Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pak.de"

Nazm MATCHES FOR "pak.de"

Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

adl-e-faruqi ka ek namuna

ek din hazrat-e-faaruuq ne mimbar pe kahaa
kyaa tumhe.n hukm jo kuchh duu.n to karoge manzuur
ek ne uTh ke kahaa ye ki na maane.nge kabhii
ki tire adl me.n ham ko nazar aataa hai futuur
chaadare.n maal-e-Ganiimat me.n jo ab ke aa.ii.n
sehan-e-masjid me.n vo taqsiim hu.ii.n sab ke huzuur
un me.n har ek ke hisse me.n faqat ik aa.ii
thaa tumhaaraa bhii vahii haq ki yahii hai dastuur
ab jo ye jism pe tere nazar aataa hai libaas
ye usii luuT kii chaadar se banaa hogaa zaruur
muKHtasar thii vo ridaa aur tiraa qad hai daraaz
ek chaadar me.n tiraa jism na hogaa mastuur
apne hisse se ziyaada jo liyaa tuu ne to ab
tuu KHilaafat ke na qaabil hai na ham hai.n maamuur
garche vo had-e-manaasib se ba.Dhaa jaataa thaa
sab ke sab mohr-ba-lab the che inaas o che zakuur
rok de ko.ii kisii ko ye na rakhtaa thaa majaal
nashsha-e-adl-o-masaavaat se sab the maKHmuur
apne farzand se faaruuq-e-mo.azzam ne kahaa
tum ko hai haalat-e-aslii kii haqiiqat pe ubuur
tumhii.n de sakte ho is kaa mirii jaanib se javaab
ki na pak.De mujhe mahshar me.n miraa rabb-e-Gafuur
bole ye ibn-e-umar sab se muKHaatib ho kar
is me.n kuchh vaalid-e-maajid kaa nahii.n jurm o qusuur
ek chaadar me.n jo puuraa na hu.aa un kaa libaas
kar sakii is ko gavaaraa na mirii tab-e-Gayuur
apne hisse kii bhii mai.n ne unhe.n chaadar de dii
vaaqi.a kii ye haqiiqat hai ki jo thii mastuur
nukta-chii.n ne ye kahaa uTh ke ki haa.n ai faaruuq
hukm de ham ko ki ab ham use maane.nge zaruur

Shibli Nomani
Nazm

ye basti meri basti hai

ajab be-KHauf mausam the
ham aksar baaG se ik saath hii
amruud kii chorii me.n pak.De jaa chuke the par
samajh me.n ye nahii.n aataa
ki maalii kii har ik gaalii har ik patthar
akelii maarvii hii ke liye maKHsuus thaa kyuu.nkar

Ishrat Afreen
Nazm

naqqad

log jin kii jaa.n-gudaazii se hai.n dil pak.De hu.e
khokhle naGme hai.n vo auzaan me.n jak.De hu.e

Josh Malihabadi
Nazm

zara socho

farz karo ki saare jaanvar baat bhii karte ham se
un ke jo jii me.n aa jaataa kah dete ek dam se
darvaaze par kuttaa kahtaa bhuuke hai.n do din ke
ko.ii davaa bhii de do dekho makkhii zaKHm pe bhinke
baavarchii-KHaane me.n chyuu.nTii shakar maa.ngtii rahtii
bas do daane bas do daane har phere par kahtii
chi.Diyaa u.Dte phirte khi.Dkii par aavaaz lagaatii
bachcho.n ke kamre me.n chhup kar daal ke daane khaatii
ga.e bail sabzii ke Thele vaalo.n se la.D jaate
DanDe khaa kar gaaliyaa.n bakte dil kii aag bujhaate
billii duudh kaa pyaala pak.De gosht maa.ngtii rahtii
din bhar leTii daadii jaisii apnii baat hii kahtii
bakre kii qurbaanii par kuchh bakre maatam karte
murGe bhii is majlis me.n mu.nh laTkaa kar Gam karte
saas bahuu ke jhag.De kii chhipkiliyaa.n shaahid hotii.n
shauhar kii aamad par saaraa qissa vo hii rotii.n
Garaz ke saarii duniyaa me.n ik shor saa barpaa rahtaa
chup ho jaa.o chup ho jaa.o saaraa aalam kahtaa

Asna Badr
Nazm

ek-tarfa ishq

mai.n apnii nazm se bharii Diary haath me.n pak.De
tumhaare saamne jab bhii pa.Dhnaa chaahtaa huu.n
mere haath aur merii zabaan dono la.Dkha.Daate hai.n
ye is baat kaa subuut hai ki mujhe nazmo.n se ishq to hai
par vo ek-tarfa hai

Himanshu Sharma Himanshu
Nazm

eid ke roz

kaisii nikhrii sii nazar aatii hai fazaa eid ke roz
shaadmaa.n phirte hai.n sab shaah-o-gadaa eid ke roz
kitnii be-fikrii se gaate hai.n gadaa raaho.n me.n
peT KHaalii ho to gaa.e.n bhii na kyaa eid ke roz
kyaa bhalii lagtii hai har piir-o-javaa.n ke mu.nh se
har taraf eid mubaarak kii sadaa eid ke roz
ammii KHush ho.ngii aur eidii bhii vahii paa.egaa
vaqt se pahle jo bedaar hu.aa eid ke roz
chaa.nd untiis ko kyaa niklaa ki aadhii shab se
tailoring shaap me.n ik taa.ntaa ba.ndhaa eid ke roz
kap.De bhii dhul na sake vaqt-e-namaaz aa pahuu.nchaa
laundry vaalo.n pe aafat hai bapaa eid ke roz
daadii ammaa.n ne musalle ko pare Daal diyaa
ghar me.n mehmaano.n kaa vo shor machaa eid ke roz
aa.nkh ojhal hu.ii aur TuuT savayyo.n pe pa.Daa
der se aslam isii taak me.n thaa eid ke roz
iid-gah shaan se Tam Tam pe chale hai.n babban
baap ke kaa.ndho.n pe nanhaa bhii cha.Dhaa eid ke roz
pak.De laaThii ko maTakte chale ramzaanii miyaa.n
piichhe se bachcho.n kaa ik gol chalaa eid ke roz
apne begaane jo ba.Dh ba.Dh ke gale milte ho.n
kyo.n na phir aa.e ibaadat me.n maza eid ke roz
roze ramzaan ke rakhnaa to sabhii bhuul ga.e
kaise bhuule.nge savayyo.n ko bhalaa eid ke roz
saal ke saal rahe yaad-e-KHudaa se Gaafil
ai 'zakii' un ko bhii yaad aayaa KHudaa eid ke roz

Zaki Ahmad
Nazm

kachche rangon ka mausam

ghar se basta aur tiffin ke saath nikalnaa maktab ko
aadhe hii raste se ghuum ke vaapas aanaa
shaam Dhale tak
khelnaa kuudnaa
jhag.De karnaa
phir mil jaanaa
baaG se jaa kar aam churaanaa
pak.De jaanaa
ghar par aa kar Daa.nTe.n sun.naa
kabhii kabhii thappa.D bhii khaanaa
ganne ke murjhaa.e aur kaale phuulo.n se
naqlii daa.Dhii muu.nchh banaanaa
chhup kar juuThii bii.Dii piinaa
kheto.n me.n jhaa.De ko jaanaa
idhar udhar kii baate.n karnaa
ik gore la.Dke ke piichhe takte rahnaa
kam-umrii me.n baaliG honaa
ulTe siidhe dhyaan me.n shab bhar
jaagte rahnaa
kitnaa achchhaa lagtaa thaa
vo raate.n kitnii pyaarii thii.n
vo din kitne albele the

Shakeel Azmi
Nazm

pyare pyare

pa.Dhnaa likhnaa sikhaa.e
achchhii raah bataa.e
bad se hame.n bachaa.e
achchhaa bachcha banaa.e
bhayyaa pyaaraa pyaaraa
ghanTii KHuub bajaa.e
basta bhii laTkaa.e
maktab le kar jaa.e
jaldii se pahu.nchaa.e
rickshaw pyaaraa pyaaraa
phuulo.n par itraa.e
KHushbuu bhii bikhraa.e
ghar aa.ngan mahkaa.e
hariyaalii bhii laa.e
gamlaa pyaaraa pyaaraa
bhayyaa le kar jaa.e
circus bhii dikhlaa.e
laDDuu bhii khilvaa.e
jo chaaho mil jaa.e
mela pyaaraa pyaaraa
jab jab ye lahraa.e
sab kii shaan ba.Dhaa.e
jis ke haath ye aa.e
aage ba.Dhtaa jaa.e
jhanDaa pyaaraa pyaaraa
taariikii me.n aa.e
bistar tak pahu.nchaa.e
lorii bhii sunvaa.e
sapne bhii dikhlaa.e
sonaa pyaaraa pyaaraa
sab ko maar bhagaa.e
jo dekhe Dar jaa.e
ulTii shaamat laa.e
dushman ko.ii aa.e
Da.nDaa pyaaraa pyaaraa
baarish me.n kaam aa.e
baahar le kar jaa.e
KHud to bhiigaa jaa.e
lekin hame.n bachaa.e
chhaataa pyaaraa pyaaraa
jagmag ruup dikhaa.e
chandaa riijhaa jaa.e
rasta bhii batlaa.e
lekin haath na aa.e
taaraa pyaaraa pyaaraa
tal kar munnaa khaa.e
KHaagiina banvaa.e
saalan me.n pak jaa.e
munnii ko lalchaa.e
anDaa pyaaraa pyaaraa
jab ye mausam aa.e
sehat KHuub banaa.e
Dhero.n kap.De laa.e
phir bhii duur na jaa.e
jaa.Daa pyaaraa pyaaraa
khaanaa jab bhii aa.e
aage ba.Dh kar laa.e
ham ko sab khilvaa.e
KHud bhuukaa rah jaa.e
chamcha pyaaraa pyaaraa
baazaaro.n me.n nikle
haath me.n sab ke laTke
jo kuchh bhii ye dekhe
apne peT me.n rakhe
thailaa pyaaraa pyaaraa
miiThaa miiThaa khaa.o
munnaa bole laa.o
jaldii se pakvaa.o
saaraa chaT kar jaa.o
halva pyaaraa pyaaraa
chaahe ko.ii bulaa.e
sab kii god me.n jaa.e
dekhe to lalchaa.e
toffee biscuit chaa.e
nanhaa pyaaraa pyaaraa
paanii ThanDaa kar de
sar pe kaToraa rakhe
dau.De aa.e.n pyaare
jo chaahe vo pii le
maTkaa pyaaraa pyaaraa
suurat rang bira.ngii
haalat bhii hai achchhii
bistar kaa hai saathii
aadat me.n hai narmii
takiya pyaaraa pyaaraa
garmii duur bhagaa.e
ThanDaa mausam laa.e
tho.Dii bijlii khaa.e
behtar kaam banaa.e
pa.nkhaa pyaaraa pyaaraa
cham cham chamkaa jaa.e
bijlii saa lahraa.e
jaldii jaldii aa.e
saath me.n chaltaa jaa.e
juutaa pyaaraa pyaaraa
sab se pahle jaage
pe.D pe cha.Dh ke baiThe
diivaaro.n par bhaage
kuuk.Duu.n kuuk.Duu.n chiiKHe
murGaa pyaaraa pyaaraa
ghar me.n dau.D lagaa.e
baahar bhaag ke jaa.e
billii par Gurraa.e
nanhe ko bahlaa.e
kuttaa pyaaraa pyaaraa
piiTh pe hame.n biThaa.e
sarpaT dau.D ke jaa.e
manzil par pahu.nchaa.e
tab jaa kar sustaa.e
gho.Daa pyaaraa pyaaraa
jaldii se uTh jaa.e
chiiKHe aur chillaa.e
daana patte khaa.e
phir bhuukaa rah jaa.e
bakraa pyaaraa pyaaraa
pinjre me.n par tole
Thumak Thumak kar Dole
jab bhii mu.nh ko khole
miiThii bolii bole
totaa piyaare pyaaraa
ru.ii ko lipTaa.e
dhaagaa bantaa jaa.e
haatho.n me.n bal khaa.e
bal khaa kar lahraa.e
taklaa pyaaraa pyaaraa
choro.n se la.D jaa.e
Daaku se Takraa.e
jo bhii chaabii laa.e
us ke bas me.n aa.e
taalaa pyaaraa pyaaraa
sa.Dke.n bhii dikhlaa.e
galiyo.n me.n le jaa.e
kaun kidhar ko jaa.e
bhed ye sab batlaa.e
naqsha pyaaraa pyaaraa
kaliyo.n par manD laa.e
phuulo.n se batlaa.e
naache jhuume gaa.e
mastii me.n lahraa.e
bhau.nraa pyaaraa pyaaraa
shab ko mu.nh dikhlaa.e
suuraj se sharmaa.e
baadal me.n chhup jaa.e
raat hote hii aa.e
chandaa pyaaraa pyaaraa
jhiil ke paas hii baiThe
chhoTii machhlii pak.De
hans ho ko.ii jaise
motii khaane aa.e
bagulaa pyaaraa pyaaraa
aa.nkho.n se lag jaa.e
raahat hii pahu.nchaa.e
kaale kaale shiishe
abr ke Tuk.Do.n jaise
chashma pyaaraa pyaaraa
meraa hamdam saathii
aisaa na hogaa ko.ii
suurat bhii hai pyaarii
siirat bhii hai achchhii
basta pyaaraa pyaaraa
vaqt pe so kar uThe
vaqt pe apne khele
vaqt pe pa.Dhne jaa.e
avval number aa.e
bachcha pyaaraa pyaaraa

Aadil Aseer Dehlvi
Nazm

tare aur tum

kuchh taare mil kar tumhaarii tasviir banaate hai.n aasmaan me.n
tum un taaro.n se ek baar mil aa.o
roz vo tumhaare ho.nTh ke niiche kaa til banaanaa bhuul jaate hai.n
phir mujhe apne u.ngliyo.n kii poro.n se vo til banaanaa pa.Dtaa hai
vo til banaate banaate aksar mai.n mauqa dekh kar tumhaarii zulf tumhaare daa.e.n kaan ke piichhe kar detaa huu.n
phir kisii chamakte taare se banaataa huu.n tumhaare ek kaan kaa jhumkaa
duusraa jhumkaa mai.n almaarii se lene jaataa huu.n tab tak taare tumhaarii tasviir miTaa dete hai.n aur mai.n
bas tumhaaraa jhumkaa pak.De pak.De raat ko sub.h se milvaa detaa huu.n

Himanshu Sharma Himanshu
Nazm

tumhein likhna na aata tha

qasam in khurdure haatho.n kii
mai.n jin me.n qalam pak.De hu.e huu.n
nihaayat be-iimaanii se
tumhe.n har baar mai.n tum se churaa kar nazm buntii huu.n
kahaanii kaa.Dhtii huu.n
aur sab se jhuuT kahtii huu.n
ki saare harf mere hai.n

Ishrat Afreen
Nazm

jaen kahan hum

tabii.at jo andar se jhunjhlaa rahii hai
to baahar se aavaaz ye aa rahii hai
ki ai faazil-e-dars-gaah-e-himaaqat
hijaabaat-e-daanish uThaa kar bhii dekho
sharaafat ke piichhe jigar ho gayaa KHuu.n
sharaafat se piichhaa chhu.Daa kar bhii dekho
azal se mohabbat KHudii kaa hai zindaa.n
ab is se zaraa baahar aa kar bhii dekho
muravvat ne pahnaa.ii hai.n be.Diyaa.n jo
zaraa un kaa lohaa ghulaa kar bhii dekho
tasavvur kii vaadii me.n bhaTkoge kab tak
kabhii shahr-e-imkaa.n me.n jaa kar bhii dekho
Garaz 'maz.harii' is dayaar-e-junuu.n me.n
milaa, kuchh na khone se paa kar bhii dekho
sunaa mashvara teraa ai saut-e-Gaibii
zalaalat kii sarhad me.n aa kar bhii dekhaa
rizaalat kii gardan me.n baa.nhe.n bhii Daalii.n
sharaafat se piichhaa chhu.Daa kar bhii dekhaa
hamiyyat kaa gho.nTaa galaa rafta rafta
mohabbat ko phaa.nsii cha.Dhaa kar bhii dekhaa
kaf-e-mor se us kaa luqma bhii chhiinaa
haq-e-ahl-e-KHidmat churaa kar bhii dekhaa
shu.uur o KHirad ko Guruur o hasad ko
sulaa kar bhii dekhaa jagaa kar bhii
phire kuu-ba-kuu aql kii rahbarii me.n
Garaz ye ki kho kar bhii, paa kar bhii dekhaa
na khone se haasil, na paane se haasil
jise suud kahte hai.n vo bhii ziyaa.n hai
yahii bas ki taqdiir-e-aql o junuu.n hai
yahii KHisht-e-ta.amiir-e-kaun-o-makaa.n hai
mohabbat jahannam hai, nafrat jahannam
jidhar jaa.e.n ik aag shola-fishaa.n hai
dayaar-e-vafaa yaa dayaar-e-havas ho
na raahat yahaa.n hai na raahat vahaa.n hai
sharaafat bhii Gam-gii.n rizaalat bhii Gam-gii.n
bas ab mu.nh na khulvaa KHudaa darmiyaa.n hai
samak se samaa tak tapish hii tapish hai
fazaa se KHalaa tak fuGaa.n hii fuGaa.n hai
KHudii paa.nv pak.De hai jaa.e.n kahaa.n ham
tasavvur kii jannat banaa.e.n kahaa.n ham

Jameel Mazhari
Nazm

sasti nazm

kaise maatam karuu.n
kaise nauhe likhuu.n
kaise ruuho.n kii chiiKHo.n se nazme.n bunuu.n
jaagtii bain kartii havaa.o.n se
jaa kar lipaT jaa.uu.n kyaa
kirchii kirchii ye KHvaabo.n ke a.azaa jo bikhre pa.De hai.n
unhe.n dekh kar phir palaT jaa.uu.n kyaa
apne aqdaar se qaul-o-iqraar se piichhe haT jaa.uu.n kyaa

Injeel Saheefa
Nazm

aawara

ko.ii yaad aisii nahii.n
jo mujhe raah chalte hu.e rok le meraa daaman pak.De
mire paa.nv me.n ek zanjiir sii Daal de
ko.ii bhii aisaa biitaa hu.aa pal nahii.n
mast jho.nke ke maanind jo gungunaataa hu.aa duur se aa.e
viiraan aa.nkho.n se lipTe
kisii bhuulii-bisrii hu.ii baat kaa giit gaa.e
mire saamne ek phailaa hu.aa jaal hai raasto.n kaa
qataare.n hai.n bijlii ke khambo.n kii uu.nche makaano.n kii paTriyo.n kii
magar ko.ii bhii raasta ko.ii bhii raushnii
ko.ii khi.Dkii kisii pe.D kaa saaya aisaa nahii.n hai
jise dekh kar
mehrbaan aa.nkh kii muskuraahaT mujhe yaad aa.e
bhaTaktii hu.ii ruuh ko apnii baa.nho.n me.n le le

Nazm

bachpan ke din

haa.e vo bachpan ke din
saaf aur suthre sachche din
yaad bahut aate hai.n ab
apne the jab apne din
fikr-o-taraddud kis ko kahte
duur Gamo.n se jab the din
aa.nkh-michaulii aur kabaDDii
gullii DanDe vaale din
raate.n raahat se bharpuur
aur sharaarat vaale din
piichhe piichhe titlii ke
phulvaarii me.n biite din
aam amruud ke pe.Do.n par
Daal pe baiThe khaate din
kaaGaz pencil aur kitaab
aisii daulat vaale din
jism Gubaar-aaluuda le kar
taalaabo.n me.n tairaate din
ko.ii nahii.n thaa dushman jab
sab ko dost banaate din
to.D le.n auro.n ke amruud
sab ke saath vo khaate din
kaaT le.n kheto.n se ganne
chorii pak.De jaate din
shaam pa.Dhaa.ii me.n guzre
haa.e vo maktab vaale din
aah 'manaazir' kis se kahe.n
mere vo lauTaa de din

Manazir Ashiq Harganvi
Nazm

tariKH ke murda-KHane se

naarii aur shuudar ko samaan samajhne vaale mahaa-puruush
itihaas ke panno.n me.n kho ga.e hai.n
ho.nT aaj bhii thartharaate hai.n
lafz maile na ho jaa.e.n
zamiin thii to pathriilii
lekin apnaa ku.aa.n khodaa
to paanii miiThaa niklaa
phunkaarte aabhuushan
sanduuqo.n me.n band kar ke
chaabii buzurgo.n ke havaale kar dii ga.ii
u.Dte hu.e lafzo.n ko muTThiyo.n me.n paka.Dte hii
chaa.nd sharmaane lagaa
raushnii kaa saudaa karne vaalo.n ne
gahre ga.Dhe khod kar
kirno.n ko dafnaanaa chaahaa
lekin vo zinda shiryaano.n me.n
lahuu ban kar dau.D ga.ii.n
masaamo.n se phuuTte ujaalo.n kii yuurish me.n
bah nikle jaane kitne 'miir' o 'saudaa'
kitne 'kaaliidaas'
ulTii pothii pak.De pak.De
jaane kab Dhaa.ii akhshar siidhe
Dhaa.ii ulTe pa.Dhe
aur dariyaa me.n Dupkii lagaane se pahle
sarasvatii ko kahte sunaa
dushyant kii a.ngushtarii lahro.n ke havaale kar do
machhliyaa.n chuGul-KHor hotii hai.n
'bharat' ko apne andar thaame raho
taa-abad

Shahnaz Nabi
Nazm

andesha-ha-e-dur-daraaz

tirii baabat kisii se puuchhne me.n KHauf aataa hai
vo jaane kyaa hai
tire baare me.n ko.ii baat bhii kartaa huu.n to Dartaa huu.n
jaane guftuguu kyaa rang pak.De
tirii baabat kisii se ko.ii raa.e bhii talab karte laraztaa huu.n
vo jaane tujh ko kaisaa naam de

Riaz Majeed
Nazm

ganw aur rail

mere gaa.nv me.n aa.ii rail
bachcho nahii.n ye ko.ii khel
baat hai mere bachpan kii
shaayad unniis sau pachpan kii
mere dil kii uljhan kii
gaa.nv me.n kaise aa.ii rail
bachcho nahii.n ye ko.ii khel
mere daadaa kahte the
kalkatta jo rahte the
gaa.nv vaale ha.nste the
vahaa.n sa.Dak par chalii rail
bachcho nahii.n ye ko.ii khel
kalkatta jaanaa thaa mushkil
rail to miltii chal kar paidal
tiis miil par thaa jo signal
mushkil ko sab jaate jhel
bachcho nahii.n ye ko.ii khel
ba.De log jab jaanaa sochte
raat me.n bail-gaa.Dii ko jot-te
raaste me.n jab Daaku rokte
chho.D ke gaa.Dii bhaagte bail
bachcho nahii.n ye ko.ii khel
aazaadii ne daad miTaayaa
gaa.nv ko shahro.n se milaayaa
ummiido.n kaa phuul khilaayaa
sadaa harii rahe ye bel
bachcho nahii.n ye ko.ii khel
dillii me.n anshan hu.e
rail ke tab naqshe bane
baabuu jii jab ban ga.e
markaz me.n vaziir-e-rail
bachcho nahii.n ye ko.ii khel
shahr se sab kuchh rail se laate
Dibbo.n ko nuqsaa.n pahu.nchaate
chorii karte pak.De jaate
jo pak.Daa.e jaate jail
bachcho nahii.n ye ko.ii khel
mushkil din sab kaT jaate hai.n
lekin vo din yaad aate hai.n
ab to sab collage jaate hai.n
paka.D ke bombay-mail
bachcho nahii.n ye ko.ii khel

Abul Lais Javed
Nazm

jangal mein cricket

jangal me.n one day cricket kaa hu.aa anokhaa match
bandar ne kii KHuub fielding pak.De chhe chhe catch
zero par languur gayaa to hiran tiin par out
l b w gai.nDaa bhaagaa nahii.n thaa ko.ii doubt
giida.D ne aate hii jaise lii apnii position
kangaroo kii ge.nd thii spin badal ga.ii situation
wicket bachaa na paayaa giida.D ballaa ajab ghumaayaa
bandar ke haatho.n me.n siidhe apnaa catch thamaayaa
sii.ng hilaate baara-singhaa ne ab baT sa.nbhaalaa
kangaroo kii second baal thii chuuk gayaa bechaara
ge.nd ghusii stump bikheraa gillii chhiTkii duur
ek ba.Daa score kaa sapnaa ho gayaa aaKHir chuur
lauT chalaa jab baara-singhaa bhaaluu chaachaa aa.e
ge.nd tiisrii kangaroo kii vo bhii jhel na paa.e
lagaataar tiino.n ge.ndo.n par wicket gire the tiin
kangaroo ke is over ne badal diyaa thaa scene
jaldii jaldii wicket ga.nvaa.e biga.D ga.ii thii haalat
jame jamaa.e haathii daadaa bhej rahe the la.anat
bhaaluu gayaa zebra aaya ab ke ballaa thaame
navve par haathii pahu.nchaa thaa lagaa use samjhaane
ballaa chamkaa ge.nd u.Dii empire bolaa six
haathii ne phir fauran Tokaa pahle holo fix
chauke aur chhakke kii baarish tho.Daa ruk kar karnaa
match agar hai hame.n jiitnaa wicket bachaa.e rakhnaa
over nayaa liye chiitaa ab bowling karne aaya
do ge.ndo.n par lagaataar haathii ne six jamaayaa
binaa century haathii ne armaan na.e kuchh baa.ndhe
chiite kii ik tez ge.nd ne to.De sabhii iraade
haathii ke out hote hii jo aaya vo bebas
not out kaa tamGa le kar hu.aa zebra vaapas
kaptaanii thii sher ke zimme jiit liyaa thaa match
bandar ne kii KHuub fielding pak.De chhe chhe catch

Tariq Manzoor
Nazm

yad-e-baiza

mirii hathelii ke saa.np kab tak Dase.nge mujh ko
mirii hathelii ke saa.np jo ab
mirii rago.n me.n utar chuke hai.n
badan ko zanjiir kar chuke hai.n
mai.n KHvaab dekhuu.n to ko.ii aa.nkho.n pe haath rakh de
qadam uThaa.uu.n to ko.ii mere qadam pak.De
palaT ke dekhuu.n to ko.ii piichhe na ko.ii aage
bas ek saaya
mirii haqiiqat kaa ik kinaaya
mirii haqiiqat ki me.n a.ndhere kii rahnumaa.ii me.n chal rahaa huu.n
azal se ik saamrii ke saa.npo.n me.n pal rahaa huu.n

Himayat Ali Shayar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now