Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gosht"

Nazm MATCHES FOR "gosht"

Nazm

raqib se!

jab kabhii biktaa hai baazaar me.n mazduur kaa gosht
shaah-raaho.n pe Gariibo.n kaa lahuu bahtaa hai
aag sii siine me.n rah rah ke ubaltii hai na puuchh
apne dil par mujhe qaabuu hii nahii.n rahtaa hai

Faiz Ahmad Faiz
Nazm

sone se pahle

har la.Dkii ke
takiye ke niiche
tez blade
go.nd kii shiishii
aur kuchh tasviire.n hotii hai.n
sone se pahle
vo ka.ii tasviiro.n kii taraash-KHaraash se
ek tasviir banaatii hai
kisii kii aa.nkhe.n kisii ke chehre par lagaatii hai
kisii ke jism par kisii kaa chehra sajaatii hai
aur jab is khel se uub jaatii hai
to kisii bhii gosht-post ke aadmii ke saath
lipaT kar so jaatii hai

Nida Fazli
Nazm

abul-ala-marri

kahte hai.n kabhii gosht na khaataa thaa ma.arrii
phal-phuul pe kartaa thaa hamesha guzar-auqaat
ik dost ne bhuunaa hu.aa tiitar use bhejaa
shaayad ki vo shaatir isii tarkiib se ho maat
ye KHvaan-e-tar-o-taaza ma.arrii ne jo dekhaa
kahne lagaa vo saahib-e-Gufraan-o-luzuumaat
ai murGak-e-bechaara zaraa ye to bataa tuu
teraa vo gunah kyaa thaa ye hai jis kii mukaafaat?
afsos-sad-afsos ki shaahii.n na banaa tuu
dekhe na tirii aa.nkh ne fitrat ke ishaaraat!
taqdiir ke qaazii kaa ye fatvaa hai azal se
hai jurm-e-za.iifii kii sazaa marg-e-mufaajaat!

Allama Iqbal
Nazm

aurat aur namak

tum kis kumbe kii maa.n ho
reip kii qaid kii baTe hu.e jism kii
yaa ii.nTo.n me.n chunii hu.ii beTiyo.n kii
baazaaro.n me.n tumhaarii beTiyaa.n
apne lahuu se bhuuk guu.ndhtii hai.n
aur apnaa gosht khaatii hai.n
ye tumhaarii kaun sii aa.nkhe.n hai.n
ye tumhaare ghar kii diivaar kii kaun sii chinaa.ii hai
tum ne merii ha.nsii me.n ta.aaruf rakkhaa
aur apne beTe kaa naam sikka-e-raa.ij-ul-vaqt

Sara Shagufta
Nazm

rishwat

sirf ik patluun silvaanaa qayaamat ho gayaa
vo silaa.ii lii miyaa.n darzii ne na.ngaa kar diyaa
aap ko ma.aluum bhii hai chal rahii hai kyaa havaa
sirf ik tie kii qiimat gho.nT detii hai galaa

Josh Malihabadi
Nazm

munni tere dant kahan hain

munnii tere daa.nt kahaa.n hai.n
daa.nt the mai.n ne duudh pilaa kar saat baras me.n paale
aa kar un ko le ga.e chuuhe lambii mo.nchho.n vaale
gu.D kaa un ko maaT milaa thaa miiThaa aur mazedaar
laakh KHushaamad kar ke mujh se le liye daa.nt udhaar
munnii tere daa.nt kahaa.n hai.n
billii thii ik maamii mausii chupke chupke aa.ii
panjo.n par thii deg kii khurchan ho.nTo.n par baalaa.ii
bolii gu.D ke maaT pe mai.n ne chuuhe dekhe chaar
hissa aadho.n-aadh rahegaa de do daa.nt udhaar
munnii tere daa.nt kahaa.n hai.n
ba.ad me.n buu.Dhaa motii aayaa ronii shakl banaa.e
bolaa biibii is billii kaa kuchh to kare.n upaa.e
duudh na chho.De gosht na chho.De hai.n buDDhaa laachaar
is ko karuu.n shikaar jo mujh ko de do daa.nt udhaar
achchhii munnii tum ne apne itne daa.nt ga.nvaa.e
kuchh chuuho.n ne kuchh billii ne kuchh motii ne paa.e
baaqii jo do-chaar rahe hai.n vo ham ko dilvaa.o
ik daavat me.n aaj mile.nge tikke aur polaav
murGii ke paa.e kaa saalan baigan kaa aachaar
dogii yaa kisii aur se maa.nguu.n
haa.n diye udhaar
baabaa haa.n haa.n diye udhaar
munnii tere daa.nt kahaa.n hai.n

Ibn۔e۔Insha
Nazm

biwiyan

pahle to shauharo.n ko paTaatii hai.n biiviyaa.n
tigunii kaa naach phir ye nachaatii hai.n biiviyaa.n
har shab shab-baraat banaatii hai.n biiviyaa.n
kuchh din ke baa'd chhakke chhu.Daatii hai.n biiviyaa.n
pahle-pahal to kahtii hai.n tum ho mire balam
tum mil ga.e to ho ga.e duniyaa ke duur Gam
tum par hazaar jaan se qurbaan mai.n sanam
kuchh din ke baa'd kahtii hai.n shauhar ko phir KHasm
pahle to KHuub sar pe cha.Daatii hai.n biiviyaa.n
qadmo.n me.n is ke baa'd giraatii hai.n biiviyaa.n
khaa khaa ke gosht weight na apnaa ba.Dhaa.iye
jo mai.n banaa rahii huu.n vo chup-chaap khaa.iye
is vaqt ghar me.n aa.iye us vaqt jaa.iye
jaanaa kahaa.n hai jaane se pahle bataa.iye
is tarah control me.n laatii hai.n biiviyaa.n
haakim ko bhii Gulaam banaatii hai.n biiviyaa.n
vo santarii ho ko.ii ki ho ko.ii mantarii
hotaa hai haavii sab pe hii ehsaas-e-kamtarii
kaisaa bhii sher-dil ho bahaadur ho yaa jarii
rahtii hai jin ke KHauf se duniyaa Darii Darii
aise bahaaduro.n ko dabaatii hai.n biiviyaa.n
phir u.ngliyo.n pe un ko nachaatii hai.n biiviyaa.n
bachcho.n kii baat chho.Diye begam kaa hai ye haal
Gusse me.n yuu.n samajhiye ki har shai pe hai zavaal
samjhaa.e kaun aise me.n kis kii hai ye majaal
is shor-o-Gul me.n shaa.erii karnaa bhii hai muhaal
qai.nchii-sifat zabaan chalaatii hai.n biiviyaa.n
Tar-Tar se phir dimaaG dukhaatii hai.n biiviyaa.n
sasuraal me.n ho shaadii to KHarcha ho kam janaab
maike me.n hai to KHarch ye kartii hai.n be-hisaab
vo saas yaa sasur ho.n ki devar ho sab KHaraab
aayaa hu.aa hai maike se kuttaa bhii laa-javaab
kuchh is tarah dimaaG pe chhaatii hai.n biiviyaa.n
shauhar ke rishte-daar chhu.Daatii hai.n biiviyaa.n

Nashtar Amrohvi
Nazm

apahij gaDi ka aadmi

kuchh aaise hai.n jo zindagii ko mah-o-saal se naapte hai.n
gosht se saag se daal se naapte hai.n
KHat-o-KHaal se gesu.o.n kii mahak chaal se naapte hai.n
sa.uubat se janjaal se naapte hai.n
yaa apne a.amaal se naapte hai.n
magar ham ise azm-e-paamaal se naapte hai.n

Akhtarul Iman
Nazm

ubaal

hazaaro.n baras se mirii aatmaa uu.ngh me.n pha.ns ga.ii thii
jab insaan do pattharo.n ko raga.D kar kuhan-saal suuraj kii surKH aatmaa ko bulaane lagaa thaa
magar tez aa.nch aur bahut tez buu ne jhi.njho.Daa to ab aa.nkh phaa.De hu.e
dam-ba-KHud hai
ubalne lagii.n sabziyaa.n phuul phal gosht daale.n anaaj
abhii shorbe ke khadakne kii aavaaz chhaa.ii hu.ii thii
abhii saa.np-chhatrii lagaa.e hu.e bhaap niile KHalaa.o.n kii jaanib ravaa.n hai
vo jis kii ziyaafat kii tayyaariyaa.n thii.n kahaa.n hai
mirii aatmaa jaag kar chiiKHtii hai
ye haa.nDii ubalne lagii hai
ye miTTii kii haa.nDii ubalne lagii hai
ye miTTii kii diivaanii haa.nDii ubalne lagii hai

Ameeq Hanafi
Nazm

eid ki KHaridari

musalmaa.n qarz le kar eid kaa saamaa.n KHariide.nge
jo daanaa hai.n vo beche.nge jo hai.n naadaa.n KHariide.nge
jo sayyaa.n shauq se khaa.e.n vo sivayyaa.n KHariide.nge
murkkab suud kaa saudaa ba-naqd-e-jaa.n KHariide.nge
musalmaano.n ke sar par jab mah-e-shavvaal aataa hai
to un kii iqtisaadiyaat me.n bhau.nchaal aataa hai
baham dast-o-garebaa.n sales-man aur un ke gaahak hai.n
vo Gul barpaa hai jaise naGma-zan chauha.D me.n me.nDak hai.n
mizaajan roza-daar-e-shaam baaruud aur gandhak hai.n
aur un me.n nazm aur zabt aur ravaa-daarii yahaa.n tak hai.n
ki shiddat bhuuk kii aur pyaas kii aise miTaate hai.n
ba-zo.am-e-roza abnaa-e-vatan ko kaaT khaate hai.n
jo mujh aise hai.n ri.nd un ko bhii zo.am-e-paarsaa.ii hai
aur is mazmuun kii ik daavat-e-iftaar aa.ii hai
ki ik chaaliis-saala tifl kii roza-kushaa.ii hai
farishte is pe hairaa.n dam-ba-KHud saarii KHudaa.ii hai
KHudaavand-e-do-aalam se vo ye bevpaar karte hai.n
jo rakkhaa hii nahii.n roza use iftaar karte hai.n
miyaa.n biivii chale baazaar ko bahr-e-KHariidaarii
miThaa.ii phal sivayyaa.n itr juute gosht tarkaarii
jo shai biivii ne lii vo dosh par shauhar ke de maarii
vo be-chaara to KHachchar hai baraa.e baar-bardaarii
ba-zor-e-qarz duukaano.n pe itnaa fazl-e-baarii hai
ki is ghamsaan me.n insaan par insaan taarii hai
liyaa biivii ne shauhar ke liye juutaa jo arzaa.n hai
vo amriikii madad kii tarah us ke sar pe ehsaa.n hai
ki is se faa.eda pahu.nchegaa us ko jis kii duukaa.n hai
aur us shauhar kaa juutaa KHud usii ke sar pe raqsaa.n hai
ye suurat dekh kar kahte hai.n akasr dil me.n bin-byaahe
''dil o dii.n naqd laa saaqii se gar saudaa kiyaa chaahe''
jo silne ko diye kap.De vo hai.n sab habs-e-bejaa me.n
ki darzii chhup gayaa jab atlas-o-kamKHvaab-o-diibaa me.n
to readymade kap.Do.n kii dukaane.n jhaa.nktaa thaa mai.n
falak par qiimate.n laTkii hu.ii thii.n shaaKH-e-tuubaa me.n
mubaarak maah ke andar hamii.n se naf.a-KHorii hai
nahii.n hotaa hai baatil jis se roza ye vo chorii hai
ye sivayyaa.n jo bal khaatii hu.ii me.ade me.n jaa.e.ngii
siyaasii guththiyo.n ko aur uljhaanaa sikhaa.e.ngii
hamaarii aane vaalii nasl ke leader banaa.e.ngii
jo leader ban chuke hai.n ebdo un ko karaa.e.ngii
''qad o gesuu me.n qais-o-kohkan kii aazmaa.ish hai
jahaa.n ham hai.n vahaa.n daar-o-rasan kii aazmaa.ish hai''
mahiine bhar ke rozo.n baa'd haq ne din ye dikhlaayaa
alal-ailaan khaayaa dosto.n ke saath jo paayaa
ye pahle Dar thaa ham ko jhaa.nk kar dekhe na ham-saaya
ba-juz KHauf-e-KHudaa din me.n ba-zaahir kuchh na thaa khaayaa
hasiino.n mah-vasho.n ko ab sar-e-baazaar dekhe.nge
ga.e vo din ki kahte the pas-az-iftaar dekhe.nge

Syed Mohammad Jafri
Nazm

ye bhi ghalat hai wo bhi ghalat

kal baazaar me.n bhayyaa shaafii
piine aa.e ThanDii coffee
ik do packet biscuit khaa.e
Thuu.ns ga.e do darjan toffee
aaluu chhole khaa kar bole
barfii ek kilo hai kaafii
ammii jii kii baat na maanii
abbuu se kii va.ada-KHilaafii
aisaa khaTkaa peT kaa maTkaa
allaah mu.aafii allaah mu.aafii
guDDuu kaa bhii haal sunaa.e.n
duudh piye.n na anDe khaa.e.n
phal tarkaarii ek na bhaa.e
Gusse me.n bas ho.nT chabaa.e.n
dekh ke dastar-KHvaan pe machhlii
paa.nv paTaKHte bhaage jaa.e.n
chaaval roTii gosht kii boTii
dekhe.n to naKHre dikhlaa.e.n
din kaa ho yaa raat kaa khaanaa
ro.e.n piiTe.n shor machaa.e.n
duble patle ruukhe suukhe
baat karo to la.Dne aa.e.n
itne halke phulke se hai.n
fan chale to u.D hii jaa.e.n

Ahmad Hatib Siddiqi
Nazm

zara socho

farz karo ki saare jaanvar baat bhii karte ham se
un ke jo jii me.n aa jaataa kah dete ek dam se
darvaaze par kuttaa kahtaa bhuuke hai.n do din ke
ko.ii davaa bhii de do dekho makkhii zaKHm pe bhinke
baavarchii-KHaane me.n chyuu.nTii shakar maa.ngtii rahtii
bas do daane bas do daane har phere par kahtii
chi.Diyaa u.Dte phirte khi.Dkii par aavaaz lagaatii
bachcho.n ke kamre me.n chhup kar daal ke daane khaatii
ga.e bail sabzii ke Thele vaalo.n se la.D jaate
DanDe khaa kar gaaliyaa.n bakte dil kii aag bujhaate
billii duudh kaa pyaala pak.De gosht maa.ngtii rahtii
din bhar leTii daadii jaisii apnii baat hii kahtii
bakre kii qurbaanii par kuchh bakre maatam karte
murGe bhii is majlis me.n mu.nh laTkaa kar Gam karte
saas bahuu ke jhag.De kii chhipkiliyaa.n shaahid hotii.n
shauhar kii aamad par saaraa qissa vo hii rotii.n
Garaz ke saarii duniyaa me.n ik shor saa barpaa rahtaa
chup ho jaa.o chup ho jaa.o saaraa aalam kahtaa

Asna Badr
Nazm

dusre darje ki pichhli qatar ka aadmi

gosht machhlii sabziyaa.n baniye kaa ration duudh ghii
mujh ko khaatii hai.n ye chiize.n mai.n ne kab khaayaa inhe.n
meraa ghar rahtaa hai mujh me.n ghar me.n mai.n rahtaa nahii.n
biivii bachcho.n ke phaTe kap.Do.n me.n huu.n
aur na.e jo.Do.n kii KHushiyo.n me.n chhupaa jo karb hai vo bhii huu.n mai.n
fees me.n school kii copy kitaabo.n me.n bhii mai.n
mai.n hii huu.n chuulhe kii gas
mai.n hii huu.n stove kaa gas
mere juute jo.nk kii maanind mere paa.nv se lipTe hu.e hai.n
chuuste hai.n meraa KHuun
meraa scooter mere kaa.ndho.n pe baiThaa hai
mai.n us ke tyro.n me.n lipTaa huu.n aur ghistaa huu.n

Shakeel Azmi
Nazm

abba ka chaaliswan

buu.Dhe Gariib baap ke marne pe daf.atan
beTe ne sochaa kaise karuu.n dafn aur kafan
apne yahaa.n to maut me.n KHarche kaa hai chalan
Gam se niDhaal beTe ke maathe pe thii shikan
jo kuchh thaa paas dafn-o-kafan me.n uThaa diyaa
KHarche ne phir to maut kaa sadma bhulaa diyaa
karnaa pa.Daa jo dafan kaa taa-sub.h intizaar
mayyat ke paas chaltii rahii chaa.e baar baar
aur maut me.n jo aa.e the bairuunii rishta-daar
chaa.e se un kii to.Daa gayaa nii.nd kaa KHumaar
aur is ke baa'd chaltaa jo phir pandaan hai
lagtaa hai sogvaar nahii.n mezbaan hai
purse ko sub.h shaam phir aate hai.n rishta-daar
khaanaa nahii.n to chaa.e kam-az-kam ho ek baar
chaa.e ke saath vaa.e me.n KHarche hai.n be-shumaar
murde ko chho.D KHarche ko rotaa hai sogvaar
tiije ke baa'd dasvaa.n hai phir biisvaa.n bhii hai
phir chand roz baa'd hii chaaliisvaa.n bhii hai
har roz faatiha ke liye gosht chaahiye
saalan bhii sirf ek nahii.n do pakaa.iye
nazr-o-niyaaz ke liye halva banaa.iye
phir roz aane vaalo.n ko chaa.e pilaa.iye
beTaa bichaara dab gayaa qarze ke baar se
barso.n tak ab chhu.Daa.egaa piichhaa udhaar ke
phir is ke baa'd baate.n banaatii hai.n aurte.n
kyaa kyaa kamii rahii ye bataatii hai.n aurte.n
chaaliisvaa.n kuchh aise karaatii hai.n aurte.n
farmaa.isho.n ke Dher lagaatii hai.n aurte.n
is tarah maut ko bhii tamaasha banaa diyaa
vo e'tiraaz uThaa.e kaleja hilaa diyaa
beTe ne naam kar diyaa raushan jahaan me.n
aisii kisii ne maut na kii KHaandaan me.n
chaaliisvaa.n kuchh aisaa kiyaa aan-baan me.n
zevar bahuu kaa bik gayaa masnuu.ii shaan me.n
vo maut kii ki kumbe me.n Da.nkaa bajaa diyaa
chaaliisve.n pe shahr ko khaanaa khilaa diyaa

Nashtar Amrohvi
Nazm

dehli

darinde dau.Dte phirte hai.n sa.Dtii laasho.n me.n
lahuu se tar kiye naaKHuun gosht daa.nto.n me.n

Wamiq Jaunpuri
Nazm

maut meri jaan maut

raushnaa.ii KHushk nib TuuTii hu.ii kaaGaz kii aa.nkhe.n nam
diimako.n kaa ghar dimaaG
aur merii taak me.n tuu
kyuu.n rag-o-pai me.n saraayat kar rahaa hai ye siyaah ehsaas
lamha lamha KHatm hotaa jaa rahaa huu.n
aa.nkh se Tapke hu.e ashko.n ke saath
qatra qatra KHatm!
nuqta nuqta KHatm!
chhah tabassum qarz le kar
suud me.n apne badan kaa gosht adaa karne ke har va.ade ke saath
KHatm hote jaa rahe mujh ko agar paa bhii ga.ii to kyaa karegii
maut merii jaan maut

Ameeq Hanafi
Nazm

main kuchh bhi kah na paya

taa.nge kaa ek gho.Daa
la.ngDaa thaa tho.Daa tho.Daa
puuchhaa jo mai.n ne us se
kyaa paa.nv me.n hai pho.Daa
bolaa ye zulm mujh par
ik aadmii ne to.Daa
pahle to us ne mujh ko
taa.nge me.n laa ke jo.Daa
phir us ko KHuub bhar kar
bolaa ki chal mano.Daa
jab mai.n khisak na paayaa
lahraayaa us ne ko.Daa
maaraa mujhe ta.Daata.D
phir dum ko bhii maro.Daa
mai.n bilbilaa ke bhaagaa
bas ban gayaa bhago.Daa
KHud bhii giraa phisal kar
ek ik kaa sar bhii pho.Daa
us din se aaj tak mai.n
la.ngDaa huu.n tho.Daa tho.Daa
ye daastaa.n sunaa kar
bolaa vo hinhinaa kar
mai.n ne to munnuu bhaa.ii
tabii.at hai saada paa.ii
KHud apne mu.nh se apnii
kartaa nahii.n ba.Daa.ii
qur.aan-e-paak ne bhii
merii qasam hai khaa.ii
gar tiisvaa.n sipaarah
tum ne pa.Dhaa ho bhaa.ii
val-aadiyaat zabhan me.n
baat hai ye aa.ii
insaa.n to apne rab se
kartaa he bevafaa.ii
bas maal-o-zar ke piichhe
hai zindagii ga.nvaa.ii
gho.Do.n ne maaliko.n par
hai jaan bhii luTaa.ii
ham log ha.nste gaate
har bojh hai.n uThaate
hai.n jaanvar hamesha
insaa.n ke kaam aate
maahaul kii kashish bhii
ham log hai.n ba.Dhaate
dilkash parind pyaare
shaaKHo.n pe chahchahaate
saare namaaziyo.n ko
har sub.h hai.n jagaate
phir KHud bhii apne rab kii
hamd-o-sanaa hai.n gaate
sau sau tarah tumhaaraa
ham dil bhii hai.n lubhaate
kuchh aise hai.n ki jin se
tum ho davaa banaate
kuchh uun tum ko de kar
sardii se hai.n bachaate
kuchh duudh tum ko dete
kuchh gosht hai.n khilaate
gar jaanvar na hote
tum ghii kidhar se laate
makkhan paniir anDe
aaKHir kahaa.n se khaate
bas kyaa kahuu.n ki kyaa kyaa
hai.n faa.ede uThaate
phir bhii hai.n log ham ko
har tarah se sataate
ye baat kahte kahte
dukh.Daa ye sab sunaate
aisaa vo bilbilaayaa
mai.n kuchh bhii kah na paayaa

Ahmad Hatib Siddiqi
Nazm

kal jab daraKHt na honge

kal ham ko
sab aaraam mayassar ho.nge
lekin
ham KHush-baKHt na ho.nge
shaayad
jiine kii sarsabz tamannaa
Daalii Daalii
sisak sisak kar
mar jaa.egii
ye taaj aur taKHt na ho.nge
shaayad
viiraan samay
baarish ko tarse.nge
har-suu aag ke sho.ale ho.nge
tab ham par
dhu.e.n kaalak
aur
carbon ke ajzaa barse.nge
jiinaa hai to baahar aa.o
apne liye
aur aane vaalii naslo.n kii
KHaatir
daraKHt lagaa.o
baahar aa.o
aaj parinde aur jaanvar
mushkil me.n hai.n
jald hamaarii baarii hai
dekho
sar pe maut kha.Dii hai
aur ban par
vahshat taarii hai
pahle
jahaa.n nadii bahtii thii
ab ke vahaa.n par
KHuun kaa dariyaa jaarii hai
fasle.n Galla aur
daraKHt hai.n
sab kii zaruurat
kisaan hai
yaa ko.ii haarii hai
maa.ng sabhii kii
gosht hai
duudh aur phal hai.n
sabzii aur tarkaarii hai
vo ghar bhii
kyaa ghar hai jahaa.n par
phal phuul hai.n
na phulvaarii hai
kal jab daraKHt nahii.n ho.nge
ham KHush-baKHt nahii.n ho.nge

Ashraf Jawed Malik
Nazm

qurbani ke bakre

qurbaanii ho bhii jaa.e magar khi.nch rahii hai khaal
ai gosht khaane vaalo zaraa KHud karo KHayaal
bakre ke saath hotaa hai gaahak kaa intiqaal
gar qiimate.n yahii hai.n to jiine kaa kyaa savaal
hai.n gallaa-baan logo.n ke piichhe pa.De hu.e
aur bakraa le ke ham bhii hai.n murGe bane hu.e

Syed Mohammad Jafri
Nazm

saugandhi

aa.iina dekhuu.n, baal sa.nvaaruu.n
lab pe ha.nsii sajaa.uu.n
galaa-sa.Daa vahii gosht ki jis par
baiThii rang cha.Dhaa.uu.n

Kumar Pashi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now