Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taqtii"

Nazm MATCHES FOR "taqtii"

Nazm

kitaben

kitaabe.n jhaa.nktii hai.n band almaarii ke shiisho.n se
ba.Dii hasrat se taktii hai.n
mahiino.n ab mulaaqaate.n nahii.n hotii.n
jo shaame.n un kii sohbat me.n kaTaa kartii thii.n, ab aksar
guzar jaatii hai.n computer ke pardo.n par
ba.Dii bechain rahtii hai.n kitaabe.n
unhe.n ab niind me.n chalne kii aadat ho ga.ii hai
ba.Dii hasrat se taktii hai.n
jo qadre.n vo sunaatii thii.n
ki jin ke cell kabhii marte nahii.n the
vo qadre.n ab nazar aatii nahii.n ghar me.n
jo rishte vo sunaatii thii.n
vo saare udh.De udh.De hai.n

Gulzar
Nazm

raat sunsan hai

saamne taaq pe rakkhii hu.ii do tasviire.n
aksar auqaat mujhe pyaar se yuu.n taktii hai.n
jaise mai.n duur kisii des kaa shahzaada huu.n
meraa kamra mire maazii kaa haqiiqii muunis
aaj har fikr har ehsaas se begaana hai
apne hamraaz kivaa.Do.n ke ahaate ke evaz
aaj mai.n jaise mazaaro.n pe chalaa aayaa huu.n
gard-aaluuda calendar pe ajantaa ke nuquush
mere chehre kii lakiiro.n kii taraf dekhte hai.n
jaise ik laash kii phailii hu.ii be-bas aa.nkhe.n
apne majbuur aziizo.n ko takaa kartii hai.n

Mustafa Zaidi
Nazm

ek ghamgin yaad

mire pahluu-ba-pahluu jab vo chaltii thii gulistaa.n me.n
faraaz-e-aasmaa.n par kahkashaa.n hasrat se taktii thii
mohabbat jab chamak uThtii thii us kii chashm-e-KHandaa.n me.n
KHamistaan-e-falak se nuur kii sahbaa chhalaktii thii

Asrarul Haq Majaz
Nazm

watan mein wapsi

kal vo milii jo bachpan me.n mere bhaa.ii se khelaa kartii thii
jaane tab kyaa baat thii us me.n mujh se bahut hii Dartii thii
par kyaa hu.aa? vo kahaa.n ga.ii? ab kaun ye baate.n jaantaa hai
kab itnii duurii se ko.ii shaklo.n ko pahchaantaa hai
lekin ab jo milii hai mujh se aisaa kabhii na dekhaa thaa
us ko itnii chaah thii merii mai.n ne kabhii na sochaa thaa
naam bhii us ne bachche kaa mere hii naam pe rakkhaa thaa
phir kahii.n us se bichha.D na jaa.uu.n aaise mujh ko taktii thii
ko.ii gahrii baat thii jii me.n jise vo kah bhii na saktii thii
aisii chup aur paagal aa.nhke.n damak rahii thii.n shiddat se
mai.n to sach-much Darne lagaa thaa is KHaamosh mohabbat se

Muneer Niyazi
Nazm

sal-e-nau mubarak

umiide.n hai.n raahe.n azaa.em savaarii
KHabar de rahii hai ye baad-e-bahaarii
mahaktii hu.ii manzile.n pyaarii pyaarii
ki sadiyo.n se taktii hai.n raahe.n hamaarii
mubaarak mubaarak nayaa saal sab ko
mubaarak mubaarak nayaa saal sab ko

Mohammad Asadullah
Nazm

ba-shart-e-ustuwari

zulm parvarda qavaaniin ke aivaano.n se
be.Diyaa.n taktii hai.n zanjiir sadaa detii hai

Sahir Ludhianvi
Nazm

raat judai ki raat

kaTtii nahii.n sard raat
Dhaltii nahii.n zard raat
raat judaa.ii kii raat
KHaalii gilaaso.n kii samt
taktii hu.ii aa.nkh me.n
qatra-e-shabnam nahii.n
kaun lahuu me.n bahe
merii rago.n me.n chale
tez ho saa.nso.n kaa shor
jalne lage por por
aa.e samundar me.n josh
gir pa.De diivaar-e-hosh
suukhii hu.ii shaaKH par
barg o samar khil uThii.n
aa.o mirii niind kii
bikhrii hu.ii pattiyaa.n
aaj sameTo zaraa
kab se khulaa hai badan
is ko lapeTo zaraa
ek shikan do shikan
bistar-e-tanhaa.ii par
phir se ba.Dhaa do zaraa
mujh ko rulaa do zaraa
ek pahar raat hai
raat judaa.ii kii raat

Shahryar
Nazm

tilismat

pare se dekho to sirf KHushbuu qariib jaa.o to ik nagar hai
tilismii ra.ngo.n se bhiigte ghar nisaa.ii saa.nso.n se band galiyaa.n
KHamosh mahlo.n me.n KHuub-suurat talaa.ii shaklo.n kii ra.ng-raliyaa.n
kisii dariiche kii chiq ke piichhe dahakte ho.nTo.n kii surKH kaliyaa.n
pare se taktii har ik nazar us nagar kii raaho.n se be-KHabar hai
hinaa.ii-a.ngusht kaa ishaara lajaa.ii-aa.nkho.n kii muskuraahaT
kabhii yuu.nhii raah chalte ik reshmii dupaTTe kii sarsaraahaT
siyaah-raato.n ko haule haule qariib aatii hu.ii sii aahaT
ye saarii raahe.n hai.n us nagar kii jo daa.imii aa.nsu.o.n kaa ghar hai

Muneer Niyazi
Nazm

mere dushman ki maut

teG lahuu me.n Duubii thii aur pe.D KHushii se jhuumaa thaa
baad-e-bahaarii chalii jhuum ke jab us ne mujh ko dekhaa thaa
ghaayal nazre.n us dushman kii aise mujh ko taktii thii.n
jaise anhonii ko.ii dekhii un kamzor nigaaho.n ne
ye insaaf to baa'd me.n hogaa kyaa sachchaa kyaa jhuuTaa hai
kaun yaqiin se kah saktaa hai kaun buraa kaun achchhaa hai
lekin phir bhii ek baar to meraa dil bhii kaa.npaa thaa
kaash ye sab kuchh kabhii na hotaa mai.n ne dukh se sochaa thaa
ghaayal nazre.n us dushman kii gahrii soch me.n kho.ii thii.n
jaise anhonii ko.ii dekhii un kamzor nigaaho.n ne
kaun huu.n mai.n aur kaun thaa vo jis par honii ne vaar kiyaa
kaun thaa vo jis shaKHs ko mai.n ne bharii bahaar me.n maar diyaa

Muneer Niyazi
Nazm

gungi aurat

kyuu.n hairat se taktii hai ek ik chehre ko
kyaa tujh ko shikva hai terii goyaa.ii kii taaqat
chhiin ke qudarat ne be-insaafii kii hai?
kyaa tujh ko ehsaas hai tere paas agar guftaar kii ne.amat hotii
to is chaaro.n jaanib phailii hathiyaaro.n kii duniyaa
siina dahlaa dene vaale tayyaaro.n kii insaa.n-kush aavaaze.n
aavaaze.n jin me.n insaa.n kii ruuh shabaana roz dabii jaatii hai
mahshar-KHez aavaaze.n kal-purzo.n kii jin se nafsii-nafsii kaa aalam paidaa ho kar
din par din ifriit kii suurat me.n ba.Dhtaa jaataa hai
in aavaazo.n kii haibat-naakii par vaavailaa kartii
tuu aavaaz uThaatii us faashii aur ta.assub phailaane vaale unsur ko ba.Dhtaa paa kar
jo hubb-ul-vatanii ke naam pe insaa.n-kush hotaa jaataa hai
tuu un rujhaanaat kii KHuub mazammat kartii
un se la.Dtii jo is duniyaa ko piichhe le jaane me.n koshaa.n hai.n
'maz.hab aur tahziib'
'saqaafat' aur 'taraqqii' kah kar raj.at-parvar ho jaate hai.n
le mai.n tujh ko apnii goyaa.ii detaa huu.n!
ye mere kaam nahii.n aa.ii kuchh
mai.n aisaa buzdil huu.n jo har be-insaafii ko chupke chupke sahtaa hai
jis ne 'maqtal' aur 'qaatil' dono.n dekhe hai.n
lekin daanaa.ii kah kar
apnii goyaa.ii ko guu.ngaa kar rakhaa hai!

Akhtarul Iman
Nazm

KHabar hai ki nahin

ab sabaa kuucha-e-jaanaa.n me.n guzre hai ki nahii.n
tujh ko is fitna-e-aalam kii KHabar hai ki nahii.n
bujh gayaa mehr kaa faanuus ki raushan hai abhii
ab un aa.nkho.n me.n lagaavaT kaa asar hai ki nahii.n
ab mere naam kaa pa.Dhtaa hai vaziifa ko.ii
ab miraa zikr-e-vafaa dard-e-sahar hai ki nahii.n
ab bhii taktii hai.n mirii raah vo kaafir aa.nkhe.n
ab bhii duzdiida nazar jaanib-e-dar hai ki nahii.n
chhup ke raato.n ko mirii yaad me.n rotaa hai ko.ii
maujzan aa.nkh me.n ab KHuun-e-jigar hai ki nahii.n
husn ko pursish-e-biimaar kaa hai ab bhii KHayaal
mehr kii zarra KHaakii pe nazar hai ki nahii.n
be-KHabar mujh ko zamaane se kiyaa hai jis ne
kuchh use merii tabaahii kii KHabar hai ki nahii.n
khaa.e jaataa hai mujhe dard-e-Gariib-ul-vatanii
dil par is jaan-e-vatan ke bhii asar hai ki nahii.n
'josh' KHaamosh bhii ho puuchh rahaa hai kyaa kyaa
kuchh tujhe taa.Dne vaalo.n kii KHabar hai ki nahii.n

Josh Malihabadi
Nazm

shofer

un se.... vo.... tahziib se uu.nchii, chhoTe bhaa.ii se vaqtii chaah
shauhar aa.e na aa.e lekin devar kii ''taktii hai.n raah''
KHvaahish kii takmiil bhii jaarii, ''shaadii bhii naakaam nahii.n''

Shaad Aarfi
Nazm

tumhein likhna na aata tha

kabhii qirtaas par tum jhurriyo.n me.n jhilmilaatii ho
hamesha kii tarah se miiThe miiThe muskuraatii ho
to apne khurdure haatho.n ko mai.n hairat se taktii huu.n
sunaa ye hai tumhe.n likhnaa na aataa thaa
tumhaare haath kii kap.De kii gu.Diyaa
aur gulaabii rang kii miTTii kii chi.Diyaa
lafz ban kar jab bhii kaaGaz par chahaktii hai.n
mai.n chaalaakii se ha.nstii huu.n
chalo achchhaa hai logo.n ko yahii ma.aluum hai ab tak
tumhe.n likhnaa na aataa thaa

Ishrat Afreen
Nazm

mera raj-kumar

vidaa.ii ke baad kii raat aa.ii thii
mai.n pahlii baar pyaar se kuchh yuu.n sharmaa.ii thii
aa.nkhe.n na sahii par dil mere paas thaa
us dil me.n basaa ab ko.ii KHaas thaa
mai.n kaan lagaa kar suntii rahii
bin aa.nkhe.n bhii raahe.n taktii rahii
isii soch me.n rainaa biit.tii ga.ii
merii KHushiyaa.n har soch se jiit.tii ga.ii
aaKHir pyaar mai.n ne paaya thaa
ye pyaar mujhe jannat me.n laaya thaa

Ankita Garg
Nazm

an-kahi

saa.nvlii! to mire pahluu me.n hai
lekin tirii pyaasii aa.nkhe.n
kabhii diivaar ko taktii hai.n
kabhii jaanib-e-dar dekhtii hai.n
mujh se is tarah gurezaa.n jaise
unhe.n mujh se nahii.n diivaar se kuchh kahnaa hai
yaa ye panchhii hai.n jinhe.n
ek hii parvaaz me.n u.D jaanaa hai
haath nahii.n aanaa hai
(ai mirii saa.nvlii! in aa.nkho.n ke dono.n panchhii
gar u.De bhii to mire dil kii taraf aa.e.nge)

Shahzad Ahmad
Nazm

mehndi

mai.n us ke naam kii meh.ndii
sajaa kar apne haatho.n par
unhe.n taa-der taktii huu.n
ki jitnaa pyaar vo kartaa hai rang utnaa hii gahraa ho
magar ye dekh kar hairaan hotii huu.n
na-jaane kyuu.n
mire haatho.n pe har meh.ndii kaa rang kachchaa hii aataa hai

Urooj Zehra Zaidi
Nazm

aankh-micholi

vo ik nannhii sii la.Dkii
barf ke gaale se naazuk-tar
havaa me.n jhuultii shaaKHo.n kii KHushbuu
us kaa lahja thaa
chamakte paaniyo.n jaisii subuk-rau
us kii baate.n thii.n
vo u.Dtii titliyo.n ke rang pahne
jab mujhe taktii
to aa.nkhe.n miich letii
magar ab vo nahii.n hai
barf ke gaale bhii Gaa.eb hai.n
havaa me.n jhuultii shaaKHo.n me.n
lahja hai na KHushbuu hai

Shahzad Ahmad
Nazm

jang

tiirgii me.n bhayaanak sadaa.e.n uThii.n
aur dhu.aa.n saa fazaa.o.n me.n lahraa gayaa
maut kii sii sapedii ufuq-taa-ufuq
tilmilaane lagii
aur phir ek dam
siskiyaa.n chaar-suu thartharaa kar uThii.n
ek maa.n siina-kuubii se thak kar girii
ik bahan apnii aa.nkho.n me.n aa.nsuu liye
raah taktii rahii
ek nanhaa khilaune kii ummiid me.n
sar ko dahliiz par rakh ke sotaa rahaa
ek ma.asuum suurat dariiche se sar ko lagaa.e hu.e
KHvaab buntii rahii
muntazir thii.n nigaahe.n ba.Dii der se
muntazir hii rahii.n
maut kii sii sapedii ufuq-taa-ufuq
tilmilaatii rahii

Balraj Komal
Nazm

nazr-e-firaq

ai dil-e-kaafir ijz se munkir aaj tiraa sar KHam kyuu.n hai
terii haTelii shiryaano.n me.n ye bebas maatam kyuu.n hai
aa.nkh to ronaa bhuul ga.ii thii phir har manzar nam kyuu.n hai
mat roko bahne do aa.nsuu kisii ko karte hai.n parnaam
aap jhukaa hai jhukne do sar chhupaa thaa us me.n ko.ii salaam
shaayad us ke huzuur me.n ho tum jis ko kahte hai.n anjaam
vo hastii kii sarhad-e-aaKHir hu.aa jahaa.n har safar tamaam
bebas hai insaa.n bebas hai taktii rah ga.ii rotii shaam
uTh gayaa ko.ii bharii duniyaa se baaqii rahe KHudaa kaa naam
yaa phir kaaGaz par parchhaa.ii.n milegaa jis ko sabt-e-davaam
ye Tuk.De insaanii dil ke shaa.er aur shaa.er kaa kalaam
naaz karuu.ngii KHush-baKHtii me.n mai.n ne 'firaaq' ko dekhaa thaa
uj.De ghar me.n vo tahziibo.n ke sa.ngam par baiThaa thaa
garm ham-aaGoshii sadiyo.n kii hogii kitnii pyaar bharii
jis kii baa.nho.n me.n khelii thii us kii soch kii sundartaa
sher kaa dil shaffaaf thaa itnaa jaise aa.iina-e-taariiKH
kyaa bhar puur visaal thaa jis ne us shaa.er ko janm diyaa
gar taariiKH ne paagal ho kar KHud apnaa sar pho.Daa hai
KHuun uchhaalaa hai galiyo.n me.n apnaa hanDolaa to.Daa hai
chhii.nT na thii daaman par us ke kaun ghaaT dho baiThaa thaa
jise samajhte ho naa-mumkin vo us insaa.n jaisaa thaa
insaa.n bhii itnaa maamuulii jaise apnaa ham-saaya
apne sher sunaanaa us kaa aur KHud hairaa.n ho jaanaa
baato.n me.n maasuum mahak thii aa.nkho.n me.n bechain lapak
KHaamoshii ke vaqfe yuu.n jaise us ne kuchh dekhaa thaa
pii.D bahut jhelii thii us ne itnii baat to zaahir thii
lahja me.n shoKHii thii jaise raakh me.n chamke a.ngaara
sa.ngam ke paanii par mai.n ne dekhii thii kaisii tasviir
u.Daa lahak kar ik jal-panchhii khii.nch gayaa paanii pe lakiir
jamunaa kii niilii gahraa.ii bhed bharii chup se bojhal
ga.ngaa ke dhaare kii jumbish ujlii taaqat aur be-kal
is paanii me.n aks Daaltaa aasmaan kaa ik Tuk.Daa
miTTii ke but hare naariyal chandan lagaa ko.ii mukh.Daa
vo dhaaro.n par naav khetaa suukhaa panjar maa.njhii kaa
daan ke paise gintaa panDit taa.nba suuraj saa.njhii kaa
jamunaa par miinaar qila ke gumbad kaa tirchhaa saayaa
paaksitaan se aa.e muhaajir ge.nde kii TuuTii maalaa
paanii me.n chappuu kii shap shap baato.n ke TuuTe Tuk.De
yahii.n kahii.n par ham se ojhal sarasvatii bhii bahtii hai
jo samjhii jo aage samjhuu.n chhalak rahaa hai dil kaa jaam
vo manzar jo KHud se ba.Daa thaa us kaa gheraa tumhaare naam
ye kamre kaa maa.nd ujaalaa baahar huuk papihe kii
khi.Dkii par buu.ndo.n kii dastak saa.nse.n bhartii KHaamoshii
puurii baat nahii.n batlaataa guu.nge aa.nsuu ro denaa
terii dhartii sah na sakegii itne husn ko kho denaa
tanhaa aur apaahij buu.Dhe tujhe na marne de.nge log
abhii to jiivan baa.njh nahii.n hai phir tujh ko janme.nge log

Fahmida Riaz
Nazm

yaadon ka lams

nahii.n tanhaa nahii.n huu.n mai.n
tumhaare sehr ke dhaago.n ne
mere jism-o-jaa.n ko baa.ndh rakhaa hai
hasii.n yaado.n kaa shiirii.n lams
merii ruuh ko chhuu kar
mirii aa.nkho.n se bahtaa hai
tum apnii u.ngliyo.n kii narm poro.n se
mire haatho.n ko chhuute ho
bahut dhiire se
tum apne dahakte lab mire gaalo.n pe rakh kar
aa.nsu.o.n ko po.nchh dete ho
mai.n apnii band aa.nkho.n me.n
hasii.n qaus-e-quzah aur titliyo.n ke rang taktii huu.n
mohabbat ke parinde giit gaate hai.n
fazaa.e.n gungunaatii hai.n
tumhaare baazu.o.n ne mere tan ko
thaam rakkhaa hai
tumhaarii saa.ns kii KHushbuu
mirii saa.nso.n me.n uljhii hai
tumhe.n chhuutii
tumhe.n mahsuus kartii huu.n
mai.n tum se pyaar kartii huu.n
jidhar dekhuu.n tumhii tum ho
har ik pal me.n tumhii tum ho
jahaa.n tum ho vahii.n huu.n mai.n
nahii.n tanhaa nahii.n huu.n mai.n

Laeeq Akbar Sahaab
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now