be-vafaa honaa
badii se shaam-o-sahar jang-aazmaa honaa
KHudaa se duur na ai banda-e-KHudaa honaa
nashe me.n daulat-o-zar ke na chuur ho jaanaa
qariib aa.e jo duniyaa to duur ho jaanaa
jo ruuh ban ke samaa jaa.e har rag-o-pai me.n
to phir na shahd me.n lazzat na saaGar-e-mai me.n
vahii hai saaz ke parde me.n lahn me.n lai me.n
usii kii zaat kii parchhaa.iyaa.n har ik shai me.n
na mauj hai na sitaaro.n kii aab hai ko.ii
tajalliyo.n ke idhar aaftaab hai ko.ii
abad kaa nuur faraaham kiyaa sahar ke liye
diyaa payaam bahaaro.n kaa dasht-o-dar ke liye
diye jalaa diye taariik rahguzar ke liye
jiyaa bashar ke liye jaan dii bashar ke liye
du.aa ye hai ki rahe ishq hashr tak teraa
zamii.n pe aam ho ye dard-e-mushtarak teraa
KHudaa kare ki zamaana sune tirii aavaaz
har ik jabii.n ko mayassar ho teraa aks-e-niyaaz
jahaa.n me.n aam ho tere hii pyaar kaa andaaz
KHuluus-e-dil se ho puujaa KHuluus-e-dil se namaaz
tire payaam kii barakat se nek ho jaa.e.n
ye imtiyaaz miTe.n log ek ho jaa.e.n

Darshan Singh
Nazm

zarurat-e-ittihad

yaa KHudaa hind par karam farmaa
is kii takliif kal-adam farmaa
hai.n pareshaa.n bahut havaas is ke
nahii.n hamdard ko.ii paas is ke
faqr-o-faaqa se paa.emaal hai ab
qarz me.n is kaa baal baal hai ab
na hii san.at na ab tijaarat hai
saarii aasuudgii vo Gaarat hai
ilm-o-fan se hai is kaa ghar KHaalii
aql o idraak se hai sar KHaalii
achchhe atvaar miT ga.e is ke
nek kirdaar miT ga.e is ke
KHulq hai ab na mehr-o-ulfat hai
aatishii hai na ab uKHuvvat hai
ra.ng bilkul hai mulk kaa badlaa
saaraa paanii hai chaah kaa gadlaa
har taraf jahl hai la.Daa.ii hai
dushman aapas me.n bhaa.ii bhaa.ii hai
na mohabbat hai ab na hamdardii
na dilerii na ab javaa.n-mardii
na ravaa-daarii o sharaafat hai
na ab amn-o-amaan o raahat hai
har taraf hai fasaad ha.ngaama
ko.ii rustam hai aur ko.ii gaamaa
ab kahaa.n sulh-o-KHair kii baate.n
jab hai.n kaano.n me.n Gair kii baate.n
john-bill kii hai.n saazishe.n jaarii
mulk par hai.n navaazishe.n jaarii
ek se hai kabhii shanaasaa.ii
duusre ke liye kabhii saa.ii
kabhii in ko la.Daa diyaa sab se
kabhii un ko bhi.Daa diyaa sab se
kabhii in ko police o thaana hai
aur kabhii un ko jail-KHaana hai
yahii manzar yahaa.n hai shaam-o-sahar
bas yahii ho rahaa hai aaTh pahar
jaantaa hai har ik ye sab baate.n
phir bhii KHaalii nahii.n havaalaate.n
vahii ja.ng-o-jadal vahii jhag.De
vahii buGz-o-enaad ke rag.De
yaa KHudaa de hame.n vo aql-e-saliim
ki samajh ham sake.n har ik scheme
pa.D sake phir na ko.ii zad ham par
khul sake.n saare nek-o-bad ham par
KHatm kar de.n ye tafraqa-saazii
aag me.n jho.nk de.n tabar-yaazii
sab kare.n mil ke mulk kii KHidmat
duur ho is kii usrat-o-nakbat
hikmat o fan vatan me.n phailaa.e.n
shaahraahe.n masal kii khul jaa.e.n
ilm o science mulk me.n bhar de.n
is zamii.n ko ham aasmaa.n kar de.n
ham pe khul jaa.e.n sab vo aql ke raaz
ho is kaa europe ke turra-e-e.azaaz
san.ato.n kii ho garm-baazaarii
gaa.nv gaa.nv me.n ho.n mile.n jaarii
rail, motor, jahaaz, tayyaare
KHud ye tayaar ham kare.n saare
kabhii sahraa ho mustaqar apnaa
ho kabhii Taapuu.o.n me.n ghar apnaa
manchester pe KHaak Daale.nge
ghar se jaapaan ko nikaale.n ham
na rahe.n ham kisii ke bhii muhtaaj
mulk apnaa ho aur apnaa raaj
ham me.n gar ittihaad ho jaa.e
mulk aabaad shaad ho jaa.e

Ahmaq Phaphoondvi
Nazm

fasad-e-zat

tumhaaraa ahd agar ustuvaar hii hotaa
to phir bhii daaman-e-dil taar taar hii hotaa
KHud apnii zaat hii naaKHun KHud apnii zaat hii zaKHm
KHud apnaa dil rag-e-jaa.n aur KHud apnaa dil nashtar
fasaad-e-KHalq bhii KHud aur fasaad-e-zaat bhii KHud
safar kaa vaqt bhii KHud ja.ngalo.n kii raat bhii KHud

Mustafa Zaidi
Nazm

gandhi-ji ki aawaz

salaam ai ufuq-e-hind ke hasii.n taaro
salaam tum pe sip.har-e-vatan ke mah-paaro
salaam tum pe mire bachcho ai mire pyaaro
bhulaa.e baiThe ho tum mujh ko kis liye yaaro
jalaa.o mere payaamaat ke diye yaaro
suno ki merii tamannaa-o-aarzuu tum ho
suno ki maadar-e-bhaarat kii aabruu tum ho
suno ki amn-e-zamaana kii justujuu tum ho
KHamosh baiThe ho kyuu.n apne lab siye yaaro
jalaa.o mere payaamaat ke diye yaaro
salaam tum pe ki mere chaman ke phuul ho tum
mirii nazar mirii fitrat miraa usuul ho tum
magar ye kyaa hu.aa kis vaaste maluul ho tum
ye tum ne chand Galat kaam kyuu.n kiye yaaro
jalaa.o mere payaamaat ke diye yaaro
vatan me.n KHuun ke dariyaa bahaa diye tum ne
sabhii nuquush-e-ahinsaa miTaa diye tum ne
rivaaj-kaar-e-mohabbat bhalaa diye tum ne
rusuum-e-mehr-o-vafaa tark kar diye yaaro
jalaa.o mere payaamaat ke diye yaaro
sabaq pa.Dhaayaa thaa tum ko adam-tashaddud kaa
tumhe.n bataayaa thaa mai.n ne gunaah hai hinsaa
ye tum ne kis liye teG-o-tabar se kaam liyaa
tumhaare haatho.n me.n KHanjar hai.n kis liye yaaro
jalaa.o mere payaamaat ke diye yaaro
tumhaare zehno.n me.n makruuh saazish aur fasaad
dilo.n me.n nafrat-o-kiina hai aur buGz-o-inaad
magar labo.n pe hai baabaa-e-qaum zindabaad
mujhe ye khokhle na.are na chaahiye yaaro
jalaa.o mere payaamaat ke diye yaaro
zamiin naanak-o-chishtii pukaartii hai tumhe.n
dayaar-e-budh kii tajallii pukaartii hai tumhe.n
suno kanhaiyaa kii bansii pukaartii hai tumhe.n
ab aur der bhii karnii na chaahiye yaaro
jalaa.o mere payaamaat ke diye yaaro
uTho zamaana-e-haazir hai ik payaam-e-amal
uTho ki kaa.np rahii hai navaa-e-saaz-e-Gazal
uTho ki maa.nd na ho jaa.e husn-e-taaj-mahal
uTho ki siino.n me.n phir raushnii jiye yaaro
jalaa.o mere payaamaat ke diye yaaro
phir apne zehno.n me.n lahkaa.o dostii kaa chaman
phir apnii saa.nso.n se mahkaa.o pyaar kaa madhuuban
phir apne kaamo.n se chamkaa.o sar-zamiin-e-vatan
tumhaare mai-kade me.n dahr phir piye yaaro
jalaa.o mere payaamaat ke diye yaaro
na chho.Do zinda vatan me.n kisii luTere ko
kuchal do ba.Dh ke har ik saa.np ko sapere ko
miTaa.o firqa-parastii ke har a.ndhere ko
bachaa.o desh ko bhagvaan ke liye yaaro
jalaa.o mere payaamaat ke diye yaaro
mujhe ye khokhle na.are na chaahiye yaaro

Nazish Partap Gadhi
Nazm

janm-ashTami

vaziir-chand ne puuchhaa zafar-alii-KHaa.n se
shrii-krishn se kyaa tum ko bhii iraadat hai
kahaa ye us ne vo the apne vaqt ke haadii
isii liye adab un kaa mirii sa.aadat hai
fasaad se unhe.n nafrat thii jo hai mujh ko bhii
aur us pe de rahii fitrat mirii shahaadat hai
hai is vatan me.n ik aisaa giroh bhii maujuud
shrii-krishn kii jo kar rahaa ibaadat hai
magar fasaad hai us kii sarisht me.n daaKHil
bichaare kyaa kare.n pa.D hii chukii ye aadat hai

Zafar Ali Khan
Nazm

ghar ki raunaq

ham apne ahl siyaasat ke dil se qaa.el hai.n
ki haq me.n qaum ke vo maadar-e-masaa.il hai.n
qadam qadam pe na.e gul khilaate rahte hai.n
tarah tarah ke masaa.il ugaate rahte hai.n
kabhii ye dhun hai ki suubo.n kii phir se ho tashkiil
kabhii ye zid hai ki had-bi.ndiyaa.n na ho.n tabdiil
kabhii ye shor karo KHatm chor-baazaarii
munaafa-KHoro.n kii lekin na ho giraftaarii
baraa.e-bahs kha.Daa hai kabhii ye ha.ngaama
libaas qaum kaa dhotii ho yaa ki paajaama
har ek bahs me.n kuchh kisht-o-KHuu.n zaruurii hai
nahii.n to jo bhii hai tahriik vo adhuurii hai
har ek fitna-o-shorish kaa aaKHirii jalva
muzaaharaat o juluus o tasaadum o balva
yuu.nhii uThaa.ii ga.ii bahs jab zabaa.n ke liye
''suKHan bahaana hu.aa marg-e-naa-gahaa.n ke liye''
vo mas.ala ki jo daanish-kado.n me.n hal hotaa
balaa se aaj agar tai na hotaa kal hotaa
use bhii ahl-e-siyaasat ne kar liyaa iGvaa
aur is ke baa'd vo sab kuchh hu.aa jo honaa thaa
nifaaq o buGz o ta.assub ke aa ga.e rele
zabaa.n kii aa.D me.n ahl-e-fasaad khul-khele
muKHaalifat me.n hu.ii jaa-ba-jaa saf-aaraa.ii
juluus le ke chale ik taraf se balvaa.ii
labo.n pe GalGala-e-''inqilaab zindaabaad''
magar dilo.n mai.n dabaa.e hu.e sharaar-e-fasaad
dukaane.n lauTii ga.ii.n raah-giir maare ga.e
gharo.n me.n aag lagii tifl o piir maare ga.e
vo pahlaa shaKHs jau khaa kar chhure kaa zaKHm giraa
maze kii baat to ye hai, Gariib guu.ngaa thaa
maziid ye ki ise jaa.n se maarne vaale
kisii zabaan se vaaqif na the KHud an-pa.Dh the

Raza Naqvi Vahi
Nazm

hidayat

Gazab mas.ala hai ye mohabbat tumhaarii
suljhaa lo
kahii.n vo lafz aur ye harakat tumhaarii na tazaad rah jaa.e
lete jaa.o ye likhe KHat bhii tumhaare
mere aage ba.Dhne me.n na ye fasaad rah jaa.e

Geetanjali Geet
Nazm

curfew mein mushaera

kyaa jaane us zariif ke kyaa dil me.n aa.ii thii
curfew me.n jis ne mahfil-e-sherii sajaa.ii thii
allaah aisaa zauq jahannam me.n Daal de
curfew me.n shaa.iro.n ko jo ghar se nikaal de
aise me.n jab ki shahr ke sab raaste ho.n band
sa.Dko.n pe aa ga.e the ye baa-zauq shar-pasand
aise me.n jab ki ghar se nikalnaa muhaal thaa
lekin ye shaa.iro.n kii anaa kaa savaal thaa
sherii-mahaaz KHaana-e-shaa.er se duur thaa
ka.aba me.n haajiyo.n ko pahu.nchnaa zaruur thaa
shaa.ir ravaa.n the sher ke chaaquu liye hu.e
dil me.n KHayaal-e-KHidmat-e-urdu liye hu.e
zor-e-qalam ke saath sipaah-e-riyaaz thii
qaanuun haath me.n thaa baGal me.n bayaaz thii
galiyo.n me.n qatl-o-KHuu.n thaa sa.Dak par fasaad thaa
shaa.ir ba-zor-e-fikr shariik-e-jihaad thaa
kaisii nikal rahii thii sadaa gun-machine se
jaise kisii ko daad mile saama.iin se
shaa.ir bayaaz laa.e the sanduuq kii tarah
misre ugal rahe the vo banduuq kii tarah
jab firing ahl-e-suKHan kii hu.ii tamaam
ye KHidmat-e-adab kaa police ne sila diyaa
kuchh shaa.iro.n ko road pe murGaa banaa diyaa
kuchh kohna-mashq bhii the sujuud-o-rukuu me.n
jabran unhe.n pa.Dhaayaa gayaa thaa shuruu.a me.n
tarhii mushaa.ere kaa samaa.n de rahe the vo
ik misra-e-tarah pe azaa.n de rahe the vo
kuchh shaa.iro.n ko naGma-saraa.ii kii fikr thii
sadr-e-mushaa.ira ko rihaa.ii kii fikr thii
jab shaa.iro.n ke haath shariik-e-du.aa hu.e
curfew kaa vaqt KHatm hu.aa tab rihaa hu.e
sab apne apne ghar ga.e is haav-huu ke ba.ad
shaa.ir-aziim hotaa hai har curfew ke ba.ad

Khalid Irfan
Nazm

fasad ke baad

fasaad-e-shahr tham gayaa
fazaa me.n bas ga.ii hai ek zahr-naak KHaamushii
hiraas KHauf bebasii

Abdul Ahad Saaz
Nazm

na-guzir

ye chaa.ndnii ye sitaare ye aabshaar ye jhiil
ye jugnu.o.n kii chamak aur ye titliyo.n kii u.Daan
ye koyale.n ye papiihe tarah tarah ke ye phuul
ghane ghane se daraKHto.n ke miiThe miiThe phal
hasiin KHvaab me.n bachche kii jaadu.ii muskaan
vafaa KHuluus mohabbat jihaad qurbaanii
ye sab qadiim hai.n in me.n nayaa to kuchh bhii nahii.n
hamaare apne masaa.il bhii sab puraane hai.n
ye kusht-o-KHuun ye Gaarat-garii ye barbaadii
havaa-o-hirs-o-mazaalim kii daastaan-e-taviil
galii galii ye sharaab-o-shabaab ke fitne
zar-o-zamiin kaa ab tak vahii qadiim fasaad
ye saarii baate.n hamesha se thii.n aur aaj bhii hai.n
ye baat ab bhii nahii.n tai hu.ii ki sach kyaa hai
agar yahii hai muqaddar hamaarii duniyaa kaa
kisii rasuul ke aane kii kyaa zaruurat thii

Hosh Jaunpuri
Nazm

KHanjar talash karta hai

bashar rumuuz-e-muqaddar talaash kartaa hai
qazaa-o-qadr kaa mehvar talaash kartaa hai
faqiih-e-shahr sanam-KHaana-e-siyaasat me.n
siraat-e-diin kaa rahbar talaash kartaa hai
KHudaa ko chho.D ke jamhuur kaa havas-pesha
sukuun-e-qalb falak par talaash kartaa hai
mazaaq-e-adl se begaana hai magar insaan
fasaad-KHaana me.n yaavar talaash kartaa hai
pa.e najaat vatan me.n ba-faiz-e-aazaadii
shariif aadmii KHanjar talaash kartaa hai
fazaa-e-dahr me.n taKHriib kaa alam-bardaar
hayaat-saaz payambar talaash kartaa hai
taraashtaa hai baraahiim-e-asr sad-asnaam
charaaG-e-tuur par aazar talaash kartaa hai
barahna zulmat-e-tahziib me.n tan-e-maryam
masiih-e-vaqt kii chaadar talaash kartaa hai
sanam-kade me.n tafalsuf ke tiira-dil vaa.iz
uvais-o-KHaalid-o-buu-zar talaash kartaa hai
ilaaj KHaatir-e-millat kaa paasbaan-e-haram
la.iin-e-vaqt ke dar par talaash kartaa hai
KHuluus-e-diin ko ba.ad-az-KHaraabi-e-bisyaar
zamaana aaj mukarrar talaash kartaa hai
tan-e-shuyuuKH ba-zaahir galiim-posh sahii
zamiir shaahid-o-saaGar talaash kartaa hai
du.aa asiirii kii kartaa hai saahab-e-qur.aa.n
mafar Gulaamii se kaafar talaash kartaa hai
mazaaq-e-faqr hai rahmat asar zamaane me.n
azaab-e-kunz tava.ngar talaash kartaa hai
jahaan-e-shor me.n paiham yaziid kaa lashkar
husain-e-asr ko ghar ghar talaash kartaa hai
sa.nvar to saktii hai millat kii naasehaa taqdiir
lahuu zamaane kaa tevar talaash kartaa hai
miyaan-e-bahr sadaf me.n guhar to hai lekin
KHatar-pasand shanaavar talaash kartaa hai
zamaana batn-e-jahannam me.n ek muddat se
nishaat-o-kaif baraabar talaash kartaa hai
gunaahgaar hai 'bebaak' be-navaa lekin
nabii kaa gumbad-e-aKHzar talaash kartaa hai

Bebak Bhojpuri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now