Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "resho.n"

Nazm MATCHES FOR "resho.n"

Nazm

heart-attack

dard itnaa thaa ki us raat dil-e-vahshii ne
har rag-e-jaa.n se ulajhnaa chaahaa
har bun-e-muu se Tapaknaa chaahaa
aur kahii.n duur tire sahn me.n goyaa
pattaa pattaa mire afsurda lahuu me.n dhul kar
husn-e-mahtaab se aazurda nazar aane lagaa
mere viiraana-e-tan me.n goyaa
saare dukhte hu.e resho.n kii tanaabe.n khul kar
silsila-vaar pataa dene lagii.n
ruKHsat-e-qaafila-e-shauq kii tayyaarii kaa
aur jab yaad kii bujhtii hu.ii sham.o.n me.n nazar aayaa kahii.n
ek pal aaKHirii lamha tirii dildaarii kaa
dard itnaa thaa ki us se bhii guzarnaa chaahaa
ham ne chaahaa bhii magar dil na Thaharnaa chaahaa

Faiz Ahmad Faiz
Nazm

hum

vo be-KHabar hai
ki shaatir-e-vaqt kii nazar me.n
ko.ii ikaa.ii
shajar hajar ho ki zii-nafas ho
nizaam-e-kul se alag nahii.n hai
vo ye nahii.n jaantii ki hastii ke kaar-KHaane me.n
us kaa honaa na honaa be-naam haadisa hai
aur us ke hisse kaa kul asaasa
vo chand lamhe vo chand saa.nse.n hai.n
jin me.n vo KHvaab dekhtii hai
saliiqa-e-zaat se chaman ko sa.nvaarne kaa
bahaar-e-jaa.n ko nikhaarne kaa
2
bajaa ki naa-paa.edaar hai ye vajuud meraa
mai.n Gair-faanii hayaat ke silsile me.n
ik biich kii ka.Dii huu.n
rahiin-e-gardish bhii markaz-e-kaa.enaat bhii huu.n
jo mai.n ne dekhaa hai vo mire KHuu.n me.n rach gayaa hai
jo mai.n ne sochaa hai mujh me.n zinda hai
aur jo kuchh sunaa hai mujh me.n samaa gayaa hai
havaa kii suurat har ek ehsaas
merii saa.nso.n me.n jii rahaa hai
har ek manzar mire tasavvur me.n bas gayaa hai
mai.n zaat-e-mahduud apnii pahnaa.iyo.n me.n
ik kaa.enaat bhii huu.n
mirii rago.n me.n vo joshash-e-jaavedaa.n ravaa.n hai
jo shaaKH me.n phuul kii numuu hai
jo bahr me.n mauj kii ta.Dap hai
par-e-kabuutar me.n taab-e-parvaaz hai
sitaaro.n me.n raushnii hai
mai.n apne hone ke sab havaalo.n me.n ruunumaa huu.n
mai.n jaa-ba-jaa suurat-e-sabaa huu.n
Gazaal-e-KHush-chashm kii kaliyo.n me.n kheltaa huu.n
humakte bachche kii muskuraahaT huu.n
piir-e-shab-KHez kii du.aa huu.n
mai.n mehr me.n maahtaab me.n huu.n
ye kaisii chaahat hai jis se mai.n
ek mustaqil iztiraab me.n huu.n
vo kaun sii manzil talab thii
ki raa.njhaa raa.njhaa pukaartii hiir
aap hii raa.njhaa ho ga.ii thii

Zia Jalandhari
Nazm

KHak aur dhund ka safar

ulajhtii saa.nso.n kii saKHt girhe.n
badan ke andar khii.nchii hu.ii hai.n
niDhaal sadiyo.n ke faaslo.n kaa safar ki paa.nv me.n pal rahaa hai
dha.Do.n ke niiche hamaaraa saaya
hamaare jismo.n ko reza reza nigal rahaa hai
(2)
samundaro.n se havaa lipaT kar na.ii ruto.n kaa visaal maa.nge
zamii.n kii KHushbuu sahar kii aahaT ke dhu.ndle KHvaabo.n kaa aks phaile
hame.n yaqii.n hai havaa ke gadle safar se aage
chamakte lamho.n kii rahguzar hai
na.e gulaabo.n kii sarzamii.n hai
hamaare paa.nv me.n aane vaale safar kii KHvaahish ta.Dap rahii hai
hamaarii aa.nkho.n me.n baavle KHvaab kaa nasha hai
ham apne apne dha.Do.n ke taabuut se nikal kar
ba.Dhe ki suuraj kaa jism chhiine.n
zamii.n kii KHushbuu kaa khoj paa.e.n
ham ek muddat se sochte hai.n
ki aasmaa.n ke siyaah patthar me.n ab kiran kaa shigaaf utre
zamii.n kii paataal se kashish ho
na.e gulaabo.n kii mast KHushbuu badan me.n phaile
magar vahii dhund kaa safar hai
kaTii-phaTii sard u.ngliyo.n par lahuu ke jugnuu chamak chamak kar bikhar chuke hai.n
rago.n ke resho.n me.n taaza KHvaahish kii kashmakash sard pa.D chukii hai
dho.e.n ke phande me.n marne vaalo.n ke naam zehno.n kii taKHtiyo.n se
utar rahe hai.n
saro.n pe karb-o-balaa ke mausam kaa saKHt KHema khii.nchaa hu.aa hai
havaa pe likkhe hu.e hai.n nauhe
fazaa me.n laTke hu.e hai.n chehre
ufuq pe TuuTii hu.ii lakiire.n
zamii.n pe phaile hu.e hai.n saa.e
samundaro.n se lipaTne vaalii havaa kii an-dekhii Doriyo.n kaa
ko.ii siraa haath me.n nahii.n hai
hamaarii palke.n udha.D chukii hai.n
tamaam KHvaabo.n kii dhundlii ruuhe.n muhiib jangal ke raasto.n par
bhaTak rahii hai.n
ulajhtii saa.nso.n kii saKHt girhe.n
abhii talak jism par khii.nchii hai.n
hamaare niiche kisii zamii.n kii kashish ho shaayad
yahii.n kahii.n dhund ke aqab me.n ho ko.ii suuraj nikalne vaalaa
havaa ke gadle safar se aage chamakte lamho.n kii rahguzar ho
na.e gulaabo.n kii sar-zamii.n ho
magar pighalte badan ko tahliil karne vaalii ajiib saa.at sadaa aTal hai
hamaarii KHvaahish ye nek saa.at hamaarii aa.nkho.n me.n ghul ke phaile
hamaare jismo.n kaa dard pighle
hamaarii KHvaahish ye nek saa.at sukuut ban kar ta.Dapte jismo.n me.n aa ke Thahre
ulajhtii saa.nso.n kii girhe.n khole
ham us kii KHushbuu ke pur-sukuu.n malgaje a.ndhere kii gahrii lazzat ke muntazir hai.n
ham us kii KHvaahish me.n apne apne dha.Do.n ke taabuut me.n ba.ndhe hai.n

Sarmad Sahbai
Nazm

lughat mahdud hai

udaasii baat kartii hai kisii anjaan bolii me.n
sukuu.n kaa phuul dil ke shaaKHcho.n se to.D letii hai
ye nii.ndo.n ko uThaa letii hai aa.nkho.n ke kaToro.n se
kabhii kho.ii hu.ii yaade.n kahii.n se khoj laatii hai
bahut sii an-kahii baate.n kahii.n se gher laatii hai
hathelii par sajaa laatii hai vo suukhe hu.e patte
rachii hai jin ke resho.n me.n ko.ii bhuulii hu.ii KHushbuu
likhe hai.n jin pe guzre mausamo.n ke dil-nashii.n lamhe
puraane se puraanaa qufl pal me.n khol detii hai
udaasii jaa utartii hai
badan ke un jaziiro.n par
jinhe.n viiraan rakhnaa ho
udaasii TimTimaatii hai
lahuu ke un ilaaqo.n me.n
jinhe.n taariik rakhnaa ho

Hamida Shaheen
Nazm

shahr-e-ashob

taraashiye to ka.ii pattharo.n ke siino.n me.n
shajar kii shaaKHo.n ke maanind naqsh phaile hai.n
par un ke resho.n me.n zauq-e-numuu nahii.n maltaa

Zia Jalandhari
Nazm

dard

sarsaraahaT hai
na aahaT hai
na halchal
na chubhan
dard chup-chaap
kisii dhiimii nadii kii suurat
saa.ns letii hu.ii
gaa.nTho.n me.n
utar aayaa hai
kitne barso.n kii
riyaazat se
hunar-mandii se
aaise bikhre hu.e
resho.n ko sameTaa hai magar
aur har baar
har ik baar
bahut jatano.n se
jism ko jaan se
jo.Daa hai magar
be-sabab saa.ns kii kaTtii Dorii
kab se thaame hu.e
baiThe hai.n magar
aaj nahii.n
yaa kahii.n dard thame
aur sakuu.n mil jaa.e
yaa ko.ii gaa.nTh khule
aur qaraar aa jaa.e

Gulnaz Kausar
Nazm

aabaad viraniyan

vo dastake.n
jo tumhaarii poro.n ne in daro.n me.n u.nDel dii hai.n
vo aaj bhii
in ke chob-resho.n me.n jaagtii hai.n
tumhaare qadmo.n kii chaap
chup saa.ato.n me.n bhii
ek ek zarre me.n boltii hai
tumhaare lahje ke miiThe ghaa.o se
aaj bhii
mere ghar kaa ku.Del chaTaan-siina chhanaa hu.aa hai

Waheed Ahmad
Nazm

yahi sab kuchh hai

bhuuk ifriit hai
vahshat hai ba.Dii aafat hai
bhuuk KHamyaaza-e-jaan-o-tan hai
be-par-o-baal kiyaa kartii hai
vaqt kii taal ko be-taal kiyaa kartii hai
bhuuk a.asaab-e-shikasta kii khulii bai.at hai
ye KHad-o-KHaal kuchal detii hai
tahziib ke resho.n ko masal detii hai
aur sarmaaya-parastii ke sunahre ayyaam
gird-e-ruKHsaar shab-o-roz pe mil jaate hai.n
siina-e-KHaak ko dahlaataa hu.aa suur-e-falak
mutma.in KHaak-nashiino.n ke liye
roz hii roz viGaa laataa hai
aur shab-o-roz mah-o-saal me.n Dhal jaate hai.n

Khumar Mirzada
Nazm

raat har bar liye

raat har baar liye
KHauf ke KHaalii paikar
KHuu.n miraa maa.ngne
be-KHauf chalii aatii hai
aur jaltii hu.ii aa.nkho.n ke
tahayyur ke tale
ek sannaaTaa
bahut shor kiyaa kartaa hai
kuchh to kaTtaa hai
ta.Daptaa hai
bahaataa hai lahuu
aur khul jaate hai.n
resho.n ke puraane baKHiye
raat har baar mirii
jaagtii palke.n chun kar
andhe gumnaam dariicho.n pe
sajaa jaatii hai
aur dhundlaa.e hu.e
gard-zada rasto.n me.n
ek aahaT kaa siraa hai
jo nahii.n miltaa hai
aasmaa.n giilii chaTaano.n pe
Tikaa.e chehra
siskiyaa.n letaa hai
sahme hu.e bachche kii tarah
aur dariicho.n pe dharii
kaa.nptii palke.n merii
gul-zamiino.n ke na.e
KHvaab bunaa kartii hai.n

Gulnaz Kausar
Nazm

fan

vo shaaKH mazbuut ho yaa naazuk
ye munhasir hai kamaal-e-fan par
ki kaise tinko.n ko jo.Dnaa hai
mahiin resho.n ke taane-baane
se kaise diivaar jo.Dnii hai

Tabassum Azmi
Nazm

DhunDte jaen kiran

zindagii
aasaan bhii
mushkil bhii thii
gunjlak itnii na thii
gard itnii jam ga.ii hai
zehn ke aa.iine par
dhund me.n Duubii nazar aatii hai
saarii kaa.enaat
dil ke resho.n me.n
siyaahii jam ga.ii hai be-tarah

Sajid Hameed
Nazm

magarmachh ne mujhe nigla hua hai

dekhtaa huu.n
garm gahre les ke dariyaa me.n
kachhu.o.n, me.nDako.n
jal-kek.Do.n ke paaracho.n me.n
ojha.Dii ke khurdure resho.n me.n
saalim huu.n
nabuud o buud ke taariik andesho.n me.n
baahar kaun hai
jo zaat ke is KHema-e-KHaakistarii ke
peT ke phuule hu.e
gadle Gubaare par
azal se kaan rakh kar sun rahaa hai
sar paTaKHne
haath paa.nv maarne
karvaT badalne kii sadaa!

Rafiq Sandelvi
Nazm

tere mere jism-e-pur-asrar mein

qabl azii.n ki teraa fikr-e-muushigaaf
maGz-e-insaa.n aur a.azaa-e-badan ke darmiyaa.n
un resho.n ke har har lachchhe ke gird
jin me.n dil kii barq-rau mauje.n ravaa.n hai.n
jin me.n ehsaasaat kii mahtaabiyaa.n hai.n
gardisho.n par gardishe.n khaane lage
us haqiiqat ko samajh
kyuu.n ko.ii be-barq zarra
ik anokhii dhaat ke
nuqta markaz ke baaruudii anaasir se
ma.an kuchh aise Takraane lage
dekhte hii dekhte
nuqta markaz kaa jaaduu bhak se u.D jaane lage
har tasaadum ke amal kaa
ek saa radd-e-amal
ek se radd-e-amal kaa silsila
be-karaa.n taKHayyul kii u.Dtii hado.n se maavaraa
laa-intihaa

Takht Singh
Nazm

mere alfaz ko mahsus karo

in me.n raqsaa.n hai.n musaffaa jazbe
in me.n pinhaa.n hai.n dha.Dakte lamhe
in me.n taKH.iil kaa jaaduu hai nihaa.n
in me.n afkaar kaa dariyaa hai ravaa.n
in me.n miTTii kii hai sarshaar mahak
in me.n tahziib kii raushan hai jhalak
in me.n sarsabz ruto.n kii hai bahaar
in me.n aavaara shabo.n kaa hai KHumaar
in me.n purvaa.ii kii ThanDak bhii hai
in me.n tuufaan kii dastak bhii hai
in me.n sangiit kii devii bhii hai
in me.n ehsaas kii jyotii bhii hai
in me.n dariyaa kii ravaanii bhii hai
in me.n sahraa kii kahaanii bhii hai
khiltii kaliyo.n kaa tabassum bhii hai
zard patto.n kaa takallum bhii hai
surmagii.n sub.h kii dildaarii hai
lamha-e-vasl kii sarshaarii hai
sabz mausam kii dhanak hai in me.n
shaaKH-e-gul kii bhii lachak hai in me.n
in me.n sho.alo.n kii lapak hai dekho
in me.n chehro.n kii lalak hai dekho
dil ke resho.n me.n inhe.n jazb karo
phir inhe.n zehn se chhuu kar dekho

Sajid Hameed
Nazm

mujhse pahli si mohabbat meri mahbub na mang

an-ginat sadiyo.n ke taariik bahiimaana tilism
resham o atlas o kamKHaab me.n bunvaa.e hu.e
jaa-ba-jaa bikte hu.e kuucha-o-baazaar me.n jism
KHaak me.n luTh.De hu.e KHuun me.n nahlaa.e hu.e

Faiz Ahmad Faiz
Nazm

hamesha der kar deta hun

hamesha der kar detaa huu.n mai.n har kaam karne me.n
zaruurii baat kahnii ho ko.ii va.ada nibhaanaa ho
use aavaaz denii ho use vaapas bulaanaa ho
hamesha der kar detaa huu.n mai.n
madad karnii ho us kii yaar kii Dhaaras ba.ndhaanaa ho
bahut deriina rasto.n par kisii se milne jaanaa ho
hamesha der kar detaa huu.n mai.n
badalte mausamo.n kii sair me.n dil ko lagaanaa ho
kisii ko yaad rakhnaa ho kisii ko bhuul jaanaa ho
hamesha der kar detaa huu.n mai.n
kisii ko maut se pahle kisii Gam se bachaanaa ho
haqiiqat aur thii kuchh us ko jaa ke ye bataanaa ho
hamesha der kar detaa huu.n mai.n har kaam karne me.n.....

Muneer Niyazi
Nazm

raqib se!

jab kabhii biktaa hai baazaar me.n mazduur kaa gosht
shaah-raaho.n pe Gariibo.n kaa lahuu bahtaa hai
aag sii siine me.n rah rah ke ubaltii hai na puuchh
apne dil par mujhe qaabuu hii nahii.n rahtaa hai

Faiz Ahmad Faiz
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

subh-e-azadi (August-47)

ye daaG daaG ujaalaa ye shab-gaziida sahar
vo intizaar thaa jis kaa ye vo sahar to nahii.n
ye vo sahar to nahii.n jis kii aarzuu le kar
chale the yaar ki mil jaa.egii kahii.n na kahii.n
falak ke dasht me.n taaro.n kii aaKHirii manzil
kahii.n to hogaa shab-e-sust-mauj kaa saahil
kahii.n to jaa ke rukegaa safiina-e-Gam dil
javaa.n lahuu kii pur-asraar shaah-raaho.n se
chale jo yaar to daaman pe kitne haath pa.De
dayaar-e-husn kii be-sabr KHvaab-gaaho.n se
pukaartii rahii.n baahe.n badan bulaate rahe
bahut aziiz thii lekin ruKH-e-sahar kii lagan
bahut qarii.n thaa hasiinan-e-nuur kaa daaman
subuk subuk thii tamannaa dabii dabii thii thakan

Faiz Ahmad Faiz
Nazm

taj-mahal

sabt jis raah me.n ho.n satvat-e-shaahii ke nishaa.n
us pe ulfat bharii ruuho.n kaa safar kyaa ma.anii

Sahir Ludhianvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now