Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "zabuun"

Nazm MATCHES FOR "zabuun"

Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

hum

falak se anvaar
koh se chashme
shaaKH se phuul phuuTte hai.n
magar har ik phuul me.n namii bhii hai raushnii bhii
zabaa.n me.n alfaaz
aa.nkh me.n diid
dil me.n ehsaas rakh diye ga.e hai.n
pa lafz ehsaas diid ik duusre kaa paivand ho ga.e hai.n
numuu-o-taKHliiq ke amal baar baar dohraa.e jaa rahe hai.n
jamaal-e-arz-o-samaa kii takmiil ho rahii hai
mohabbat e.ajaaz-e-sarmadii hai

Zia Jalandhari
Nazm

shikast-e-ana

aaj kii raat bahut sard bahut kaalii hai
tiirgii aise lipaTtii hai havaa-e-Gam se
apne bichh.De hu.e saajan se milii hai jaise
mish.al-e-KHvaab kuchh is taur bujhii hai jaise
dard ne jaagtii aa.nkho.n kii chamak khaa lii hai
shauq kaa naam na KHvaahish kaa nishaa.n hai ko.ii
barf kii sil ne mire dil kii jagah paa lii hai
ab dhundalke bhii nahii.n ziinat-e-chashm-e-be-KHvaab
aas kaa ruup-mahl dast-e-tahii hai jaise
bahr-e-imkaan pe kaa.ii sii jamii hai jaise
aise lagtaa hai ki jaise miraa ma.amuura-e-jaa.n
kisii sailaab-zada ghar kii zabuu.n-haalii hai
na ko.ii dost na taaraa ki jise batlaa.uu.n
is tarah TuuT ke bikhraa hai anaa kaa shiisha
meraa pindaar mire dil ke liye gaalii hai
nabz taaro.n kii tarah Duub rahii hai jaise!
Gam kii pinhaa.ii samundar se ba.Dii hai jaise!
aa.nkh sahraa.o.n ke daaman kii tarah KHaalii hai
vahshat-e-jaa.n kii taraf dekh ke yuu.n lagtaa hai
maut is tarah ke jiine se bhalii hai jaise
tiirgii chhaTne lagii, vaqt rukegaa kyuu.n-kar
sub.h-e-KHurshiid liye dar pe kha.Dii hai jaise
daaG-e-rusvaa.ii chhupaane se nahii.n chhup saktaa
ye to yuu.n hai ki jabii.n bol rahii hai jaise!

Amjad Islam Amjad
Nazm

mira-ji sahib

ai yaar-e-Gayaab 'majiid-amjad'
KHaamosh shikaar-e-rashk-o-hasad
be-tash.hiirii ke said-e-zabuu.n
kab jhang me.n aa kar tujh se kahuu.n
le vo sach vaapas aayaa hai
jo jis kaa haq ho ek na ek din us ne puuraa paayaa hai

Jameeluddin Aali
Nazm

ilm aur jahaalat

vo bashar jo pa.Dh ke bhii kahtaa ho yuu.n
ban ke taalib aur kuchh haasil karuu.n
ko.ii shak us kii faziilat me.n nahii.n
us kaa rutba hai farishto.n se fuzuu.n
vo bashar kuchh bhii na aataa ho jise
lekin us ko shauq ho aalim banuu.n
apnii be-ilmii kaa us ko ilm hai
naa-munaasib hai use jaahil ginuu.n
vo bashar jo ho niraa ahmaq magar
KHud samajhtaa ho ki daanish-mand huu.n
maut hai us kii himaaqat kaa ilaaj
vo rahegaa umr bhar KHvaar-o-zabuu.n
har bashar ai 'faiz' ye koshish kare
jis tarah bhii ho jahaalat se bachuu.n

Faiz Ludhianvi
Nazm

tere baghair

aa ki dil kii chaa.ndnii ruu-posh hai tere baGair
aa ki saaz-e-zindagii KHaamosh hai tere baGair
iid ho tum ko mubaarak haa.n magar mere liye
zindagii kyaa hai vabaal-e-dosh hai tere baGair
aa ki zahar ab baada-e-sar-josh hai tere baGair
hai KHizaa.n-aaluuda sub.h-e-gulsitaa.n tere baGair
KHanda-e-gul hai tabii.at par garaa.n tere baGair
jalva-e-sarv-o-saman me.n ab kahaa.n vo dilkashii
Garq hasrat hai dil-e-naa-shaadmaa.n tere baGair
aa ki mahruum-e-tarab huu.n jaan-e-jaa.n tere baGair
ro rahe hai.n Guncha-o-barg-o-shajar tere baGair
baaG kii saarii fazaa hai nauhagar tere baGair
ik basiit ehsaas-e-mahruumii mirii har saa.ns me.n
kar rahaa hai zindagii ko muKHtasar tere baGair
aa ki ab taariik hai saaraa jahaa.n tere baGair
dil ko aa.e kyaa mohabbat me.n sukuu.n tere baGair
ho ga.e aql-o-KHirad nazr-e-junuu.n tere baGair
dil hai aur aaTho.n-pahar ik vahshat-e-be-iKHtiyaar
aa.nkh hai aur baarish-e-sailaab-e-KHuu.n tere baGair
aa ki rusvaa hai miraa haal-e-zabuu.n tere baGair

Jauhar Nizami
Nazm

ai zamistan ki hawa tez na chal

ai zamistaa.n kii hu.aa tez na chal
is qadar tez na ho mauj-e-subuk-KHez kii rau
kahii.n ashjaar ke KHemo.n kii tanaabe.n kaT jaa.e.n
zard patte hai.n abhii gulshan-e-hastii kaa si.nghaar
kah rahii hai ye abhii ahd-e-guzashta kii bahaar
ra.ng-rafta huu.n magar aaj bhii tasviir me.n huu.n
murtasim hai.n mirii shaaKHo.n pe mirii yaad ke chaa.nd
mai.n hanuuz apne KHayaalaat kii zanjiir me.n huu.n
abhii patto.n pe chamak uThtaa hai ra.ngo.n kaa Gubaar
abhii shaaKHo.n me.n lahak jaatii hai bulbul kii pukaar
barg-riizaa.n se kaho shahar se baahar Thahre
shahar ke baaG se bustaan-e-dabistaa.n se pare
barg-e-larzaa.n me.n ta.Daptaa hai abhii zauq-e-numuu
par-e-taa.uus me.n hai raqs kii KHvaahish ab bhii
abhii kartaa hai chaman chaak-e-garebaa.n ko rafuu
yuu.n to qaanuun hai.n fitrat ke aTal
ai zamistaa.n kii havaa tez na chal
sa.ii-e-malbuus me.n hai.n kitne nago.n baKHt-e-zabuu.n
zindagii jin ke liye sahn-e-saman-posh nahii.n
duur ke des se aa.ii hu.ii utran ke liye
mard-o-zan kuucha-o-baazaar me.n rusvaa hai.n abhii
jaise ho qahr-e-mujassam tirii yaKH-basta jabii.n
terii aahaT me.n ho jaise kisii dahshat kaa payaam
terii dastak se larazte hai.n makaa.n aur makii.n
vo makaa.n jin ke dar-o-baam dar-o-baam nahii.n
vo makii.n jin ke liye ishrat-e-ayyaam nahii.n
jin ke lahjo.n me.n nahii.n lazzat-e-guftaar kaa ra.ng
jin kii aavaaz me.n hai.n tiira-nasiibii ke azaab
jin se tahziib liyaa kartii hai jiine kaa KHiraaj
jin kii har saa.ns hai andesha-e-fardaa kaa nisaab
is qadar tund na ho dekh sambhal
ai zamistaa.n kii hu.aa tez na chal

Aslam Ansari
Nazm

ba-faiz-e-qaed-e-azam

ham vo hai.n jin kii rivaayaat-e-salaf ke aage
cha.Dhte suuraj the nago.n
qaisar-o-kisraa the zubuu.n
gardish-e-vaqt se ik aisaa zamaana aayaa
ham niguu.n-saar-o-zabuu.n-haal-o-paraaganda hu.e

Nasir Zaidi
Nazm

dars-e-mohabbat

dost milaa thaa tujh ko kaisaa haif itnaa bhii yaad nahii.n
jaan fidaa kartaa thaa jis par dil me.n us kii yaad nahii.n
gardish-e-dauraa.n ne jab us ko aah shikasta-haal kiyaa
dekh kar us ke haal-e-zabuu.n ko tuu ne kuchh na malaal kiyaa
kaun shikasta-haal kahaa.n hai ye bhii dhyaan aayaa na tujhe
aah tasavvur ne aise mohsin ke ta.Dpaayaa na tujhe
paas thaa apne qaul kaa jis ko tuu ne kuchh us kaa paas kiyaa
aamad-o-raft-e-deriina kaa bhuul ke bhii ehsaas kiyaa
us ke dard se vaaqif ho kar tuu ne KHabar kyaa lii us kii
qarz mohabbat jaan ke dil se kyaa ko.ii KHidmat kii us kii
dil tere us dost kaa naahaq vaqf-e-sahar-e-lisaanii thaa
merii samajh me.n ab aayaa vo jam-o-KHarch zabaanii thaa
naadaa.n insaan terii daulat tere saath na jaa.egii
lailaa-e-matlab duur rahegii tere paas na aa.egii
hasr faqat tujh hii par kiyaa hai tuu hii ik zar-dost nahii.n
dost bahut milte hai.n lekin un me.n aksar dost nahii.n
dost nahii.n jo naam kii KHaatir apne dost ke kaam aa.e
dost vo hai logo.n kii zabaa.n par jis kaa misaalan naam aa.e

Ali Manzoor Hyderabadi
Nazm

main shair hun

mai.n shaa.ir huu.n mujhe ahl-e-hunar fankaar kahte hai.n
mujhe ramz-aashnaa-e-nik.hat-e-gulzaar kahte hai.n
KHuluus-o-uns kaa mujh ko alam-bardaar kahte hai.n
jo baaqii hai.n mujhe ik banda-e-bekaar kahte hai.n
zabuu.n-haalii kii zad me.n hai bayaa.n meraa zabaa.n merii
nahii.n minnat-kash-e-taab-e-shuniidan daastaan merii

Asad Jafri
Nazm

mazdur

muntashir ho ke zamaane me.n hu.aa KHaar-o-zabuu.n
ho munazzam to qavii tujh saa zamaane me.n nahii.n
an-ginat haath tire jab bhii uThe hai.n mil kar
tere qadmo.n pe jhukii aa ke chaTaano.n kii jabii.n

Daud Ghazi
Nazm

amar jot

a.ndheraa har taraf chhaayaa hu.aa hai
a.ndheraa hii azal hai aur a.ndheraa hii abad kii jot hai shaayad
isii taariik chaadar kii taho.n me.n
adam ke KHvaab se taariiKH jaagii
isii taariik chaadar me.n tamaddun muskuraayaa khilkhilaayaa jagmagaayaa
yahii taariik chaadar KHaavar-e-tahziib kaa mashriq banii aaKHir
yahii taariik chaadar o.Dh kar haivaaniyat ne ruup dhaaran kar liye laakho.n
isii taariik chaadar me.n simaT kar gum hu.ii hastii
yahii mashriq yahii maGrib
a.ndheraa hii azal hai aur a.ndheraa hii abad kii jot hai shaayad
a.ndhere kii isii diivaar-e-chii.n ko
kabhii 'suqraat' kii hikmat ne Dhaayaa
kabhii iisaa ke KHuun-e-garm-o-taaza ne kiyaa rangii.n
kabhii gautam kii mausiiqii ke saayo.n ne ise gheraa
kabhii zarb-e-mohammad ne kiyaa Tuk.De
husain ibn-e-alii ke KHuun-e-naahaq ke thape.Do.n se kabhii kaa.npii kabhii larzii
fazaa me.n ek chingaarii sii ta.Dpii
aur us ke baad us ke baad
chhaa.ii phir vahii manhuus taariikii vahii manhuus taariikii
a.ndheraa hii azal hai aur a.ndheraa hii abad kii jot hai shaayad
a.ndhere kii jabiin-e-aahanii se
ye kaisii jot phuuTii muskuraa.ii jagmagaa.ii
ye kis kii muskuraahaT se banii insaaniyat gulshan
ye kis ne hind kii taariik duniyaa ko kiyaa raushan
dukhii duniyaa sitaaro.n se banii dul.han
zamiir-e-zindagii me.n karvaTe.n lene lagii ik mustaqil dha.Dkan
varaq taariiKH ne tezii se ulTe
taGayyur le ke saaz-o-barg-e-ta.amiir-e-jahaa.n aaya
banii aadam kii duniyaa ko sajaane
dil-e-suqraat-o-iisaa jhuum uTThe
jabiin-e-budh se niklii ik na.ii jot
a.ndhere hii se phuuTaa ik nayaa saut
a.ndheraa apnii hastii kho rahaa hai
a.ndheraa nuur me.n hal ho rahaa hai
na.e diipak kii jotii muskuraa.ii
jahaa.n ko kar diyaa raushan
jahaa.n ko maanavtaa ko zindagii ko qalb-o-jaa.n ko kar diyaa raushan
siyah-KHaane me.n apnaa jaal le aa.e na.e KHaake
na.ii duniyaa banaane kii tamanna ke na.e KHaake
ki phir zaalim a.ndheraa jang-juu haasid a.ndheraa
liye taariikiyo.n ke jaal aaya
nigaar-e-amn ke diipak pe TuuTaa
kabhii kirno.n kabhii diipak ko luuTaa
zamii.n se aasmaa.n tak mauj-e-KHuu.n hai
abhii tak aadmii said-e-zabuu.n hai
a.ndheraa hii azal hai aur a.ndheraa hii abad kii jot hai shaayad
agar suqraat kaa diipak hai raushan
siraaj-e-ibn-e-mariyam gar abad tak bujh nahii.n saktaa
ko.ii jho.nkaa agar sham.a-e-shahiid-e-karbalaa ko chhuu nahii.n saktaa
to ai taariik duniyaa to ai maayuus insaa.n
bujhaa saktii nahii.n hai ko.ii aa.ndhii
yu.nhii raushan rahegii sham.a-e-gaa.ndhii

Zakiya Sultana Nayar
Nazm

dawat-e-nazar

mai.n hii mai.n huu.n ko.ii hushyaar kahe jaataa hai
vo hii vo hai.n ko.ii sarshaar kahe jaataa hai
hama-uust us kii KHudii ke liye markaz ai dost
us kaa naadaan anaa bhii hai mataa-e-hama-uust
hosh-afzaa hai mujhe GalGala-e-hushyaarii
kaash samjhe use tuu bhii jaras-e-bedaarii
inhisaar-e-mann-o-tuu Thiik nahii.n sab samjhe.n
vaqt hai KHud ko samajhne kaa yahii ab samjhe.n
KHud-shanaasii se hai ummiid ki ban jaa.egaa kaam
varna is haal-e-zabuu.n kaa hai tabaahii anjaam
na basaarat na basiirat na aziimat ham me.n
kaam karne kii nahii.n naam ko himmat ham me.n
ik KHudii thii so kiyaa us ko bhii Gaflat ke sipurd
zindagii kii hu.ii ye lahar bhii yuu.n dariyaa burd
is taraf dekh fariisaan-e-aruupaa kii numuud
aaj bil-fe.al jo saabit hai vo un kaa hai vajuud
raaz-e-taqdiir khulaa un ke amal se un par
apne dar pai hai faqat be-amalii kaa chakkar
husn-kaarii kaa mazaaq un se hu.aa aa.iina
na.ii duniyaa kaa ye manzar hai nayaa aa.iina
aisii vahdat pe na ho kis liye kasrat shaidaa
ek manzil se hai.n haftaa-o-manaazil paidaa
un kii duniyaa hai na.ii apnii puraanii duniyaa
ban ga.ii apne liye raam kahaanii duniyaa
aur baato.n me.n to kyaa KHaak milegii jiddat
jab zabaa.n me.n bhii gavaaraa nahii.n ko.ii jiddat
chashm-ba-raah nazar aate hai.n vo naqd-e-nigaar
jin kii fitrat ko upaj se nahii.n bilkul sarokaar
na.ii tarkiib agar un ko kahii.n mil jaa.e
barham itne ho.n ki paamaal zamii.n hil jaa.e
phir ye hai.n aur adab-soz mudaaraate.n hai.n
kyaa zamaane me.n panapne kii yahii baate.n hai.n

Ali Manzoor Hyderabadi
Nazm

jawaz

aaj har chand hai.n ba-haal-e-zabuu.n
kaun jaane ki kal magar kyaa ho

Daud Ghazi
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

bol

bol ki lab aazaad hai.n tere
bol zabaa.n ab tak terii hai
teraa sutvaa.n jism hai teraa
bol ki jaa.n ab tak terii hai
dekh ki aahan-gar kii dukaa.n me.n
tund hai.n sho.ale surKH hai aahan
khulne lage quflo.n ke dahaane
phailaa har ik zanjiir kaa daaman
bol ye tho.Daa vaqt bahut hai
jism o zabaa.n kii maut se pahle
bol ki sach zinda hai ab tak
bol jo kuchh kahnaa hai kah le

Faiz Ahmad Faiz
Nazm

zindagi se Darte ho

zindagii se Darte ho!
zindagii to tum bhii ho zindagii to ham bhii hai.n!
zindagii se Darte ho?
aadmii se Darte ho?
aadmii to tum bhii ho aadmii to ham bhii hai.n
aadmii zabaa.n bhii hai aadmii bayaa.n bhii hai
us se tum nahii.n Darte!
harf aur ma.anii ke rishta-haa-e-aahan se aadmii hai vaabasta
aadmii ke daaman se zindagii hai vaabasta
us se tum nahii.n Darte
''an-kahii'' se Darte ho
jo abhii nahii.n aa.ii us gha.Dii se Darte ho
us gha.Dii kii aamad kii aagahii se Darte ho

Noon Meem Rashid
Nazm

daraKHt-e-zard

nahii.n ma.aluum 'zayuun' ab tumhaarii umr kyaa hogii
yahii hai dil kaa mazmuun ab tumhaarii umr kyaa hogii
hamaare darmiyaa.n ab ek bejaa-tar zamaana hai
lab-e-tishna pe ik zahr-e-haqiiqat kaa fasaana hai
ajab fursat mayassar aa.ii hai ''dil jaan rishte'' ko
na dil ko aazmaanaa hai na jaa.n ko aazmaanaa hai
kaliid-e-kisht-zaar-e-KHvaab bhii gum ho ga.ii aaKHir
kahaa.n ab jaada-e-KHurram me.n sar-sabzaana jaanaa hai
kahuu.n to kyaa kahuu.n meraa ye zaKHm-e-jaavedaana hai
vahii dil kii haqiiqat jo kabhii jaa.n thii vo ab aaKHir
fasaana dar fasaana dar fasaana dar fasaana hai
hamaaraa baahamii rishta jo haasil-tar thaa rishto.n kaa
hamaaraa taur-e-be-zaarii bhii kitnaa vaalihaana hai
kisii kaa naam likkhaa hai mirii saarii bayaazo.n par
mai.n himmat kar rahaa huu.n ya.anii ab us ko miTaanaa hai

Jaun Eliya
Nazm

muhasara

miraa qalam to amaanat hai mere logo.n kii
miraa qalam to adaalat mire zamiir kii hai
isii liye to jo likkhaa tapaak-e-jaa.n se likhaa
jabhii to loch kamaa.n kaa zabaan tiir kii hai

Ahmad Faraz
Nazm

KHuda ka sawal

haqiiqat hu.ii jaise mujh par ayaa.n
qalam ban gayaa hai KHudaa kii zabaa.n

Abrar Ahmad Kashif
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now