Search result for "shaukat-e-shaahaana" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "shaukat-e-shaahaana"

Nazm MATCHES FOR "shaukat-e-shaahaana"

Nazm

yaad-e-ahbab

ai inqalaab-e-duniyaa ai gardish-e-zamaana
ai rozgaar-e-faanii sun to miraa fasaana
kartaa huu.n mai.n shikaayat ye tujh se dostaana
rakhtaa na thaa jahaa.n me.n mai.n shaukat-e-shahaana

Mirza Mohammad Hadi Aziz Lakhnavi

Nazm

hum bachche hum shahzade

phuul khile.nge gulshan me.n
diip jale.nge aa.ngan me.n
dil na kisii kaa ham to.De.nge
ahd hai apnaa bachpan me.n
rakhe.nge maa.n baap kii laaj
chamke.nge ilm-o-fan me.n
baaham mil ke rahe.nge ham
khoT na rakkhe.nge man me.n
duniyaa ham ko dekhegii
ek na.e pairaahan me.n
phaile.nge KHushbuu kii tarah
dhartii ke is aa.ngan me.n
dil me.n jo rakhtaa hai laalach
rahtaa hai vo uljhan me.n
ham bachche hai.n ham shahzaade
khele.nge har aa.ngan me.n
jo hai samajhtaa jhuuTaa ham ko
chehra dekhe darpan me.n
ilm kaa jis ko shauq nahii.n hai
KHaak hai is ke daaman me.n
uu.nchii uu.nchii baat nahii.n hai
uu.nchii himmat hai man me.n
'shaukat' ik din laa.e.nge
bachche KHushiyaa.n jiivan me.n

Shaukat Pardesi

Nazm

tarah-e-nau

sa.ii-e-baqaa-e-shaukat-e-askandarii kii KHair
maahaul-e-KHisht-baar me.n shiishagarii kii KHair

Sahir Ludhianvi

Nazm

ishwar pararthna

ai hamaare kibriyaa tuu KHaaliq-o-ma.abuud hai
hast hai tuu niist me.n maaduum me.n maujuud hai
shaukat-e-jaah-o-hasham hai manzil-e-maqsuud hai
apne bando.n kii haqiiqat tujh se kab mafquud hai
ai KHudaa ab tuu zaraa hindostaa.n vaalo.n ko dekh
haa.e tuu bedaad kii Thokar ke paamaalo.n ko dekh

Tika Ram Sukhan

Nazm

aawaz-e-adam

dar-e-zindaa.n se dekhe.n yaa uruuj-e-daar se dekhe.n
tumhe.n rusvaa sar-e-baazaar-e-aalam ham bhii dekhe.nge
zaraa dam lo ma.aal-e-shaukat-e-jam ham bhii dekhe.nge

Sahir Ludhianvi

Nazm

watan

azm-e-raasiKH bhii hai tujh me.n shaukat-e-daaraa bhii hai
lashkar-e-jarraar kaa tuu afsar-e-a.alaa bhii hai

Shatir Hakeemi

Nazm

sayyad se aaj hazrat-e-waiz ne ye kaha

sayyad se aaj hazrat-e-vaa.iz ne ye kahaa
charchaa hai jaa-ba-jaa tire haal-e-tabaah kaa
samjhaa hai tuu ne nature o tadbiir ko KHudaa
dil me.n zaraa asar na rahaa laa-ilaah kaa
ho tujh se tark-e-saum-o-salaat-o-zakaat-o-haj
kuchh Dar nahii.n janaab-e-risaalat-panaah kaa
shaitaan ne dikhaa ke jamaal-e-uruus-e-dahr
banda banaa diyaa hai tujhe hubb-e-jaah kaa
us ne diyaa javaab ki maz.hab ho yaa rivaaj
raahat me.n jo muKHil ho vo kaa.nTaa hai raah kaa
afsos hai ki aap hai.n duniyaa se be-KHabar
kyaa jaaniye jo rang hai shaam-o-pagaah kaa
europe kaa pesh aa.e agar aap ko safar
guzre nazar se haal re.aayaa-o-shaah kaa
vo aab-o-taab-o-shaukat-e-aivaan-e-khusravii
vo mahakmo.n kii shaan vo jalva sipaah kaa
aa.e nazar uluum-e-jadiidah kii raushnii
jis se KHajil ho nuur ruKH-e-mehr-o-maah kaa
daavat kisii amiir ke ghar me.n ho aap kii
kam-sin miso.n se zikr ho ulfat kaa chaah kaa
nau-KHez dil-fareb gul-andaam naaznii.n
aariz pe jin ke baar ho daaman nigaah kaa
rukiye agar to ha.ns ke kahe ik but-e-hasii.n
sun maulvii ye baat nahii.n hai gunaah kaa
us vaqt qibla jhuk ke karuu.n aap ko salaam
phir naam bhii huzuur jo le.n KHaanqaah kaa
patluun-o-koT-o-ba.ngla-o-biscuit kii dhun ba.ndhe
saudaa janaab ko bhii ho turkii kulaah kaa
mimbar pe yuu.n to baiTh ke goshe me.n ai janaab
sab jaante hai.n va.az savaab-o-gunaah kaa

Akbar Allahabadi

Nazm

dur ki shahzadi

qumchii ke nishaano.n se meraa shaffaaf badan
niilaa thaa magar
mai.n ne na jhukaayaa apnaa sar
ki mai.n to paidaa.ish hii se thii ik sultaana
jab thaam ke mai.n diivaar uThii
to tab bhii merii chaal me.n thaa
pahlaa saa vaqaar-e-shaahaana

Asif Raza

Nazm

jahan rehana rahti thi

yahii.n aabaad thii ik din mire afkaar kii malka
mire jazbaat kii devii mire ash.aar kii malka
vo malka jo ba-ra.ng-e-azmat-e-shaahaana rahtii thii
yahii vaadii hai vo hamdam jahaa.n rehaana rahtii thii

Akhtar Shirani

Nazm

paris

jo aduu hai.n vo hamaare hii aduu kab hai.n faqat
ham hadaf kab hai.n ki un kaa hadaf aasaanii hai
un ko ma.aluum nahii.n ham hai.n ko.ii shaukat-e-zau
ilm kaa qatl faqat maz.habii naadaanii hai

Atif tauqeer

Nazm

kanch

thakaa-haaraa azal kii vus.ato.n me.n KHaak kaa putlaa
hazaaro.n man kii taariikii tale thaa saakit-o-jaamid
har ik zii-ruuh kii nazro.n kaa markaz, maujib-e-hairat
chamakte nuuriyo.n kii shaukat-e-betaab kaa shaahid

Mohammad Shahbaz Akmal

Nazm

nilo

tab-e-shaahaana pe jo log giraa.n hote hai.n
haa.n unhe.n zahr bharaa jaam diyaa jaataa hai
tuu ki naa-vaaqif-e-aadaab-e-shahanshaahii thii
raqs zanjiir pahan kar bhii kiyaa jaataa hai

Habib Jalib

Nazm

taj

vus.at-e-kaun-o-makaa.n kaa aa.ina
jalva-zaar-e-kahkashaa.n kaa aa.ina
jis ko duniyaa kho ke rotii hii rahii
is mataa-e-raa.egaa.n kaa aa.ina
ek bazm-e-rafta kaa maatam-gusaar
ik nishaan-e-be-nishaa.n kaa aa.ina
dil-kushaa tasviir-e-sub.h-e-anjuman
daastaan-e-paastaa.n kaa aa.ina
azmat-e-mumtaaz kii ik jalva-gaah
shaukat-e-shaah-jahaa.n kaa aa.ina
yaadgaar-e-mahfil-e-taaraaj hai
taaj ab bhii hairato.n kaa taaj hai

Mohammad Sadiq Zia

Nazm

jamuna

be-sadaa zer-e-zamii.n hai bazm-e-shaahaan-e-Gayuur
aah jamunaa tujh me.n lekin hai vahii shaan-e-Guruur
aah o shikva-taraaz-e-dast bedaad-e-ajal
ro na KHuun-e-aarzuu o mahv-e-fariyaad-e-ajal
aah is daar-e-fanaa me.n hai baqaa kis ke liye
chho.Dne vaalaa hai shaahiin-e-qazaa kis ke liye

Suroor Jahanabadi

Nazm

rang-e-guftugu

har makaa.n makiino.n kii hai tafsiir-e-nazar
shaukat-e-shaah kaa unvaan banaa us kaa mahal
sa.ng-e-diivaar ne dii us ke tahaffuz ko zabaa.n
jho.npa.Dii Gurbat-e-mazduur kii hai marsiyaa.n-KHvaa.n
chiith.De chiiKHte hai.n jeb kii naadaarii par
aabla-paa.ii se aatii hai safar kii KHushbuu
gard-e-malbuus se miltii hai musaafir kii KHabar
kis kii aavaaz sunuu.n kis kii sadaa par boluu.n

Yusuf Zafar

Nazm

yas o umid

yaas
morid-e-zulm huu.n aamaaj-gah-e-tiir huu.n mai.n
taKHta-e-mashq-e-sitam qaidi-e-zanjiir huu.n mai.n
saik.Do.n dushman-e-saffaak lage hai.n piichhe
kitne hii naavak-e-bedaad kaa naKHchiir huu.n mai.n
shaukat-e-rafta kii taKH.iil bhii ab mushkil hai
mahfil-e-dosh kii miTtii hu.ii tasviir huu.n mai.n
kis qadar apnii tabaahii pe karuu.n nauha-zanii
muKHtasar ye hai ki phuuTii hu.ii taqdiir huu.n mai.n
ham-nashii.n sail-e-havaadis me.n bahaa jaataa huu.n
sarhad-e-maut se nazdiik hu.aa jaataa huu.n

Urooj Qadri

Nazm

nazr-e-tagore

mirii kalaa merii shaa.irii mere fan kaa us ko salaam pahu.nche
ki jis ne mashriq kii azmato.n ko ataa kiye zindagii ke paikar
jo satvate.n KHvaab ho chukii thii.n jo rif.ate.n past ho chukii thii.n
unhe.n jagaa kar unhe.n sajaa kar banaa diyaa aasmaa.n kaa ham-sar
bhaTak rahii thii vatan kii hastii Gulaam ruuho.n ke kaarvaa.n me.n
shu.uur-e-aazaadii us ko de kar banaa diyaa asr-e-nau kaa rahbar
mirii navaa.o.n me.n shoKH tarz-e-suKHan kaa us ko salaam paho.nche
ki jis ne mashriq kii sarzamii.n ko na.e jahaa.n kaa ufuq banaayaa
nizaam-e-tahsiil-e-ilm badlaa nayaa tasavvur adab ko baKHshaa
lalit-kalaa.o.n ko shaa.ntii ke hasiin unvaan se sajaayaa
shafaq kii meh.ndii dhanak ke ka.ngan churaa.e aur kahkashaa.n kii afshaa.n
ba.De jatan se hasiina-e-shaa.irii ko jis ne dulhan banaayaa
'sarosh' mere shu.uur ke baa.nkpan kaa us ko salaam pahu.nche
sharaab-e-mashriq ke jaam chhalkaa.e jis ne maGrib ke mai-kado.n me.n
musavvir-e-tal.at-e-nigaaraa.n muGannii-e-shaukat-e-bahaaraa.n
hai.n maujzan kaa.enaat ke dil kii dha.Dkane.n jis ke chahchaho.n me.n
sukuut-e-shab raqs-e-maah-o-anjum fazaa ke shaane sabaa kii zulfe.n
nigaar-e-fitrat kii har adaa kaa jamaal hai jis ke zamzamo.n me.n

Rifat Sarosh

Nazm

ali-baba koi sim-sim

alii-baabaa
ye ujlat himmato.n ko past kartii hai
mohabbat raaste me.n maut ko tajviiz kartii hai
havas terii ghane jangal se choro.n ko
mirii bastii me.n le aa.ii
vo chaaliis chor.....
bastii ke galii-kuucho.n me.n ab maqtal sajaate hai.n
alii-baabaa
KHazaana paane kii ujlat
tire maazii kii mahruumii kaa
abtar shaaKHaasana hai
ye terii bad-nasiibii se bhii bad-tar ik fasaana hai
nahii.n hai ko.ii marjiinaa, tirii achchhii kaniizo.n me.n
jo bastii ko bachaa letii
salaamat hai na teraa ghar
na meraa dil
na ab darbaar-e-shaahaana?
tujhe kyaa hai?
havas terii rahe baaqii
ye bastii aag kii tasviir ho jaa.e
agar ye raakh kaa hii Dher ho jaa.e
tujhe kyaa hai?
kaniizo.n KHaasa-daaro.n aur Gulaamo.n se
tujhe fursat nahii.n miltii
vahii baGdaad jis ke sab galii-kuuche
kabhii the mah-vasho.n ke
gul-ruKHo.n ke aa.iina-KHaane
sitaare aasmaa.n se jhuk ke jin ko roz takte the

Faheem Shanas Kazmi

Nazm

gham

jahaa.n me.n Gam bhii hai raushan-tarii.n sitaaro.n me.n
dikhaataa raah hai zulmat ke KHaarzaaro.n me.n
nahii.n suruud me.n cha.ng-o-rabaab me.n bhii nahii.n
vo ek lai ki hai TuuTe dilo.n ke taaro.n me.n
KHizaa.n kii shaukat-o-azmat hai un pe sab zaahir
jo Dhuu.nDte use phirte rahe bahaaro.n me.n
KHushii se husn nikhartaa hai zaahirii lekin
jamiil ruuho.n ko paa.oge Gam ke maaro.n me.n
baGair dard nahii.n hai kabhii zuhuur-e-hayaat
jigar kaa KHuun ubhartaa hai shaahkaaro.n me.n
makii.n haram ke musiibat ko un kii kyaa jaane.n
jo KHaak chhaante hai.n ajnabii dayaaro.n me.n
pasand aayaa jo TuuTe dilo.n kaa izz-o-niyaaz
to bas gayaa hai KHudaa bhii gunahgaaro.n me.n
kabhii to dekhte tum aa ke Gam nasiibo.n ko
hasiin daaG hai siine ke laala-zaaro.n me.n

JaiKrishn Chaudhry Habeeb

Nazm

padmani

andaliibo.n ko milii aah-o-bukaa kii taaliim
aur parvaano.n ko dii soz-e-vafaa kii taaliim
jab har ik chiiz ko qudrat ne ataa kii taaliim
aa.ii hisse me.n tire zauq-e-fanaa kii taaliim
narm o naazuk tujhe aazaa diye jalne ke liye
dil diyaa aag ke sholo.n pe pighalne ke liye
ra.ng tasviir ke parde me.n jo chamkaa teraa
KHud-ba-KHud luuT gayaa jalva-e-raanaa teraa
Dhaal kar kaal-bud-nuur me.n putlaa teraa
yad-e-qudrat ne banaayaa jo saraapaa teraa
bhar diyaa kuuT ke soz-e-Gam-e-shauhar dil me.n
rakh diyaa chiir ke ik shola-e-muztar dil me.n
tuu vo thii sham.a ki parvaana banaayaa tujh ko
tuu vo lailaa thii ki diivaana banaayaa tujh ko
raunaq-e-KHavlat-e-shaahaana banaayaa tujh ko
naazish-e-himaat-e-mardaana banaayaa tujh ko
naaz aayaa tire hisse me.n adaa bhii aa.ii
jaa.n-faroshii bhii, mohabbat bhii, vafaa bhii, aa.ii
aa.ii duniyaa me.n jo tuu husn me.n yaktaa ban kar
chaman-e-dahr me.n phuulii gul-e-raanaa ban kar
rahii maa.n baap kii aa.nkho.n kaa jo taaraa ban kar
dil-e-shauhar me.n rahii KHaal-e-suvaidaa ban kar
Husn-e-KHidmat se shagufta dil-e-shauhar rakkhaa
ki qadam jaada-e-taa.at se na baahar rakkhaa
terii fitrat me.n muravvat bhii thii Gam-KHvaarii bhii
terii suurat me.n adaa bhii tarah-daarii bhii
jalva-e-husn me.n shaamil thii niko-kaarii bhii
dard aayaa tire hisse me.n, to KHuddaarii bhii
aag par bhii na tujhe aah machalte dekhaa
tapish-e-husn ko pahluu na badalte dekhaa
tuu vo ismat kii thii o aa.iina-siimaa tasviir
husn-e-siirat se thii terii mutajalaa tasviir
laakh tasviiro.n se thii ik tirii zebaa tasviir
tujh ko qudrat ne banaayaa thaa saraapaa tasviir
nuur hii nuur tire jalva-e-mastuur me.n thaa
anjum-e-naaz kaa jhurmuT ruKH-e-pur-nuur me.n thaa
lab me.n ejaaz hayaa chashm-e-fusuu.n-saaz me.n thii
ki qayaamat kii adaa tere har andaaz me.n thii
shakl phirtii jo tirii diida-e-Gammaaz me.n thii
barq-e-betaab tirii jalva-gaah-e-naaz me.n thii
ye vo bijlii thii qayaamat kii ta.Dap thii jis me.n
shola-e-naar-e-uquubat kii ta.Dap thii jis me.n
ye vo bijlii thii jo teG-e-sharar-afshaa.n ho kar
kau.nd uThii qila-e-chittau.D me.n jaulaa.n ho kar
ye vo bijlii thii jo soz-e-Gam-e-hirmaa.n ho kar
KHaak sii loT ga.ii terii pashiimaa.n ho kar
ye vo bijlii thii tujhe jis ke asar ne phuu.nkaa
rafta rafta tapish-e-soz-e-jigar ne phuu.nkaa
aah o ishva o andaaz o adaa kii devii
aah o hind ke naamuus-e-vafaa kii devii
aah o partav-e-anvaar-e-safaa kii devii
o ziyaarat-kada-e-sharm-o-hayaa kii devii
terii taqdiis kaa qaa.el hai zamaana ab tak
terii iffat kaa zabaa.n par hai fasaana ab tak
aafrii.n hai tirii jaa.n-baazii o himmat ke liye
aafrii.n hai tirii iffat tirii ismat ke liye
kyaa miTaa.egaa zamaana tirii shohrat ke liye
ki chalii aatii hai ik KHalq ziyaarat ke liye
naqsh ab tak tirii azmat kaa hai baiThaa dil me.n
tuu vo devii hai, tiraa lagtaa hai mela dil me.n

Suroor Jahanabadi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now