Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gulistaan"

Nazm MATCHES FOR "gulistaan"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

tarana-e-milli

chiin-o-arab hamaaraa hindostaa.n hamaaraa
muslim hai.n ham vatan hai saaraa jahaa.n hamaaraa
tauhiid kii amaanat siino.n me.n hai hamaare
aasaa.n nahii.n miTaanaa naam-o-nishaa.n hamaaraa
duniyaa ke but-kado.n me.n pahlaa vo ghar KHudaa kaa
ham is ke paasbaa.n hai.n vo paasbaa.n hamaaraa
teGo.n ke saa.e me.n ham pal kar javaa.n hu.e hai.n
KHanjar hilaal kaa hai qaumii nishaa.n hamaaraa
maGrib kii vaadiyo.n me.n guu.njii azaa.n hamaarii
thamtaa na thaa kisii se sail-e-ravaa.n hamaaraa
baatil se dabne vaale ai aasmaa.n nahii.n ham
sau baar kar chukaa hai tuu imtihaa.n hamaaraa
ai gulistaan-e-undulus vo din hai.n yaad tujh ko
thaa terii Daaliyo.n me.n jab aashiyaa.n hamaaraa
ai mauj-e-dajla tuu bhii pahchaantii hai ham ko
ab tak hai teraa dariyaa afsaana-KHvaa.n hamaaraa
ai arz-e-paak terii hurmat pe kaT mare ham
hai KHuu.n tirii rago.n me.n ab tak ravaa.n hamaaraa
saalaar-e-kaarvaa.n hai miir-e-hijaaz apnaa
is naam se hai baaqii aaraam-e-jaa.n hamaaraa
'iqbaal' kaa taraana baa.ng-e-daraa hai goyaa
hotaa hai jaada-paimaa phir kaarvaa.n hamaaraa

Allama Iqbal
Nazm

mata-e-ghair

merii darmaa.nda javaanii kii tamannaa.o.n ke
muzmahil KHvaab kii taabiir bataa de mujh ko
tere daaman me.n gulistaa.n bhii hai.n viiraane bhii
meraa haasil merii taqdiir bataa de mujh ko

Sahir Ludhianvi
Nazm

KHizr-e-rah

aa bataa.uu.n tujh ko ramz-e-aaya-e-innal-muluuk
saltanat aqvaam-e-Gaalib kii hai ik jaaduugarii
KHvaab se be-daar hotaa hai zaraa mahkuum agar
phir sulaa detii hai us ko hukmaraa.n kii saahirii
jaaduu-e-mahmuud kii taasiir se chashm-e-ayaaz
dekhtii hai halqa-e-gardan me.n saaz-e-dil-barii
KHuun-e-israa.iil aa jaataa hai aaKHir josh me.n
to.D detaa hai ko.ii muusaa tilism-e-saamarii
sarvarii zebaa faqat us zaat-e-be-hamtaa ko hai
hukmaraa.n hai ik vahii baaqii butaan-e-aazarii
az Gulaamii fitrat-e-aazaad raa rusvaa makun
taa-taraashii KHvaaja-e-az-barahman kaafir tirii
hai vahii saaz-e-kuhan maGrib kaa jamhuurii nizaam
jis ke pardo.n me.n nahii.n Gair-az-navaa-e-qaisarii
dev-e-istibdaad jamhuurii qabaa me.n paa-e-kuub
tuu samajhtaa hai ye aazaadii kii hai niilam-parii
majlis-e-aa.iin-o-islaah-o-ri.aayaat-o-huquuq
tibb-e-maGrib me.n maze miiThe asar KHvaab-aavarii
garmii-e-guftaar aazaa-e-majaalis al-amaa.n
ye bhii ik sarmaaya-daaro.n kii hai ja.ng-e-zargarii
is saraab-e-ra.ng-o-buu ko gulistaa.n samjhaa hai tuu
aah ai naadaa.n qafas ko aashiyaa.n samjhaa hai tuu
sarmaaya-o-mehnat

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

samundar ka bulawa

ab aa.nkho.n me.n jumbish na chehre pe ko.ii tabassum na tevarii
faqat kaan sunte chale jaa rahe hai.n
ye ik gulistaa.n hai havaa lahlahaatii hai kaliyaa.n chaTaktii hai.n
Gunche mahakte hai.n aur phuul khilte hai.n khil khil ke murjhaa ke
girte hai.n ik farsh-e-maKHmal banaate hai.n jis par
mirii aarzuu.o.n kii pariyaa.n ajab aan se yuu.n ravaa.n hai.n
ki jaise gulistaa.n hii ik aa.iina hai
isii aa.iine se har ik shakl nikhrii sa.nvar kar miTii aur miT hii ga.ii phir na ubhrii
ye parbat hai KHaamosh saakin
kabhii ko.ii chashma ubalte hu.e puuchhtaa hai ki us kii chaTaano.n ke us paar kyaa hai
magar mujh ko parbat kaa daaman hii kaafii hai daaman me.n vaadii hai vaadii me.n naddii
hai naddii me.n bahtii hu.ii naav hii aa.iina hai
isii aa.iine me.n har ik shakl nikhrii magar ek pal me.n jo miTne lagii hai to
phir na ubhrii
ye sahraa hai phailaa hu.aa KHushk be-barg sahraa
baguule yahaa.n tund bhuuto.n kaa aks-e-mojassam bane hai.n

Meeraji
Nazm

naya hukm-nama

kisii kaa hukm hai saarii havaa.e.n
hamesha chalne se pahle bataa.e.n
ki un kii samt kyaa hai
kidhar jaa rahii hai.n
havaa.o.n ko bataanaa ye bhii hogaa
chale.ngii ab to kyaa raftaar hogii
havaa.o.n ko ye ijaazat nahii.n hai
ki aa.ndhii kii ijaazat ab nahii.n hai
hamaarii ret kii sab ye fasiile.n
ye kaaGaz ke mahal jo ban rahe hai.n
hifaazat un kii karnaa hai zaruurii
aur aa.ndhii hai puraanii in kii dushman
ye sabhii jante hai.n
kisii kaa hukm hai dariyaa kii lahre.n
zaraa ye sar-kashii kam kar le.n apnii had me.n Thahre.n
ubharnaa phir bikharnaa aur bikhar kar phir ubharnaa
Galat hai ye un kaa ha.ngaama karnaa
ye sab hai sirf vahshat kii alaamat
baGaavat kii alaamat
baGaavat to nahii.n bardaasht hogii
ye vahshat to nahii.n bardaasht hogii
agar lahro.n ko hai dariyaa me.n rahnaa
to un ko hogaa ab chup-chaap bahnaa
kisii kaa hukm hai
is gulistaa.n me.n bas ik rang ke hii phuul ho.nge
kuchh afsar ho.nge jo ye tai kare.nge
gulistaa.n kis tarah ban.naa hai kal kaa
yaqiinan phuul to yak-ra.ngii.n ho.nge
magar ye rang hogaa kitnaa gahraa kitnaa halkaa
ye afsar tai kare.nge
kisii ko ye ko.ii kaise bataa.e
gulistaa.n me.n kahii.n bhii phuul yak-rangii.n nahii.n hote
kabhii ho hii nahii.n sakte
ki har ik rang me.n chhup kar bahut se rang rahte hai.n
jinho.nne baaG-e-yakrangii.n banaanaa chaahe the
un ko zaraa dekho
ki jab ik rang me.n sau rang zaahir ho ga.e hai.n to
kitne pareshaa.n hai.n kitne ta.ng rahte hai.n
kisii ko ye ko.ii kaise bataa.e
havaa.e.n aur lahre.n kab kisii kaa hukm suntii hai.n
havaa.e.n haakimo.n kii muTThiyo.n me.n hathka.Dii me.n
qaid-KHaano.n me.n nahii.n ruktii.n
ye lahre.n rokii jaatii hai.n
to dariyaa kitnaa bhii ho pur-sukuu.n betaab hotaa hai
aur is betaabii kaa aglaa qadam sailaab hotaa hai

Javed Akhtar
Nazm

kis se mohabbat hai

vo ik mizraab hai aur chhe.D saktii hai rag-e-jaa.n ko
vo chi.ngaarii hai lekin phuu.nk saktii hai gulistaa.n ko
vo bijlii hai jalaa saktii hai saarii bazm-e-imkaa.n ko
abhii mere hii dil tak hai.n sharer-saamaaniyaa.n us kii

Asrarul Haq Majaz
Nazm

krishn kanhayya

ai dekhne vaalo
is husn ko dekho
is raaz ko samjho
ye naqsh-e-KHayaalii
ye fikrat-e-aalii
ye paikar-e-tanviir
ye krishn kii tasviir
ma.anii hai ki suurat
san.at hai ki fitrat
zaahir hai ki mastuur
nazdiik hai yaa duur
ye naar hai yaa nuur
duniyaa se niraalaa
ye baa.nsurii vaalaa
gokul kaa gvaalaa
hai sehr ki e.ajaaz
khultaa hii nahii.n raaz
kyaa shaan hai vallaah
kyaa aan hai vallaah
hairaan huu.n kyaa hai
ik shaan-e-KHudaa hai
but-KHaane ke andar
KHud husn kaa but-gar
but ban gayaa aa kar
vo turfa nazzaare
yaad aa ga.e saare
jamunaa ke kinaare
sabze kaa lahaknaa
phuulo.n kaa mahaknaa
ghanghor ghaTaa.e.n
sarmast havaa.e.n
ma.asuum uma.nge.n
ulfat kii tara.nge.n
vo gopiyo.n ke saath
haatho.n me.n diye haath
raqsaa.n hu.aa brijnaath
bansii me.n jo lai hai
nashsha hai na mai hai
kuchh aur hii shai hai
ik ruuh hai raqsaa.n
ik kaif hai larzaa.n
ek aql hai mai-nosh
ik hosh hai mad.hosh
ik KHanda hai sayyaal
ik girya hai KHush-haal
ik ishq hai maGruur
ik husn hai majbuur
ik sehr hai mas.huur
darbaar me.n tanhaa
laachaar hai kirishnaa
aa shyaam idhar aa
sab ahl-e-KHusuumat
hai.n dar pa.e izzat
ye raaj dulaare
buzdil hu.e saare
parda na ho taaraaj
bekas kii rahe laaj
aa jaa mere kaale
bhaarat ke ujaale
daaman me.n chhupaa le
vo ho ga.ii an-ban
vo garm hu.aa ran
Gaalib hai duryodhan
vo aa ga.e jagdiish
vo miT ga.ii tashviish
arjun ko bulaayaa
updesh sunaayaa
Gam-zaad kaa Gam kyaa
ustaad kaa Gam kyaa
lo ho ga.ii tadbiir
lo ban ga.ii taqdiir
lo chal ga.ii shamshiir
siirat hai aduu-soz
suurat nazar-afroz
dil kaifiyat-andoz
Gusse me.n jo aa jaa.e
bijlii hii giraa jaa.e
aur lutf par aa.e
to ghar bhii luTaa jaa.e
pariyo.n me.n hai gulfaam
raadhaa ke liye shyaam
balraam kaa bhayyaa
mathuraa kaa basayyaa
bindraa me.n kanhayyaa
ban ho ga.e viiraa.n
barbaad gulistaa.n
sakhiyaa.n hai.n pareshaa.n
jamunaa kaa kinaaraa
sunsaan hai saaraa
tuufaan hai.n KHaamosh
maujo.n me.n nahii.n josh
lau tujh se lagii hai
hasrat hii yahii hai
ai hind ke raajaa
ik baar phir aa jaa
dukh dard miTaa jaa
abr aur havaa se
bulbul kii sadaa se
phuulo.n kii ziyaa se
jaaduu-asarii gum
shoriida-sarii gum
haa.n terii judaa.ii
mathuraa ko na bhaa.ii
tuu aa.e to shaan aa.e
tuu aa.e to jaan aa.e
aanaa na akele
ho.n saath vo mele
sakhiyo.n ke jhamele

Hafeez Jalandhari
Nazm

self made logon ka alamiya

self made logo.n kaa alamiya
raushnii mizaajo.n kaa kyaa ajab muqaddar hai
zindagii ke raste me.n bichhne vaale kaa.nTo.n ko
raah se haTaane me.n
ek ek tinke se aashiyaa.n banaane me.n
KHushbu.e.n paka.Dne me.n gulistaa.n sajaane me.n
umr kaaT dete hai.n
umr kaaT dete hai.n
aur apne hisse ke phuul baa.nT dete hai.n
kaisii kaisii KHvaahish ko qatl karte jaate hai.n
darguzar ke gulshan me.n abr ban ke rahte hai.n
sabr ke samundar me.n kashtiyaa.n chalaate hai.n
ye nahii.n ki un ko is roz-o-shab kii kaahish kaa
kuchh sila nahii.n miltaa
marne vaalii aaso.n kaa KHuu.n-bahaa nahii.n miltaa
zindagii ke daaman me.n jis qadar bhii KHushiyaa.n hai.n
sab hii haath aatii hai.n
sab hii mil bhii jaatii hai.n
vaqt par nahii.n miltii.n vaqt par nahii.n aatii.n
yaanii un ko mehnat kaa ajr mil to jaataa hai
lekin is tarah jaise
qarz kii raqam ko.ii qist qist ho jaa.e
asl jo ibaarat ho pas navisht ho jaa.e
fasl-e-gul ke aaKHir me.n phuul un ke khulte hai.n
un ke sahn me.n suuraj der me.n nikalte hai.n

Amjad Islam Amjad
Nazm

aaj ki raat

dekhnaa jazb-e-mohabbat kaa asar aaj kii raat
mere shaane pe hai us shoKH kaa sar aaj kii raat
aur kyaa chaahiye ab ai dil-e-majruuh tujhe
us ne dekhaa to ba-andaaz-e-digar aaj kii raat
phuul kyaa KHaar bhii hai.n aaj gulistaa.n-ba-kanaar
sa.ng-reze hai.n nigaaho.n me.n guhar aaj kii raat
mahv-e-gulgasht hai ye kaun mire dosh-ba-dosh
kahkashaa.n ban ga.ii har raahguzar aaj kii raat
phuuT niklaa dar-o-diivaar se sailaab-e-nashaat
allaah allaah miraa kaif-e-nazar aaj kii raat
shabnamistaan-e-tajallii kaa fusuu.n kyaa kahiye
chaa.nd ne phe.nk diyaa raKHt-e-safar aaj kii raat
nuur hii nuur hai kis samt uThaa.uu.n aa.nhke.n
husn hii husn hai taa-hadd-e-nazar aaj kii raat
qasr-e-giitii me.n uma.nD aayaa hai tuufaan-e-hayaat
maut larzaa.n hai pas-e-parda-e-dar aaj kii raat
allaah allaah vo peshaani-e-siimii.n kaa jamaal
rah ga.ii jam ke sitaaro.n kii nazar aaj kii raat
aariz-e-garm pe vo ra.ng-e-shafaq kii lahre.n
vo mirii shoKH-nigaahii kaa asar aaj kii raat
nargis-e-naaz me.n vo nii.nd kaa halkaa saa KHumaar
vo mire naGma-e-shiirii.n kaa asar aaj kii raat
naGma o mai kaa ye tuufaan-e-tarab kyaa kahiye
ghar miraa ban gayaa 'KHayyaam' kaa ghar aaj kii raat
merii har saa.ns pe vo un kii tavajjoh kyaa KHuub
merii har baat pe vo jumbish-e-sar aaj kii raat
vo tabassum hii tabassum kaa jamaal-e-paiham
vo mohabbat hii mohabbat kii nazar aaj kii raat
uf vo vaaraftagi-e-shauq me.n ik vahm-e-latiif
kapkapaa.e hu.e ho.nTo.n pe nazar aaj kii raat
maz.hab-e-ishq me.n jaa.ez hai yaqiinan jaa.ez
chuum luu.n mai.n lab-e-la.alii.n bhii agar aaj kii raat
apnii rif.at pe jo naazaa.n hai.n to naazaa.n hii rahe.n
kah do anjum se ki dekhe.n na idhar aaj kii raat
un ke altaaf kaa itnaa hii fusuu.n kaafii hai
kam hai pahle se bahut dard-e-jigar aaj kii raat

Asrarul Haq Majaz
Nazm

apni malka-e-suKHan se

chehre ko rang-o-nuur kaa tuufaa.n kiye hu.e
sham-o-sharaab-o-sh.er kaa unvaa.n kiye hu.e
har naqsh-e-paa ko taaj-e-gulistaa.n kiye hu.e
sau tuur ik nigaah me.n pinhaa.n kiye hu.e
aatii hai tuu chaman me.n jab is tarz-o-taur se
gul dekhte hai.n baaG me.n bulbul ko Gaur se

Josh Malihabadi
Nazm

zabta

ye zaabta hai kahuu.n dasht ko gulistaa.n-zaar
KHizaa.n ke ruup ko likkhuu.n faroG-e-husn-e-bahaar

Habib Jalib
Nazm

tum

shaguftagii kaa lataafat kaa shaahkaar ho tum
faqat bahaar nahii.n haasil-e-bahaar ho tum
jo ek phuul me.n hai qaid vo gulistaa.n ho
jo ik kalii me.n hai pinhaa.n vo laala-zaar ho tum
halaavato.n kii tamannaa, malaahato.n kii muraad
Guruur kaliyo.n kaa phuulo.n kaa inkisaar ho tum
jise tara.ng me.n fitrat ne gungunaayaa hai
vo bhairvii.n ho, vo diipak ho vo malhaar ho tum
tumhaare jism me.n KHvaabiida hai.n hazaaro.n raag
nigaah chhe.Dtii hai jis ko vo sitaar ho tum
jise uThaa na sakii justujuu vo motii ho
jise na guu.ndh sakii aarzuu vo haar ho tum
jise na buujh sakaa ishq vo pahelii ho
jise samajh na sakaa pyaar bhii vo pyaar ho tum
KHudaa kare kisii daaman me.n jazb ho na sake.n
ye mere ashk-e-hasii.n jin se aashkaar ho tum

Kaifi Azmi
Nazm

mulaqat

jo ho na sakii baat vo chehro.n se ayaa.n thii
haalaat kaa maatam thaa mulaaqaat kahaa.n thii
us ne na Thaharne diyaa pahro.n mire dil ko
jo terii nigaaho.n me.n shikaayat mirii jaa.n thii
ghar me.n bhii kahaa.n chain se so.e the kabhii ham
jo raat hai zindaa.n me.n vahii raat vahaa.n thii
yaksaa.n hai.n mirii jaan qafas aur nasheman
insaan kii tauqiir yahaa.n hai na vahaa.n thii
shaaho.n se jo kuchh rabt na qaa.em hu.aa apnaa
aadat kaa bhii kuchh jabr thaa kuchh apnii zabaa.n thii
sayyaad ne yuu.nhii to qafas me.n nahii.n Daalaa
mash.huur gulistaa.n me.n bahut merii fuGaa.n thii
tuu ek haqiiqat hai mirii jaa.n mirii hamdam
jo thii mirii Gazlo.n me.n vo ik vahm-o-gumaa.n thii
mahsuus kiyaa mai.n ne tire Gam se Gam-e-dahr
varna mire ash.aar me.n ye baat kahaa.n thii

Habib Jalib
Nazm

ek ghamgin yaad

mire pahluu-ba-pahluu jab vo chaltii thii gulistaa.n me.n
faraaz-e-aasmaa.n par kahkashaa.n hasrat se taktii thii
mohabbat jab chamak uThtii thii us kii chashm-e-KHandaa.n me.n
KHamistaan-e-falak se nuur kii sahbaa chhalaktii thii

Asrarul Haq Majaz
Nazm

aalam kitne

kitne Gunche hai.n jigar-chaak gulistaa.n me.n abhii
har taraf zaKHm hai.n be-minnat-e-marham kitne

Jan Nisar Akhtar
Nazm

mata-e-alfaz

aur is arsa-e-aKHlaaq-o-muravvat me.n kabhii
ek pal ke liye vo saa.at-e-naazuk aa jaa.e
naaKHun-e-lafz kisii yaad ke zaKHmo.n ko chhu.e
ik jhijaktaa hu.aa jumla ko.ii dukh de jaa.e
kaun jaanegaa ki ham dono.n pe kyaa biitii hai
is KHamoshii ke a.ndhero.n se nikal aa.e.n chalo
kisii sulge hu.e lahje se charaaGaa.n kar le.n
chun le.n phuulo.n kii tarah ham bhii mataa-e-alfaaz
apne uj.De hu.e daaman ko gulistaa.n kar le.n
chun le.n phuulo.n kii tarah ham bhii mataa-e-alfaaz
daulat-e-dard ba.Dii chiiz hai iqraar karo
ne.amat-e-Gam ba.Dii ne.amat hai ye iz.haar karo
lafz paimaan bhii iqraar bhii iz.haar bhii hai.n
taaqat-e-sabr agar ho to ye Gam-KHvaar bhii hai.n
haath KHaalii huu.n to ye jins-e-giraa.n-baar bhii hai.n
paas ko.ii bhii na ho phir to ye dildaar bhii hai.n
haath KHaalii ho.n to ye jins-e-giraa.n-baar bhii hai.n
ye jo tum mujh se gurezaa.n ho mirii baat suno

Zehra Nigaah
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now