Search result for "thar-thar" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "thar-thar"

Nazm MATCHES FOR "thar-thar"

Nazm

jaDa

kaisii havaa hai farfar farfar
kaa.npte hai.n sab thar-thar thar-thar

Mohammad Shafiuddin Nayyar

Nazm

pichhle-pahar ke sannaTe mein

pichhle pahr ke sannaaTe me.n
kis kii siskii kis kaa naala
kamre kii KHaamosh fazaa me.n dar aayaa hai
zor havaa kaa TuuT chukaa hai
khule dariiche kii jaalii se
nannhii nannhii buu.nde.n chhan kar
sab kono.n me.n phail ga.ii hai.n
aur mire ashko.n se
un ke haath kaa takiya bhiig gayaa hai
kitnii zaalim
kitnii gahrii taariikii hai
khulaa dariicha thar-thar-thar-thar kaa.np rahaa hai
bhiigii miTTii sau.ndhii KHushbuu chho.D rahii hai
uude baadal
kaale ambar kii jhiilo.n me.n Duub ga.e hai.n
kis ke ruKHsaaro.n kii larzish dekh rahaa huu.n
kis kii zulfo.n kii shikno.n se khel rahaa huu.n
chupke chupke leTe leTe soch rahaa huu.n
pichhle pahr kaa sannaaTaa hai
kis kii siskii kis kaa naala
kamre kii KHaamosh fazaa me.n dar aayaa hai

Ibn۔e۔Insha

Nazm

sardi

sardii se jab kaa.npe thar-thar
baiThe log jalaa kar heater
aa.ii sab ko yaad razaa.ii
sardii aa.ii sardii aa.ii

Ayyub Akhtar

Nazm

TuTa tara

raat ko TuuTaa ek sitaaraa
uupar se lu.Dhkaa bechaara
chaa.nd ne aaKHir de ke sahaaraa
sahn me.n apne us ko utaaraa
pahle chumkaaraa puchkaaraa
kaa.np rahaa thaa thar thar saaraa
ghar pahu.nchaayaa us ko dobaara

Shaanul Haq Haqqi

Nazm

aaina-dar-aina

mai.n aaj savere jaag uThaa
dekhaa ki hai har-suu sannaaTaa
chup-chaap hai saaraa ghar aa.ngan
baahar se band hai darvaaza
sab bhaa.ii bahan biivii bachche
aaKHir hai.n kahaa.n hai kyaa qissa
itne me.n ajab ik baat hu.ii
naagaah jo dekhaa aa.iina
ik aadmii mujh ko aayaa nazar
mujh se hii magar miltaa-jultaa
do sii.ng hai.n us ke sar pe uge
ye dev hai ko.ii yaa devtaa
tum kaun ho ye puuchhaa mai.n ne
par ko.ii na mujh ko javaab milaa
mai.n kaa.np uThaa thar thar thar thar
sochaa ki karuu.n jhuk kar sajda
itne me.n hu.ii ik aahaT sii
mai.n sun ke yakaayak chau.nk uThaa
ab der hu.ii uThiye paapaa
haa.n mujh ko daftar jaanaa hai
us KHvaab kaa lekin kyaa hogaa

Khalilur Rahman Azmi

Nazm

na-rasai

raat a.ndherii ban hai suunaa ko.ii nahii.n hai saath
pavan jhakole pe.D hilaa.e.n thar-thar kaa.npe.n paat
dil me.n Dar kaa tiir chubhaa hai siine par hai haath
rah rah kar sochuu.n yuu.n kaise puurii hogii raat

Meeraji

Nazm

ek waqia

labo.n se niklii siskaarii sii
cigarette ik sulgaayaa
ulTii samt ko bhaagte kheto.n
aur khambo.n ko dekhaa
sab be kaar hai ko.ii bolaa
chiiKHe.n, lazzat, nasha
nafrat, lazzat, nasha
logo.n ne jab alag kiyaa to
dekhaa
garm raan me.n KHuun ke qatre
thar thar kaa.np rahe the
aur mu.nh me.n lage KHuun ko vo
paiham chaaT rahaa thaa

Abrar Azmi

Nazm

ek lamha

lamha
dil ke bahut paas se
guzraa hu.aa sirf ek lamha
bahaa le gayaa hai
jaane kitne KHvaabo.n KHvaahisho.n aur mansuubo.n ko
bachaa hai
haDDiyo.n tak dha.nsaa hu.aa sannaaTaa
ruktii hu.ii saa.nse.n
Duubtii hu.ii nabz
aur sard hu.aa jism
phir ko.ii tez havaa kaa jho.nkaa
Dher saarii gaD-maD aavaaze.n
chiiKH ha.nsii aur muskuraahaT
ghar daftar biivii bachche
aur aa.inda biis barso.n kaa mansuuba
bhaagtii hu.ii aa.Dii tirchhii tasviire.n
ek ke baad duusre be-rabt manaazir
aur phir
Thahar gayaa hai guzre hu.e lamhe kaa saaya
Daraa-Daraa sahmaa-sahmaa dil
aur thar-thar kaa.nptaa hu.aa jism

Shahid Mahuli

Nazm

aaya mausam jaDe ka

sar se paa tak jism ko Dhaa.npe.n aayaa mausam jaa.De kaa
lekin phir bhii thar thar kaa.npe.n aayaa mausam jaa.De kaa
pahle dhuup nikaltii thii to ham us se ghabraate the
hotii thii dopahar to bhayyaa kamro.n me.n ghus jaate the
suuraj Dhaltaa luu kam hotii tab ham baahar aate the
garmii se bachne kii KHaatir pa.nkhe KHuub chalaate the
garmii kaa ab zikr nahii.n hai aayaa mausam jaa.De kaa
pa.nkhe kii ab fikr nahii.n hai aayaa mausam jaa.De kaa
garmii se chhuTkaaraa paayaa to baarish ne gher liyaa
kaale kaale baadal chhaa.e din bhii aadhii raat lagaa
rim-jhim rim-jhim rim-jhim rim-jhim paanii phir din raat pa.Daa
ghar se baahar kaam ko jaanaa logo.n ko dushvaar hu.aa
kaalii kaalii raat ga.ii tab aayaa mausam jaa.De kaa
ruKHsat jab barsaat hu.ii tab aayaa mausam jaa.De kaa
ab ko.ii jacket pahne hai ko.ii achkan pahne hai
ko.ii sweater coat alisTar muflar KHuub lapeTe hai
sar par uunii shaal kisii ke ko.ii kambal o.Dhe hai
Garz ki jis ko jo hai mayassar us se jism chhupaa.e hai
kitnaa hii sar se paa tak Dhaa.npe.n aayaa mausam jaa.De kaa
lekin phir bhii thar-thar kaa.npe.n aayaa mausam jaa.De kaa

Murtaza Sahil Tasleemi

Nazm

sabun ki Tikiya

saabun kii Tikiyaa
nannhii sii biTiyaa
paanii me.n chhap-chhap
kartii hai gap-shap
paanii bahaa.e chhii.nTe u.Daa.e
lo jhaag niklaa
munnuu ko dekho
vo bhaag niklaa
jab mu.nh ko dhulaa.e
saabun lagaa.e
munnuu akelaa sab ko nachaa.e
laate.n chalaa.e
dham-dham dhamaa-dham
aa.nsuu bahaa.e
chham-chham chhamaa-chham
munnuu kha.Daa hai
kursii ke uupar
saabun ke Dar se
kartaa hai thar-thar
munnuu ko pak.Do
baazuu me.n jaka.Do
nalke pe laa.o
tub me.n biThaa.o
saabun kii Tikiyaa
sar par lagaa.o
jab jhaag nikle
paanii bahaa.o
saabun kii Tikiyaa sar par kha.Dii hai
munnii sii biTiyaa kitnii ba.Dii hai

Abid Hasan

Nazm

december

sardii khaate daa.nt bajaate aa.e december baabaa
ra.ng-bira.nge uunii kap.De laa.e december baabaa
sub.h-salonii garm chaa.e kii pyaalii le kar dau.Dii
kaisaa thar-thar kaa.np rahe hai.n haa.e december baabaa
in kii daa.Dhii chaa.ndii jaisii dhuup pa.De to chamke
lekin naTkhaT la.Dkii saa chhup jaa.e december baabaa
duur gagan par naT-khaT baadal sabhaa sajaane baiThe
ujle ujle uun ke gole laa.e december baabaa
sub.h suhaanii shaam suhaanii har pal na.ii kahaanii
maze maze ke qisse le kar aa.e december baabaa
kahii.n a.ngeThii kahii.n alaav haath taapte jaa.o
mausam dau.De aur piichhe rah jaa.e december baabaa
diivaaro.n par na.e calendar na.e manaazir ho.nge
dau.Dii dau.Dii aa.ii january bye december baabaa

Abdur Rahim Nashtar

Nazm

sal mahina aur din

aa.nkh jhapakte ek second
ek minute me.n saaTh second
saaTh minute kaa ik ghanTa
ik din me.n chaubiis ghanTa
saat dino.n kaa ik hafta
ek maah hai tiis din kaa
baarah mahiine kaa ik saal
365 din kaa ik saal
january me.n din hai.n iktiis
february me.n hai.n aTThaa.iis
chaar se san taqsiim jo puuraa
february us me.n untiis din kaa
march iktiis april tiis
may iktiis june me.n tiis
may june me.n garmii ziyaada
is me.n sab ko aa.e pasiina
iktiis july iktiis august
barkhaa rut me.n rahnaa mast
tiis september iktiis december
sardii me.n sab kaa.npe.n thar thar
maazii guzraa ab hai haal
ek sadii me.n hai.n sau saal

Abrar Kiratpuri

Nazm

jaDe ki bahaaren

jab maah aghan kaa Dhaltaa ho tab dekh bahaare.n jaa.De kii
aur ha.ns ha.ns puus sambhaltaa ho tab dekh bahaare.n jaa.De kii
din jaldii jaldii chaltaa ho tab dekh bahaare.n jaa.De kii
aur paalaa barf pighaltaa ho tab dekh bahaare.n jaa.De kii
chillaa Gam Tho.nk uchhaltaa ho tab dekh bahaare.n jaa.De kii
tan Thokar maar pichhaa.Daa ho aur dil se hotii ho kushtii sii
thar-thar kaa zor ukhaa.Daa ho bajtii ho sab kii battiisii
ho shor phaphuu huu-huu kaa aur dhuum ho sii-sii sii-sii kii
kalle pe kallaa lag lag kar chaltii ho mu.nh me.n chakkii sii
har daa.nt chane se daltaa ho tab dekh bahaare.n jaa.De kii
har ek makaa.n me.n sardii ne aa baa.ndh diyaa ho ye chakkar
jo har dam kap-kap hotii ho har aan ka.Daaka.D aur thar-thar
paiThii ho sardii rag rag me.n aur barf pighaltaa ho patthar
jha.D-baa.ndh mahaavaT pa.Dtii ho aur tis par lahre.n le le kar
sannaaTaa baav kaa chaltaa ho tab dekh bahaare.n jaa.De kii
har chaar taraf se sardii ho aur sehn khulaa ho koThe kaa
aur tan me.n niimaa shabnam kaa ho jis me.n KHas kaa itr lagaa
chhi.Dkaav hu.aa ho paanii kaa aur KHuub pala.ng bhii ho bhiigaa
haatho.n me.n piyaala sharbat kaa ho aage ik farraash kha.Daa
farraash bhii pa.nkhaa jhaltaa ho tab dekh bahaare.n jaa.De kii
jab aisii sardii ho ai dil tab roz maze kii ghaate.n ho.n
kuchh narm bichhaune maKHmal ke kuchh aish kii lambii raate.n ho.n
mahbuub gale se lipTaa ho aur kuhnii, chuTkii, laate.n ho.n
kuchh bose milte jaate ho.n kuchh miiThii miiThii baate.n ho.n
dil aish-o-tarab me.n paltaa ho tab dekh bahaare.n jaa.De kii
ho farsh bichhaa Gaaliicho.n kaa aur parde chhoTe ho.n aa kar
ik garm a.ngiiThii jaltii ho aur sham.a ho raushan aur tis par
vo dilbar, shoKH, parii, chanchal, hai dhuum machii jis kii ghar ghar
resham kii narm nihaalii par sau naaz-o-adaa se ha.ns ha.ns kar
pahluu ke biich machaltaa ho tab dekh bahaare.n jaa.De kii
tarkiib banii ho majlis kii aur kaafir naachne vaale ho.n
mu.nh un ke chaa.nd ke Tuk.De ho.n tan un ke ruu.ii ke gaale ho.n
poshaake.n naazuk ra.ngo.n kii aur o.Dhe shaal do-shaale ho.n
kuchh naach aur rang kii dhuume.n ho.n aish me.n ham matvaale ho.n
piyaale par pyaala chaltaa ho tab dekh bahaare.n jaa.De kii
har ek makaa.n ho KHalvat kaa aur aish kii sab tayyaarii ho
vo jaan ki jis se jii Gash ho sau naaz se aa jhankaarii ho
dil dekh 'naziir' us kii chhab ko har aan adaa par vaarii ho
sab aish muhayyaa ho aa kar jis jis armaan kii baaii ho
jab sab armaan nikaltaa ho tab dekh bahaare.n jaa.De kii

Nazeer Akbarabadi

Nazm

dhund

aa.nkhe.n yuu.n markuuz hu.ii hai.n jaise mai.n hii mai.n huu.n aur nahii.n hai ko.ii
sachchii baat magar hai itnii
mai.n murdaar samundar huu.n
ehsaas ziyaa.n kaa jho.nkaa hai
aa.nkhe.n bol nahii.n saktii hai.n
aur badan biinaa.ii se mahruum hu.aa hai
lekin mai.n to ab tak KHvaab-zada tasviire.n dekh rahaa huu.n
aur samundar ke parbat par Thahraa ja.ngal
biite giito.n se pur ja.ngal
azalii KHaamoshii ke haale me.n thar-thar kaa.np rahaa hai
sadiyaa.n saaye shoKH fasiile.n aamannaa saddaqnaa
ai-lo! suuraj chaa.nd sitaare dhartii ke siine par utre
merii raahguzar par bikhre
halkii maddham aur musalsal harkat
manzil phuul ka.nval kaa phuul adam ke bahr-e-be-paayaa.n me.n
tanhaa jhuule
baahar par markuuz nigaaho.n se maKHfii lafz-e-mutlaq
tanhaa aur udaas ka.nval par jhilmil jhilmil phuuT bahaa
mauhuum ridaa-e-koh-o-dasht-o-daman
duniyaa-e-man-o-tuu par chhaa.ii
phiikii phiikii ho kar phail ga.ii dhuul banii
apnaa gaa.nv, gorii ke paa.nv tak dhundlaa.e
phailii raushan aur niraalii dhund, aur dhund aur dhund

Iftikhar Jalib

Nazm

bhuli bisri raat

pichhlii raat kaa chaa.nd dikhaa.ii detaa thaa kuchh yuu.n taaro.n me.n
jaise ko.ii jaan buujh kar kuud rahaa ho a.ngaaro.n me.n
dhartii se aakaash talak kirno.n kaa sundar jaal bichhaa thaa
raaj thaa sapno.n kaa sab jag par chhaayaa hu.aa ik sannaaTaa thaa
lahro.n kii mu.nh zor silvaTo.n me.n nadii bas ghol rahii thii
dhiime dhiime madhur suro.n me.n shaayad kuchh bol rahii thii
pe.D kinaare par bhiigii parvaa se kaa.np rahe the thar-thar
rah rah kar ik aadh an-dekhaa panchhii chiiKH uThtaa thaa jin par
duur ik parbat kii uu.nchii choTii par ik chhoTii sii badlii
kyaa jaane puurab kii dhu.ndle manDal me.n kyaa Dhuu.nDh rahii thii
aise me.n ham dono.n ik halkii sii nannhii naav me.n baiThe
jhil-mil jhil-mil karte paanii kii chhaatii par tair rahe the
terii ruKH pe pareshaa.n kaakul khel khel rahii thii narm havaa se
ruup me.n teraa sundar mukh.Daa kahii.n suhaanaa thaa chandraa se
bijlii aisaa nuur aa.nkho.n me.n dikhaa.ii detaa thaa kuchh aise
chalte ho.n do nanhe nanhe diipak kaalii raat me.n jaise
rah rah kar saarii kaa aa.nchal kaa.ndhe par se Dhalak jaataa thaa
rah rah kar tujh se kuchh kahne ko meraa jii lalchaataa thaa
lekin ruk jaatii thii ho.nTo.n par jo baat uThtii thii man me.n
prem kii chiiKH liptaa alhii thii laaj kii an-suljhii uljhan me.n
jhuum rahaa thaa jaagte sapno.n kaa sansaar aa.nkho.n me.n aise
aur kii motii jhuul rahe ho.n phuulo.n ke jhuulo.n me.n jaise
alag alag bechain thaa chappuu haatho.n se chhuuTaa jaataa thaa
aur yuu.n mere sabr kaa pyaalaa rah rah kar chhalkaa jaataa thaa
ekaa ekii tuu ne bharii ik ThanDii saa.ns a.ng.Daa.ii le kar
chup kii thakan se baaz aa.ii thii sar ko rakhaa mere kaa.ndhe par
phir kyaa thaa dil aise machlaa apne aap ko bhuul gayaa mai.n
zor se tujh ko bhe.nch kar apnii baaho.n me.n kuchh bol uThaa mai.n
ik me.n kyaa aakaash ke taare bhii vo raat nahii.n bhuule hai.n
jis ko guzre aaj to lag-bhag chaar mahiine biit ga.e hai.n
ab bhii is kii yaad machaa detii hai ik halchal sii man me.n
aisii raat nahii.n aatii hai palaT kar kyuu.n mere jiivan me.n

Takht Singh

Nazm

hijr

aaj tuu paas nahii.n hai to khulaa hai mujh par
Daar se kuu.nj bichha.D jaa.e to kyo.n martii hai
mausam-e-dard kaa aa.ngan me.n utarnaa kyaa hai
shaaKH se Tuut ke patto.n kaa bikharnaa kyaa hai
chaa.nd kyo.n raat ke pahluu me.n buraa lagtaa hai
sub.h ke saath pe itraatii hu.ii baad-e-nasiim
ek bebaak hasiina sii burii lagtii hai
lafz kyo.n apne mataalib se mukar jaate hai.n
likhnaa chaahe.n bhii to tanhaa.ii likhii jaatii nahii.n
karnaa chaahe.n bhii to ye dard bayaa.n hotaa nahii.n
raat hote hii charaaGo.n ko bujhaa denaa kyo.n
qaid-e-furqat ke asiiro.n ko bhalaa lagtaa hai
hijr kaa lambaa safar kaaTe se kyo.n kaTtaa nahii.n
paa.nv kaT jaate hai.n par raat kaa thar kaTtaa nahii.n
aaj tuu paas nahii.n hai to khulaa hai mujh pe
Daar se kuu.nj bichha.D jaa.e to kyo.n martii hai

Zaheer Mushtaq Rana

Nazm

sardi re sardi

kunDii haTaa ke kohraa jamaa ke
aa.ngan me.n aa ke Thaar ga.ii sardii

Ataur Rahman Tariq

Nazm

do charagh

ek mailii dukaan tiira o taar
ik charaaG aur ek doshiiza
ye bujhii sii hai vo udaas saa hai
dono.n jaa.Do.n kii lambii raato.n me.n
tiirgii aur havaa se la.Dte hai.n
tiirgii uTh rahii hai maidaa.n se
fauj-dar-fauj baadalo.n kii tarah
aur havaa.o.n ke haath hai.n gustaaKH
to.De lete hai.n nanhe shole ko
noche lete hai.n maile aa.nchal ko
la.Dkii rah rah ke jism Dhaa.nptii hai
shola rah rah ke thar tharaataa hai
na.ngii buu.Dhii zamiin kaa.nptii hai

Ali Sardar Jafri

Nazm

sawan

rim-jhim rim-jhim tham tham tham tham buu.ndo.n kii sadaa jab aatii hai
har buu.nd se dil ke taaro.n par ik choT sii pa.Dtii jaatii hai

Nushur Wahidi

Nazm

parindon ki music conference

totaa chhe.De thap-thap tabla mainaa giit sunaa.e
ulluu jab mirda.ng bajaa.e kavvaa shor machaa.e
kuk.Duu.n kuu.n kii taan lagaa ke murGaa gaay KHayaal
qumrii apnii Thumrii gaay murGii deve taal
mor apnii dum ko phailaa kar katthak naach dikhaa.e
totaa chhe.De thap-thap tabla mainaa giit sunaa.e
chi.Diyaa baajii sabhaa me.n naache KHushii se chham chham chham
moTii bataKH cho.nch se Dholak piiTe dham dham dham
bayaa bajaa.e manjere aur bhau.nraa bhajan u.Daa.e
totaa chhe.De thap-thap tabla mainaa giit sunaa.e
bulbul gul kii yaad me.n ro-ro gaa.e diipak raag
mast papiihaa duur se naGmo.n kii bha.Dkaa.e aag
koyal pahan ke paa.el saarii mahfil me.n iThlaa.e
totaa chhe.De tha-thap tabla mainaa giit sunaa.e
ra.ng bira.ngii chi.Diyaa.n ab chhe.De.n aisii qavvaalii
pattaa pattaa buuTaa buuTaa taal me.n deve taalii
phuuphii chiil vajd me.n aa kar uu.nchii taan lagaa.e
totaa chhe.De thap-thap tabla mainaa giit sunaa.e
inglistaan kaa saaras aa kar naache rock ain rol
murGaabii se bole madam english gaanaa bol
dekho dekho kitnii pyaarii mahfil hai ye haa.e
totaa chhe.De thap-thap tabla mainaa giit sunaa.e

Raja Mehdi Ali Khan

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now