Search result for "pat-san" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pat-san"

Nazm MATCHES FOR "pat-san"

Nazm

unwan muhajir

yahaa.n par sab muhaajir hai.n
ye denaa ik saraa.e hai
saraa.e kaa agar matlab tumhe.n ma.aluum ho jaa.e
tum apnii KHvaahishaat-e-qalb ko dafnaa ke rakkhoge
ibaadat ke kafan se ruuh ko kafnaa ke rakkhoge
saraa.e lafz kaa matlab luGat me.n mil hii jaa.egaa
agar tum pa.Dh nahii.n sakte suno phir mai.n bataataa huu.n
saraa.e us ko kahte hai.n
jahaa.n manzil ko paane kii tamanna me.n muhaajir Thahar jaate hai.n
karo.Do.n roz aate hai.n karo.Do.n roz jaate hai.n
jahaa.n par mustaqil rahne kii hasrat sab ko hotii hai
magar ko.ii jahaa.n par mustaqil rah hii nahii.n saktaa
kise kis vaqt aanaa hai kise kis vaqt jaanaa hai
jahaa.n par sab muqarrar ho
kyaa tum ab bhii nahii.n samjhe
ye duniyaa ik saraa.e hai jo faanii hai
ye sab miT jaane vaalaa hai
hamesha baaqii rahne kaa tasavvur kar nahii.n sakte
hamesha baaqii rahne kii jo baate.n karte rahte the
jo apne aap ko maalik bataate the saraa.e kaa
na jaane aise kitne naamvar hijrat yahaa.n se kar chuke pyaare
yahaa.n se ik na ik din sab ko hijrat kar ke jaanaa hai
ko.ii pahle to ko.ii baa'd me.n lekin yahii sach hai
ko.ii samjhe yaa na samjhe
magar merii samajh me.n aa gayaa 'mahvar'
yahaa.n par sab muhaajir hai.n
ye duniyaa ik saraa.e hai

Mahwar Sirsivi

Nazm

ilm

hai zabaa.n par sab kii mid.hat ilm kii
kyo.n na ho dil me.n mohabbat ilm kii
kyo.n na ho har ik ko chaahat ilm kii
har kisii ko hai zaruurat ilm kii
ilm ke rutbe se vaaqif hai jahaa.n
goshe goshe me.n hai shohrat ilm kii
jis ko chaskaa lag gayaa hai ilm kaa
puuchhiye us se haqiiqat ilm kii
bas usii ne paa.ii izzat mulk me.n
dil se kii hai jis ne KHidmat ilm kii
saare duniyaa kaa chahiitaa hai ye ilm
rahtii hai har dil me.n ulfat ilm kii
vo zaliil-o-KHvaar duniyaa me.n hu.aa
jis kisii ne kii na izzat ilm kii
do jahaa.n kii us ko ne.amat mil ga.ii
ho ga.ii jis par inaayat ilm kii
surKH-ruu hotaa hai vo ik din zaruur
rahtii hai jis dil ko chaahat ilm kii
taKHt-e-shaahii kyaa hai miltaa hai KHudaa
is se ba.Dh kar kyaa ho barakat ilm kii
kyo.n kisii ke aage vo phailaa.e haath
haath aa.ii jis ke daulat ilm kii
hai ye kunjii aish aur aaraam kii
kyaa bataa.uu.n qadr-o-qiimat ilm kii
saarii duniyaa paa rahii hai jis se faiz
hai haqiiqat me.n vo daulat ilm kii
jaan se is ko samajhte hai.n aziiz
jin pe raushan hai haqiiqat ilm kii
ho vo bachcha yaa ho buu.Dhaa yaa javaan
har kisii ko hai zaruurat ilm kii
jaa.o 'jauhar' har kahii.n be-KHauf tum
ko.ii luuTegaa na daulat ilm kii

Banne Miyan Jauhar

Nazm

us mez par sar jhukae

ek la.Dkii mujhe sketch kar rahii thii
la.Dkii kii drawing agarche achchhii nahii.n thii
lekin use is qadar munhamik dekh kar
mai.n bahut mutaa.assir hu.aa
mujhe KHvaahish hu.ii
ki mai.n us la.Dkii kaa bosa hii le luu.n
magar meraa dha.D Gaa.eb thaa
merii drawing us la.Dkii se kahii.n ziyaada behtar thii
aur mai.n us kii chhaatiyaa.n banaanaa bhii chaahtaa thaa
jo us ke khule hu.e garebaan se jhaa.nk rahii thii.n
lekin meraa baqiyaa jism vahaa.n nahii.n thaa
use shaayad ja.ngalii jaanvar bha.nbho.D rahe ho.n
drawing me.n ma.amuulii dastgaah rakhne ke baavajuud
la.Dkii ne mere chehre kii udaasii ko
bhar puur tariiqe se kaaGaz par muntaqil kar diyaa thaa
lekin vo mere nichle dha.D ko
baar baar koshish ke baavajuud
banaane me.n naakaam rahii thii
mujhe lagaa vo mere jism ko
ja.ngalii jaanvaro.n se bachaane kii har mumkin koshish kar rahii hai
kyaa use ma.aluum hai
agar vo is kashmakash me.n kaamyaab rahii
aur meraa jism puurii tarah baazyaab karaa sakii
to mere haath
sab se pahle
kis chiiz ko chhuu lenaa chaahe.nge

Saeeduddin

Nazm

Khaali bore mein zaKHmi billa

jaan-mohamaad-KHaan
safar aasaan nahii.n
dhaan ke is KHaalii bore me.n
jaan ulajhtii hai
paT-san kii mazbuut salaaKHe.n dil me.n ga.Dii hai.n
aur aa.nkho.n ke zard kaToro.n me.n
chaa.nd ke sikke chhan-chhan girte hai.n
aur badan me.n raat phailtii jaatii hai...
aaj tumhaarii na.ngii piiTh par
aag jalaa.e kaun
a.ngaare dahkaa.e kaun
jidd-o-johd ke
KHuunii.n phuul khilaa.e kaun
mere shola-gar panjo.n me.n jaan nahii.n
aaj safar aasaan nahii.n
tho.Dii der me.n ye pagDanDii
TuuT ke ik gande taalaab me.n gir jaa.egii
mai.n apne taabuut kii tanhaa.ii se lipaT kar
so jaa.uu.ngaa
paanii paanii ho jaa.uu.ngaa
aur tumhe.n aage jaanaa...
ik... gahrii niind me.n chalte jaanaa hai
aur tumhe.n is nazar na aane vaale bore...
...apne KHaalii bore kii pahchaan nahii.n
jaan-mohamaad-KHaan
safar aasaan nahii.n

Saqi Faruqi

Nazm

saf laDki

vaah ye la.Dkii hai kitnii paak saaf
saaf kap.De saaf chehra naak saaf
mail daa.nto.n par na naaKHun me.n kahii.n
aur kap.Do.n par kahii.n dhabba nahii.n
saaf suthre dhoyaa motii haath paa.nv
chaahtaa hai dil kaleje se lagaa.uu.n
aa.o baby aa.o jaldii paas aa.o
ik maze kaa pyaar ham ko de ke jaa.o
aate hii pahle kiyaa us ne salaam
phir jo puuchhaa to bataayaa apnaa naam
god me.n le kar kiyaa pahle to pyaar
phir kahaa beTii mai.n tum par se nisaar
aap kyaa pa.Dhtii hai.n kyaa kartii hai.n kaam
aap ke vaalid kaa hai kis jaa maqaam
bholii la.Dkii ne diyaa ham ko javaab
duusrii urdu kii pa.Dhtii huu.n kitaab
first reader pahlii diiniyaat kii
aur kalaam-ul-laah saaraa pa.Dh chukii
hifz hai kashf-ul-KHulaasa sab mujhe
yaad hai har sher kaa matlab mujhe
saaf suthrii hai merii har ek chiiz
mujh ko ammaa.n ne sikhaa.ii ye tamiiz
saaf bistar saaf kamra saaf ghar
mai.n ne puuchhaa baat us kii kaaT kar
haath mu.nh kab dhotii ho us ne kahaa
fajr-o-zohar asr-o-maGrib aur ishaa
paa.nch vaqto.n kii mai.n pa.Dhtii huu.n namaaz
juutii ko lagtaa nahii.n bol-o-baraaz
chauthe din nahaa kar badaltii huu.n libaas
chhaavaa.n saabun ka.nghii hai sab mere paas
daa.nt mere saaf bhii hai.n paak bhii
mere haa.n manjan bhii hai misvaak bhii
aa.ii pa.Dhne ko aligarh saal haal
umr ke guzre hai.n mere aaTh saal
is se bhii kam thaa bahut jab meraa sin
saaf rakkhii jaatii thii mai.n raat din
mere vaalid hai.n Gulaam panjatan
meraa ghar hai Hyderabad dakan
sun ke us paakiiza la.Dkii ke javaab
mai.n nai dii.n kaifii du.aa.e.n be-hisaab

Kaifi Hyderabadi

Nazm

qaus-e-quzah

khi.nchii hai qaus-e-quzah aasmaan par sar-e-shaam!
ajiib kaif saa hai hairat-e-nazar me.n nihaa.n!
ajiib kaif saa jinsii bhii maavaraa.ii bhii
chhalakte jism kii golaa.iyo.n kaa raaz hai kyaa!
aur us me.n ruuh kii ra.ngiin dhaariyo.n kaa fusuu.n!?
latiif sat.h-e-tafakkur pe khoyaa khoyaa saa
ubhar rahaa hai ye pur-karb o pur-suruur savaal
ye saat rang kii lahre.n ye daa.ere kii kamaan!

Abdul Ahad Saaz

Nazm

nazr-e-collage

ai sar-zamiin-e-paak ke yaaraan-e-nek-naam
baa-sad KHuluus shaa.ir-e-aavaara kaa salaam

Sahir Ludhianvi

Nazm

ek nazm man ke liye

pahlii baar mai.n kab takiye par sar rakh kar so.ii thii
un ke badan ko Dhuu.nDaa thaa
aur ro.ii thii
do haatho.n ne bhe.nch liyaa thaa
garm aaGosh kii raahat me.n
kaisii gahrii nii.nd mujhe tab aa.ii thii
kab duur hu.ii thii pahlii baar
apne pairo.n par chal kar
bistar se alag phir ghar se alag
ik lambe safar par niklii thii
dhiire dhiire duur hu.ii kab
narm badan kii garmii se
is miiThii nii.nd kii raahat se
ab sochtii huu.n
aur rotii huu.n

Fatima Hasan

Nazm

achchhi urdu pyari urdu

in phiike phiike lafzo.n par
sab bejaa KHuub aka.Dte hai.n

Asna Badr

Nazm

chal aa ek aisi nazm kahun

mire shaane par sar rakkhe tuu
mai.n nii.nd kahuu.n tuu so jaa.e

Amir Ameer

Nazm

batao to

sangam kaa vo kaun nagar hai
jis par sab kii lagii nazar hai

Jauhar Rahmani

Nazm

beTi ka KHat abbu ke nam

haal ghar kaa ab bayaa.n kartii huu.n mai.n
aap par sab kuchh 'ayaa.n kartii huu.n mai.n

Amaan Zakhirvi

Nazm

ajnabi

uun utrii bhii.D ke maanind pe.D
mu.nh chi.Daatii dil dukhaatii choTiyaa.n
duur niiche pattharo.n kii sej par
sar paTaKHtii chiiKHtii naddii ravaa.n

Wazir Agha

Nazm

ganga

suuraj bikhertaa hai kirno.n ke haar tujh par
aur kartii hai.n havaa.e.n naqsh-o-nigaar tujh par
sab hai.n nisaar tujh par sab hai.n nisaar gangaa
ai shaandaar gangaa
ai pur-bahaar gangaa

Hafeez Jalandhari

Nazm

baad-az-marg

mai.n mar chukaa huu.n
aur mujhe pata bhii nahii.n
ab kyaa karoge tum
nahlaa.oge mujhe
aur puuchhoge bhii nahii.n
mai.n nahaanaa chaahtaa huu.n yaa nahii.n
ye bhii nahii.n dekhoge
paanii garm hai yaa nahii.n
bhuul jaa.oge ki achchhaa nahii.n lagtaa
mujhe ThanDaa paanii
nahaane ke liye na piine ke liye
phir libaas tabdiil karoge meraa
aur ye bhii nahii.n puuchhoge
kyaa pahannaa chaahtaa huu.n
kaun saa rang patluun qamiiz yaa kuchh aur
mujh se puuchhe baGair
tum vo sab kuchh karoge
jo mai.n ne apne saath kabhii nahii.n hone diyaa
ek do baar nahii.n saika.Do.n baar
mai.n ne KHud ko intihaa.ii be-bas mahsuus kiyaa hai
la.anat ho mujh par
maut hai bebasii kii intihaa
ye baat mujh par kab khulii hai
mere jism se jald-az-jald
jaan chhu.Daa ke
tum lauToge
yaa shaayad vahii.n se chale jaa.oge
shaayad kuchh der baate.n karoge
mere baare me.n kam
kaarobaar ke baare me.n
kisii meeting ke baare me.n
yaa sports ke baare me.n
yaa kisii adaakaara ke na.e scandal ke baare me.n
shaayad kuchh khaa.oge yaa shaayad kuchh piyoge
aur ek ek kar ke ruKHsat ho jaa.oge
darvaaze par ruke baGair
ye dekhe baGair
ki mai.n tumhe.n ruKHsat karne aa rahaa huu.n
shukriya adaa karnaa chaahtaa huu.n mai.n tumhaaraa
tamaam masruufiyat ke baavajuud
itnaa vaqt nikaalne par

Anwar Sen Roy

Nazm

pagalon ki madh mein

paagalo.n se nahii.n
bahut Dar lagtaa hai, mujhe
normal aur zahiin logo.n se
kuchh bhii kar sakte hai.n
vo
apnii mahbuubiyat me.n
qahr aur fitne se bharii
KHud-pasandii me.n
kuchh bhii soch sakte hai.n
kuchh bhii chaah sakte hai.n
mansuube banaanaa
aur saazishe.n karnaa mushkil nahii.n hotaa
un ke liye
yaqiin rahtaa hai unhe.n
kuchh bhii kar saktii hai zehaanat
agar mushkil ko.ii vaar karegii
to Dhaal ban jaa.egii zehaanat
normal
bahut muta.assir hote hai.n un se
un jaisaa honaa chaahte hai.n
unhii kaa saath dete hai.n
kisii bhii aurat ke baare me.n
kuchh bhii soch sakte hai.n
zahiin aur normal
mantiq se chalte hai.n aur hisaab se
ishq nahii.n kar sakte isii liye
ye baat to saabit nahii.n
ki ishq
pahle mahbuub ke dil me.n paidaa hotaa hai
aurte.n ye sab samajhtii hai.n
mardo.n se kahii.n ziyaada
ahmaq-tariin lagne vaalii aurat bhii
in mu.aamlo.n me.n
kahii.n aage hotii hai kisii bhii mard se
phir bhii
pha.ns hii jaatii hai.n be-chaarii
pha.nstii chalii jaatii hai
paagalo.n ko qubuul nahii.n kartii.n vo
haalaa.nki vahii jaantii hai.n sab se ziyaada
ishq to kaam hai sirf paagalo.n kaa
naach sakte hai.n paagal
un ke KHayaal me.n
yaad kar sakte hai.n unhe.n
phuulo.n ko dekh kar
sun sakte hai.n havaa se un kii baate.n
jo un kii taraf se na bhii aa.ii ho
daraKHto.n ko chaltaa hu.aa dekh sakte hai.n
un ke saath
bharii dopahro.n me.n
dhuup par hairaan ho sakte hai.n
un ke muqaabil kha.Daa kar sakte hai.n
dhuup aur saa.e ko paagal
aur shaa.erii ban saktii hai.n
un ke baare me.n
sirf paagalo.n kii baate.n

Anwar Sen Roy

Nazm

izafi zaruraton ke liye ek nazm

har aadmii kii qismat me.n
ek na ek sazaa hotii hai
mere liye har baar
tum se duur rahne kii sazaa muntaKHab kii jaa.egii
naa-insaafii ke pesh-e-nazar
sazaa kaa kaam kisii munsif par nahii.n chho.Daa jaa.egaa
lekin is ke baavajuud
vo tauhiin kaa vo notice nahii.n jaarii kar sake.nge
jis me.n vahii ho.nge mudda.ii
vahii ho.nge munsif
hamaarii shahriyat ko KHaam kar diyaa gayaa hai
achchhaa hu.aa ki hamaare dilo.n ko
aabgiine taraashne vaalo.n par nahii.n chho.Daa gayaa
ek aavaara-manush ne
mujhe chaak chalaanaa
aur miTTii me.n dil rakhnaa sikhaayaa
mai.n har raat apne dil ko
miTTii me.n milaataa aur na.ii na.ii tarah guu.ndhtaa huu.n
har sub.h us mulk ke liye
ek nayaa KHvaab Dhaaltaa huu.n
jis ke liye juGraafi.e kii taariiKH me.n
ko.ii jagah nahii.n hogii
abhii aasmaano.n par rahne vaalo.n ko
mere jaraa.em kaa ilm nahii.n hu.aa
varna vo mere sar par
ek aadh aasmaan zaruur giraa dete
ehtiyaatan
mai.n ne
tumhe.n in saarii baato.n
aur apne KHvaabo.n se duur rakhaa hai
isii liye ab tak
kisii musavvir yaa mujassama-saaz ne
tumhe.n ko.ii shakl nahii.n dii
mai.n ne tumhe.n un KHayaalo.n se bhii duur rakhaa hai
jin tak ko.ii shaa.er rasaa.ii haasil kar sake
yahaa.n tak ki
mai.n ne tumhe.n apnii rasaa.ii se bhii duur rakhaa hai
taaki tumhaare vo libaas aaluuda na ho.n
jinhe.n pahan kar
tum aa.ii.ne ke saamne nahii.n jaatii hogii
jinhe.n pahan kar
tum baaG kii sair
aur baazaar jaanaa bhii mauquuf kar detii hogii
mai.n ne
apne liye sazaa tajviiz karne kaa iKHtiyaar
kisii ko nahii.n diyaa
tumhe.n bhii nahii.n
varna tum mere liye qurbat tajviiz kar saktii thii.n

Anwar Sen Roy

Nazm

kya hona mumkin hai

agar tum kisii din kuchh ban jaa.o
ya.anii tum ek harf ban jaa.o
jo ab tak kisii huruuf-e-tahajjii kaa hissa na ho
tuu jadliyaatii maaddiyat ke mutaabiq kyaa hogii tumhaarii
haisiyat
kyaa kahe.nge tumhaare baare me.n ahl sharii.at
kis maqaam par rakhe.nge tumhe.n ahl-e-tariiqat?
kaun sii jamhuuriyat tumhe.n qubuul karegii
kyaa suluuk kare.nge tumhaare saath maaheriin
lissniyaat?
kaise tai kiyaa jaa.egaa tumhaare liye ko.ii naam?
kaise muqarrar kii jaa.egii aavaaz?
kyaa kare.nge jadiidi.e aur maa-ba.ad-al-jadiidi.e?
zaruur tumhaaraa rishta karaane ko koshish kii jaa.egii
aur is se pahle
tai kii jaa.egii tumhaarii jins
lekin kaise tai kii jaa.egii tumhaarii jins
kyaa qubuul kar sakegaa tumhe.n ko.ii lafz?
qubuul bhii kar liyaa
kisii matruuk yaa naa-qaabil-e-istimaal ne
to kyaa karegii grammar
kyaa banegaa grammar kii kitaabo.n kaa?
zaruur tumhe.n jilaa vatan kar diyaa jaa.egaa
zaruur kisii din sab ikaTThe ho.nge
aur qatl kar degaa tumhe.n
ijtimaa.ii mafaad yaa qaumii salaamtii ke pesh-e-nazar
sa.ngsaar kar degaa
naa-jaa.ez aur naa-tahqiiq hone ke jurm me.n
aur shaayad tum bhii yahii samjhoge
aaise hone se to behtar hai
na honaa

Anwar Sen Roy

Nazm

ajnabi sham

dhu.nd chhaa.ii hu.ii hai jhiilo.n par
u.D rahe hai.n parind Tiilo.n par
sab kaa ruKH hai nashemano.n kii taraf
bastiyo.n kii taraf bano.n kii taraf

Jaun Eliya

Nazm

diwali

mirii aavaaz ko jazbaat kii diivaar ke paar
sun to sakte hai.n magar sar ko nahii.n dhun sakte

Qateel Shifai

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now