Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nihaarnaa"

Nazm MATCHES FOR "nihaarnaa"

Nazm

sunahri machhli

baat hai to kuchh aib sii
lekin phir bhii hai
ho ga.ii thii mohabbat
ek mard ko
ek sunahrii machhlii se
lahro.n se aTkheliyaa.n kartii
bal khaatii chamchamaatii machhlii
bhaa ga.ii thii mard ko
TukTukii baa.ndhe pahro.n
dekhtaa rahtaa vo
us shoKH kii aThkheliyaa.n
machhlii ko bhii achchhaa lagtaa thaa
mard kaa is tarah se nihaarnaa
ba.ndh ga.e dono.n pyaar ke bandhan me.n
milan kii KHvaahish fitrii thii
mard ne machhlii se iltijaa kii
ek baar sirf ek baar
paanii se baahar aane kii koshish karo
mohabbat kaa junuun
itnaa shadiid thaa ki
baGair kuchh soche-samjhe
machhlii paanii se baahar aa ga.ii
chhaT-paTaa ga.ii
bahut barii tarah se chhaT-paTaa ga.ii
lekin ab
vo apne mahbuub kii baa.nho.n me.n thii
mohabbat kii kaifiyat me.n
kuchh pal ko
saarii ta.Dap saarii chhaT-paTaahaT jaatii rahii
do badan ik jaan ho ga.e
sairaab ho kar mahbuub ne
mahbuuba ko paanii ke supurd kar diyaa
ba.Daa anokhaa ba.Daa masarrat-a.ngez
aur ba.Daa dardnaak thaa ye mel
har baar puurii taaqat baTor kar
chal pa.Dtii mahbuuba
mahbuub se milne
ta.Dpha.Daatii chhaT-paTaatii
pyaar detii pyaar paatii
sairaab kartii sairaab hotii
aur phir lauT aatii paanii me.n
ek din
machhlii ko jaane kyaa suujhii
us ne mard se kahaa
aaj tum aa.o
mai.n paanii me.n kaise aa.uu.n
kuchh pal apne saa.nse.n rok lo
machhlii ne kahaa
saa.ns rok luu.n
ya.anii jiinaa rok luu.n
kuchh pal jiine ke liye hii to aataa huu.n mai.n
tumhaare paas
saa.ns rok luu.ngaa to jiyuu.ngaa kaise
mard ne kahaa
machhlii sakte me.n thii
ek hii pal me.n:
mard kii fitrat aur mohabbat ke
baahamii rishte kii sachchaa.ii
us ke saamne thii
ab
kuchh jaan.ne paane aur chaahne ko
baaqii nahii.n bachaa thaa
machhlii ne be-kaif nigaaho.n se
mard ko dekhaa
aur Duub ga.ii
be-panaah gahraa.iyo.n me.n
udhar KHud se be-KHabar mard
jiine kii KHvaahish liye abhii tak vahii.n baiThaa hai
aur soch rahaa hai meraa qusuur kyaa hai

Deepti Mishra
Nazm

hamesha der kar deta hun

hamesha der kar detaa huu.n mai.n har kaam karne me.n
zaruurii baat kahnii ho ko.ii va.ada nibhaanaa ho
use aavaaz denii ho use vaapas bulaanaa ho
hamesha der kar detaa huu.n mai.n
madad karnii ho us kii yaar kii Dhaaras ba.ndhaanaa ho
bahut deriina rasto.n par kisii se milne jaanaa ho
hamesha der kar detaa huu.n mai.n
badalte mausamo.n kii sair me.n dil ko lagaanaa ho
kisii ko yaad rakhnaa ho kisii ko bhuul jaanaa ho
hamesha der kar detaa huu.n mai.n
kisii ko maut se pahle kisii Gam se bachaanaa ho
haqiiqat aur thii kuchh us ko jaa ke ye bataanaa ho
hamesha der kar detaa huu.n mai.n har kaam karne me.n.....

Muneer Niyazi
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

ai ishq hamein barbaad na kar

aa.ankho.n ko ye kyaa aazaar hu.aa har jazb-e-nihaa.n par ro denaa
aaha.ng-e-tarab par jhuk jaanaa aavaaz-e-fuGaa.n par ro denaa
barbat kii sadaa par ro denaa mutrib ke bayaa.n par ro denaa

Akhtar Shirani
Nazm

muhasara

qalandaraan-e-vafaa kii asaas to dekho
tumhaare saath hai kaun aas-paas to dekho
so shart ye hai jo jaa.n kii amaan chaahte ho
to apne lauh-o-qalam qatl-gaah me.n rakh do
vagarna ab ke nishaana kamaan-daaro.n kaa
bas ek tum ho so Gairat ko raah me.n rakh do

Ahmad Faraz
Nazm

tarana-e-hindi

saare jahaa.n se achchhaa hindostaa.n hamaaraa
ham bulbule.n hai.n is kii ye gulsitaa.n hamaaraa
Gurbat me.n ho.n agar ham rahtaa hai dil vatan me.n
samjho vahii.n hame.n bhii dil ho jahaa.n hamaaraa
parbat vo sab se uu.nchaa ham-saaya aasmaa.n kaa
vo santarii hamaaraa vo paasbaa.n hamaaraa
godii me.n kheltii hai.n is kii hazaaro.n nadiyaa.n
gulshan hai jin ke dam se rashk-e-jinaa.n hamaaraa
ai aab-ruud-e-ga.ngaa vo din hai yaad tujh ko
utraa tire kinaare jab kaarvaa.n hamaaraa
maz.hab nahii.n sikhaataa aapas me.n bair rakhnaa
hindii hai.n ham vatan hai hindostaa.n hamaaraa
yuunaan o misr o ruumaa sab miT ga.e jahaa.n se
ab tak magar hai baaqii naam-o-nishaa.n hamaaraa
kuchh baat hai ki hastii miTtii nahii.n hamaarii
sadiyo.n rahaa hai dushman daur-e-zamaa.n hamaaraa
'iqbaal' ko.ii mahram apnaa nahii.n jahaa.n me.n
maaluum kyaa kisii ko dard-e-nihaa.n hamaaraa

Allama Iqbal
Nazm

abhi to main jawan hun

havaa bhii KHush-gavaar hai
gulo.n pe bhii nikhaar hai
tarannum-e-hazaar hai
bahaar pur-bahaar hai
kahaa.n chalaa hai saaqiyaa
idhar to lauT idhar to aa
are ye dekhtaa hai kyaa
uThaa subuu subuu uThaa
subuu uThaa pyaala bhar
pyaala bhar ke de idhar
chaman kii samt kar nazar
samaa.n to dekh be-KHabar
vo kaalii kaalii badliyaa.n
ufuq pe ho ga.ii.n ayaa.n
vo ik hujuum-e-mai-kashaa.n
hai suu-e-mai-kada ravaa.n
ye kyaa gumaa.n hai bad-gumaa.n
samajh na mujh ko naa-tavaa.n
KHayaal-e-zohd abhii kahaa.n
abhii to mai.n javaan huu.n
ibaadato.n kaa zikr hai
najaat kii bhii fikr hai
junuun hai savaab kaa
KHayaal hai azaab kaa
magar suno to shaiKH jii
ajiib shai hai.n aap bhii
bhalaa shabaab o aashiqii
alag hu.e bhii hai.n kabhii
hasiin jalva-rez ho.n
adaa.e.n fitna-KHez ho.n
havaa.e.n itr-bez ho.n
to shauq kyuu.n na tez ho.n
nigaar-haa-e-fitnagar
ko.ii idhar ko.ii udhar
ubhaarte ho.n aish par
to kyaa kare ko.ii bashar
chalo jii qissa-muKHtasar
tumhaaraa nuqta-e-nazar
durust hai to ho magar
abhii to mai.n javaan huu.n
ye gasht kohsaar kii
ye sair juu-e-baar kii
ye bulbulo.n ke chahchahe
ye gul-ruKHo.n ke qahqahe
kisii se mel ho gayaa
to ranj o fikr kho gayaa
kabhii jo baKHt so gayaa
ye ha.ns gayaa vo ro gayaa
ye ishq kii kahaaniyaa.n
ye ras bharii javaaniyaa.n
udhar se mehrbaaniyaa.n
idhar se lan-taraaniyaa.n
ye aasmaan ye zamii.n
nazaara-haa-e-dil-nashii.n
inhe.n hayaat-aafrii.n
bhalaa mai.n chho.D duu.n yahii.n
hai maut is qadar qarii.n
mujhe na aa.egaa yaqii.n
nahii.n nahii.n abhii nahii.n
abhii to mai.n javaan huu.n
na Gam kushuud o bast kaa
buland kaa na past kaa
na buud kaa na hast kaa
na vaada-e-alast kaa
ummiid aur yaas gum
havaas gum qayaas gum
nazar se aas paas gum
hama-bajuz gilaas gum
na mai me.n kuchh kamii rahe
qadah se hamdamii rahe
nashist ye jamii rahe
yahii hamaa-hamii rahe
vo raag chhe.D mutribaa
tarab-fazaa, alam-rubaa
asar sadaa-e-saaz kaa
jigar me.n aag de lagaa
har ek lab pe ho sadaa
na haath rok saaqiyaa
pilaa.e jaa pilaa.e jaa
abhii to mai.n javaan huu.n

Hafeez Jalandhari
Nazm

la-ilaha-illallah

KHudii kaa sirr-e-nihaa.n laa-ilaaha-illallaah
KHudii hai teG fasaa.n laa-ilaaha-illallaah
ye daur apne baraahiim kii talaash me.n hai
sanam-kada hai jahaa.n laa-ilaaha-illallaah
kiyaa hai tuu ne mataa-e-Guruur kaa saudaa
fareb-e-suud-o-ziyaa.n laa-ilaaha-illallaah
ye maal-o-daulat-e-duniyaa ye rishta o paivand
butaan-e-vahm-o-gumaa.n laa-ilaaha-illallaah
KHirad hu.ii hai zamaan o makaa.n kii zunnaarii
na hai zamaa.n na makaa.n laa-ilaaha-illallaah
ye naGma fasl-e-gul-o-laala kaa nahii.n paaband
bahaar ho ki KHizaa.n laa-ilaaha-illallaah
agarche but hai.n jamaa.at kii aastiino.n me.n
mujhe hai hukm-e-azaa.n laa-ilaaha-illallaah

Allama Iqbal
Nazm

pas raho

tum mire paas raho
mire qaatil, mire dildaar mire paas raho
jis gha.Dii raat chale,
aasmaano.n kaa lahuu pii ke siyah raat chale
marham-e-mushk liye, nashtar-e-almaas liye
bain kartii hu.ii ha.nstii hu.ii gaatii nikle
dard ke kaasnii paazeb bajaatii nikle
jis gha.Dii siino.n me.n Duube hu.e dil
aastiino.n me.n nihaa.n haatho.n kii rah takne lage
aas liye
aur bachcho.n ke bilakne kii tarah qulqul-e-mai
bahr-e-naa-suudgii machle to manaa.e na mane
jab ko.ii baat banaa.e na bane
jab na ko.ii baat chale
jis gha.Dii raat chale
jis gha.Dii maatamii sunsaan siyah raat chale
paas raho
mire qaatil, mire dildaar mire paas raho

Faiz Ahmad Faiz
Nazm

dua

ishq kaa sirr-e-nihaa.n jaan-e-tapaa.n hai jis se
aaj iqraar kare.n aur tapish miT jaa.e
harf-e-haq dil me.n khaTaktaa hai jo kaa.nTe kii tarah
aaj iz.haar kare.n aur KHalish miT jaa.e

Faiz Ahmad Faiz
Nazm

urdu

kyuu.n mujh ko banaate ho ta.assub kaa nishaana
mai.n ne to kabhii KHud ko musalmaa.n nahii.n maanaa
dekhaa thaa kabhii mai.n ne bhii KHushiyo.n kaa zamaana
apne hii vatan me.n huu.n magar aaj akelii

Iqbal Ashhar
Nazm

ye daulat bhi le lo ye shohrat bhi le lo

kha.Dii dhuup me.n apne ghar se nikalnaa
vo chi.Diyaa.n vo bulbul vo titlii paka.Dnaa
vo gu.Diyo.n kii shaadii pe la.Dnaa jhaga.Dnaa
vo jhuulo.n se girnaa vo girte sambhalnaa
vo piital ke chhaa.nv ke pyaare se tohfe
vo TuuTii hu.ii chuu.Diyo.n kii nishaanii
vo kaaGaz kii kashtii vo baarish kaa paanii

Sudarshan Faakir
Nazm

KHizr-e-rah

bartar az andesha-e-suud-o-ziyaa.n hai zindagii
hai kabhii jaa.n aur kabhii tasliim-e-jaa.n hai zindagii
tuu ise paimaana-e-imroz-o-fardaa se na naap
jaavedaa.n paiham davaa.n har-dam javaa.n hai zindagii
apnii duniyaa aap paidaa kar agar zindo.n me.n hai
sirr-e-aadam hai zamiir-e-kun-fakaa.n hai zindagii
zindagaanii kii haqiiqat kohkan ke dil se puuchh
juu-e-shiir-o-tesha-o-sa.ng-e-garaa.n hai zindagii
bandagii me.n ghaT ke rah jaatii hai ik juu-e-kam-aab
aur aazaadii me.n bahr-e-be-karaa.n hai zindagii
aashkaaraa hai ye apnii quvvat-e-tasKHiir se
garche ik miTTii ke paikar me.n nihaa.n hai zindagii
qulzum-e-hastii se to ubhraa hai maanind-e-habaab
is ziyaa.n-KHaane me.n teraa imtihaa.n hai zindagii
KHaam hai jab tak tuu hai miTTii kaa ik ambaar tuu
puKHta ho jaa.e tuu hai shamsher-e-be-zinhaar tuu
ho sadaaqat ke liye jis dil me.n marne kii ta.Dap
pahle apne paikar-e-KHaakii me.n jaa.n paidaa kare
phuu.nk Daale ye zamiin-o-aasmaan-e-musta'aar
aur KHaakistar se aap apnaa jahaa.n paidaa kare
zindagii kii quvvat-e-pinhaa.n ko kar de aashkaar
taa ye chingaarii froG-e-jaavedaa.n paidaa kare
KHaak-e-mashriq par chamak jaa.e misaal-e-aaftaab
taa-badaKHshaa.n phir vahii laa'l-e-giraa.n paidaa kare
suu-e-garduu.n naala-e-shab-giir kaa bheje safiir
raat ke taaro.n me.n apne raaz-daa.n paidaa kare
ye gha.Dii mahshar kii hai tuu arsa-e-mehshar me.n hai
pesh kar Gaafil ‘amal ko.ii agar daftar me.n hai
saltanat

Allama Iqbal
Nazm

aaKHiri KHat

vo vaqt mirii jaan bahut duur nahii.n hai
jab dard se ruk jaa.e.ngii sab ziist kii raahe.n
aur had se guzar jaa.egaa andoh-e-nihaanii
thak jaa.e.ngii tarsii hu.ii naakaam nigaahe.n
chhin jaa.e.nge mujh se mire aa.nsuu mirii aahe.n
chhin jaa.egii mujh se mirii be-kaar javaanii

Faiz Ahmad Faiz
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

KHalwat

fusuu.n-kaaraa nigaaraa nau-bahaaraa aarzuu-aaraa
bhalaa lamho.n kaa merii aur tumhaarii KHvaab-parvar
aarzuu-mandii kii sarshaarii se kyaa rishta
hamaarii baahamii yaado.n kii dildaarii se kyaa rishta
mujhe tum apnii baa.nho.n me.n jaka.D lo aur mai.n tum ko
yahaa.n ab tiisraa ko.ii nahii.n ya.anii mohabbat bhii

Jaun Eliya
Nazm

chalo chhoDo

chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa
talab suukhe hu.e patto.n kaa be-raunaq jaziira hai
KHalish diimak-zada auraaq par bosiida satro.n kaa zaKHiira hai
KHummaar-e-vasl taptii dhuup ke siine pe u.Dte baadalo.n kii raa.egaa.n baKHshish!
Gubaar-e-hijr-e-sahraa me.n saraabo.n se aTe mausam kaa KHamyaaza
chalo chho.Do
ki ab tak mai.n a.ndhero.n kii dhamak me.n saa.ns kii zarbo.n pe
chaahat kii binaa rakh kar safar kartaa rahaa huu.ngaa
mujhe ehsaas hii kab thaa
ki tum bhii mausamo.n ke saath apne pairahan ke rang badlogii
chalo chho.Do
vo saare KHvaab kachchii bharbharii miTTii ke be-qiimat gharau.nde the
vo saare zaa.iqe merii zabaa.n par zaKHm ban kar jam ga.e ho.nge
tumhaarii u.ngliyo.n kii naram pore.n pattharo.n par naam likhtii thii.n miraa lekin
tumhaarii u.ngliyaa.n to aadatan ye jurm kartii thii.n
chalo chho.Do
safar me.n ajnabii logo.n se aise haadse sarzad hu.aa karte hai.n sadiyo.n se
chalo chho.Do
miraa honaa na honaa ik baraabar hai
tum apne KHaal-o-KHad ko aa.iine me.n phir nikharne do
tum apnii aa.nkh kii bastii me.n phir se ik nayaa mausam utarne do
mire KHvaabo.n ko marne do
na.ii tasviir dekho
phir nayaa maktuub likho
phir na.e mausam na.e lafzo.n se apnaa silsila jo.Do
mire maazii kii chaahat raa.egaa.n samjho
mirii yaado.n se kachche raabte to.Do
chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa

Mohsin Naqvi
Nazm

iltija-e-musafir

farishte pa.Dhte hai.n jis ko vo naam hai teraa
ba.Dii janaab tirii faiz aam hai teraa
sitaare ishq ke terii kashish se hai.n qaa.em
nizaam-e-mehr kii suurat nizaam hai teraa
tirii lahad kii ziyaarat hai zindagii dil kii
masiih o KHizr se uu.nchaa maqaam hai teraa
nihaa.n hai terii mohabbat me.n ra.ng-e-mahbuubii
ba.Dii hai shaan ba.Daa ehtiraam hai teraa
agar siyaah dilam daaG-e-laala-zaar-e-tavaam
digar kushaada jabiinam gul-e-bahaar-e-tavaam
chaman ko chho.D ke niklaa huu.n misl-e-nik.hat-e-gul
hu.aa hai sabr kaa manzuur imtihaa.n mujh ko
chalii hai le ke vatan ke nigaar-KHaane se
sharaab-e-ilm kii lazzat kashaa.n kashaa.n mujh ko
nazar hai abr-e-karam par daraKHt-e-sahraa huu.n
kiyaa KHudaa ne na mohtaaj-e-baaGbaa.n mujh ko
falak-nashii.n sifat-e-mehr huu.n zamaane me.n
tirii du.aa se ataa ho vo nardbaa.n mujh ko
maqaam ham-safaro.n se ho is qadar aage
ki samjhe manzil-e-maqsuud kaarvaa.n mujh ko
mirii zabaan-e-qalam se kisii kaa dil na dukhe
kisii se shikva na ho zer-e-aasmaa.n mujh ko
dilo.n ko chaak kare misl-e-shaana jis kaa asar
tirii janaab se aisii mile fuGaa.n mujh ko
banaayaa thaa jise chun chun ke KHaar o KHas mai.n ne
chaman me.n phir nazar aa.e vo aashiyaa.n mujh ko
phir aa rakhuu.n qadam-e-maadar-o-pidar pe jabii.n
kiyaa jinho.n ne mohabbat kaa raaz-daa.n mujh ko
vo sham-e-baargah-e-KHaandaan-e-murtazvii
rahegaa misl-e-haram jis kaa aastaa.n mujh ko
nafas se jis ke khilii merii aarzuu kii kalii
banaayaa jis kii muravvat ne nukta-daa.n mujh ko
du.aa ye kar ki KHudaavand-e-aasmaan-o-zamii.n
kare phir us kii ziyaarat se shaadmaa.n mujh ko
vo meraa yuusuf-e-saanii vo sham-e-mahfil-e-ishq
hu.ii hai jis kii uKHuvvat qaraar-e-jaa.n mujh ko
jalaa ke jis kii mohabbat ne daftar-e-man-o-tuu
havaa-e-aish me.n paalaa kiyaa javaa.n mujh ko
riyaaz-e-dahr me.n maanind-e-gul rahe KHandaa.n
ki hai aziiz-tar az-jaa.n vo jaan-e-jaa.n mujh ko
shagufta ho ke kalii dil kii phuul ho jaa.e
ye iltijaa-e-musaafir qubuul ho jaa.e

Allama Iqbal
Nazm

mere dard ko jo zaban mile

miraa dard naGma-e-be-sadaa
mirii zaat zaraa-e-be-nishaa.n
mere dard ko jo zabaa.n mile
mujhe apnaa naam-o-nishaa.n mile
merii zaat kaa jo nishaa.n mile
mujhe raaz-e-nazm-e-jahaa.n mile
jo mujhe ye raaz-e-nihaa.n mile
mirii KHaamushii ko bayaa.n mile
mujhe kaa.enaat kii sarvarii
mujhe daulat-e-do-jahaa.n mile

Faiz Ahmad Faiz
Nazm

pandrah august

yahii jagah thii yahii din thaa aur yahii lamhaat
yahii.n to dekhaa thaa ik KHvaab sochii thii ik baat
musaafiro.n ke dilo.n me.n KHayaal aataa hai
har ik zamiir ke aage savaal aataa hai
vo baat yaad hai ab tak hame.n ki bhuul ga.e
vo KHvaab ab bhii salaamat hai yaa fuzuul ga.e
chale the dil me.n liye jo iraade puure hu.e
ye kaun hai ki jo yaado.n me.n charKHaa kat.taa hai
ye kaun hai jo hame.n aaj bhii bataataa hai
hai va.ada KHud se nibhaanaa hame.n agar apnaa
to kaarvaa.n nahii.n ruk paa.e bhuul kar apnaa
hai tho.Dii duur abhii sapno.n kaa nagar apnaa
musaafiro abhii baaqii hai kuchh safar apnaa

Javed Akhtar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now