Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nimaT"

Nazm MATCHES FOR "nimaT"

Nazm

gwadar chhawni

agar kahii.n in ke bas me.n ho to
vatan kii miTTii ke chappe chappe pe chhaavnii ho
agar kahii.n in ke bas me.n ho to
badan kii miTTii ke chappe chappe pe chhaavnii ho
jo log ab tak masaa.il-e-hast-o-buud hii se nimaT rahe the
ab un me.n ik fasl-e-niist kaTtii ho aur naabuud ug rahaa ho
agar kahii.n in ke bas me.n ho to
zamiin se baaruud ug rahaa ho

Salman Haider
Nazm

tujhe apne liye

ba.Dii dil-bastagii ke saath
pahle KHud tujhe ta.amiir karnaa hai
kamaal-e-aarzuu ko jo mayassar hai.n
ba.Dii chaahat se phir tujh me.n
vo saare rang bharne hai.n
tujhe tasviir karnaa hai
hujuum-e-ibn-e-aadam ke liye
terii guzargaaho.n pe
kuchh taaza gul-o-laala bichhaane hai.n
tujhe ik KHvaab kii ta.abiir karnaa hai
charaaG-e-jaa.n kii taabaanii se tujh ko
partav-e-tanviir karnaa hai
nimaT kar in sabhii kaamo.n se ai duniyaa
tire fankaar ko KHuu-e-zamaana naa-shanaasii se
tujhe apne liye KHud laa.iq-e-taaziir karnaa hai

Mubeen Mirza
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

shor-e-barbat-o-nai

hastii kii mataa-e-be-paayaa.n jaagiir tirii hai na merii hai
is bazm me.n apnii mish.al-e-dil bismil hai to kyaa raKHshaa.n hai to kyaa
ye bazm charaaGaa.n rahtii hai ik taaq agar viiraa.n hai to kyaa
afsurda hai.n gar ayyaam tire badlaa nahii.n maslak-e-shaam-o-sahar
Thahre nahii.n mausam-e-gul ke qadam qaa.em hai jamaal-e-shams-o-qamar
aabaad hai vaadii-e-kaakul-o-lab shaadaab-o-hasii.n gulgasht-e-nazar
maqsuum hai lazzat-e-dard-e-jigar maujuud hai nemat-e-diida-e-tar
is diida-e-tar kaa shukr karo is zauq-e-nazar kaa shukr karo
is shaam o sahar kaa shukr karo in shams o qamar kaa shukr karo

Faiz Ahmad Faiz
Nazm

hello best friend

mere hone kii zamaane me.n vazaahat karnaa
dil ke jazbaat kii duniyaa se hifaazat karnaa
vaise mushkil hai kisii par bhii ye nemat karnaa
phir bhii mumkin ho to taa-umr mohabbat karnaa

Balmohan panday
Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi
Nazm

sab jaante hain ilm se hai zindagi ki ruh

sab jaante hai.n ilm se hai zindagii kii ruuh
be-ilm hai agar to vo insaa.n hai naa tamaam
be-ilm-o-be-hunar hai jo duniyaa me.n ko.ii qaum
nature kaa iqtizaa hai rahe ban ke vo Gulaam
ta.aliim agar nahii.n hai zamaane ke hasb-o-haal
phir kyaa umiid-e-daulat-o-aaraam-o-ihteraam
sayyad ke dil me.n naqsh ho is KHayaal kaa
Daalii binaa-e-madrasa le kar KHudaa kaa naam
sadme uThaa.e ranj sahe gaaliyaa.n sunii.n
lekin na chho.Daa qaum ke KHaadim ne ye kaam
dikhlaa diyaa zamaane ko zor-e-dil-o-dimaaG
batlaa diyaa vo karte hai.n karne vaale kaam
niyyat jo thii ba-KHair to barkat KHudaa ne dii
collage hu.aa durust ba-sad shaan-o-ehtishaam
sarmaa.e me.n kamii thii sahaaraa ko.ii na thaa
sayyad kaa dil thaa darpai takmiil-e-intizaam
aaKHir uThaa safar ko vo mard KHasta paye
ahbaab chand saath the zii-ilm-o-KHush-kalaam
qismat ki rahbarii se milii manzil-e-muraad
farmaa.n-ravaa-e-mulk-e-dakan ko kiyaa salaam
haalat dikhaa.ii aur zaruurat bayaan kii
KHuubii se iltimaas kiyaa qaum kaa payaam
rahm aa gayaa huzuur ko haalat pe qaum kii
phir kyaa thaa maujzan hu.aa dariyaa-e-faiz-e-aam
maahaana do hazaar kiyaa ik hazaar se
ummiid se ziyaada ataa thii ye laa-kalaam
'akbar' kii ye du.aa hai KHudaa kii janaab me.n
taa-hashr is ra.iis-o-riyaasat ko ho qayaam
kyaa vaqt par hu.ii hai ki be-ehtijjaj-e-fikr
taariik apnii aap hai fayyazii-e-nizaam

Akbar Allahabadi
Nazm

sayyad ki lauh-e-turbat

ai ki teraa murG-e-jaa.n taar-e-nafas me.n hai asiir
ai ki terii ruuh kaa taa.ir qafas me.n hai asiir
is chaman ke naGma-pairaao.n kii aazaadii to dekh
shahr jo uj.Daa hu.aa thaa us kii aabaadii to dekh
fikr rahtii thii mujhe jis kii vo mahfil hai yahii
sabr-o-istiqlaal kii khetii kaa haasil hai yahii
sa.ng-e-turbat hai miraa girviida-e-taqriir dekh
chashm-e-baatin se zaraa is lauh kii tahriir dekh
mudda.aa teraa agar duniyaa me.n hai ta.aliim-e-dii.n
tark-e-duniyaa qaum ko apnii na sikhlaanaa kahii.n
vaa na karnaa firqa-bandii ke liye apnii zabaa.n
chhup ke hai baiThaa hu.aa ha.ngaama-e-mahshar yahaa.n
vasl ke asbaab paidaa ho.n tirii tahriir se
dekh ko.ii dil na dukh jaa.e tirii taqriir se
mahfil-e-nau me.n puraanii daastaano.n ko na chhe.D
ra.ng par jo ab na aa.e.n un fasaano.n ko na chhe.D
tuu agar ko.ii mudabbir hai to sun merii sadaa
hai dilerii dast-e-arbaab-e-siyaasat kaa asaa
arz-e-matlab se jhijak jaanaa nahii.n zebaa tujhe
nek hai niyyat agar terii to kyaa parvaa tujhe
banda-e-momin kaa dil biim-o-riyaa se paak hai
quvvat-e-farmaa.n-ravaa ke saamne bebaak hai
ho agar haatho.n me.n tere KHaam-e-mojiz raqam
shiisha-e-dil ho agar teraa misaal-e-jaam-e-jam
paak rakh apnii zabaa.n tilmiiz-e-rahmaanii hai tuu
ho na jaa.e dekhnaa terii sadaa be-aabruu
sone vaalo.n ko jagaa de sher ke e.ajaaz se
KHirman-e-baatil jalaa de sho.ala-e-aavaaz se

Allama Iqbal
Nazm

mazdur laDki

idhar baiTho
paraa.ii la.Dkiyo.n ko is tarah dekhaa nahii.n karte
ye lipstick
ye powder
aur ye scarf
kyaa hogaa
mujhe kheto.n me.n mazduurii se fursat hii nahii.n miltii
mire ho.nTo.n pe ghanTo.n buu.nd paanii kii nahii.n pa.Dtii
mire chehre mire baazuu pe luu aur dhuup rahtii hai
gale me.n sirf piital kaa ye chandan haar kaafii hai
havaa me.n dilkashii hai
aur fazaa sonaa luTaatii hai
mujhe un se aqiidat hai
yahii merii mataa.a merii nemat hai

Salam Machhli shahri
Nazm

barish ka pahla qatra

ghanghor ghaTaa tulii kha.Dii thii
par buu.nd abhii nahii.n pa.Dii thii
har qatra ke dil me.n thaa ye KHatra
naachiiz huu.n mai.n Gariib qatra
tar mujh se kisii kaa lab na hogaa
mai.n aur kii guu.n na aap jogaa
kyaa khet kii mai.n bujhaa.uu.ngaa pyaas
apnaa hii karuu.ngaa satyaanaas
KHaalii haatho.n se kyaa saKHaavat
phiikii baato.n me.n kyaa halaavat
kis birte pe mai.n karuu.n dilerii
mai.n kaun huu.n kyaa bisaat merii
har qatra ke dil me.n thaa yahii Gam
sargoshiyaa.n ho rahii thii.n baaham
khich.Dii sii ghaTaa me.n pak rahii thii
kuchh kuchh bijlii chamak rahii thii
ik qatra ki thaa ba.Daa dilaavar
himmat ke muhiit kaa shanaavar
faiyyaz o javvaad o nek-niyyat
bha.Dkii us kii rag-e-hamiyyat
bolaa lalkaar kar ki aa.o!
mere piichhe qadam ba.Dhaa.o
kar guzro jo ho sake kuchh ehsaan
Daalo murda zamiin me.n jaan
yaaro! ye hachar-machar kahaa.n tak
apnii sii karo bane jahaa.n tak
mil kar jo karoge jaa.n-fishaanii
maidaan pe pher doge paanii
kahtaa huu.n ye sab se barmalaa mai.n
aate ho to aa.o lo chalaa mai.n
ye kah ke vo ho gayaa ravaana
''dushvaar hai jii pe khel jaanaa''
har-chand ki thaa vo be-bizaa.at
kii us ne magar ba.Dii shujaa.at
dekhii jur.at jo us sakhii kii
do-chaar ne aur pairvii kii
phir ek ke baa'd ek lapkaa
qatra qatra zamii.n pe Tapkaa
aaKHir qatro.n kaa ba.ndh gayaa taar
baarish lagii hone moslaa-dhaar
paanii paanii hu.aa bayaabaa.n
sairaab hu.e chaman KHayaabaa.n
thii qaht se paa.emaal KHilqat
is me.nh se hu.ii nihaal KHilqat
jur.at qatra kii kar ga.ii kaam
baaqii hai jahaa.n me.n aaj tak naam
ai saahibo! qaum kii KHabar lo
qatro.n kaa saa ittifaaq kar lo
qatro.n hii se hogii nahr jaarii
chal nikle.ngii kashtiyaa.n tumhaarii

Ismail Merathi
Nazm

dil mere sahra-naward-e-pir dil

naGma-dar-jaa.n raqs barpaa KHanda-bar-lab
dil tamannaa.o.n ke be-paayaa.n alaav ke qariib
dil mire sahraa-navard-e-piir dil
reg ke dil-shaad shahrii reg tuu
aur reg hii terii talab
reg kii nik.hat tire paikar me.n terii jaa.n me.n hai
reg sub.h-e-iid ke maanind zartaab-o-jaliil
reg sadiyo.n kaa jamaal
jashn-e-aadam par bichha.D kar milne vaalo.n kaa visaal
shauq ke lamhaat ke maanind aazaad-o-aziim
reg naGma-zan
ki zarre reg-zaaro.n kii vo paazeb-e-qadiim
jis pe pa.D saktaa nahii.n dast-e-la.iim
reg-e-sahraa zar-garii kii ek kii lahro.n se duur
chashma-e-makr-o-riyaa shahro.n se duur
reg shab-bedaar hai suntii hai har jaabir kii chaap
reg shab-bedaar hai nigaraa.n hai maanind-e-naqiib
dekhtii hai saaya-e-aamir kii chaap
reg har ayyaar Gaarat-gar kii maut
reg istibdaad ke tuGyaa.n ke shor-o-shar kii maut
reg jab uThtii hai u.D jaatii hai har faateh kii nii.nd
reg ke nezo.n se zaKHmii sab shahanshaaho.n ke KHvaab
reg ai sahraa kii reg
mujh ko apne jaagte zarro.n ke KHvaabo.n kii
na.ii ta.abiir de
reg ke zarro.n ubhartii sub.h tum
aa.o sahraa kii hado.n tak aa gayaa roz-e-tarab
dil mire sahraa-navard-e-piir dil
aa chuum reg
hai KHayaalo.n ke parii-zaado.n se bhii ma.asuum reg
reg-e-raqsaa.n maah-o-saal nuur tak raqsaa.n rahe
us kaa abresham mulaa.em narm-KHuu KHandaa.n rahe
dil mire sahraa-navard-e-piir dil
ye tamannaa.o.n kaa be-paayaa.n alaav
raah gum kar duu.n kii mash.al is ke lab par aa.o aa.o
tere maazii ke KHazaf rezo.n se jaagii hai ye aag
aag kii qurmuz zabaa.n par imbisaat-e-nau ke raag
dil mire sahraa-navard-e-piir dil
sargiraanii kii shab-e-rafta se jaag
kuchh sharar aaGosh sarsar me.n hai.n gum
aur kuchh ziina ba ziina sho.alo.n ke miinaar par cha.Dhte hu.e
aur kuchh tah me.n alaav kii abhii
muztarib lekin muzabzab tifl-e-kam-sin kii tarah
aag ziina aag ra.ngo.n kaa KHaziina
aag un lazzaat kaa sar-chashma hai
jis se letaa hai Gizaa ushshaaq ke dil kaa tapaak
chob-e-KHushk anguur us kii mai hai aag
sarsaraatii hai rago.n me.n iid ke din kii tarah
aag kaahin yaad se utrii hu.ii sadiyo.n kii ye afsaana-KHvaa.n
aane vaale qarnahaa kii daastaane.n lab pe hai.n
dil miraa sahraa-navard-e-piir dil sun kar javaa.n
aag aazaadii kaa dil-shaadii kaa naam
aag paidaa.ish kaa afzaa.ish kaa naam
aag ke phuulo.n me.n nasrii.n yaasman sumbul shafiiq-o-nastaran
aag aaraa.ish kaa zebaa.ish kaa naam
aag vo taqdiis dhul jaate hai.n jis se sab gunaah
aag insaano.n kii pahlii saa.ns ke maanind ik aisaa karam
umr kaa ik tuul bhii jis kaa nahii.n kaafii javaab
ye tamannaa.o.n kaa be-paayaa.n alaav gar na ho
is laq-o-daq me.n nikal aa.e.n kahii.n se bhe.Diye
is alaav ko sadaa raushan rakho
reg-e-sahraa ko bashaarat ho ki zinda hai alaav
bhe.Diyo.n kii chaap tak aatii nahii.n
aag se sahraa kaa rishta hai qadiim
aag se sahraa ke Te.Dhe re.ngne vaale
girah-aaluud zholiida daraKHt
jaagte hai.n naGma-dar-jaa.n raqs barpaa KHanda-bar-lab
aur manaa lete hai.n tanhaa.ii me.n jashn-e-maahtaab
un kii shaaKHe.n Gair-mara.ii tabl kii aavaaz par detii hai.n taal
biikH-o-bun se aane lagtii hai KHudaavandii jalaajil kii sadaa
aag se sahraa kaa rishta hai qadiim
rahravo.n sahraa-navardo.n ke liye hai rahnumaa
kaarvaano.n kaa sahaaraa bhii hai aag
aur sahraa.o.n kii tanhaa.ii ko kam kartii hai aag
aag ke chaaro.n taraf pashmiina-o-dastaar me.n lipTe hu.e
afsaana-go
jaise gird-e-chashm mizhgaa.n kaa hujuum
un ke hairat-naak dilkash tajrabo.n se
jab damak uThtii hai ret
zarra zarra bajne lagtaa hai misaal-e-saaz-e-jaa.n
gosh-bar-aavaaz rahte hai.n daraKHt
aur ha.ns dete hai.n apnii aarifaana be-niyaazii se kabhii
ye tamannaa.o.n kaa be-paayaa.n alaav gar na ho
reg apnii KHalvat-e-be-nuur-o-KHud-bii.n me.n rahe
apnii yaktaa.ii kii tahsii.n me.n rahe
is alaav ko sadaa raushan rakho
ye tamannaa.o.n kaa be-paayaa.n alaav gar na ho
asia africa pahnaa.ii kaa naam
be-kaar pahnaa.ii kaa naam
europe aur america daaraa.ii kaa naam
takraar-e-daaraa.ii kaa naam
meraa dil sahraa-navard-e-piir dil
jaag uThaa hai mashriq-o-maGrib kii aisii yak-dilii
ke kaarvaano.n kaa nayaa ruuyaa liye
yak-dilii aisii ki hogii fahm-e-insaa.n se varaa
yak-dilii aisii ki ham sab kah uThe.n
is qadar ujlat na kar
izhdihaam-e-gul na ban
kah uThe.n ham
tuu Gam-e-kul to na thii
ab lazzat-e-kul bhii na ban
roz-e-aasaa.ish kii bedardii na ban
yak-dilii ban aisaa sannaaTaa na ban
jis me.n taabistaa.n kii dopahro.n kii
be-haasil kasaalat ke sivaa kuchh bhii na ho
is jafaa-gar yak-dilii ke kaarvaa.n yuu.n aa.e.nge
dast-e-jaaduu-gar se jaise phuuT nikle ho.n tilism
ishq-e-haasil-KHez se yaa zor-e-paidaa.ii se jaise naa-gahaa.n
khul ga.e ho.n mashriq-o-maGrib ke jism
jism sadiyo.n ke aqiim
kaarvaa.n farKHanda-pai aur un kaa baar
kiisa kiisa taKHt-e-jam aur taaj-e-kai
kuuza kuuza fard kii satvat kii mai
jaama jaama roz-o-shab mehnat kaa KHai
naGma naGma hurriyat kii garm lai
saaliko firoz-baKHto aane vaale qaaflo
shahr se lauToge tum to paa.oge
ret ke sarhad pe jo ruuh-e-abad KHvaabiida thii
jaag uThii hai shikva-haa-e-nai se vo
ret kii tah me.n jo sharmiilii sahar ro.iida thii
jaag uThii hai hurriyat kii lai se vo
itnii doshiiza thii itnii mard-e-naa-diida thii sub.h
puuchh sakte the na us kii umr ham
dard se ha.nstii na thii
zarro.n kii ra.anaa.ii pe bhii ha.nstii na thii
ek mahjuubaana be-KHabarii me.n ha.ns detii thii sub.h
ab manaatii hai vo sahraa kaa jalaal
jaise izz-o-jal ke paa.nv kii yahii mehraab ho
zer-e-mehraab aa ga.ii ho us ko bedaarii kii raat
KHud janaab-e-izz-o-jal se jaise umiid-e-zafaaf
saare naa-karda gunaah is ke mu.aaf
sub.h-e-sahraa shaad-baad
ai uruus-e-izz-o-jal farKHanda ro taabinda kho
tuu ik aise hujra-e-shab se nikal kar aa.ii hai
dast-e-qaatil ne bahaayaa thaa jahaa.n har sej par
sai.nka.Do.n taaro.n kaa raKHshanda lahuu phuulo.n ke paas
sub.h-e-sahraa sar mire zaanuu pe rakh kar daastaa.n
un tamannaa ke shahiido.n kii na kah
un kii niima-ras uma.ngo.n aarzuu.o.n kii na kah
jin se milne kaa ko.ii imkaa.n nahii.n
shahd teraa jin ko nashsh-e-jaa.n nahii.n
aaj bhii kuchh duur is sahraa ke paar
dev kii diivaar ke niiche nasiim
roz-o-shab chaltii hai mub.ham KHauf se sahmii hu.ii
jis tarah shahro.n kii raaho.n par yatiim
naGma-bar-lab taaki un kii jaa.n kaa sannaaTaa ho duur
aaj bhii is reg ke zarro.n me.n hai.n
aise zarre aap hii apne Ganiim
aaj bhii is aag ke sho.alo.n me.n hai.n
vo sharar jo us kii tah me.n par-buriida rah ga.e
misl-e-harf naa-shuniida rah ga.e
sub.h-e-sahraa ai uruus-e-izz-o-jal
aa ki un kii daastaa.n dohraa.e.n ham
un kii izzat un kii azmat gaa.e.n ham
sub.h ret aur aag ham sab kaa jalaal
yak-dilii ke kaarvaa.n un kaa jamaal
aa.o
is tahliil ke halqe me.n ham mil jaa.e.n
aa.o
shaad-baaG apnii tamannaa.o.n kaa be-paayaa.n alaav

Noon Meem Rashid
Nazm

holi

jo ko.ii siyaanii hai in me.n to ko.ii hai naa-kunad
vo shor-bor thii sab rang se nipaT yak chand
ko.ii dilaatii hai saathin ko yaar key saugand
ki ab to jaama-o-a.ngiyaa ke Tole hai.n sab band
phir aa ke khele.nge ho kar do-chaar holii me.n

Nazeer Akbarabadi
Nazm

holi

ab zard ye cheraa jo tire sar pe jamaa hai
aur is pe ye turra jo zarii kaa bhii dharaa hai
niimaa bhii tiraa rang se kesar ke bharaa hai
poshaak pe terii gul-e-sad-barg fidaa hai
nargis tirii aa.nkho.n pe hai qurbaan idhar dekh

Nazeer Akbarabadi
Nazm

sahari mein ammi mujhko jagana

duu.ngaa na zahmat
kar lii hai niyyat
saharii me.n ammii mujh ko jagaanaa

Ataur Rahman Tariq
Nazm

inqalab

zamaane kii havaa badlii udhar ra.ng-e-chaman badlaa
gulo.n ne jab ravish badlii anaadil ne vatan badlaa
tariiqa aashnaa.ii kaa kabhii aisaa na badlaa thaa
ki chaal ushshaaq ne badlii hasiino.n ne chalan badlaa
badalte aa.e hai.n yuu.n to hamesha daur garduu.n ke
na aisaa bhii ki ham badle hamaaraa kul jatan badlaa
maqaasid maz.hab o millat ke badle daur-e-aalam ne
sahaa.if kii sharh badlii kitaabo.n kaa matan badlaa
badal Daalaa hai aisaa maGribii tahziib ne ham ko
mazaaq-e-KHvaan-e-nemat aur tarz-e-pairahan badlaa
puraanii chaal be-Dha.ngii hamaarii dekhe.n kab badle
abhii tak jug hii badle the Gazab ye hai qaran badlaa
na badlaa par na badlaa haa.e tarz-e-mu.asharat qaumii
agarche saarii duniyaa kaa hunar aur ilm-o-fan badlaa
nizaam-e-shaa.erii me.n haa.e aayaa inqalaab aisaa
ki shaan-e-nazm badlii aur andaaz-e-suKHan badlaa
saliiqa intiqaad-e-jins-e-hirfat kaa nahii.n ham ko
zar-e-KHaalis se abresham-numaa europe ne san badlaa
na badlaa hai na badlegaa faqat qaanuun-e-islaamii
'qamar' jab tak ki qudrat ne na ye charKH-e-kuhan badlaa

Syed Taslim Haider Qamar
Nazm

tafaut

ham kitnaa ro.e the jab ik din sochaa thaa ham mar jaa.e.nge
aur ham se har nemat kii lazzat kaa ehsaas judaa ho jaa.egaa
chhoTii chhoTii chiize.n jaise shahd kii makkhii kii bhin bhin
chi.Diyo.n kii chuu.n chuu.n kavvo.n kaa ek ik tinkaa chun.naa
niim kii sab se uu.nchii shaaKH pe jaa kar rakh denaa aur gho.nsla bun.naa
sa.Dke.n kuuTne vaale engine kii chhuk chhuk bachcho.n kaa dhuul u.Daanaa
aadhe na.nge mazduuro.n ko pyaaz se roTii khaate dekhe jaanaa
ye sab laa-yaanii bekaar mashaaGil baiThe baiThe ek dam chhin jaa.e.nge
ham kitnaa ro.e the jab pahlii baar ye KHatra andar jaagaa thaa
is gardish karne vaalii dhartii se rishta TuuTegaa ham jaamid ho jaa.e.nge
lekin kab se lab saakit hai.n dil kii ha.ngaama-aaraa.ii kii
barso.n se aavaaz nahii.n aa.ii aur is marg-e-musalsal par
in kam-maaya aa.nkho.n se ik qatra aa.nsuu bhii to nahii.n Tapkaa

Akhtarul Iman
Nazm

alamiya-e-naqd

sabhii kaale dhan vaale hai.n KHairiyat se
jahaa.n hai.n jidhar hai.n vo hai.n aafiyat se
mile na mile un ko achchhii niyyat se
ye ruupya agar mil bhii jaa.e to kyaa hai

Fay Seen Ejaz
Nazm

KHuda se kalam

KHudaa-e-bartar
terii vahdaaniyat kii qasam
jab bhii tere aage sar-ba-sujuud hu.ii
to niyyat kii
ki zamiin ke un tamaam KHudaa.o.n ko radd kartii huu.n
jo apne ohdo.n ke aage
mujhe jhukaane par ba-zid rahe
ai hamesha rahne vaalii zaat
jab ko.ii jism-e-KHaakii taaqat ke nashe me.n
kisii kamzor ko kuchaltaa hai
tab guzartaa vaqt is par bahut ha.nstaa hai
ai raaziq-e-rahiim
ham aise nizaam ko bhog rahe hai.n
jahaa.n ek kii baqaa duusre kii bhuuk par qaabiz hone me.n hai
tuu ki vaaqif hai dilo.n ke bhed se
aise haalaat aa jaate hai.n ki
sach gosha-nashiin ho jaataa hai
sharaafat aur hayaa pe
sa.ng-baarii hotii hai
ai KHaaliq-e-kaa.enaat
tuu ne apne kalaam me.n zamiin kaa dukh bayaan kiyaa hai
jo an-ginat mazaalim apne uupar jheltii hai
is zamiin kii KHaamoshii kii qasam
saare zaalim apnii dasht apnii saffaakiyo.n kaa khel rachaate rachaate
ek din zamiin ke andar chale jaate hai.n
ai KHudaa-e-aziim
ye zamiin meraa bichhaunaa
mai.n ne us kii KHaamushii ko apne siine me.n utaaraa
tere ataa kiye hu.e hausle ne
mere qadam ukha.Dne nahii.n diye
varna
kisii drill-machine kii tarah
jumle dil me.n suuraaKH karte ga.e
tashannuj-zada chehro.n par ha.nsii tab dikhaa.ii dii
jab aa.nkho.n se KHvaab chhiin liye ga.e
ai mere parvardigaar
hame.n ek aisaa mu.aashra diyaa gayaa
jahaa.n hamaare phep.Do.n pe paa.nv rakh ke hukmaraanii karne vaale
hamaarii saa.ns ke chalne rukne kaa tamaashaa dekhte hai.n
tashaama-biino.n kii aa.nkho.n us ant kii muntazir hotii hai.n
ki jab in se zinda rahne kii bhiik maa.ngii jaa.e
ai mere ma.abuud
mai.n ne aise hii kagaar pe
terii bartarii talab kii
ai mere dukho.n ke raaz-daa.n
tuu vaaqif hai
jab mere ird-gird girya-e-vahshat taarii thaa
aur mujhe bataayaa jaa rahaa thaa
ki sartaan mere baap ko khaa rahaa hai
vo vaqt thaa ki na ko.ii harf-e-tasallii kaam aa saktaa thaa na ko.ii ummiid baaqii rah ga.ii thii
merii aa.nkhe.n KHushk thii.n
mere saare aa.nsuu mere andar girte ga.e
vo vaqt thaa mere ma.abuud
jab tuu ne mere qalb ko Gam se labrez kar ke
merii tarbiyat kii thii
mujhe baavar hu.aa
ki aane vaale vaqt me.n qadam qadam pe
mujhe sartaan kaa saamaan karnaa hogaa
fiqro.n me.n qahqaho.n me.n
us shaitaan ko ka.nkarii kaun maare
jo taariik dilo.n ke minaa me.n baiThaa hai
mere maulaa
mai.n kisii mo.ajize kii muntazir nahii.n
bas itnii himmat de mujhe
ki tiirgii ke muqaabil
raushnii ko hameshgii de duu.n

Injila Hamesh
Nazm

wo lamha

ba.De ahmaq ho
use bhuulne ko kahte ho
jiite jii marne kii
niyyat nahii.n hamaarii hai

Anita Mohan
Nazm

aaTa

hazrat aadam pe jo guzrii hai sab ko yaad hai
daana-e-gandum kii zinda aaj tak be-daad hai
aaj phir aulaad-e-aadam par vahii uftaad hai
is kaa baanii bhii farishto.n kaa vahii ustaad hai
daur daura aaj is kaa chor-baazaaro.n me.n hai
maaheriin-e-chor-baazaarii ke Gam-KHvaaro.n me.n hai
un me.n dekhaa is kaa jalva jo zaKHiira-baaz hai.n
dafn tah-KHaano.n me.n jin ke boriyo.n ke raaz hai.n
boriyo.n se milte-julte to.nd ke andaaz hai.n
aur fariyaad-o-bukaa me.n sab ke ham-aavaaz hai.n
to.nd par hai haath aur faaqo.n se haalat zaar hai
in ko ii.ndhan is jahannam ke liye darkaar hai
ho gayaa baazaar se aaTe kaa aisaa intiqaal
ab khule baazaar me.n aaTe kaa milnaa hai muhaal
ik zaKHiira-baaz maulaanaa-numaa duukaan-daar
qaum ke is ibtilaa se kal bahut the be-qaraar
aah is millat kaa kyuu.n gehuu.n pe hai daar-o-madaar
kaash khaatii baajraa yaa kaash ye khaatii javaar
is ke khaane ke liye nemat har ik maujuud hai
daana-e-gandum bhalaa kyuu.n gauhar-e-maqsuud hai
sach jo puuchho to kahuu.n shaitaan kaa ration hai ye
jis ne jannat luuT lii insaa.n kaa vo dushman hai ye
haif hai insaan kar de is par jannat tak nisaar
sab ko gandum se bachaanaa ai mire parvardigaar
sai.nka.Do.n man yuu.n to gehuu.n mere tah-KHaane me.n hai
aur mazaa bhii kyaa mujhe aazaar pahchaane me.n hai
mere hisse kii vahii mai hai jo paimaane me.n hai
haa.n magar dozaKH jo hai gehuu.n ke parvaane me.n hai
jis ne gehuu.n khaa liyaa dozaKH me.n gole khaa.egaa
jis ko jannat chaahiye vo sirf chhole khaa.egaa

Shaukat Thanvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now