Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "zamzam"

Nazm MATCHES FOR "zamzam"

Nazm

lamhon ki parastar

mai.n ne chaahaa thaa use ruuh kii raahat ke liye
aaj vo jaan kaa aazaar banii baiThii hai
merii aa.ankho.n ne jise phuul se naazuk samjhaa
ab vo chaltii hu.ii talvaar banii baiThii hai
ham-safar ban ke jise naaz thaa hamraahii par
rahzano.n kii vo taraf-daar banii baiThii hai
kisii afsaane kaa kirdaar banii baiThii hai
us kii ma.asuumiyat-e-dil pe bharosa thaa mujhe
azm-e-siitaa kii qasam ismat-e-maryam kii qasam
yaad hai.n us ke vo ha.nste hu.e aa.nsuu mujh ko
KHanda-e-gul kii qasam girya-e-shabnam kii qasam
us ne jo kuchh bhii kahaa mai.n ne vahii maan liyaa
hukm-e-havvaa kii qasam jazba-e-aadam kii qasam
paak thii ruuh mirii chashma-e-zamzam kii qasam
mai.n ne chaahaa thaa use dil me.n chhupaa luu.n aise
jism me.n jaise lahuu siip me.n jaise motii
umr bhar mai.n na jhapaktaa kabhii apnii aa.nhke.n
mere zaanuu.n pe vo sar rakh ke hamesha sotii
sham-e-yak-shab to samajhtaa hai use ek jahaa.n
kaash ho jaatii vo mere liye jiivan-jotii
dar-ba-dar us kii tamaazat na pareshaa.n hotii
mai.n use le ke bahut duur nikal jaa.uu.n magar
vo mirii raah me.n diivaar banii baiThii hai
zindagii bhar kii parastish use manzuur nahii.n
vo to lamho.n kii parastaar banii baiThii hai
mai.n ne chaahaa thaa use ruuh kii raahat ke liye
vo magar jaan kaa aazaar banii baiThii hai
kisii afsaane kaa kirdaar banii baiThii hai

Qateel Shifai
Nazm

dar-guzar

kaun vo log the ab yaad nahii.n aataa hai
phe.nk aa.e the mujhe yuusuf-e-kan.aa.n kii tarah
khii.nch laa.e the mujhe shahr ke baazaaro.n me.n
sab ko dikhlaate the aa.iina-e-hairaa.n kii tarah
log kahte hai.n ki ko.ii bhii KHariidaar na thaa
kaun vo log the ab yaad nahii.n aataa hai
chho.D aa.e the sulagte hu.e maidaa.n me.n mujhe
e.Diyaa.n rag.Dii.n magar chashma-e-zamzam na milaa
kaise tanhaa kiyaa kis haal-e-pareshaa.n me.n mujhe
kaun vo log the ab yaad nahii.n aataa hai

Shaz Tamkanat
Nazm

rishte ki sachchai

ham jaante hai.n
ye duniyaa hame.n jiine nahii.n degii
faasle kii diivaare.n
ham dono.n ke darmiyaan
ba.Dhtii rahe.ngii
ye kaisaa rishta hai
ham dono.n apne apne ehsaasaat se vaaqif hai.n
magar ye rasm-o-rivaaj
aadmii se aadmii kii tafriiq ke...
ham dono.n mahz apnii aa.nkho.n ke alaava
ek duusre ko chhuu nahii.n sakte
aab-e-zam-zam yaa ga.ngaa-jal
ek ra.ng, ek KHumaar aur ek ehsaas
kyuu.n na ham dono.n
ek aafaaqii rishte se
munsalik ho jaa.e.n
aise rishte se
ki jahaa.n talvaare.n jhuk jaatii hai.n
aur a.ngaare ban jaate hai.n phuul
aur niilaa aasmaan muskuraa uThtaa hai
aa.o aaj
tum merii kalaa.ii me.n ye raakhii baa.ndh do
ham dono.n apnii apnii
anokhii chaahat ke havaale se
ban jaa.e.n janm janm ke saathii
aTuuT ho jaa.e.nge jab
phir shaayad zamaana u.nglii nahii.n uThaa sakegaa!!

Ehsan Saqib
Nazm

kutte ki maut

bho.nknaa chaahtaa huu.n
apne andar ke kutte pe mai.n
zor se bhuu.nknaa chaahtaa huu.n
magar ye bhii mumkin nahii.n
bhuu.nk paanaa to duur
gale se mire ab to do ghuu.nT paanii utarnaa bhii mumkin nahii.n
is ko kahte hai.n kutte kii maut
aab-e-zam-zam
glucose kii botalo.n se cha.Dhaate hu.e
nabz bhii ha.ns rahii hai

Shariq Kaifi
Nazm

mohabbat kya hai

mere nazdiik mohabbat ilhaamii shai hai
ye aasmaano.n se utartii hai
dil kii paak shaffaaf zamiin par
ye mohabbat azaan-e-fajr ke baad utartii hu.ii paak sahar hai
ye itnii paak hai jitnaa jis kaa taKHayyul paak hai
mohabbat is qadar paakiiza hotii hai jitnaa jis kaa KHuun paak hotaa hai
mohabbat us ko kahte hai.n jab roza-daar iftaar ke vaqt
ik paanii kaa gilaas saamne rakhe us aavaaz kaa intizaar kartaa hai ki kab hukm ho
us aavaaz kaa intizaar mohabbat hai
mohabbat vo manzil hai jis ke raaste pe chalne vaale dil aab-e-zamzam se dhule hote hai.n
mohabbat rizq hai un aa.nkho.n kaa jo mahbuub kaa diidaar baa-vazuu ho kar kartii hai.n
un logo.n ke chahaar-jaanib bahaar-e-mohabbat ke gulaab khilte hai.n jin pe KHizaa.n nahii.n aatii
mohabbat kaa gulshan
izzat kii KHushbuu se mahaktaa hai
ye mohabbat vo jazba hai jis ke tahat garmii kii shiddat pyaas kii hiddat me.n
chhaa.nv kii jagah par parindo.n ko paanii rakhaa jaa.e
ye mohabbat vo manzil hai jis pe pahu.nchne ke liye ik pyaase kutte ko paanii pilaanaa pa.Dtaa hai
mohabbat naam zabaan pe aane se pahle soch ko baa-vazuu ho jaanaa chaahiye
aur jinho.n ne naam-e-mohabbat ko utran kii tarah pahnaa hai
jinho.n ne mohabbat ko hii dhoka diyaa hai
un pe phir mohabbat azaab ban ke utartii hai
mohabbat ruuTh jaatii hai
kyuu.nki ye izzat hai
aisii izzat jo mohabbat se pahle dil kii sarzamiin pe utre
aur izzate.n buland rahe.n hamesha mohabbato.n se
jahaa.n izzat kii sar-bulandii rahegii vahaa.n mohabbat hamesha zinda rahegii
aur jin logo.n ne
mohabbat ko kaarobaar banaayaa hai
vo log mohabbat kii miim se naa-balad hai.n
un ke vaaste mohabbat naam ke chand din hote hai.n
phir bahaane aur apnii Galiiz fitrat ke pesh-e-nazar
kabhii ik dar kabhii duusraa dar
kabhii yahaa.n jhukaa kabhii vahaa.n jhukaa
are suno
mohabbat ke naam pe ta'alluqaat ko libaas se jald badalne vaale insaan
tauhiin mat karo mohabbat kii
is ilhaamii shai ko is paak jazbe ko paak rahne do
aur yaad rakho tauhiin-e-mohabbat ke murtakib
tum se to ab nafrat bhii mere shaayaan-e-shaan nahii.n

Omainuz Zahra Sayyad
Nazm

tariKH ka nauha

shaaho.n ko KHabar nahii.n ho sakii
ki bulldozero.n se haTaa.ii ga.ii mayyato.n kii Dher me.n
kis kis ke ehraam par lahuu ne aayate.n raqam kii.n
haajiyo.n kii jam.a puu.njii se munaafe.a baTortii hukuumate.n
aab-e-zam-zam ke chashme aur petrol ke ku.e.n me.n
tamiiz karnaa bhuul jaa.e.n
to KHuun kii lakiir haram se nikal kar minaa tak pahu.nch jaatii hai
shaahii farmaan ko ibaadat kaa darja dene vaale
muftiyo.n ne ye kabhii nahii.n dekhaa
ki taariiKH ka.ii baar taKHt ko taKHta bante hu.e dekh chukii hai
shaitaan ko patthar maartaa hu.aa hujuum
apne aap ko rau.nd kar KHaak me.n mil jaataa hai
aur mansuur anal-haq kah kar har daur me.n amar hotaa rahaa
KHudaa
nadaamat ke aa.nsuu rone vaalo.n ko
mu.aaf karne me.n der nahii.n kartaa
aur shaitaan intiqaam lenaa nahii.n bhuultaa
lekin ham bhuul jaate hai.n
ki mehraab masjid ke ho.n yaa maatho.n ke
nekiyo.n aur badiyo.n kaa hisaab sirf KHudaa ke paas hai
gin gin kar patthar maarne vaale
un ka.nkaro.n kii gintii bhuul chuke hai.n
jo abaabiilo.n ne haathiyo.n par giraa.e the

Maqsood Wafa
Nazm

qurb-e-ilahi

KHvaahishe.n puurii ho.n
saarii pyaase.n bujhe.n
aab-e-zam-zam kuchh aisaa pilaa de ise

Adeel Zaidi
Nazm

dil ki aaKHiri tah mein

be-kalii na be-zaarii
nai ko.ii udaasii hai
dekhne ko lahje me.n
KHafagiyaa.n nahii.n miltii.n
ek chup sii hai lekin
guftuguu ke zamzam ko
rok rok detii hai
har adaa-e-be-parvaa
thaam thaam letii hai
bolne se pahle jo
sochne ko kahtii hai
har suKHan mukammal hai
phir bhii harf kahte hai.n
baat naa-mukammal hai
qurbato.n kii baarish me.n
ik gurez kaa lamha
ab bhii dhul nahii.n paayaa
haath se tadabbur ke
zehn-o-dil kii uljhan kaa
ik KHafiif saa resham
ab bhii khul nahii.n paayaa
zaKHm be yaqiinii kaa
mundamil hu.aa lekin
rog kii ikaa.ii to
ab bhii saa.ns letii hai
vaqt ke saliiqe ne
dukh kii ek silvaT par
ik dhulii hu.ii muskaan
khol kar bichhaa dii hai
aas-paas rah kar bhii
sub.h-o-shaam karne me.n
is qadar na kho jaanaa
be-KHabar na ho jaanaa
dil kii aaKHirii tah me.n
ko.ii baat rahtii hai

Saima Esma
Nazm

pota

daadii kaa pandaan Thikaane lagaa diyaa
phir aaj is shariir ne zamzam giraa diyaa

Ataur Rahman Tariq
Nazm

mohabbat naghmagi jaisi

mohabbat chhaa.nv jaisii hai
mohabbat maa.o.n jaisii hai
mohabbat ism-e-aazam hai
mohabbat hii to zamzam hai

Dua Ali
Nazm

nili gard ka zamzam

mai.n taKHayyul ke tashaddud kaa shikaar
dekhtaa huu.n aasmaa.n se saaya saaya chiith.De girte hu.e
sun rahaa huu.n
fa.Dfa.Daatii dhuup kii piilii sadaa
dard kii buu.Dhii chu.Dele.n
aa.nkh ke sahraa me.n apnii retlii aavaaz me.n sab ko pukaare.n
aa.o aa.o
mai.n akelaa apne sannaaTe me.n gird-o-pesh ke aashob me.n khoyaa hu.aa
chal rahaa huu.n
raaste ke sa.ng-reze aa.nkh se chunte hu.e
taaki pathraa.ii hu.ii mar mar kii sa.Dke.n rafta rafta mere paa.nv chaaT le.n
chal rahaa huu.n
jaane kis jaanib mujhe jaanaa hai kyuu.n jaanaa hai
shaayad faaslo.n kii intihaa uftaadgii hai
aur shaayad manzile.n is vaahime kii maut kii manzar hai.n
jo taaza lahuu ke aa.iine kaa aks hai
aur kyaa maaluum ye bhii vaahima ho
kaash ko.ii lafz apnii band muTThii khol de
aur kaaGaz par bichhii satro.n kaa jaal
mujh pe chaaro.n samt se aa kar gire
kyaa KHabar aazaad ho jaa.uu.n vadaq riit ke kohraam se
chiiKHtii chiile.n zamii.n se saaya saaya chiitha.Do.n ko le u.De.n
aur mai.n miTTii kii na.ngii god me.n leTe hu.e
aasmaa.n ko apne uupar o.Dh luu.n

Aftab Iqbal Shamim
Nazm

maya ye sansar

allaah-huu kaa na.ara ho yaa harii harii kii taan
dil hii teraa paak nahii.n to kyaa simran kyaa dhyaan
zamzam me.n tuu Gusl kare yaa gangaa me.n ashnaan
laa-haasil sab sajde tere puujaa sab bekaar
maayaa ye sansaar re baabaa maayaa ye sansaar

Amjad Najmi
Nazm

qurb-e-ilahi

KHvaahishe.n puurii ho.n
saarii pyaase.n bujhe.n
aab-e-zam-zam kuchh aisaa pilaa de ise

adil zaidi
Nazm

dushmanon ke darmiyan sulh

barg-e-aavaara-sadaa aa.e hai.n
ko.ii aavaaza-e-paa laa.e hai.n
tere paiGaam-rasaa.n hai.n shaayad
aur paimaan-e-vafaa laa.e hai.n
guftuguu narm hai lahja dhiimaa
ab ke andaaz judaa laa.e hai.n
ik nadaamat bhii hai pachhtaavaa bhii
KHiffar-e-jurm-o-jafaa laa.e hai.n
aa.nkh me.n ashk pashemaanii ke
ho.nT par harf-e-du.aa laa.e hai.n
saare saamaan rafuugarii ke
jeb o daaman me.n uThaa laa.e hai.n
marham-e-zaKHm ke ambaar ke saath
paara-e-KHaak-e-shifaa laa.e hai.n
shaaKH-e-zaituun bhii ammaame bhii hai.n
aur abaa.e.n bhii silaa laa.e hai.n
hajr-e-asvad ne chhu.aa hai jis ko
ek aisii bhii ridaa laa.e hai.n
kuchh madiine kii khujuuro.n ke tabaq
kaasa-e-sar pe sajaa laa.e hai.n
ek mashkiiza-e-aab-e-zamzam
pusht-e-naazuk pe uThaa laa.e hai.n
agle pichhle sabhii maqtuulo.n kaa
goyaa ki KHuun-bahaa laa.e hai.n

Ejaz Gul
Nazm

abhi kuchh der ruk jate

abhii kuchh der ruk jaate
abhii kuchh kaam baaqii the
abhii tasviir ko kuchh aur rango.n kii zaruurat thii
abhii kaa.nTo.n bhare rasto.n ko phuulo.n kii zaruurat thii
abhii kuchh naqsh aise the jo yaksar naa-mukammal the
jahaa.n baaGo.n kaa sochaa thaa vahaa.n be-kaar jangal the
bahut se KHvaab the jin kii abhii taa'biir baaqii thii
abhii is shahr-e-be-ehsaas kii taa'miir baaqii thii
jo sach puuchho abhii insaaf kii tahriir baaqii thii
abhii kuchh zaalimo.n ke zulm kii taa'ziir baaqii thii
abhii kuchh masjido.n ke gumbado.n ko sabz honaa thaa
jo firqa-saaz mimbar the unhe.n zamzam se dhonaa thaa
abhii to ham ne nafrat ke sabhii maa'bad jalaane the
abhii ham ne mohabbat ke ka.ii parcham banaane the
abhii to qaa.id-o-iqbaal ke bhii din manaane the
abhii to ham ne apne saare baam-o-dar sajaane the
abhii to mausamo.n ne bhii hame.n naGme sunaane the
abhii rohii me.n baarish ne ka.ii chashme bahaane the
abhii sahraa-nashii.n bachcho.n kii KHushiyaa.n raaste me.n thii.n
abhii to ham ne cholistaan me.n jhuule lagaane the
abhii kuchh der ruk jaate
abhii kuchh kaam baaqii the
abhii ham ne dar-o-diivaar kii haalat badalnii thii
abhii patjha.D-zada ashjaar kii suurat badalnii thii
abhii jo hukm dete the unhe.n mahkuum honaa thaa
abhii jo zulm dhaate the unhe.n mazluum honaa thaa
abhii kuchh badshaho.n kii baadshaahii KHatm honii thii
abhii un bastiyo.n kii be-nigaahii KHatm honii thii
abhii to shahr me.n mere ka.ii taariik raste the
abhii sahme hu.e school ke bachcho.n ke baste the
abhii to amn kii ham ne ka.ii sham'e.n jalaanii thii.n
abhii kuchh der ruk jaate
ki jab aisaa a.ndheraa ho
diye ko alvidaa' kahnaa
bahut takliif detaa hai

Jabbar Wasif
Nazm

humne girya kiya

ham ne girya kiyaa
us jagah jis jagah jashn darkaar thaa
ham ne girya kiyaa
us jagah
jis jagah e.Diyaa.n ham raga.Dte
to zamzam ubalne ko tayyaar thaa
ham ne girya kiyaa
sang-e-hasrat pe sar ko paTakte hu.e ek ehsaas par
naa-tavaa.n pyaas par
pyaas jo us gha.Dii mar ga.ii
us ne jab
mere suukhe labo.n par
samundar kii vus'at liye
apne lab rakh diye
der tak apne sab zaKHm ham
jism kii KHaak me.n saath bote rahe
yuu.nhii lipTe hu.e
jaagtii nii.nd sote rahe
ek duuje kii aa.nkho.n se rote rahe
ham ne girya kiyaa

Ameer Imam
Nazm

wajd

tere qur.aan me.n bahtaa hu.aa sargam maKHfii
aur zamzam ke liye KHaak raga.Dtii e.Dii
duur mandir me.n kaliisaa.o.n me.n bajtii ghanTii
ghuumtaa jaa.e falak aur ye zamii.n kii chakkii
aur is sab me.n mujhe ghar kaa banaa kar qaidii
nuur karte ho ataa mujh ko banaa kar miTTii

Humaira Gul Tishna
Nazm

KHwab se tabir tak

mai.n us insaan se
vaaqif huu.n
jis ne
madiine kii zamiin-e-paak se
kuchh KHaak laa kar
banaa.ii thii.n
kanhayyaa kii shabiihe.n
raam aur lachhman kii tasviire.n
sar-e-chashm-e-aqiidat
shiv kii muurat thii
kahii.n arjun kii suurat
jilau me.n in buto.n ke
thaa vahaa.n
raavan kaa bhii paikar
vo gaagar
jis me.n vo
kuchh aab-e-zam-zam
bhar ke laayaa thaa
tabarruk kii tarah
us ne milaayaa gangaa-jal us me.n
diye phir Gusl us ne
in buto.n ko
usii paanii se
jis me.n ruuh kii
KHushbuu mahaktii thii
mohabbat gungunaatii thii
hu.aa phir ye
yakaayak
saare hii but
jaag uTThe
aadmii kaa ruup le kar
phir us ke baad
mirii aa.nkho.n ne dekhaa
ki us kii laash thii
aur KHuunii panje
devtaa.o.n ke

Rafiuddin Raz
Nazm

main tere hijr ka saim

hariim-e-saa'at-e-ruKHsat me.n
dono.n ne
vuzuu aa.nkho.n ke zamzam se kiyaa thaa
aur namaaz-e-‘ishq adaa kii thii
siyaam-e-hijr kii niyyat se
ik duuje se bichh.De the
tire haalaat se vaaqif nahii.n lekin
mai.n tere hijr kaa saa.im
ba.Dii muddat se sahn-e-kaa'ba-e-tanhaa.ii me.n huu.n
e’tikaaf-e-‘ishq kii haalat me.n ehraam-e-vafaa baa.ndhe
tavaaf-e-yaad me.n mashGuul huu.n kab se
ye merii bandagii maqbuul ho jaa.e
agar tuu lauT aa.e aur
mujhe baar-e-digar aa.nkho.n ke zamzam se bhigo jaa.e
tirii qurbat kii ‘ajvah gar mayassar ho
to phir iftaar-e-saum-e-hijr ho jaa.e

Sheeraz Sagar
Nazm

bahaar ban ke chali aa ki ja rahi hai bahaar

chaman bahisht hai mauj-e-sharaab zamzam-e-kaif
baras rahii hai gul-e-mudda.aa pe shabnam-e-kaif
yahii nashaat ke din hai.n yahii hai aalam-e-kaif
ki zarra-zarra hai bazm-e-jahaa.n kaa mahram-e-kaif
bahaar ban ke chalii aa ki jaa rahii hai bahaar

Syed Aabid Ali Aabid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now