Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "seel"

Nazm MATCHES FOR "seel"

Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

suna hai maine

galii me.n jaatii ho
jaate hii lauT aatii ho
kahii.n kii chiiz
kahii.n rakh ke bhuul jaatii ho
kitchen me.n!
roz ko.ii pyaalii to.D detii ho
masaala piis kar
sil yuu.nhii chho.D detii ho
nasiihato.n se KHafaa
mashvaro.n se uljhan sii
kamar me.n dard kii lahre.n
rago.n me.n ai.nThan sii

Nida Fazli
Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

wo kaisi aurten thin

vo kaisii aurte.n thii.n
jo giilii lak.Diyo.n ko phuu.nk kar chuulhaa jalaatii thii.n
jo sil par surKH mirche.n piis kar saalan pakaatii thii.n
sahar se shaam tak masruuf lekin muskuraatii thii.n
bharii dopahar me.n sar apnaa jo Dhak kar milne aatii thii.n
jo pa.nkhe haath ke jhaltii thii.n aur bas paan khaatii thii.n
jo darvaaze pe ruk kar der tak rasme.n nibhaatii thii.n
pala.ngo.n par nafaasat se darii chaadar bichhaatii thii.n
ba-sad israar mehmaano.n ko sirhaane biThaatii thii.n
agar garmii ziyaada ho to ruuh-afzaa pilaatii thii.n
jo apnii beTiyo.n ko sweater bun.naa sikhaatii thii.n
silaa.ii kii mashiino.n par ka.De roze bataatii thii.n
ba.Dii pleTo.n me.n jo iftaar ke hisse banaatii thii.n
jo kalime kaa.Dh kar lak.Dii ke framo.n me.n sajaatii thii.n
du.aa.e.n phuu.nk kar bachcho.n ko bistar par sulaatii thii.n
aur apnii jaa-namaaze.n mo.D kar takiya lagaatii thii.n
ko.ii saa.il jo dastak de use khaanaa khilaatii thii.n
pa.Dosan maa.ng le kuchh baa-KHushii detii dilaatii thii.n
jo rishto.n ko baratne ke ka.ii nusKHe bataatii thii.n
mohalle me.n ko.ii mar jaa.e to aa.nsuu bahaatii thii.n
ko.ii biimaar pa.D jaa.e to us ke paas jaatii thii.n
ko.ii tehvaar ho to KHuub mil-jul kar manaatii thii.n
vo kaisii aurte.n thii.n
mai.n jab ghar apne jaatii huu.n to fursat ke zamaano.n me.n
unhe.n hii Dhuu.nDhtii phirtii huu.n galiyo.n aur makaano.n me.n
kisii miilaad me.n juzdaan me.n tasbiih daano.n me.n
kisii baraamde ke taaq par baavarchii KHaano.n me.n
magar apnaa zamaana saath le kar kho ga.ii hai.n vo
kisii ik qabr me.n saarii kii saarii so ga.ii hai.n vo

Asna Badr
Nazm

mufahamat

jo yaadgaar the baaham satiiza-kaarii kii
ba-faiz-e-vaqt vo daaman ke chaak sil hii ga.e

Sahir Ludhianvi
Nazm

nae sur ki tamsil

kaamanii KHvaab kii lau me.n ha.nstii hu.ii kaamanii
sola baras kii taqviim me.n fasl-e-gul kaa ko.ii tazkira
tak na thaa
mai.n ne battiis battiis jha.D rute.n kaaT dii.n
ab jo tamsiil ke ek vaqfe me.n tum se milaa huu.n
to saa.nso.n me.n nam chaal me.n un zamaano.n kaa rum
jii uThaa hai
jo ahd-e-zamistaa.n me.n yaKH the
saqar saa saqar
kaamanii KHanda-e-gul kii kul zindagii
ek gulchii.n kii vahshat bharii aa.nkh hai
ye chaTaknaa ye khulnaa
bahut sehar-aavar sahii jaagne aur sone me.n ik
KHvaab-e-mauhuum se kuchh ziyaada nahii.n
KHvaab-o-KHvaahish ajab silsila hai
bahut duur bahtii hu.ii aabshaaro.n kaa ik silsila
jis me.n koh-e-tazabzub kii KHushbuu bhii hai
ahd-o-paimaa.n kaa jaaduu bhii
KHuu.n se suro.n tak
suro.n se us ik lafz tak
jis me.n raago.n kaa jauhar ba.ndhaa hai
kahii.n aimanii ras kahii.n maarvaa ThaaTh bhageshirii
bhairvii.n aur pahaa.Dii
vo sab kuchh jo apne lahuu me.n dahaktaa chahaktaa hai
jis ke tanaazur me.n ham biist-o-shash-saal
pahle ba.ndhe the
unhii aabshaaro.n se mujh ko sadaa aa rahii hai
so mai.n jaa rahaa huu.n
na.e sur uThaane
ki sargam kii farsuudgii diida-o-dil bujhaane lagii hai
nayaa sur jise lafz tartiib dete hai.n
pahu.nche to jaano ki saan.e.a ke lafzo.n se uThtii namii tum
tak aa.ii

Akhtar Usman
Nazm

yaad

raat ik la.Dkha.Daate jho.nke se
naa-gahaa.n sa.ng-e-surKH kii sil par
aa.ina gir ke paash paash hu.aa
aur nannhii nukiilii kircho.n kii
ek bochhaa.D dil ko chiir ga.ii

Shakeb Jalali
Nazm

paron mein sham Dhalti hai

mirii miTTii rah-e-sayyaargaa.n kii ham-qadam niklii
mirii palko.n pe taare jhilmilaate hai.n
badan me.n aag jaltii hai
magar paa.nv me.n KHuu.n-aashaam raste la.Dkha.Daate hai.n
ye kyaa shiiraaza-bandii hai
ye merii be-parii kis kunj se ho kar baham niklii
nazar me.n din nikaltaa hai
paro.n me.n shaam Dhaltii hai
magar mai.n to lahuu kii munjamid sil huu.n
badan kii kisht-e-viiraa.n me.n
ye kis kii u.ngliyo.n ne umr bhar mujh ko kuredaa hai
kahaa.n shiryaan me.n chaltaa hu.aa ye qaafila Thahraa
ki mai.n us haath kii rekhaa.o.n me.n ra.ng-e-hinaa Thahraa
kahaa.n jaanaa thaa mujh ko
kis jagah KHema lagaanaa thaa

Abbas Tabish
Nazm

id

chaa.nd jab iid kaa nazar aayaa
haal kyaa puuchhte ho KHushiyo.n kaa
aasmaa.n par havaa.iyaa.n chhuuTii.n
naubate.n masjido.n me.n bajne lagii.n
shukr sab KHaas-o-aam karne lage
aur baaham salaam karne lage
nanhe bachche hai.n KHaas kar masruur
kahte hai.n iid ab hai kitnii duur
maa.e.n kahtii hai.n kuchh nahii.n ab duur
sub.h aa jaa.egii yahaa.n pe zaruur
aa.o khaa pii ke so raho chup chaap
aa.egii iid sub.h aapii-aap
bachcho.n kii aa.nkh me.n hai nii.nd kahaa.n
hai.n unhe.n to cha.Dhii hu.ii KHushiyaa.n
ho ga.ii raat kaaTnii mushkil
kal ke din par lagaa hu.aa hai dil
bachchiyo.n ne lagaa.ii hai meh.ndii
rangyaalii ma.ngaa.ii hai meh.ndii
achchhe achchhe banaa.e hai.n kap.De
sab na.e sil ke aa.e hai.n kap.De
bachche be-e'tibaar aise hai.n
un ko rakh kar sirhaane so.e hai.n
aa ga.ii nii.nd so ga.e bachche
baare KHaamosh ho ga.e bachche
KHvaab bhii iid hii ke aate hai.n
sote se uTh ke baiTh jaate hai.n

Hafeez Jalandhari
Nazm

shikast-e-ana

aaj kii raat bahut sard bahut kaalii hai
tiirgii aise lipaTtii hai havaa-e-Gam se
apne bichh.De hu.e saajan se milii hai jaise
mish.al-e-KHvaab kuchh is taur bujhii hai jaise
dard ne jaagtii aa.nkho.n kii chamak khaa lii hai
shauq kaa naam na KHvaahish kaa nishaa.n hai ko.ii
barf kii sil ne mire dil kii jagah paa lii hai
ab dhundalke bhii nahii.n ziinat-e-chashm-e-be-KHvaab
aas kaa ruup-mahl dast-e-tahii hai jaise
bahr-e-imkaan pe kaa.ii sii jamii hai jaise
aise lagtaa hai ki jaise miraa ma.amuura-e-jaa.n
kisii sailaab-zada ghar kii zabuu.n-haalii hai
na ko.ii dost na taaraa ki jise batlaa.uu.n
is tarah TuuT ke bikhraa hai anaa kaa shiisha
meraa pindaar mire dil ke liye gaalii hai
nabz taaro.n kii tarah Duub rahii hai jaise!
Gam kii pinhaa.ii samundar se ba.Dii hai jaise!
aa.nkh sahraa.o.n ke daaman kii tarah KHaalii hai
vahshat-e-jaa.n kii taraf dekh ke yuu.n lagtaa hai
maut is tarah ke jiine se bhalii hai jaise
tiirgii chhaTne lagii, vaqt rukegaa kyuu.n-kar
sub.h-e-KHurshiid liye dar pe kha.Dii hai jaise
daaG-e-rusvaa.ii chhupaane se nahii.n chhup saktaa
ye to yuu.n hai ki jabii.n bol rahii hai jaise!

Amjad Islam Amjad
Nazm

fan

ek raqqaasa thii kis kis se ishaare kartii
aa.nkhe.n pathraa.ii adaa.o.n me.n tavaazun na rahaa
Dagmagaa.ii to sab atraaf se aavaaz aa.ii
''fan ke is auj pe ik tere sivaa kaun gayaa''
farsh-e-marmar pe girii gir ke uThii uTh ke jhukii
KHushk ho.nTo.n pe zabaa.n pher ke paanii maa.ngaa
ok uThaa.ii to tamaashaa.ii sambhal kar bole
raqs kaa ye bhii ik andaaz hai allaah allaah
haath phaile hii rahe sil ga.ii ho.nTo.n se zabaa.n
ek raqqaas kisii samt se naagaah ba.Dhaa!
parda sarkaa to ma.an fan ke pujaarii garje
''raqs kyuu.n KHatm hu.aa? vaqt abhii baaqii thaa''

Ahmad Nadeem Qasmi
Nazm

ek clerk laDki

aa.ina kis liye hai za.ng-aaluud
phuul kii pa.nkhu.Dii pe sil kyuu.n hai
dekh kar tujh ko sochtaa huu.n mai.n
zindagii itnii ta.ng-dil kyuu.n hai

Naresh Kumar Shad
Nazm

saloni sardiyon ki nazm

puraane boot hai.n tasme khule hai.n
abhii miTTii ke chehre un-dhule hai.n
sharaabe.n aur mashkiiza sahar kaa
abhii hai jism paakiiza gajar kaa
sute chehre pe istehzaa kaa mausam
lahuu nabzo.n se KHaalii kar gayaa hai
gale me.n mulk ke ta.aviiz Daalo
bidesii barchhiyo.n se Dar gayaa hai
Gazal daalaan me.n rakkhii hai mai.n ne
mahak hai sa.ngtare kii qaash jaisii
ye kaisii mai hai jo chakkhii hai mai.n ne
mujhe ushshaaq ye kahte hai.n 'aamir'
bahut tanhaa sisakte dahr me.n ho!
ba.De shaa.er ho chhoTe shahr me.n ho
fareb-e-asr se mad.hosh kamraa
nigo.Dii titliyo.n se bhar gayaa hai
samundar pi.nDliyo.n tak aate aate
kisii patthar kii sil par mar gayaa hai
salonii sardiyo.n se jhaa.nkte hai.n
vo abruu kashtiyo.n ko haa.nkte hai.n
sileTii baadalo.n kaa ye sahiifa
mirii muTThii me.n pa.Dhtaa hai vaziifa
mai.n rotaa huu.n to ro pa.Dte hai.n taa.ir
mire hujre me.n kam aate hai.n zaa.er
ye pore.n nuur-baafii kar rahii hai.n
mohabbat ko Gilaafii kar rahii hai.n
tafaaKHur me.n hai do ho.nTo.n kaa KHam bhii
abhii rakkhaa nahii.n mai.n ne qalam bhii

Aamir Suhail
Nazm

kabhi dekha nahin tumko

kabhii dekhaa nahii.n tum ko
hamesha se faqat aavaaz ban kar merii aa.nkho.n me.n utartii ho
guzartii ho mire dil se
magar is phone se ho kar guzartii ho
kabhii dekhaa nahii.n tum ko
chalo ye farz kar lo
jaise tum ko dekhtaa hai ko.ii
aur vo kaise dekhtaa hai
aaj ye mujh ko bataa.o tum
un aa.nkho.n se mujhe KHud ko dikhaa.o tum
mai.n dekhuu.ngaa ki vo aa.nkhe.n
tumhaare jism me.n kaise nahaatii hai.n
mai.n dekhuu.ngaa ki vo aa.nkhe.n
tumhaarii be-karaanii ko bhalaa kaise samaatii hai.n
mai.n dekhuu.ngaa ki vo aa.nkhe.n
tumhaare jism ke har jo.D se
kis tarh ju.Dtii hai.n
Dhalaano.n par phisaltii hai.n vo kaise
phir sa.nbhaltii hai.n vo kyuu.nkar
aur mo.D aate hai.n to kis tarh mu.Dtii hai.n
un aa.nkho.n kii zabaanii daastaa.n apnii sunaa.o tum
mujhe KHud ko dikhaa.o tum
ki tum ko dekhne kii aarzuu ne
in aa.nkho.n kaa garebaa.n chaak kar Daalaa
vo sil jaa.e
mujhe aaraam mil jaa.e

Ameer Imam
Nazm

ajib hai ye silsila

ajiib hai ye silsila
ye silsila ajiib hai
havaa chale to ketiyo.n me.n dhuum chahchaho.n kii hai
havaa ruke to murdanii hai
murdanii kii raakh kaa nuzuul hai
kahaa.n hai tuu kahaa.n hai tuu
kahaa.n nahii.n hai tuu bataa
abhii thaa tere girte u.Dte aa.nchalo.n kaa silsila
aur ab ufuq par duur tak
ga.e dino.n kii dhuul hai
ga.e dino.n kii dhuul kaa ye silsila fuzuul hai
mai.n ro sakuu.n
to kyaa ye gadlii kaa.enaat dhul sakegii
mere aa.nsu.o.n ke jhaag se
mai.n muskuraa sakuu.n
to kyaa safar kii KHastagii ko bhuul kar ye kaarvaa.n nujuum ke
baras pa.De.nge motiye ke phuul ban ke
is muhiib kaasa-e-hayaat me.n
na tuu sune na mai.n kahuu.n
na mere a.ng a.ng se sadaa uThe
yuu.n hii mai.n aa.nsu.o.n ko qahqaho.n ko
apne dil me.n dafan kar ke
gum
labo.n pe sil dhare
tire nagar me.n paa-piyaada paa-barahna
shaam ke fishaar tak ravaa.n rahuu.n
magar kabhii
tirii nazar ke aastaa.n ko
paar tak na kar sakuu.n
ki tuu azal se taa-abad
hazaar sad hazaar aa.nkh vaale vaqt
kii naqiib hai
ye silsila ajiib hai
ye silsila ajiib hai

Wazir Agha
Nazm

najat

dukhte hu.e siino.n kii KHushbuu ke haatho.n me.n
un jalte KHvaabo.n ke lahraate ko.De hai.n
jinhe.n vo ik gahnaa.e chaa.nd kii na.ngii kamar pe barsaatii rahtii hai
tiirgii ba.Dhtii jaatii hai
aur hamaaraa chaa.nd abhii tak aisii kohna-saal havelii kaa qaidii hai
jise havaa aur baadal ne taamiir kiyaa hai
jis kii giilii diivaaro.n par ma.nDhii hu.ii belo.n me.n
aisii khop.Diyaa.n khiltii hai.n
jin kii aa.nkho.n ke KHaalii halqo.n me.n maazii haal aur mustaqbil ke
gaD-maD ra.ngo.n ke be-nuur dhundalke jame hu.e hai.n
tum hii bataa.o jab shaaKHo.n se
faaKHatii niile phuulo.n kii bajaa.e
khop.Diyaa.n phuuTe.n
sub.h-e-bahaar kaa suuraj un se aa.nkh milaa kar kaise zinda rah saktaa hai
isii liye to is viiraan havelii ke aa.ngan me.n KHizaa.n ke naGme
zinda insaano.n ke nauhe ban kar guu.njte hai.n
nam-aaluud fazaa ke naadiida siine par
sabr kii sil kii tarah ruke hu.e barfiile suuraj
shaam kii ukh.Dii hu.ii chaukhaT par
apne sar ghuTno.n me.n chhupaa kar sochte hai.n
kabhii to sadiyo.n kii aavaargiyo.n kaa bojh uThaa.e ko.ii musaafir
ism-e-rihaa.ii ko zer-e-lab dohraate hu.e
is be-ra.ng havelii ke darvaaze par
vo dastak dene aa.egaa
khul kar baarish barsegii aur chaa.nd rihaa ho jaa.egaa

Jameel ur Rahman
Nazm

kahani

ajab din the vo
jab bhii kuchh kahnaa chaahaa
ghuse murda lafzo.n kii ko.ii kumak tak na aa.ii
jo aa.ii to phir ho.nT sil se ga.e
aur aa.nkhe.n
na kah sakne ke karb me.n mubtalaa ho ke
apne hii halqo.n se baahar nikal aa.e.n risne lagii.n
aur phir ek din
uu.nche-niiche pahaa.Do.n se hotaa hu.aa vo
yahaa.n aa ke Thahraa
yahaa.n aa ke us ne
mu.ammar-tariin one ke niiche vo sho.ala jagaayaa
ki jis me.n bhasm ho ga.e sab ye one jhunD pharvaa.n phulaa.ii
havaa ho ga.e sunnat-saadhuu kaTii jhaa.Diyaa.n
aur kaa.ii-zada taal dhartii ke naasuur
ab un kaa naam-o-nishaa.n bhii nahii.n thaa
tab us ne
muqaddas asaa se vo jaaduu jagaayaa ki saarii fazaa sail-e-anvaar me.n bah ga.ii
gho.nslo.n aur phuulo.n me.n Dhaltii ga.ii ye zamii.n
chahchaho.n KHushbu.o.n se havaa aT ga.ii
aaj vo lauT kar jaa chukaa hai
to phir kaalii dhartii ke andar se aag aa.e hai.n
janD ke pe.D kaa.nTo.n-bharii jhaa.Diyaa.n
phir se risne lage hai.n
vo kaa.ii-zada taal
jin ke andar se
manhuus saadhuu nikal kar kinaaro.n pe baiThe hu.e hai.n
udaasii hu.aa ban ke phirne lagii hai
kisii ne alaav pe bhaarii qadam kyaa rakhaa hai
a.ndhere kaa bojhal saa paT khul gayaa hai
fazaa bujh ga.ii hai

Wazir Agha
Nazm

naya daur

chakkii ke baaTo.n ke beach ab kuchh nahii.n aataa
shaant pa.De rahte hai.n jaise mar ga.e huu.n be-shak patthar the
sil-baTTe bichha.D ga.e hai.n ka.ii saalo.n se mile nahii.n
aur chakkii ke baa.nT bhii ek arse se hile nahii.n
ab chakkii aur sil-baTTe kii kaTar kaTar kii jagah
mixer grinder kii ghan ghan sunaa.ii detii hai bas

Sachin Dev Verma
Nazm

Hyderabad

Hyderabad dil kii suurat hai
dil dha.Daktaa hai saa.ns chaltii hai
aarzuu zindagii kii paltii hai
Hyderabad ik mohabbat hai
Hyderabad hai qulii kaa dil
jis me.n miltaa hai husn-e-bhaag-matii
aur is sahr-e-sher-o-naGma kii
zindagii hai ki pyaar kii sil
qibla-e-dil kahuu.ngaa mai.n is ko
Hyderabad hai vatan meraa
rashk-e-jannat hai ye chaman meraa
ye nahii.n hai to kyaa hai tum hii kaho
zaKHm ulfat kaa bhar nahii.n saktaa
Hyderabad mar nahii.n saktaa

Barq Yusufi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now