Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "muchalka"

Nazm MATCHES FOR "muchalka"

Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

ek laDka

ek chhoTaa saa la.Dkaa thaa mai.n jin dino.n
ek mele me.n pahu.nchaa humaktaa hu.aa
jii machaltaa thaa ek ek shai par
jaib KHaalii thii kuchh mol le na sakaa
lauT aayaa liye hasrate.n sai.nka.Do.n
ek chhoTaa saa la.Dkaa thaa mai.n jin dino.n

Ibn۔e۔Insha
Nazm

marhum aur mahrum

hazaaro.n qarz the mujh par tumhaarii ulfat ke
mujhe vo qarz chukaane kaa mauqa to dete
tumhaaraa KHuun mire jism me.n machaltaa rahaa
zaraa se qatre bahaane kaa mauqa to dete

Zubair Ali Tabish
Nazm

ek thi aurat

ko.ii sard chashma ubaltaa hu.aa aur machaltaa hu.aa yaad aa.e
jo ho dekhne me.n Tapaktii hu.ii chand buu.nde.n
magar apnii had se ba.Dhe to bane ek naddii bane ek dariyaa bane ek saagar
ye jii chaahtaa hai ki ham aise saagar kii lahro.n pe aisii havaa se bahaa.e.n vo kashtii jo bahtii nahii.n hai
musaafir ko lekin bahaatii chalii jaatii hai aur palaT kar nahii.n aatii hai ek gahre sakuu.n se milaatii chalii jaatii hai
ye jii chaahtaa hai ki ham bhii yuu.nhii chiiKHe.n chillaa.e.n ha.ns de.n yuu.nhii haath uThaa.e.n
havaa me.n hilaa.e.n hilaa kar giraa de.n
kabhii aise jaise ko.ii baat kahne lage hai.n
magar tum hame.n god me.n le ke apnii biThaa lo
machalne lage.n to sambhaalo
kabhii muskuraate hu.e shor karte hu.e phir gale se lipaT kar kare.n aisii baate.n
tumhe.n sarsaraatii havaa yaad aa.e
vahii sarsaraatii havaa jis ke miiThe fusuu.n se dupaTTa phisal jaataa hai
vahii sarsaraatii havaa jo har anjaan aurat ke bikhre hu.e gesu.o.n ko
kisii so.e jangal pe ganghor kaalii ghaTaa kaa nayaa bhes de kar
jagaa detii hai

Meeraji
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

tanhai mein

aise insaano.n se patthar ke sanam achchhe hai.n
un ke qadmo.n pe machaltaa ho damaktaa hu.aa KHuu.n

Akhtarul Iman
Nazm

main aksar sard raaton mein

mai.n aksar sard raato.n me.n
zamiin-e-KHaana-e-dil par
akele baiTh jaataa huu.n
phir apnaa sar jhukaa kar yaad-e-ahd-e-raftagaa.n dil me.n sajaataa huu.n
KHayaal-e-maazii-e-dauraa.n mire is jism ke andar ajab tuufaa.n uThaataa hai
hazaaro.n miil kaa lambaa safar paidal karaataa hai
mai.n yaado.n ke dhu.ndlako.n me.n tumhaare naqsh-e-paa ko Dhuu.nDne jab bhii nikaltaa huu.n
to ik taariik vaadii me.n utartaa huu.n
jahaa.n yaado.n kii kuchh be-ra.ng tasviire.n mujhe bikhrii pa.Dii ma.aluum detii hai.n
mujhe aavaaz detii hai.n
ki vahshat kaa ye jangal baahe.n phailaa.e bulaataa hai
miraa shauq-e-nazar thak kar zamiin par baiTh jaataa hai
achaanak jab tumhaarii yaad ke vahshii jaanvar aavaaz dete hai.n
mai.n Dartaa huu.n
ki jaise ko.ii bachcha apne hii saa.e se Dar jaa.e
ko.ii shiisha bikhar jaa.e
ko.ii furqat me.n ghabraa.e
mire taar-e-nafas par zarb kartii mustaqil dha.Dkan
mujhe rukne nahii.n detii
mujhe thakne nahii.n detii
ye bechainii mujhe phir ik safar par le ke aatii hai
mai.n chaltaa huu.n
ki jaise ik musaafir baa'd muddat apne ghar jaa.e
ThiThurtii sard raato.n me.n
ko.ii jaise ki jam jaa.e
ki jaise saa.ns tham jaa.e
magar mere muqaddar me.n
sukuun-e-qalb-o-jaa.n kab hai
nigaah-e-yaas me.n mub.ham sahii ko.ii nishaa.n kab hai
kahii.n par shorish-e-amvaaj-e-dariyaa hai
kahii.n aavaaz-e-qulqul hai
magas kaa shor hai sarsar sabaa kii aah-o-giryaa hai
so dil apnaa machaltaa hai
kisii se kab bahaltaa hai
dhu.aa.n uThtaa hai dil se aa.nkh me.n tuufaa.n machaltaa hai
tabii.at zor kartii hai
ye dha.Dkan shor kartii hai
tumhaarii yaad ke ye chiiKHte aur piiTte lamhe
mujhe rone nahii.n dete
mujhe sone nahii.n dete

Qamar Abbas Qamar
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

suna hai chandni-raaton mein aksar tum

KHamoshii se dabe paa.nv
bharii mahfil se uThte ho
khule aakaash ke niiche kahii.n par baiTh jaate ho
phir apnaa haath haule se ba.Dhaate ho
chamakte chaa.nd kii jaanib
kabhii to muskuraate ho kabhii kuchh gungunaate ho
jo 'miir'-o-'dard' kii Gazle.n kabhii ham ko sunaate the
vahii sargoshiyaa.n mujh se jo aksar karte rahte the
havaa ke dosh par baiThii kiran se karne lagte ho
sunaa hai be-qaraarii me.n
Tahalte ho kabhii chhat par
kabhii har aks me.n meraa saraapaa Dhuu.nDhte ho tum
havaa.o.n me.n mirii KHushbuu kabhii mahsuus karte ho
kabhii be aas ho kar phir zamii.n par baiTh jaate ho
bahut fariyaad karte ho
mujhe hii yaad karte ho
magar ye saarii baate.n to mahz KHvaabo.n kii baate.n hai.n
khulii jab aa.nkh merii to nazaara aur hii dekhaa
ko.ii paiGaam aayaa thaa
hamaare naam aayaa thaa
likhaa thaa us me.n dekho naa
ki ab kii chaa.nd jo niklaa
use nazdiik se dekhaa
use mahsuus kar paayaa
mukammal paa liyaa us ko jo shah-rag me.n machaltaa thaa
mubaarakbaad to de do vo meraa ho gayaa ab kii
sunaa hai chaa.ndnii-raato.n me.n tum bhii so nahii.n paatii
tuu ab kii chain se sonaa ki ab mai.n bhii nahii.n jagtaa

Asra Rizvi
Nazm

nafi sare hisabon ki

lapaktaa surKH imkaa.n
jo mujhe aa.inda kii
dahliiz par laa kar kha.Daa karne kii KHvaahish me.n
machaltaa hai
mire haatho.n ko chhuu kar
mujh se kahtaa hai
tumhaarii u.ngliyo.n me.n
KHuun kam kyuu.n hai
tumhaare naaKHuno.n me.n zardiyaa.n kis ne sajaa.ii hai.n
kalaa.ii se
nikaltii haDDiyo.n par
uun kam kyuu.n hai
mai.n us se
naa-tavaa.n sii ik sadaa me.n
puuchhtaa huu.n
is se pahle tum kahaa.n the
is se pahle bhii yahii saarii zamiine.n thii.n
yahii sab aasmaa.n the
aur merii aa.nkh me.n
niile hare ke darmiyaa.n
ik rang shaayad aur bhii thaa
ab mire andar na jhaa.nko
mere baatin me.n musalsal tairtii hai uu.nghtii duniyaa saraabo.n kii
nafii saare hisaabo.n kii

Rajinder Manchanda Bani
Nazm

aTuT ang

miraa sar tum apne hii zaanuu pe rakh kar
mujhe puuchhtii ho!
ki me.n kaun huu.n
kyaa huu.n, kaise huu.n?
saare savaalo.n ko muTThii me.n rakh kar
zaraa merii ik baat san lo
suno! ye tumhaare badan kaa KHumaar-aashnaa kaif... narm o musalsal
mujhe lazzato.n ke umuq me.n liye jaa rahaa hai
mai.n pal pal kabhii
lahza lahza kabhii
dhiire dhiire kabhii
lamha lamha kabhii
ek dariyaa ke phailaav me.n Duubtaa jaa rahaa huu.n
sharaabor tuufaan me.n tund lahro.n kii suurat
nashiile samay
ek aaha.ng ke saath hachkole khaataa hu.aa
mai.n kisii soch kii rau me.n bahtaa chalaa jaa rahaa huu.n
miraa dil, mirii jaa.n:
dono.n hii mausuum hai.n, us tamavvuj se
jo merii nas nas me.n paiham machaltaa hu.aa
KHuun ke zer-o-bam kii kahaanii sunaataa hu.aa
bah rahaa hai
ki jis ke har ek lams kii
lazzato.n, zaa.iqo.n me.n
tumhaaraa ko.ii KHvaab hai
jaise mahtaab hai
tum to mere badan kaa ko.ii paara-e-KHaak ho
tum ko.ii Gair ho?
merii ham-zaad!
ham kashtii-e-ziist ke baadbaa.n kii tanaabe.n hai.n do
ek tum, ek mai.n
jin kaa mohtaaj hai baadbaan-e-nafas
ye zamii.n, ye zamaa.n
mere hii ahd kii daastaa.n
ham se aabaad daa.em bisaat-e-jahaa.n
apne aa.ngan kii phuulo.n-bharii kiyaariyaa.n

Azhar Ghauri Nadwi
Nazm

ek lamha

machaltaa hai jo dil me.n aur ho.nTo.n tak nahii.n aataa
mohabbat kii tarah vo giit bhii ma.asuum hotaa hai
sunaatii hai tumhaarii aa.nkh jab ko.ii hasii.n naGma
to mujh ko vaqt bhii Thahraa hu.aa ma.aluum hotaa hai

Qaisarul Jafri
Nazm

maut

abhii nahii.n abhii zanjiir-e-KHvaab barham hai
abhii nahii.n abhii daaman ke chaak kaa Gam hai
abhii nahii.n abhii dar baaz hai umiido.n kaa
abhii nahii.n abhii siine kaa daaG jaltaa hai
abhii nahii.n abhii palko.n pe KHuu.n machaltaa hai
abhii nahii.n abhii kam-baKHt dil dha.Daktaa hai

Shahryar
Nazm

bachpane ki yaad

ai bachpane kii duniyaa to yaad aa rahii hai
dil se mirii sadaa-e-fariyaad aa rahii hai
raahat sunaa rahii thii afsaana saltanat kaa
thii maa.n kii god mujh ko kaashaana saltanat kaa
vo ghar ki duur jis se thii gardish-e-zamaana
aazaadiyo.n kaa merii aabaad aashiyaana
phirtii hai ab nazar me.n tasviir us makaa.n kii
arsh-e-barii.n se behtar thii sarzamii.n jahaa.n kii
naazuk-mizaaj ban kar vo ruuThnaa machalnaa
sehn-e-makaa.n me.n din bhar vo kuudnaa-uchhalnaa
allaah-re vo taKHayyul allaah-re saaz-o-saamaa.n
duniyaa kii saltanat thii is zindagii pe qurbaa.n
us ahd-e-aafyat me.n ik baar phir sulaa de
ai mere ahd-e-maazii phir ik jhalak dikhaa de
baaG-e-jahaa.n me.n rakkhaa un shaadiyo.n ne mujh ko
raahat kii loriyaa.n dii.n aazaadiyo.n ne mujh ko
be-fikr zindagii thii KHud hosh mujh ko kab thaa
ik kaif-e-be-KHudii thaa mast-e-mai-e-tarab thaa
ai umr-e-rafta tuu ne kii mujh se be-valfaaii
aa jaa palaT ke dam bhar mai.n huu.n tiraa fidaa.ii
dil me.n sharaarte.n thii.n kaise Gazab kii pinhaa.n
rag rag me.n bijliyaa.n thii.n josh-e-tarab kii pinhaa.n
huu.n apnii zindagii kaa andaaza karne vaalaa
jannat se laa ke tuu ne dozaKH me.n mujh ko Daalaa

Mirza Mohammad Hadi Aziz Lakhnavi
Nazm

intiKHabaat

inqilaabaat hone vaale hai.n
intiKHaabaat hone vaale hai.n
jaise haalaat the kabhii pahle
vaise haalaat hone vaale hai.n
bhaa.ii bhaa.ii me.n baap beTe me.n
iKHtilaafaat hone vaale hai.n
zer dasto.n ke zor dasto.n se
ek do haat hone vaale hai.n
bar-sar-e-aam raaz khulte hai.n
inkishaafaat hone vaale hai.n
jalsa-gaaho.n me.n maah-paaro.n me.n
ittifaaqaat hone vaale hai.n
phir machaltaa hai dil ki sach kah de.n
phir havaalaat hone vaale hai.n

Mirza Mahmood Sarhadi
Nazm

sae

aisii raate.n bhii ka.ii guzrii hai.n
jab tirii yaad nahii.n aatii hai
dard siine me.n machaltaa hai magar
lab pe fariyaad nahii.n aatii hai
har gunaa saamne aa jaataa hai
jaise taariik chaTaano.n kii qataar
na ko.ii hiila-e-tesha-kaarii
na madaavaa-e-faraar
aisii raate.n bhii hai.n guzrii mujh par
jab tirii raahguzar me.n saa.e
har jagah chaar taraf the chhaa.e
to na thii terii tarah ke saa.e
saa.e hii saa.e the larzaa.n larzaa.n
kabhii aa.e kabhii bhaage kabhii bhaage kabhii aa.e
saa.e hii saa.e the tirii raahguzar ke saa.e
aisii raate.n bhii hai.n guzrii mujh par
jab tirii yaad nahii.n aatii hai
lab pe fariyaad nahii.n aatii hai

Mohammad Deen Taseer
Nazm

aadmi hun

mai.n machaltaa huu.n gharo.ndo.n ke liye
uu.nchii niichii sii pasando.n ke liye

Vinod Kumar Tripathi Bashar
Nazm

sangam

prayaag pe bichh.Dii hu.ii bahne.n jo milii hai.n
paanii kii zamii.n par bhii to kaliyaa.n sii khilii hai.n
kuchh ga.ngaa kaa ruknaa
kuchh jamunaa kaa jhuknaa
phir dono.n kaa milnaa
vo phuul se khilnaa
kis shauq se iThlaatii hu.ii saath chalii hai.n
ye ishq-o-mohabbat ke nazzaare azalii hai.n
kahte hai.n ki jannat se bhii aa.ii hai bahan ek
go tiino.n kaa hii asl me.n ghar ek vatan hai
ghar jab se chhuTaa thaa
dil sard hu.aa thaa
vo koh se girnaa
vo dasht me.n phirnaa
raato.n ko vo sunsaan bayaabaan me.n chalnaa
sahme hu.e taaro.n kaa vo siine me.n machalnaa
thaa vo safar dasht me.n maidaan me.n ban me.n
KHaamosh pahaa.Do.n me.n gulistaa.n me.n chaman me.n
ja.ngal se nikalnaa
rukte hu.e chalnaa
kuchh ba.Dh ke palaTnaa
Dar Dar ke simaTnaa
mar mar ke akele ye guzaaraa hai zamaana
jaise ko.ii duniyaa me.n na ho apnaa yagaana
KHaalii kabhii jaatii nahii.n be-lafz sadaa.e.n
aaKHir ko asar kar ga.ii.n KHaamosh du.aa.e.n
jaagaa hai muqaddar
prayaag pe aa kar
ab Gam na sahe.nge
tanhaa na rahe.nge
prayaag pe bahno.n ko milaayaa hai KHudaa ne
muddat me.n ye din aaj dikhaayaa hai KHudaa ne
kyaa josh-e-mohabbat se baGal-giir hu.ii hai.n
vaaraftagii-e-shauq kii tasviir hu.ii hai.n
allaah re mohabbat
sarmaaya-e-raahat
ye kis ko KHabar thii
dil milte hai.n yuu.n bhii
ho.ngii na judaa hashr tak ab aise milii hai.n
KHush bahne.n hai.n yaa paanii pe kaliyaa.n sii khilii hai.n

Hamidullah Afsar
Nazm

nazm

raat kaaGaz qalam kaa ajab khel thaa
un ke qadmo.n kaa naqsha banaayaa gayaa
aur qadmo.n me.n dil ko sajaayaa gayaa
dil kii me.araaj the naqsh-e-paa pyaar ke
kyaa machaltaa thaa dil zindagii vaar ke
aur phir jaag uTThii adaa husn kii
meraa dil un ke zer-e-qadam aa gayaa
merii jur.at to dekho ai jaan-e-vafaa
apnaa zauq-e-junuu.n aazmaataa rahaa
tere qadmo.n ko mai.n ne miTaayaa nahii.n
dil kuchalte rahe dil banaataa rahaa

Ateeb Quadri
Nazm

bachchon ka git

la.Dakpan kii KHushiyo.n kaa e.ajaaz hai.n ham
Thaharte nahii.n josh-e-parvaaz hai.n ham
ki maa.n baap ke dil kii aavaaz hai.n ham
hamaaraa gulistaa.n hamaarii bahaare.n
hamii.n hai.n buzurgo.n ko bahlaane vaale
sharaarat me.n dilchaspiyaa.n paane vaale
sitaaro.n se la.D la.D ke so jaane vaale
hamaarii bahaare.n hamaaraa gulistaa.n
kabhii josh me.n jhuum kar ham jo gaa.e.n
kabhii mast ho kar jo dhuume.n machaa.e.n
farishte nigaaho.n me.n jalve dikhaa.e.n
hamaarii bahaare.n hamaaraa gulistaa.n
ghaTaa.o.n ne ham ko machalnaa sikhaayaa
havaa.o.n ne karvaT badalnaa sikhaayaa
sitaaro.n ne be-KHauf chalnaa sikhaayaa
hamaarii bahaare.n hamaaraa gulistaa.n
gul-e-zindagii hai nikharte rahe.nge
nikharte rahe.nge sa.nvarte rahe.nge
na.ii manzilo.n se guzarte rahe.nge
hamaarii bahaare.n hamaaraa gulistaa.n

Nazar Hyderabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now