Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nabz"

Nazm MATCHES FOR "nabz"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

daera

jism se ruuh talak ret hii ret
na kahii.n dhuup na saaya na saraab
kitne armaan hai.n kis sahraa me.n
kaun rakhtaa hai mazaaro.n kaa hisaab
nabz bujhtii bhii bha.Daktii bhii hai
dil kaa ma.amuul hai ghabraanaa bhii
raat andhere ne andhere se kahaa
ek aadat hai jiye jaanaa bhii
qaus ik rang kii hotii hai tuluu
ek hii chaal bhii paimaane kii
goshe goshe me.n kha.Dii hai masjid
shakl kyaa ho ga.ii mai-KHaane kii
ko.ii kahtaa thaa samundar huu.n mai.n
aur mirii jeb me.n qatra bhii nahii.n
KHairiyat apnii likhaa kartaa huu.n
ab to taqdiir me.n KHatra bhii nahii.n
apne haatho.n ko pa.Dhaa kartaa huu.n
kabhii qur.aa.n kabhii giitaa kii tarah
chand rekhaa.o.n me.n siimaa.o.n me.n
zindagii qaid hai siitaa kii tarah
raam kab lauTe.nge ma.aluum nahii.n
kaash raavan hii ko.ii aa jaataa

Kaifi Azmi
Nazm

kisan

naazir-e-gul paasbaan-e-ra.ng-o-buu gulshan-panaah
naaz-parvar lahlahaatii khetiyo.n kaa baadshaah

Josh Malihabadi
Nazm

ek nazm

daanish-var kahlaane vaalo
tum kyaa samjho
mub.ham chiize.n kyaa hotii hai.n
thal ke registaan me.n rahne vaale logo
tum kyaa jaano
saavan kyaa hai
apne badan ko
raat me.n andhii taariikii se
din me.n KHud apne haatho.n se
Dhaa.npne vaalo
uryaa.n logo
tum kyaa jaano
cholii kyaa hai daaman kyaa hai
shahr-badar ho jaane vaalo
fuTpaatho.n par sone vaalo
tum kyaa samjho
chhat kyaa hai diivaare.n kyaa hai.n
aa.ngan kyaa hai
ik la.Dkii kaa KHizaa.n-rasiida baazuu thaame
nabz ke uupar haath jamaa.e
ek sadaa par kaan lagaa.e
dha.Dkan saa.nse.n gin.ne vaalo
tum kyaa jaano
mub.ham chiize.n kyaa hotii hai.n
dha.Dkan kyaa hai jiivan kyaa hai
sattarah-number ke bistar par
apnii qaid kaa lamha lamha gin.ne vaalii
ye la.Dkii jo
barso.n kii biimaar nazar aatii hai tum ko
sola saal kii ik beva hai
ha.nste ha.nste ro pa.Dtii hai
andar tak se bhiig chukii hai
jaan chukii hai
saavan kyaa hai
is se puuchho
kaa.nch kaa bartan kyaa hotaa hai
is se puuchho
mub.ham chiize.n kyaa hotii hai.n
suunaa aa.ngan tanhaa jiivan kyaa hotaa hai

Aanis Moin
Nazm

ai dil-e-betab Thahar

tiirgii hai ki u.nmaDtii hii chalii aatii hai
shab kii rag rag se lahuu phuuT rahaa ho jaise
chal rahii hai kuchh is andaaz se nabz-e-hastii
dono.n aalam kaa nasha TuuT rahaa ho jaise
raat kaa garm lahuu aur bhii bah jaane do
yahii taariikii to hai Gaaza-e-ruKHsaar-e-sahar
sub.h hone hii ko hai ai dil-e-betaab Thahar
abhii zanjiir chhanaktii hai pas-e-parda-e-saaz
mutlaq-ul-hukm hai shiiraaza-e-asbaab abhii
saaGar-e-naab me.n aa.nsuu bhii Dhalak jaate hai.n
laGzish-e-paa me.n hai paabandIi-e-aadaab abhii
apne diivaano.n ko diivaana to ban lene do
apne mai-KHaano.n ko mai-KHaana to ban lene do
jald ye satvat-e-asbaab bhii uTh jaa.egii
ye giraa.n-baarii-e-aadaab bhii uTh jaa.egii
KHvaah zanjiir chhanaktii hii chhanaktii hii rahe

Faiz Ahmad Faiz
Nazm

autograph

kha.Dii hai.n ye bhii raaste pe ik taraf
bayaaz-e-aarzuu ba-kaf
nazar nazar me.n naa-rasaa parstisho.n kii daastaa.n
laraz rahaa hai dam-ba-dam
kamaan-e-abruvaa.n kaa KHam
ko.ii jab ek naaz-e-be-niyaaz se
kitaabcho.n pe khi.nchtaa chalaa gayaa
Huruuf-e-kaj-taraash kii lakiir sii
to tham ga.ii.n labo.n pe muskuraahaTe.n shariir sii

Majeed Amjad
Nazm

abad

ye kaisii lazzat se jism shal ho rahaa hai meraa
ye kyaa mazaa hai ki jis se hai uzv uzv bojhal
ye kaif kyaa hai ki saa.ns ruk ruk ke aa rahaa hai
ye merii aa.nkho.n me.n kaise shahvat-bhare a.ndhere utar rahe hai.n
lahuu ke gumbad me.n ko.ii dar hai ki vaa hu.aa hai
ye chhuuTtii nabz, ruktii dha.Dkan, ye hichkiyaa.n sii
gulaab o kaafuur kii lapaT tez ho ga.ii hai
ye aabnuusii badan, ye baazuu, kushaada siina
mire lahuu me.n simaTtaa sayyaal ek nukte pe aa gayaa hai
mirii nase.n aane vaale lamhe ke dhyaan se khi.nch ke rah ga.ii hai.n
bas ab to sarkaa do ruKH pe chaadar
diye bujhaa do

Fahmida Riaz
Nazm

KHatun-e-mashriq

naaz se huure.n taraane hamd ke gaane lagii.n
aurte.n bhar bhar ke apnii jholiyaa.n jaane lagii.n

Josh Malihabadi
Nazm

bewa ki KHud-kushi

ye a.ndherii raat ye saarii fazaa so.ii hu.ii
pattii pattii manzar-e-KHaamosh me.n kho.ii hu.ii
maujzan hai bahr-e-zulmat tiirgii kaa josh hai
shaam hii se aaj qindiil-e-falak KHaamosh hai
chand taare hai.n bhii to be-nuur pathraa.e hu.e
jaise baasii haar me.n ho.n phuul kumhlaa.e hu.e
khap gayaa hai yuu.n ghaTaa me.n chaa.ndnii kaa saaf ra.ng
jis tarah maayuusiyo.n me.n dab ke rah jaa.e uma.ng
umDii hai kaalii ghaTaa duniyaa Dubone ke liye
yaa chalii hai baal khole raa.nD rone ke liye
jitnii hai gunjaan bastii utnii hii viiraan hai
har galii KHaamosh hai har raasta sunsaan hai
ik makaa.n se bhii makii.n kii kuchh KHabar miltii nahii.n
chilmane.n uThtii nahii.n zanjiir-e-dar hiltii nahii.n
so rahe hai.n mast-o-be-KHud ghar ke kul piir-o-javaa.n
ho ga.ii hai.n band husn-o-ishq me.n sargoshiyaa.n
haa.n magar ik samt ik goshe me.n ko.ii nauhagar
le rahii hai karvaTo.n par karvaTe.n dil thaam kar
dil sambhaltaa hii nahi.n hai siina-e-sad-chaak me.n
phuul saa chehra aTaa hai bevgii kii KHaak me.n
u.D chalii hai ra.ng-e-ruKH ban kar hayaat-e-musta.aar
ho rahaa hai qalb-e-murda me.n javaanii kaa fishaar
hasrate.n dam to.Dtii hai.n yaas kii aaGosh me.n
saik.Do.n shikve machalte hai.n lab-e-KHaamosh me.n
umr aamaada nahii.n murda-parastii ke liye
baar hai ye zinda mayyat dosh-e-hastii ke liye
chaahtii hai laakh qaabuu dil pe paatii hii nahii.n
haa.e-re zaalim javaanii bas me.n aatii hii nahii.n
thartharaa kar girtii hai jab suune bistar par nazar
le ke ik karvaT paTak detii hai vo takiya pe sir
jab khanak uThtii hai.n sotii la.Dkiyo.n kii chuu.Diyaa.n
aah ban kar uThne lagtaa hai kaleja se dhu.aa.n
ho ga.ii beva kii KHaatir nii.nd bhii jaise haraam
muKHtasar saa ahd-e-vaslat de gayaa soz-e-davaam
dopahar kii chhaa.nv daur-e-shaadmaanii ho gayaa
pyaas bhii bujhne na paa.ii KHatm paanii ho gayaa
le rahii hai karvaTo.n par karvaTe.n baa-iztiraar
aag me.n paara hai yaa bistar pe jism-e-be-qaraar
pa.D ga.ii ik aah kar ke ro ke uTh baiThii kabhii
u.ngliyo.n me.n le ke zulf-e-KHam-ba-KHam ai.nThii kabhii
aa ke ho.nTo.n par kabhii maayuus aahe.n tham ga.ii.n
aur kabhii suunii kalaa.ii par nigaahe.n jam ga.ii.n
itnii duniyaa me.n kahii.n apnii jagah paatii nahii.n
yaas is had kii ki shauhar kii bhii yaad aatii nahii.n
aa rahe hai.n yaad paiham saas nando.n ke suluuk
phaT rahaa hai Gam se siina uTh rahii hai dil me.n huuk
apnii maa.n bahno.n kaa bhii aa.nkhe.n churaanaa yaad hai
aisii duniyaa me.n kisii kaa chho.D jaanaa yaad hai
baaGbaa.n to qabr me.n hai kaun ab dekhe bahaar
KHud usii ko tiir us ke karne vaale hai.n shikaar
jab nazar aataa nahii.n detaa ko.ii bekas kaa saath
zahr kii shiishii kii jaanib KHud-ba-KHud ba.Dhtaa hai haath
dil ta.Dap kar kah rahaa hai jald is duniyaa ko chho.D
chuu.Diyaa.n to.Dii.n to phir zanjiir-e-hastii ko bhii to.D
dam agar niklaa to kho.ii zindagii mil jaa.egii
ye nahi.n to KHair tanhaa qabr hii mil jaa.egii
vaa.n tujhe zillat kii nazro.n se na dekhegaa ko.ii
chaahe ha.nsnaa chaahe ronaa phir na rokegaa ko.ii
vaa.n sab ahl-e-dard hai.n sab saahab-e-insaaf hai.n
rahbar aage jaa chukaa raahe.n bhii terii saaf hai.n
dil inhii.n baato.n me.n uljhaa thaa ki dam ghabraa gayaa
haath le kar zahr kii shiishii labo.n tak aa gayaa
tilmilaatii aa.nkh jhapkaatii jhijaktii haa.nptii
pii ga.ii kul zahr aaKHir thartharaatii kaa.nptii
maut ne jhaTkaa diyaa kul uzv Dhiile ho ga.e
saa.ns ukh.Dii, nabz Duubii, ho.nT niile ho ga.e
aa.nkh jhapkii ashk Tapkaa hichkii aa.ii kho ga.ii
maut kii aaGosh me.n ik aah bhar kar so ga.ii
aur kar ik aah sulge hind kii rasmo.n kaa daam
ai javaanaa-marg beva tujh pe 'kaifii' kaa salaam

Kaifi Azmi
Nazm

husn aur mazduri

ho rahaa hai jazb mahr-e-KHuu.n-chakaa.n ke ruu-ba-ruu
ka.nkaro.n kii nabz me.n uThtii javaanii kaa lahuu

Josh Malihabadi
Nazm

mahatma-gandhi ka qatl

kuchh der ko nabz-e-aalam bhii chalte chalte ruk jaatii hai
har mulk kaa parcham girtaa hai har qaum ko hichkii aatii hai

Anand Narayan Mulla
Nazm

phir wahi kunj-e-qafas

TuuTte dekh ke deriina ta.attul kaa fusuu.n
nabz-e-ummiid-e-vatan ubhrii magar Duub ga.ii
peshvaa.o.n kii nigaaho.n me.n tazabzub paa kar
TuuTtii raat ke saa.e me.n sahar Duub ga.ii

Sahir Ludhianvi
Nazm

naqqad

rahm ai naqqaad-e-fan ye kyaa sitam kartaa hai tuu
ko.ii nok-e-KHaar se chhuutaa hai nabz-e-ra.ng-o-buu

Josh Malihabadi
Nazm

aazadi

raqs kartii hai.n ishaaro.n par mire maut-o-hayaat
dekhtii rahtii huu.n mai.n har-vaqt nabz-e-kaa.enaat

Ali Sardar Jafri
Nazm

zaifa

uf laraztii KHaufnaak aavaaz chaukiidaar kii
nabz chhuuTii jaa rahii hai gumbad-e-davvaar kii

Josh Malihabadi
Nazm

aurat

paaya-e-takmiil ko pahu.nchaa juu.nhii ye shaahkaar
dast-e-qudrat ne TaTolii nabz us kii baar baar

Shaad Aarfi
Nazm

nae KHake

KHazaana-e-ra.ng-o-nuur taariik rahguzaaro.n me.n luT rahaa hai
uruus-e-gul kaa Guruur-e-ismat siyaahkaaro.n me.n luT rahaa hai
tamaam sarmaaya-e-lataafat zaliil KHaaro.n me.n luT rahaa hai
ghuTii ghuTii hai.n numuu kii saa.nse.n chhuTii chhuTii nabz-e-gulistaa.n hai
hai.n gursana phuul, tishna Gunche, ruKHo.n pe zardii labo.n pe jaa.n hai
asiir hai.n ham-safiir jab se KHizaa.n chaman me.n ravaa.n-davaa.n hai

Kaifi Azmi
Nazm

shikast-e-ana

aaj kii raat bahut sard bahut kaalii hai
tiirgii aise lipaTtii hai havaa-e-Gam se
apne bichh.De hu.e saajan se milii hai jaise
mish.al-e-KHvaab kuchh is taur bujhii hai jaise
dard ne jaagtii aa.nkho.n kii chamak khaa lii hai
shauq kaa naam na KHvaahish kaa nishaa.n hai ko.ii
barf kii sil ne mire dil kii jagah paa lii hai
ab dhundalke bhii nahii.n ziinat-e-chashm-e-be-KHvaab
aas kaa ruup-mahl dast-e-tahii hai jaise
bahr-e-imkaan pe kaa.ii sii jamii hai jaise
aise lagtaa hai ki jaise miraa ma.amuura-e-jaa.n
kisii sailaab-zada ghar kii zabuu.n-haalii hai
na ko.ii dost na taaraa ki jise batlaa.uu.n
is tarah TuuT ke bikhraa hai anaa kaa shiisha
meraa pindaar mire dil ke liye gaalii hai
nabz taaro.n kii tarah Duub rahii hai jaise!
Gam kii pinhaa.ii samundar se ba.Dii hai jaise!
aa.nkh sahraa.o.n ke daaman kii tarah KHaalii hai
vahshat-e-jaa.n kii taraf dekh ke yuu.n lagtaa hai
maut is tarah ke jiine se bhalii hai jaise
tiirgii chhaTne lagii, vaqt rukegaa kyuu.n-kar
sub.h-e-KHurshiid liye dar pe kha.Dii hai jaise
daaG-e-rusvaa.ii chhupaane se nahii.n chhup saktaa
ye to yuu.n hai ki jabii.n bol rahii hai jaise!

Amjad Islam Amjad
Nazm

ghaTa chhai to kya

chhaT ga.e jab aap hii uudii ghaTaa chhaa.ii to kyaa
turbat-e-paamaal ke sabze pe lahar aa.ii to kyaa
jab zaruurat hii rahii baaqii na lahn-o-ra.ng kii
koyale.n kuukii.n to kyaa saavan kii rut aa.ii to kyaa
hijr ke aalaam se jab chhuT chukii nabz-e-nashaat
ab havaa ne KHaar-o-KHas me.n ruuh dau.Daa.ii to kyaa
ho chukii zauq-e-tabassum hii se jab begaanagii
ab chaman-afroz phuulo.n ko ha.nsii aa.ii to kyaa
mu.D chukii jab maut ke jaade kii jaanib zindagii
ab kisii ne aafiyat kii raah dikhlaa.ii to kyaa
har nafas ke saath dil se jab dhu.aa.n uThne lagaa
baadalo.n se chhan ke ab ThanDii havaa aa.ii to kyaa
saamne jab aap ke gesuu kii lahre.n hii nahii.n
badliyo.n ne charKH par ab zulf bikhraa.ii to kyaa
ho chukaa paayaab jab bahr-e-sar-o-barg-e-shabaab
ab samundar kii javaanii baa.Dh par aa.ii to kyaa
Guncha-e-ahd-e-tarab hii mil chukaa ab KHaak me.n
KHaak-e-gulshan ab gul-e-tar ban ke itraa.ii to kyaa
miT chuke jab vaalihaana baa.nkpan ke valvale
aa.ii ab doshiiza-e-mausam ko a.ng.Daa.ii to kyaa
khul chukaa jab parcham-e-Gam zindagii ke qasr par
ab havaa.o.n ne kamar paudo.n kii lachkaa.ii to kyaa
aa.nsu.o.n me.n bah ga.ii.n jab KHuun kii jaulaaniyaa.n
ja.ngalo.n kii chhaa.nv me.n barsaat iThlaa.ii to kyaa
'josh' ke pahluu me.n jab tum hii machal sakte nahii.n
phir ghaTaa ke daamano.n me.n barq lahraa.ii to kyaa

Josh Malihabadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now