Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mekh"

Nazm MATCHES FOR "mekh"

Nazm

koh-e-nida

sub.h-savere
ek laraztii kaa.nptii sii aavaaz aatii hai
sone vaalo! tum maalik ko bhuul ga.e ho
tum maalik ko bhuul ga.e ho
phir chamkiilii mil kaa saa.eran
ek Galiiz Daraane vaalii tund sadaa ke ruup me.n Dhal kar
diivaaro.n se Takraataa hai
aur galiyo.n ke
ta.ng a.ndhere baa.De me.n kohraam machaa kar
bhe.Do.n ke galle ko haa.nk ke le jaataa hai
phir engine kii barham siiTii
meKH sii ban kar mere kaan me.n ga.D jaatii hai
aur shab bhar kii nuchii hu.ii ik rail kii bogii
apnii kalaa.ii engine ke panje me.n de kar
chal pa.Dtii hai
phir ik dam ik sannaaTaa saa chhaa jaataa hai
aur mai.n gha.Dii kii zaalim suu.iyo.n kii Tik Tik me.n
din ke zard pahaa.D pe cha.Dhne lagtaa huu.n

Wazir Agha
Nazm

KHabar mafqud hai lekin

KHabar mafquud hai lekin
hisaar-e-zaat se niklaa hu.aa jazba
sar-e-mehraab-o-member daar-o-maqtal tak nahii.n aayaa
hu.aa sattar qadam kaa marsiya maile phaTe malbuus
gho.Do.n ke sumo.n se meKH hotii aarzuu apnii gavaahii kis tarah degii
mu.ayyan hausle sanduuqcho.n me.n jaa.n-ba-lab hai.n
aur tavaanaa baazu.o.n me.n
chuu.Diyo.n kii misl zanjiir-e-kuhan aavaaz detii hai

Farrukh Yar
Nazm

ek laDki

zaraa us KHud apne hii
jazbo.n se majbuur la.Dkii ko dekho
jo ik shaaKH-e-gul kii tarah
an-ginat chaahato.n ke jhakolo.n kii zad me.n
u.Dii jaa rahii hai
ye la.Dkii
jo apne hii phuul aaise kap.Do.n se sharmaatii
aa.nchal sameTe nigaahe.n jhukaa.e chalii jaa rahii hai
jab apne hasii.n ghar kii dahliiz par jaa rukegii
to mukh mo.D kar muskuraa.egii jaise
abhii us ne ik ghaat me.n baiThe
dil ko pasand aane vaale
shikaarii ko dhokaa diyaa hai

Muneer Niyazi
Nazm

barsat ki bahaaren

muddat se ho rahaa hai jin kaa makaa.n puraanaa
uTh ke hai un ko me.nh me.n har aan chhat pe jaanaa
ko.ii pukaartaa hai Tuk morii khol aanaa
ko.ii kahe hai chal bhii kyuu.n ho gayaa divaanaa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

tum yaad mujhe aa jate ho

jab me.nh kii phuvaare.n pa.Dtii hai.n jab ThanDii havaa.e.n aatii hai.n
jab sehn-e-chaman se ghabraa kar pii pii kii sadaa.e.n aatii hai.n

Behzad Lakhnavi
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

dipawli

gale me.n haar phuulo.n kaa charan me.n diip-maalaa.e.n
mukuT sar par hai mukh par zindagii kii ruup-rekhaa.e.n
liye hai.n kar me.n ma.ngal-ghaT na kyuu.n ghaT ghaT pe chhaa jaa.e.n
agar partav pa.De murda-dilo.n par vo bhii jii jaa.e.n

Nazeer Banarasi
Nazm

barsat

vo dekho uThii kaalii kaalii ghaTaa
hai chaaro.n taraf chhaane vaalii ghaTaa
ghaTaa ke jo aane kii aahaT hu.ii
havaa me.n bhii ik sansanaahaT hu.ii
ghaTaa aan kar me.nh jo barsaa ga.ii
to be-jaan miTTii me.n jaan aa ga.ii
zamii.n sabze se lahlahaane lagii
kisaano.n kii mehnat Thikaane lagii
ja.Dii-buuTiyaa.n pe.D aa.e nikal
ajab bel patte ajab phuul phal
har ik pe.D kaa yak nayaa Dha.ng hai
har ik phuul kaa ik nayaa rang hai
ye do din me.n kyaa maajraa ho gayaa
ki jangal kaa jangal haraa ho gayaa
jahaa.n kal thaa maidaan chaTyal pa.Daa
vahaa.n aaj hai ghaas kaa ban pa.Daa
hazaaro.n phudakne lage jaanvar
nikal aa.e goyaa ki miTTii ke par

Ismail Merathi
Nazm

nazm

basta phe.nk ke lo jii bhaagaa raushan-aaraa baaG kii jaanib
chillaataa chal guDDii chal
pakke jaamun Tapke.nge
aa.ngan kii rassii se maa.n ne kap.De khole
aur tannuur pe laa ke Tiin kii chaadar Daalii
saare din ke sukhaa.e paapa.D
lachchhii ne chaadar me.n lapeTe
bach ga.ii rabbaa kiyaa karaayaa dhul jaanaa thaa
KHairuu ne khet kii suukhii miTTii
jhurriyo.n vaale haath me.n le kar
bhiigii bhiigii aa.nkho.n se phir uupar dekhaa
jhuum ke phir uTThe hai.n baadal
TuuT ke phir me.nh barsegaa

Gulzar
Nazm

sawan ke mahine

firdaus banaa.e hu.e saavan ke mahiine
ik gul-ruKH o nasrii.n-badan o sarv-e-sahii ne
maathe pe idhar kaakul-e-zholiida kii lahre.n
garduu.n pe udhar abr-e-KHiraamaa.n ke safiine
me.nh jitnaa barastaa thaa sar-e-daaman-e-kohsaar
itne hii zamii.n apnii ugaltii thii dafiine
allaah-re ye farmaan ki is mast havaa me.n
ham mu.nh se na bole.nge agar pii na kisii ne
vo muunis-o-Gam-KHvaar thaa jis ke liye barso.n
maa.ngii thii.n du.aa.e.n mire aaGosh-e-tahii ne
gul-rez the saahil ke lachakte hu.e paude
gul-ra.ng the taalaab ke tarshe hu.e ziine
baarish thii lagaataar to yuu.n gard thii mafquud
jis tarah mai-e-naab se dhul jaate hai.n siine
dam bhar ko bhii thamtii thii.n agar sard havaa.e.n
aate the javaanii ko pasiine pe pasiine
bhar dii thii chaTaano.n me.n bhii Guncho.n kii sii narmii
ik fitna-e-kaunain kii naazuk-badanii ne
getii se ubalte the tamannaa ke saliiqe
garduu.n se baraste the mohabbat ke qariine
kyaa dil kii tamannaa.o.n ko marbuut kiyaa thaa
sabze pe chamaktii hu.ii saavan kii jha.Dii ne
badlii thii falak par ki junuu.n-KHez javaanii
buu.nde.n thii.n zamii.n par ki a.nguuThii ke nagiine
shaaKHo.n pe parinde the jhaTakte hu.e shahpar
nahro.n me.n bate.n apne ubhaare hu.e siine
is fasl me.n is darja rahaa be-KHud o sarshaar
maiKHaane se baahar mujhe dekhaa na kisii ne
kyaa lamha-e-faanii thaa ki mu.D kar bhii na dekhaa
dii kitnii hii aavaaz hayaat-e-abadii ne

Josh Malihabadi
Nazm

aansu

mere pahluu me.n jo bah nikle tumhaare aa.nsuu
ban ga.e shaam-e-mohabbat ke sitaare aa.nsuu
dekh saktaa hai bhalaa kaun ye paare aa.nsuu
merii aa.ankho.n me.n na aa jaa.e.n tumhaare aa.nsuu
sham.a kaa aks jhalaktaa hai jo har aa.nsuu me.n
ban ga.e bhiigii hu.ii raat ke taare aa.nsuu
me.nh kii buu.ndo.n kii tarah ho ga.e saste kyuu.n aaj
motiyo.n se kahii.n mah.nge the tumhaare aa.nsuu
saaf iqraar-e-mohabbat ho zabaa.n se kyuu.nkar
aa.nkh me.n aa ga.e yuu.n sharm ke maare aa.nsuu
hijr abhii duur hai mai.n paas huu.n ai jaan-e-vafaa
kyuu.n hu.e jaate hai.n bechain tumhaare aa.nsuu
sub.h-dam dekh na le ko.ii ye bhiigaa aa.nchal
merii chuGlii kahii.n khaa de.n na tumhaare aa.nsuu
apne daamaan o garebaa.n ko mai.n kyuu.n pesh karuu.n
hai.n mire ishq kaa in.aam tumhaare aa.nsuu
dam-e-ruKHsat hai qariib ai Gam-e-furqat KHush ho
karne vaale hai.n judaa.ii ke ishaare aa.nsuu
sadqe us jaan-e-mohabbat ke mai.n 'aKHtar' jis ke
raat bhar bahte rahe shauq ke maare aa.nsuu

Akhtar Shirani
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

nai mahfil mein pahli shanasai

na.ii jagah thii duur duur tak aaKHir par diivaare.n shab kii
kuchh yaaro.n ne barpaa kar dii ik mahfil kuchh apne Dhab kii
uu.nche dar se daaKHil ho kar saaf nasheb me.n baiThe jaa kar
ek maqaam me.n hu.e ikaTThe raunaq aur viiraanii aa kar
markaz-e-dar se jashn-bapaa tak sair thii shaam-e-mehr-o-vafaa kii
KHushii thii us se milne jaisii bechainii thii abr-o-havaa kii
sab ra.ngo.n ke log jam.a the ek hii manzil thii un sab kii
ik bastii aalaam se KHaalii ek fazaa kisii KHvaab-e-tarab kii
ja.ngal kii shaadaabii jaisaa pahnaa thaa ko.ii jalva us ne
pairaahan ik na.ii vaz.a kaa khule samundar jaisaa us ne
kar rakkhaa thaa chehra apnaa dukh-mukh se be-parvaa us ne
merii taraf takne se pahle chaaro.n jaanib dekhaa us ne

Muneer Niyazi
Nazm

dal ki fariyaad

ek la.Dkii baghaartii hai daal
daal kartii hai arz yuu.n ahvaal
ek din thaa harii-bharii thii mai.n
saarii aafaat se barii thii mai.n
thaa haraa khet meraa gahvaara
vo vatan thaa mujhe bahut pyaaraa
paanii pii pii ke thii mai.n lahraatii
dhuup letii kabhii havaa khaatii
me.nh barastaa thaa jho.nke aate the
godiyo.n me.n mujhe khilaate the
yahii suuraj zamii.n the maa.n baavaa
mujh se karte the nek bartaavaa
jab kiyaa mujh ko paal-pos ba.Daa
aah zaalim kisaan aan pa.Daa
ga.ii taqdiir yak-ba-yak jo palaT
khet kaa khet kar diyaa talpaT
KHuub luuTaa dha.Dii dha.Dii kar ke
mujh ko gauno.n me.n le ga.e bhar ke
ho ga.ii dam ke dam me.n barbaadii
chhin ga.ii haa.e merii aazaadii!
kyaa bataa.uu.n kahaa.n kahaa.n khii.nchaa
daal-manDii me.n mujh ko jaa bechaa
ek zaalim se vaa.n pa.Daa paalaa
jis ne chakkii me.n mujh ko dal Daalaa
hu.aa taqdiir kaa likhaa puuraa
dono.n paaTo.n ne kar diyaa chuuraa
na sunii merii aah aur zaarii
KHuub baniye ne kii KHariidaarii
chhaanaa chhalnii me.n chhaaj me.n phaTkaa
qaid-KHaana miraa banaa maTkaa
phir muqaddar mujhe yahaa.n laayaa
tum ne to aur bhii Gazab Dhaayaa
khaal khii.nchii alag kiye chhilke
zaKHm kyuu.n-kar hare na ho.n dil ke
Daalii.n marche.n namak lagaayaa KHuub
rakh ke chuulhe pe jii jalaayaa KHuub
us pe kaf-giir ke bhii Thoke hai.n
aur naaKHun ke bhii kachoke hai.n
mere galne kii le rahii ho KHabar
daa.nt hai aap kaa mire uupar
garm ghii kar ke mujh ko daaG diyaa
haa.e tum ne bhii kuchh na rahm kiyaa
haath dho kar pa.Dii ho piichhe tum
jaan par aa banii havaas hai.n gum
achchhii bii-bii tumhii.n karo insaaf
zulm hai yaa nahii.n qusuur-mu.aaf
kahaa la.Dkii ne merii pyaarii daal
mujh ko ma.aluum hai tiraa sab haal
tuu agar khet se nahii.n aatii
KHaak me.n mil ke KHaak ho jaatii
yaa ko.ii gaa.e bhai.ns char letii
peT me.n apne tujh ko bhar letii
mai.n to rutba tiraa ba.Dhaatii huu.n
ab chapaatii se tujh ko khaatii huu.n
na sataanaa na jii jalaanaa thaa
yuu.n tujhe aadmii banaanaa thaa
aglii biitii kaa tuu na kar kuchh Gam
mehrbaanii thii sab, na thaa ye sitam

Ismail Merathi
Nazm

jashn-e-azadi

me.nh barastaa hai to dhartii kii nazar jhuumtii hai
phuul khilte hai.n to gulshan pe nikhaar aataa hai
lekin ai jashn-e-bahaaraa.n ke na.e muntazimo
KHud-farebii se kahii.n dil ko qaraar aataa hai

Qateel Shifai
Nazm

baadal

kaale baadal aa.e.nge
aa kar me.nh barsaa.e.nge
me.nh me.n log nahaa.e.nge
kaale baadal aa.e.nge

Sufi Ghulam Mustafa Tabassum
Nazm

thoDa thoDa mil kar bahut ho jata hai

banaayaa hai chi.Diyo.n ne jo gho.nsla
so ek ek tinkaa ikaTThaa kiyaa
gayaa ek hii baar suuraj na Duub
magar rafta rafta hu.aa hai Guruub
qadam hii qadam tai hu.aa hai safar
ga.ii.n lahze lahze me.n umre.n guzar
samundar kii lahro.n kaa taa.ntaa sadaa
kinaare se hai aa ke Takraa rahaa
samundar se dariyaa se uThtii hai mauj
sadaa kartii rahtii hai dhaavaa ye fauj
karaaruu.n ko aaKHir giraa hii diyaa
chaTaano.n ko bilkul safaa-chaT kiyaa
barastaa jo me.nh muuslaa-dhaar hai
so ye nannhii buu.ndo.n kii bauchhaar hai
daraKHto.n ke jhunD aur jangal ghane
yuu.nhii patte pate se mil kar bane
hu.e reshe reshe se ban aur jhaa.D
banaa zarre zarre se mil kar pahaa.D
lagaa daane daane se Galle kaa Dher
pa.Daa lamhe lamhe se barso.n kaa pher
jo ek ek pal kar ke din kaT gayaa
to gha.Diyo.n hii gha.Diyo.n baras ghaT gayaa
likhaa likhne vaale ne ek ek harf
hu.ii.n gaDDiyaa.n kitnii kaaGaz kii sarf
hu.ii likhte likhte murattab kitaab
isii par har ik shai kaa samjho hisaab
har ik ilm-o-fan aur kartab hunar
na thaa pahle hii din se is Dha.ng par
yuu.nhii ba.Dhte ba.Dhte taraqqii hu.ii
jo neza hai ab thaa vo pahle su.ii
julaahe ne jo.Daa thaa ek ek taar
hu.e thaan jis ke gazo.n se shumaar
yuu.nhii phu.iyo.n phu.iyo.n bhare jhiil taal
yuu.nhii kau.Dii kau.Dii hu.aa jam.a maal
agar tho.Daa tho.Daa karo sub.h o shaam
ba.De se ba.Daa kaam bhii ho tamaam

Ismail Merathi
Nazm

megh dut

sansanaahaTo.n ke saath
ga.Dga.DaahaTo.n ke saath
aa gayaa!
pavan-rath pe baiTh kar
meraa megh devtaa
dosh par havaa.o.n ke
baal u.Daataa hu.aa
us kaa jaamunii badan
aasmaa.n pe chhaa gayaa
duur tak garaj hu.ii
zamii.n dahalne lagii
aasmaa.n simaT gayaa
ba.Dii ghan-garaj ke saath
TuuT kar baras pa.Daa
aur mai.n aa.nkh muu.nd kar
haath pasaare hu.e
dau.Dtii chalii ga.ii
a.ng se lagaa rahii
niil us ke a.ng kaa

Fahmida Riaz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now