سفگمو مینو میٹر

ڈاکٹر زرقا نے بتایا کہ امی کو ہائی بلڈ پریشر رہتا ہے۔ انھوں نے کہا کہ یہ ایک بیماری ہے اور اس کا نام ’’Hypertension‘‘ ہے۔

’’ہائپرٹینشن نہ ہو تو کیا ہو؟‘‘ امی نے فون پر آنٹی ارشد سے کہا۔ ’’جمعدارنی، مالی، ان لوگوں کا کتا۔ کوئی ایک مصیبت تو نہیں ہے۔‘‘ وہ ہمارے ہیپی کو نام سے کم ہی بلاتی تھیں اور اسے زیادہ تر’’ان لوگوں کا کتا’’ کہتی تھیں۔ یعنی میرا، نوید بھائی اور ابا کا۔

’’ہائپرٹینشن تو ہونا ہی تھی‘‘۔ انھوں نے آہ بھری۔

مگر اس انکشاف سے کہ انھیں ہائپرٹینشن ہے، وہ کچھ خوش بھی تھیں۔ جیسے یہ کچھ معتبر سی بات ہو۔ ہائپرٹینشن! ایسے باوقار نام کی بیماری ہوئی تھی انھیں۔ رعب دار اور اہم، جس کے بارے میں یہ خطرناک بات بھی مشہور تھی کہ وہ ’’سائیلنٹ کلر’’ ہے۔ یعنی ایسی قاتل بیماری ہے جو ہو سکتا ہے کبھی ظاہر نہ ہو مگر اندر ہی اندر چپکے چپکے انسان کو نیست و نابود کرنے میں مصروف رہے۔

جب آنٹی ارشد نے کہا کہ یہ ممکن ہے کہ اس بیماری کی وجہ ہماری اس جادوگر محلے دارنی کے جادو ٹونے ہوں جو حاسد ہے اور ہر چھٹی کے دن بلاوجہ ہمارے گھروں میں نمودار ہوتی ہے تو امی نے اس بات کی تردید نہیں کی بلکہ کہا کہ ہاں ہو تو سکتا ہے مگر جادو ٹونے تو وہ ہمارے بچوں کے خلاف کرتی ہے کیونکہ اس کے اپنے بچے نکمے ہیں اور کیا یہ بہتر نہیں کہ جو جادو اور ٹونے وہ میرے بچوں کے خلاف کرتی ہے ان کی زد میں آکر اپنے بچوں کے عوض میں ہی بیمار ہو جاؤں؟

’’اور بیماری بھی کیسی، آپا ارشد، بیماری بھی کیسی۔ ہائپرٹینشن۔‘‘

’’اف‘‘۔ آنٹی نے دہرایا۔ ’’ہائپرٹینشن‘‘

آنٹی ارشد کو یہ انوکھا خیال پسند آیا کہ اپنے بچوں کی جگہ وہ بیمار ہو جائیں۔ اس بات میں کچھ روحانی گہرائی دکھتی تھی۔ کچھ ہی دن کے بعد انھوں نے امی سے کہا کہ ان کو بھی وہی کچھ محسوس ہونے لگا ہے جو امی کو ہوتا تھا اور جس کی بنا پر ان کی اس خطرناک بیماری کی تشخیص کی گئی تھی۔

’’بالکل وہی ندرت جان۔ سر کے پیچھے گردن میں درد۔ ایسا مستقل درد کہ کسی بھی دوا سے ختم نہ ہو۔‘‘

’’آپا، پھر تو آپ کو بھی ہائپرٹینشن ہے۔ یہ تو بالکل میرے والی کیفیت ہے‘‘۔ امی نے کہا۔

’’میری پریشانیوں کا کوئی حساب نہیں ڈاکٹر صاحب۔ نہ حد ہے نہ حساب شمار اور اب تو ویسے بھی یہ بیماری ہمارے محلے میں داخل ہو چکی ہے۔‘‘ وہ ڈاکٹر زرقا سے مخاطب تھیں۔

’’ابھی کچھ ہی دن پہلے معلوم ہوا ہے کہ ہماری پچھلی گلی میں میری سہیلی کو بھی یہی بیماری لگ چکی ہے۔ وہ دن میں دو بار دوائی لیتی ہے۔ کئی کئی ملی گرام کی۔ ذرا غور سے چیک کریں پلیز۔ میرا اس سے بہت ملنا جلنا ہے۔ کہیں مجھے نہ لگا دی ہو اس نے یہ بیماری۔‘‘

لیکن ڈاکٹرنے صاف کہہ دیا کہ آپ کو کچھ نہیں ہے۔ بلڈ پریشر بالکل ٹھیک ہے اور اسے نیچے لانے کی کوئی دوا دینے کا سوال ہی پیدا نہیں ہوتا۔ ڈاکٹر نے یہ بھی کہا کہ یہ کوئی تپ دق یا خسرہ نہیں جو یوں کسی سے ملنے جلنے سے لگ جائے۔

آنٹی ارشد نے سنی ان سنی کر دی۔ ’’ ڈاکٹر صاحب۔ کسی بہتر آلے سے چیک کریں۔ کنپٹیوں میں ساں ساں ہوتا ہے۔ ہائے۔ کوئی اور آلہ نہیں ہے آپ کے پاس؟ کوئی نئی قسم کا؟ کوئی جدید سا آلہ ہو۔‘‘

مگر ڈاکٹر ٹس سے مس نہ ہوئی اور پرس میں سے آئینہ نکال کے اپنی لپ سٹک درست کرنے لگی۔

آنٹی ارشد نے کہا کہ ڈاکٹر صرف ایسی بیماریاں تشخیص کرنے میں دلچسپی رکھتے ہیں جن میں مریض کو بار بار ان کے کلینک کے چکر لگانا پڑیں اور وہ حیلے بہانوں سے فیس وصول کرتے رہیں۔ اس میں کیا کوئی بحث کی گنجائش تھی کہ آنٹی ارشد کی زندگی میں بے شمار پریشانیاں تھیں؟ اور اگر نہیں تھی، کنپٹیوں میں ساں ساں بھی ہوتا تھا اور سر میں درد بھی تھا، تو پھر ان کی بات پر ایک ذلیل چینی آلے کے اندر ناچتے پارے کو کیوں ترجیح دی جارہی تھی؟ اس بات پر کیوں شک کیا جا رہا تھا کہ انھیں ہائپر ٹینشن کی بیماری لگ چکی ہے؟

’’پتہ نہیں یہ سائیلنٹ کلر مجھے کب سے کل کر رہا ہے؟ چپکے چپکے، خفیہ خفیہ۔‘‘ آنٹی ارشد نے امی کے پاس بیٹھے بیٹھے کہا، ایسے، جیسے اپنی اس بے چارگی پہ بہت غمگین ہوں اور خود کلامی کر رہی ہوں اور یہ کہتے کہتے ان کی آنکھوں میں اپنی بےچارگی کے تصور سے آنسوبھی آ گئے۔

’’ندرت جان۔ ہائی بلڈ پریشر کو مذاق میں نہیں ٹالا جا سکتا،’’ انھوں نے کہا۔ ‘‘چاہے کسی آلے سے نکلے یا نہ نکلے، ہے تو سہی نا۔ آلے تو سب ناقص ہوتے ہیں۔ کیا میں علاج اس لیے نہ کرواؤں کہ آلے ناقص ہیں اور ڈاکٹر لالچی؟‘‘

اگلے دن امی اور وہ ادھر ہمارے ماڈل ٹاؤن کی بڑی مارکیٹ میں نورین اور مہرین کے ہومیوپیتھک مطب گئیں جہاں ان دو سنجیدہ بہنوں نے آنٹی ارشد کے حالات بہت توجہ سے سنے اور ان سے ان کے معاملات اور عادات کے بارے میں کئی قسم کے سوالات پوچھے۔ کچھ سوالات بہت عجیب تھے اور آنٹی کی سمجھ میں نہ آتا تھا کہ ان کا کیا مقصد ہے۔ مثلاً یہ کہ ’’اگر آپ کا کوئی کام صحیح طرح سے نہ ہو رہا ہو تو کیا آپ بس ہار مان جاتی ہیں یا کوشش کرتی رہتی ہیں؟‘‘ اور یہ کہ ’’باغیچے میں زیادہ خوشی محسو س کرتی ہیں یا کمرے کے اندر؟‘‘ آنٹی پہلے تو ان سوالات پہ جز بز ہوئیں کیونکہ وہ کچھ ڈاکٹری نوعیت کے معلوم نہ ہوتے تھے مگر جب ڈاکٹر بہنوں نے کہا کہ یہ جو کام ہم کرتی ہیں، یعنی ہومیو پیتھی کا کام، اس میں مریض کے بارے میں ایسی تفصیلات بہت اہمیت کی حامل ہوتی ہیں تاکہ عین مناسب دوا اس کے لیے تجویز کی جا سکے، تو وہ مطمئن ہو گئیں کہ دیکھو کیسے نئے طور کا علاج ہے اور تشخیص کے کیسے انوکھے طریقے اس میں رائج ہیں۔ پھر جب دونوں ڈاکٹرنیوں نے یہ کہا کہ جی ہاں آپ کو یقینا ہائپرٹینشن ہے اور ایسی عیاں ہے کہ کسی آلے والے سے ناپنے کی کوئی ضرورت نہیں ہے تو آنٹی کی خوشی کا ٹھکانہ نہ رہا۔ بہنوں نے انھیں چھ چھ پڑیوں پہ مشتمل بہت سے لفافے دئیے۔ ہر لفافہ ایک دن کے لیے تھا اور پڑیاں نمبروں کے حساب سے کھائی جانی تھیں، ایک سے چھ تک، ہر چار چار گھنٹے بعد اور اس بات کا خیال رکھنا بہت ضروری تھا کہ غلط نمبر کی پڑیانہ کھائی جائے۔ پڑیوں میں بند سفید میٹھا سفوف بغیر ہاتھ لگائے سیدھا زبان پر انڈیلے جانا چاہیے تھا تاکہ وہ وہاں خود بخود تھوک میں حل ہو جائے اور پھر جسم میں داخل ہو کے وہ وہ کچھ کرے جو اس کا فرض تھا۔ سفوف منہ میں انڈیلنے سے نہ آدھ گھنٹے پہلے کچھ کھا پی سکتے تھے اور نہ اس کے آدھ گھنٹہ بعد تک۔

’’دیکھا آپ نے کہ یہ کیسا مشکل کام ہے؟‘‘ ایک ہومیوپیتھک بہن نے فخر سے کہا۔ ’’دیکھا آپ نے کہ کیسی اس میں باریکیاں ہیں۔ کیا ایلوپیتھی اس کا مقابلہ کر سکتی ہے؟ ہائپرٹینشن، شوگر، کینسر، خناق اور دیگر کئی ایسی بیماریاں ہیں جن کا مکمل علاج صرف ہومیوپیتھی ہی کر سکتی ہے۔‘‘ دوسری نے بتایا۔

ان قابل بہنوں نے یہ بھی کہا کہ علاج کے دوران آنٹی ارشد کا تیز خوشبوؤں سے دور رہنا بہت ضروری ہے کیونکہ وہ ہومیوپیتھک دواکا اثر زائل کر سکتی ہیں۔ یہ بات آنٹی ارشد کو کچھ اچھی نہ لگی کیونکہ وہ پرفیوم لگانا بہت پسند کرتی تھیں اور ہر بیرون ملک آتے جاتے واقف سے اپنے لیے پرفیوم لانے کی فرمائش کرتی تھیں جو عام طور پر وہ نہیں لاتے تھے مگر پھر بھی آنٹی ارشد کے پاس ہمیشہ دو، تین پرفیوموں کی بوتلیں موجود رہتی تھیں جنھیں وہ بڑے شوق سے تھوڑا تھوڑا کرکے استعمال کرتی تھیں۔ سو یہ نئی پابندی انھیں پسند نہ آئی مگر پھر یہ سوچ کر کہ ہومیوپیتھک بہنیں ہر وقت دستیاب رہیں گی اور ان سے فون کرکے کبھی بھی بات کرکے انھیں اپنی تکلیف بتائی جا سکتی ہے، آنٹی ارشد نے اس پابندی کو گوارا کر لیا۔ آنٹی ارشد کو یقین تھا کہ اپنی خطرناک بیماری کے پیش نظر انھیں اکثر ان معالج بہنوں کو فون کرنے کی ضرورت پیش آئےگی۔ امی نے بھی کہا کہ ہاں ہاں کیوں نہیں؟ جب سہولت ہے تو کیوں نہ فائدہ اٹھایا جائے۔ آنٹی ارشد نے کہا کہ آدھی بیماری تو ڈاکٹر سے بات کرکے ہی چلی جاتی ہے اور یہاں تو دو ڈاکٹرنیاں موجود ہیں۔ جب ابا نے یہ سن کے کہا کہ پھر آپ دوا کھانے کی جگہ ان دونوں سے صرف بات ہی کرلیا کریں تاکہ پوری بیماری چلی جائے تو آنٹی ارشد نے برا سا منہ بنایا اور امی نے ان کی دلجوئی کے لیے کہا کہ ابا کی باتوں پہ توجہ نہیں دینی چاہیے کیونکہ ایسی باتیں کرنا ان کی عادت ہے۔

پر یہ چار چار گھنٹے بعد پڑیا کھانا اور خوشبو نہ لگانا بڑی سخت پابندیاں تھیں اور یہ طے تھا کہ میٹھے پاؤڈر کی پڑیوں کے ساتھ آئی ان پابندیوں سے انھیں بہت جلد اکتا جانا تھا۔

۔۔۔۔۔۔

’’ندرت جان‘‘ آنٹی ارشد نے فون پر امی سے کہا،’’دوا شروع شروع میں تو بہت اچھی تھی۔ مجھے محسوس ہورہا تھا کہ اثر کر رہی ہے۔ مگر اب نوکروں نے اس بات کا فائدہ اٹھانا شروع کر دیا ہے کہ میں اپنے علاج میں اس قدر مصروف رہتی ہوں۔ بس اسی بات کا فائدہ اٹھا رہے ہیں سب کہ میں ہر وقت اس فکر میں رہتی ہوں کہ کوئی نہ کوئی پڑیا کھانے کا وقت آ رہا ہے۔ صفائی والی نے آج ڈرائینگ روم صاف نہیں کیا اور انور نے جو دال پکائی ہے وہ بالکل پانی جیسی پتلی ہے۔ تم سوچو۔ وہ دال میں کھانے کی میز پر رکھ دیتی تو وہ آدمی میرا کیا حشر کرتا؟‘‘

امی اس بات کے جواب میں کچھ خاص نہ بولیں۔ آنٹی ارشد کے میاں کی بدذاتی اور ظلم کوئی ایسی چیزیں نہیں تھیں جن پر کسی رائے زنی کی ضرورت ہوتی۔ محلے میں جن جن لوگوں کے ہاں آنٹی ارشد نے اپنا آنا جانا رکھا ہوا تھا ان سب کو اس آدمی کی شخصیت کے ان معاملات کا علم تھا، کیونکہ آنٹی ارشد اپنی ذاتی باتیں چھپانے میں زیادہ یقین نہیں رکھتی تھیں اور امی کو تو وہ صاف کہہ دیتی تھیں کہ بےشک اس آدمی کی اصلیت سب کو پتا چلے، مجھے کیا؟ میں تو سوچتی ہوں کسی دن اس کے افسر کے پاس جاؤں اور اسے بتاؤں کہ جس کو آپ کارکردگی کے تمغے دیتے ہیں وہ اندر سے کیسا خبیث اور حیوان نما ہے۔

سو انکل سلطان اپنے آپ کو جتنا مرضی قابل جاسوس اور خفیہ امور کا ماہر سمجھتے، وہ اپنی اصلیت کے بارے میں لوگوں کے علم اور حقارت سے ناواقف تھے اور اس بات سے بھی کہ ان کی بیگم ان کے افسر کے پاس بھی جاپہنچ سکتی تھیں اور ان کی اصلیت اس پر عیاں کر سکتی تھیں۔

ابا کہتے تھے کہ سلطان جیسا ہے ویسا ہی ہو سکتا ہے۔ کمینہ اور بدلحاظ، کیونکہ اس کی نوکری ہی ایسی ہے جو اچھے بھلے شخص میں یہ مکروہ خصائل پیدا کر سکتی ہے۔ چاہے یہ کتنا بھی اپنے کام کا ماہر ہو اور چاہے اسے نوکر رکھنے والے کتنے ہی اس سے خوش کیوں نہ ہوں، کام تو اس کا وہی ہے نہ؟ حکومت کے لیے جاسوسی! چھپ چھپ کے لوگوں کی سو لینا، ان پر نظر رکھنا، ان کی ذاتی باتوں کا پتہ لگانا تاکہ بوقت ضرورت انکو ان لوگوں کے خلاف استعمال کرکے انھیں بلیک میل کیا جا سکے اور کچھ اور اس سے بھی گھٹیا دیگر کام جو جاسوس کرتے ہیں اور جو اتنے خفیہ ہیں کہ ہم نہیں جانتے کہ وہ کیا ہیں۔ چاہے ان لوگوں پر بنی فلمیں آپ کو دلچسپ لگتی ہوں مگر کیا یہ جاسوسی وغیرہ کوئی قابل قدر کام ہے؟ چاہے آپ ان کے خوف کی وجہ سے منہ سے کچھ نہ کہیں لیکن امر واقع تو یہی ہے نا کہ جو کام یہ کرتے ہیں وہ تو تقریباً غیبت سے بھی بدتر ہے۔ غیبت میں تو صرف کسی کے بارے میں بری بات اس کی پیٹھ پیچھے کی جاتی ہے جبکہ اس میں تو چن چن کر لوگوں کے بارے میں ہر قسم کے طریقے سے تمام اچھی بری باتیں معلوم کی جاتی ہیں اور جہاں غیبت ایسے ہے کہ جیسے اپنے مردہ بھائی کا گوشت نوچ نوچ کر کھایا جائے، وہاںیہ کام جو سلطان کرتا ہے، یہ تو کچھ ایسے لگتا ہے کہ جیسے زندہ بھائی کا گوشت کھایا جائے۔ پتہ نہیں یہ کام حلال بھی ہے یا نہیں۔ کون سا یہ لوگ اس کام کو بحالت مجبوری یا اللہ کی خوشنودی کے لیے کرتے ہیں؟ سو پھر ان لوگوں کو، ان جاسوس لوگوں کو کون ستائش کی نگاہ سے دیکھ سکتا ہے؟ پس سلطان کوئی بےقوف نہیں ہے۔ ایسا ایسا باریک جاسوسی کا کام سرکار کے لیے کر چکا ہے۔ صاف ظاہر ہے کہ یہ سب باتیں وہ بھی جانتا ہے کہ وہ کتنا مکروہ کام کرتا ہے اور ہمہ وقت یہی سو چ سوچ کے، کڑھ کڑھ کے ایسا بد مزاج ہو گیا ہے۔

امی کہتی تھیں کہ اتنے غور و فکر اور تجزئیے کی کوئی ضرورت نہیں کیونکہ اتنا وہ ایسی باتوں پہ کڑھنے والا ہوتا تو یہ مکروہ کام کرتا ہی کیوں؟

’’روزی کے لئے’’ ابا نے ایک دفعہ کہا تھا، جس پر امی نے فوراً تنک کر جواب دیا تھا کہ اتنا امیر تھا باپ، دیکھو کتنی جائیداد چھوڑ گیا ہے۔ کیا ضروری تھا کہ ایسا مکروہ کام ہی کرتا یہ؟ کون سے فاقے پڑ رہے تھے گھر میں؟ پھر طنز سے بولیں کہ آخر آپ نے بھی تو اپنے ابا جی کا ہوٹل چلانے کے عوض کچھ بھی نہ کرنا ہی بہتر سمجھانا۔ آپ کو ہوٹل چلانے میں ہتک محسوس ہوتی تھی، اسے جاسوس بنتے ہوئے ذرا بھی برا نہیں لگتا تھا؟

ابا نے ایک بار پھر امی کو سمجھانے کی کوشش کی کہ انھوں نے دادا ابا کے ہوٹل کو چلانے میں ہتک محسوس نہیں کی تھی بلکہ وہ اس بات کے ہی خلاف ہیں کہ انسان کو روزی کمانے کے لیے کام کرنا پڑے۔ انسان وہ کام کرے جس کے کرنے کو اس کا دل چاہے اور ایسے ہی کام سے اس کی روزی کا بندوبست ہونا چاہیے۔ ابا بار بار کہتے کہ دیکھنا ایسا معاشرہ ضرور قائم ہوگا جس میں یہ ممکن ہوگا اور تب تک کیوں نہ میں ابا جی کے چھوڑے ہوئے ترکے پہ آرام سے گزار اکروں؟

امی ان باتوں کا مذاق اڑاتی تھیں اور بس یہی ایک بات تھی، ابا کے کوئی بھی کام نہ کرنے والی بات، جس کی وجہ سے کبھی کبھی دونوں میں کافی تکرار ہو جاتی تھی۔ ’’خدا بخشے آپ کے ابا جی کو‘‘، امی نے کہاتھا، ’’وہ اتنا کچھ چھوڑ گئے ہیں تو آپ کے لیے یہ کہنا آسان ہے۔ خدا کا خوف کریں۔ لوگوں کو زندہ رہنے کے لیے بڑے جتن کرنے پڑتے ہیں اور انسان صرف اپنے ہنر سے پہچانا جاتا ہے۔‘‘

اس سے پہلے کہ ابا بتاتے کہ ان کے پاس بھی ہنر ہے، امی نے فوراً کہا،

’’اور ہنر سے مطلب داڑھی والے جرمن یہودیوں اور ناٹے قد کے مردہ روسیوں کی لکھی کتابیں بلاوجہ پڑھتے رہنا، بیٹھ کر سوچ بچار کرنا اور کائنات کے راز سمجھنے کی کوشش کرنا نہیں ہے۔ ہنر سے مطلب ہے وہ کام جو کرکے روزی کمائی جا سکے۔ آپ کائنات کے سارے راز صبح تک معلوم بھی کر لیں تو کوئی فرق نہیں پڑےگا‘‘۔

ابا نے اس کے بعد انکل سلطان کے بارے میں روزی کمانے والی دلیل کم کم ہی دی کیونکہ اس سے خواہ مخواہ تکرار اور تلخی کو دعوت ہوتی تھی جن دونوں چیزوں سے ابا بھاگتے تھے۔ پھر بھی وہ کبھی بھی یہ کہنے سے نہیں چوکتے تھے کہ انکل سلطان جیسے ہیں اس میں ان کی نوکری کا بہت ہاتھ ہے۔

’’میں کیا کروں؟ دنیا کی کون سی دواہے جو ان حالات میں اثر کرےگی؟ ہے کوئی ندرت جان؟ کوئی ہے ایسی دوا؟‘‘ آنٹی ارشد نے آہ وبکا کی۔

’’نہیں باجی۔ کیسے ہو سکتی ہے ایسی کوئی دوا؟ اور باجی ان حالات میں تو آپ کی ٹینشن اور بڑھ جائےگی۔ ہائپر ٹینشن اور بگڑ جائےگی۔‘‘ امی نے کہا۔

’’یہی تو میں کہہ رہی ہوں۔ پھر بتاؤ نہ، کیا کروں؟‘‘ آنٹی ارشد نے پوچھا۔

امی نے آنٹی ارشد کو تجویز کیا کہ وہ فوراً ٹیلیفون کرکے ڈاکٹرنیوں سے پوچھیں کہ کیا علاج کا کوئی اور، آسان طریقہ ہے جو اختیار کیا جاسکے اور جو پہلے سے موجود ٹینشن میں اضافہ نہ کرے۔ ڈاکٹرنیوں نے کہا کہ گھبرانے کی بات نہیں، ہر مسئلے کا کوئی نہ کوئی حل موجود ہوتا ہے اور اس کا بھی ہے۔ یوں کیا جا سکتا ہے کہ پڑیوں کی طاقت بڑھا کے ان کی تعداد گھٹا دی جائے اور ایسا حربہ بھی کیا جا سکتا ہے کہ پڑیوں پہ نمبر نہ لکھنے پڑیں اور آنٹی ارشد کو اس بات کی فکر نہ کرنی پڑے کہ کہیں غلط نمبر کی پڑی نہ کھا لیں۔ لیکن جب آنٹی ارشد نے پوچھا کہ کیا کوئی طریقہ ایسا بھی ہے کہ پرفیوم لگانے پہ پابندی نہ ہو تو ڈاکٹرنیاں بہت ناراض ہوئیں۔ انھوں نے کہا کہ ایسا ہر گز، ہرگز نہیں ہو سکتا اور یہ بھی کہا کہ حد ہوتی ہے کسی کی نرمی کا فائدہ اٹھانے کی۔ انھوں نے کہا کہ جب آپ اصل ڈاکٹروں سے آپریشن کرواتی ہیں تو کیا بیہوشی میں انھیں بتاتی رہتی ہیں کہ پیٹ میں اتنا سوراخ کرو یا سوراخ ادھر کرو ادھر نہ کرو؟ اور یہ بھی کہ یہ جو آنٹی ارشد ایسی بدعتوں والی اجازتیں مانگ رہی ہیں اس سے ثابت ہوتا ہے کہ وہ ہومیوپیتھی کو کوئی ایسا کاروبار سمجھتی ہیں کہ ہاں جی، میٹھی گولیاں ہی تو ہیں، یوں نہ کھائیں، یوں کھا لیں۔ ڈاکٹر بہنوں نے اس مقام پر آ کے تعاون سے انکار کردیا اور کہا کہ ہم آپ کے لیے ہومیوپیتھی کے اٹل اصول اور قاعدے نہیں بدل سکتیں۔ انھوں نے کہا کہ ہم نے پہلے ہی آپ سے نرمی برتی تھی مگر اب معلوم ہوتا ہے کہ آپ اس کی مستحق ہی نہیں ہیں۔ سو اب تو ہم جو دوا آپ کو دیں گی اس میں نہ صرف پرفیوم کی ممانعت ہو گی بلکہ ٹوتھ پیسٹ کی بھی ہوگی۔

آنٹی ارشد نے ڈاکٹرنیوں کا علاج بند کر دیا اور ابا اس بات سے بہت محظوظ ہوئے۔

’’یعنی آپ کو اپنی صحت سے زیادہ خوشبوئیں لگانے میں دلچسپی ہے۔ واہ۔‘‘

آنٹی ارشد بھی کوئی بچی نہیں تھیں۔

’’میں نے اس وجہ سے علاج نہیں چھوڑا‘‘ وہ بولیں۔

’’اسی وجہ سے چھوڑا ہے اور کیا۔ آپ کو پرفیوم لگانے کا اتنا شوق ہے؟‘‘

’’ایک اور وجہ ہے۔ اگر سوچا جائے تو بڑی اہم وجہ ہے۔ میں نے علاج اس لیے چھوڑا ہے کہ اگر یہ ممکن تھا کہ وہ مجھے زیادہ طاقت کی تھوڑی پڑیاں دیتیں اور ان پہ نمبر لکھنے سے بھی بچا جا سکتا تھا، تو پھر انھوں نے پہلے ہی ایسا کیوں نہیں کیا؟ بس اس بات سے میں بددل ہوئی ہوں اور میرا اعتماد جاتا رہا ہے۔‘‘

اب امی نے کہا کہ باجی چھوڑو۔ میں بتاتی ہوں کیا کرو۔ سو آنٹی ارشد نے امی کے کہنے پہ Valium 5کھانا شروع کر دی۔ ایک گولی صبح اور ایک رات۔ حالانکہ امی نے صرف رات کو ایک گولی کھانے کو کہا تھا۔ یہ گولی آنٹی ارشد کو دن بھر مسحور اور مسرور رکھتی اور رات کو خوب گہری نیند دلاتی۔

ہمارے ہاں بلڈ پریشر ناپنے کا ایک آلہ مال روڈ کی ایک دوکان سے خرید کر لایا گیا تھا جس سے بلڈ پریشر دیکھنا نوید بھائی کو دوکاندار نے ہی سکھا دیا تھا۔ اس آلے کا نام Sphygmomanometer تھا جو صرف نوید بھائی بول سکتے تھے اور جب بھی انھوں نے امی کا بلڈ پریشر چیک کرنا ہوتا تو وہ بڑے فخر اور تحکمانہ لہجے میں مجھے کہتے:

’’Sphygmomanometer لے کر آؤ‘‘۔

یا رعب سے پوچھتے کہ’’ Sphygmomanometer کہاں ہے؟‘‘

گو مجھے Sphygmomanometer سے بلڈپریشر دیکھنا نہیں آتا تھا مگر یوں معلوم ہوتا تھا کہ یہ بہت آسان کام ہے۔ بس صرف کبھی کبھی یہ مسئلہ پیدا ہوتا تھا کہ نوید بھائی امی کی کہنی کے دوسری طرف ان کی دھک دھک کرتی نس محسوس نہیں کر پاتے تھے مگر یہ Sphygmomanometer کا قصور نہ تھا۔ وہ والی نس تو خود ڈھونڈنی پڑتی ہے۔ جب کبھی انھیں نس نہ ملتی تو وہ ایسا کرتے کہ امی سے یہ بات پوشیدہ رکھتے اور قاعدے کی تمام کارروائی پوری کرتے۔ یعنی یہ کہ آلے کا بازوبند ان کے بازو پر باندھتے، ڈاکٹری ٹونٹی کان سے لگاتے اور اس کا دوسرا گول سرا امی کے بازو پر وہاں رکھتے جہاں نس ہونی چاہیے۔ پھر دستی بم کی شکل والے بیضوی ربرکے پمپ سے بازوبند میں ہوا بھرتے اور تب تک بھرتے جب تک امی نہ کہتیں کہ بس کرو بہت زور کا ٹائیٹ ہو گیا ہے۔

’’شش، سننے دیں’’وہ کہتے، جیسے واقعی نس کے اوپر ہی ٹونٹی رکھی ہو اور ابھی دھک دھک سننے والے ہوں۔ پھر آہستہ آہستہ دستی بم کا پیچ کھول کے بازوبند سے ہوا خارج کرتے۔ اس سب کے بعد وہ اندازے سے، اپنی طرف سے کوئی بلڈ پریشر بتا دیتے کہ اتنا ہے، یہ دیکھ کر کے امی کی طبیعت کیسی لگ رہی ہے اور وہ محسوس کیسا کر رہی ہیں۔ شوقیہ یا محض احتیاطً بلڈ پریشر چیک کروارہی ہیں یا واقعی کچھ طبیعت کی خرابی کی وجہ ہے۔

اکثر آنٹی ارشد بھی اپنا بلڈ پریشر دکھانے آتی تھیں جو ہمیشہ درست نکلتا تھا۔

’’Valium 5‘‘ آنٹی ارشد فخر سے بتاتیں۔ ’’دیکھا ندرت جان؟ ڈاکٹر کے بغیر ہی میرا علاج ہو گیا۔‘‘

امی کی کوشش ہوتی تھی کہ جب ان کا بلڈ پریشر دیکھا جائے تو ابا کا بھی دیکھا جائے۔ وہ ابا سے کہتی تھیں کہ ضروری نہیں کہ آپ کو کچھ محسوس ہی ہو تو بلڈ پریشر کی بیماری ہو۔ یہ خاموش بھی رہ سکتی ہے اور اچانک ایک دن دل کے دورے یا ایسی کسی بھیانک واردات کے طور پہ نمودار ہو سکتی ہے۔ تبھی تو اسے سائلنٹ کلر کہتے ہیں۔ لیکن ابا کو دوائیوں اور ڈاکٹری باتوں سے چڑ تھی اور وہ کبھی اپنا بلڈ پریشر چیک نہیں کرواتے تھے۔

ایک بار میں نے نوید بھائی سے کہا کہ مجھے بھی کبھی کبھی سر میں ہلکا ہلکا درد محسوس ہوتا ہے۔ وہ مسکرائے اور کہا کہ آؤ پھر تمہارا بھی بلڈ پریشر چیک کرلیں۔ جب انھوں نے اس کا، یعنی Sphygmomanometer کا بازوبند میرے بازو پہ باندھنا چاہا تو وہ ڈھیلا رہا اور گر گر جاتا تھا کیونکہ میرے بازو بالکل پتلے پتلے تھے اور اس کی گرفت میں نہ آتے تھے۔ نوید بھائی نے کہا کہ اگر یہ بازوبند تمہارے بازو پر باندھا نہیں جا سکتا تو ڈاکٹری کتابوں میں اس کا صاف صاف مطلب یہ لکھا ہے کہ جن لوگوں کے بازواتنے پتلے ہوں انکو کبھی بلڈ پریشر ہوہی نہیں سکتا۔

اس دن کے بعد، میں اکثر Sphygmomanometerکا بازوبند ٹانگ پہ پنڈلی کے اردگرد باندھ کر اس میں ہوا بھرتا اور خارج کرتا تھا اور جب ہوا بھرنے پہ وہ پھول کے میری پنڈلی کو دباتا تھا تو مجھے بڑا مزہ آتا تھا اور میں خود کو ہوا میں اڑتا محسوس کرتا تھا۔

۔۔۔۔۔۔

ہمارے پیارے ہیپی کی وفات کے بعد امی نے دو ٹوک کہہ دیا تھاکہ اب کوئی اور کتا اس گھر میں نہیں آئےگا۔ انھوں نے صاف کہا تھاکہ اس گھر میں یا وہ رہیں گی یا کتا۔ تھوڑی دیر نوید بھائی اور ابا نے ان سے بحث کی اور کتوں کے فوائد گنوائے مگر کچھ حاصل نہ ہوا اور امی نے کہا کہ وہ ان سے کہیں زیادہ کتوں کے نقصانات گنوا سکتی ہیں جن میں سرفہرست یہ ہے کہ رحمت کا فرشتہ گھر سے نہیں گزرتا۔

’’تو پھر اتنے دن کہاں سے گزرا وہ؟ اتنے سال جب ہیپی یہاں تھا۔ آپا صغراں کے گھر سے؟‘‘ میں نے حیران ہوکے پوچھا۔

’’اوہ تے آپ کتی جیہی اے‘‘ (1) امی نے کہا، مگر میرے سوال کا جواب نہ دیا اور کہا کہ وہ اس بحث میں پڑنا نہیں چاہتیں کہ کتوں کے نقصانات ہیں یا فوائد سوائے اس کے کہ جو فائدہ ابا اور نوید بھائی بڑھ چڑھ کے گنوا رہے تھے کہ کتا حفاظت کرتا ہے، تو اس کا جواب ایک تو یہ ہے کہ آپ لوگوں کو خطرہ ہے کس سے؟اور دوسرا یہ کہ آپ کا ہیپی تو سال میں ایک یا دو دفعہ بھونکتا تھا۔ یہ حفاظت کرتا تھا وہ؟ انھوں نے صاف کہہ دیا کہ آپ لوگ فیصلہ کر لیں۔ اگر کتا آیا، تو میں کہیں بھی چلی جاؤں گی، مگر اس گھر میں نہیں رہوں گی۔ میں حیران ہوا اور میں نے پوچھا کہ بھلاکہاں چلی جائیں گی؟ آنٹی ارشد کے؟

’’آنٹی ارشد کے ہی سہی‘‘، امی نے کہا، ’’کہیں بھی، چاہے ساتھ والے گھر میں آپا صغراں کے ہی چلی جاؤں مگر یہاں نہیں رہوں گی‘‘۔ میں اور حیران ہوا کہ آپا صغراں کا بھلا کیا ذکر ہے؟ وہ آپ کو کیوں رکھیں گی؟ وہ تو اپنی سگی بیٹیوں پہ ایسا ایسا ظلم ڈھاتی ہیں اور سوٹیوں سے انھیں مار بھی چکی ہیں۔ اگر آپ کو بھی مارا؟ پھولوں کی کیاری سے سوٹی اکھاڑ کے جو سر میں اندر تک گھس بھی سکتی ہے اور اتنا خون نکال سکتی ہے کہ آپ بیہوش ہو جائیں؟

’’کھالوں گی سوٹیاں۔ گھس جائیں سر میں۔ نکل آئے خون۔‘‘ امی نے کہا۔ ‘‘یہاں نہیں رہوں گی۔ بس۔’’ پھر ایک ڈرامائی فقرہ بولا کہ’’سر سے خون نکل آئے تو بہتر ہے، کم از کم خون کے آنسو تو نہ روؤں گی۔‘‘

میں نے خیال ظاہر کیا کہ آپا صغراں آپ کو رکھیں گی ہی نہیں۔

’’نہ رکھیں‘‘۔ امی نے غصے سے کہا، ’’لیکن میں چلی ضرور جاؤں گی کہیں۔‘‘

میں کچھ اور سوال پوچھنا چاہتا تھا کیونکہ امی کے یہ عجیب و غریب نیم ہذیانی جوابات مجھے بہت حیران کئے دے رہے تھے، مگر ابا نے اشارہ کیا کہ بکواس بند کرو۔ سو میں چپ ہو گیا لیکن میرے دل میں حسرت رہ گئی کہ پتہ چلاؤں کہ کیسا ہوگا اگر امی ہمارے گھر سے چلی جائیں اور میں جاکے دیکھنا چاہتا تھا کہ وہ جہاں رہیں گی وہاں کیسے رہیں گی اور ان کے جانے کے بعد ہمارا رہن سہن کیسا ہوگا؟ اس وقت میں خاموش تو ہو گیا مگر منہ بند کرتے کرتے میری زبان سے نکل ہی گیا کہ:

’’پھر بھی۔۔۔کہاں جائیں گی؟ کہاں؟‘‘

اس پر امی اپنی کنپٹیوں پر ہاتھ رکھ کے انھیں دبانے لگیں اور نوید بھائی کو حکم دیا کہ Sphygmomanometer سے ان کا بلڈ پریشر چیک کریں مگر مجھے پتا تھا کہ یہ صرف مجھے بتانے کے لیے کہا گیا ہے کہ دیکھو تمہاری اس بکواس سے کیسی میری طبیعت خراب ہوئی ہے کہ بلڈ پریشر چیک کروانے کی نوبت آئی ہے۔

ابا اور نوید بھائی ہار مان گئے اور ہم نے نیا کتا لانے کا ارادہ ترک کردیا۔ اس شام امی نے آنٹی ارشد کو بڑے فخر سے اپنی کامیابی کی خبر سنائی اور یہ بھی کہا کہ کچھ عجب نہ ہوگا اگر ان کا بلڈ پریشر اس وجہ سے بالکل درست ہو جائے اور انھیں دوا کھانے کی ضرورت نہ رہے۔ آنٹی ارشد نے حیران ہوکر امی سے پوچھا کہ اگر کتا ان کے لیے اتنے غم و الم کا باعث تھا تو انھوں نے اس ضمن میں پہلے کیوں احتجاج کی صدا بلند نہ کی؟ امی نے کہا کہ نقار خانے میں طوطی کی کوئی نہیں سنتا جس پر میں نے سوچا کہ جھوٹ؛ سنی تو گئی ہے ان کی۔ نئے کتے کے آنے پر تو لگا دی ہے انھوں نے پابندی۔ آنٹی ارشد نے امی سے پوچھا کہ ان کے گھر میں تو کتا نہیں ہے، پھر انھیں بلڈ پریشر کا عارضہ کیوں لاحق ہوا؟ امی نے بتایا کہ اس موذی مرض کی بہت سی وجوہات ہو سکتی ہیں اور چند ایک بالکل خفیہ جن کا ڈاکٹروں کی گرفت میں بھی آنا محال ہے۔

’’تبھی تو باجی یہ بس اتنا کہتے ہیں کہ ٹینشن نہ لو۔ٹینشن نہ لو۔ اس سے زیادہ انھیں کچھ پتا نہیں ہوتا‘‘۔

’’بدذاتـ لوگ۔‘‘ آنٹی ارشد نے کہا۔ ’’کیسے نہ لیں ٹینشن؟ اونہہ۔ میرے تو گھر میں جیتی جاگتی اتنی بڑی ٹینشن ہے۔ کتے سے بھی بڑی۔ دفع۔‘‘

’’باجی، کیسی باتیں کرتی ہو کبھی کبھی۔ اچھا نہیں لگتا۔ اس طرح نہ کہا کرو’’ امی نے کہا۔

’’ہوہائے۔ ایس طرح نہ کیا کراں ندرت جان؟ پر کیوں نہیں؟ مینوں اوس شخص نال نفرت ای۔ میں تھکدی آں اوہدے اتے۔‘‘ (2)

یہ نئی بات تھی۔ یہ کہ انکل سلطان انھیں گالیاں دیتے ہیں، یہ کہ انکل سلطان کئی بار ان کو تھپڑ مار چکے ہیں، یہ کہ کئی بار ان کی گت کھینچ چکے ہیں، یہ کہ بہت بار کھانے کی پلیٹیں توڑ چکے ہیں، یہ تو ہم جانتے تھے۔ پر یہ ایسا نفرت بھرا اعلان آنٹی کے منہ سے آج پہلی بار سنا تھا۔ امی نے بعد میں بتایا کہ ایک لمحے کو تو انھوں نے سوچا تھا کہ شاید ’’اصل وچ نفرت دے قابل ارشد آپ اے جے ایہو جیہی گل کیتی اے اپنے خاوند دے بارے وچ۔‘‘ (3)

نیا کتا نہ آنے کا مجھے زیادہ افسوس تھا۔ جب میں گھر میں ہوتا تھا تو ہیپی کے ساتھ کھیل کود میں مصروف رہتا تھا۔ نوید بھائی اب کالج جاتے تھے اور ان کی دنیا کافی بدل چکی تھی۔ ان کے نئے نئے دوست بن گئے تھے جن میں سے ایک کے پاس موٹر سائیکل بھی تھا۔ وہ رنگین کپڑے پہن کر کالج جاتے تھے اور بہت عرصہ تک میرے دل میں میٹرک پاس کرکے کالج میں داخلہ لینے کی خواہش کی ایک بڑی وجہ یہ تھی کہ میں رنگین کپڑے پہن کر کالج جایا کروں گا۔ سکول میں تو ہم رنگین کپڑے صرف تب پہنتے تھے جب سالانہ پکنک کا دن آتا تھا۔ تب سکول والے ہمیں کبھی ہرن مینار لے جاتے تھے کبھی شاہی قلعہ اور کبھی منگلا ڈیم۔ ہم بسوں میں بیٹھ کر، رنگین کپڑے پہن کر، کھانے پینے کی چیزیں ڈبوں لفافوں میں ڈال کر ان جگہوں پہ جاتے اور وہاں گھنٹہ دو گھنٹہ بے مقصد ادھر ادھر پھرتے۔ قلعے میں مغلوں کی بنائی بوسیدہ عمارات، ہرن مینار میں گندے پانی کا تالاب اور بےمقصد مینار، یا منگلا کی جھیل میں بھرا بےشمار فالتو پانی دیکھتے اور پھر بسوں میں بیٹھ کر واپس آ جاتے۔ لیکن اس سال جب ہم پکنک پر ہرن مینار گئے تو راستے میں فیضان نے، جو بس میں میرے ساتھ بیٹھا اونگھ رہا تھا، ایک دم ہڑبڑاکر قے کر دی جو تقریباً سب کی سب میرے اوپر آ گری۔ مجھ سے بو آنے لگی اور سب لڑکے دور ہٹ گئے۔ ہرن مینار پہنچ کر شوکت صاحب نے مجھ سے کہا کہ جا کے پانی سے اپنے آپ کو صاف کروں۔ وہاں کہیں پانی کا نلکا نہیں تھا اور مجھے ہرن مینار کے تالاب کے گندے سبز پانی سے اپنے آپ کو دھونا پڑا۔ وہ پانی بدبودار تھا اور ویسا ہی سبز جیسا کہ وہ لعاب تھا جو ہمارے پیارے ہیپی کی روح پرواز کرتے وقت اس کے منہ سے برآمد ہوا تھا۔ مگر وہ لعاب گاڑھا تھا جبکہ یہ مغلیہ پانی پتلا تھا۔

۔۔۔۔۔۔

ایک دن شام کے پانچ بج گئے اور نوید بھائی کالج سے نہ لوٹے۔ ویسے، عام حالات میں یہ کوئی ایسی خوفناک بات نہ تھی۔ یعنی گھر لوٹنے میں ذرا سی دیر سویر۔ مگر نوید بھائی کی کئی باتیں پچھلے دنوں سے ایسی رہی تھیں کہ ابا کچھ گھبرا گئے تھے کہ وہ کسی الٹے سیدھے کام میں نہ پڑ جائیں اور کارٹون کی شکل والے جنرل ضیاء کی حکومت کی زد میں نہ آ جائیں۔ ایک دن انھوں نے بیٹھے بیٹھے کھانے کی میز پر بہت غصے سے دانت بھینچ کر کہا تھا کہ ’’ہمیں اس یونین کے جاہل غنڈوں کو مزہ چکھانا چاہیے۔‘‘ ابا نے یہ سن کر انھیں گھورا تھا اور کہا تھاکہ تمہیں وہاں پڑھنے بھیجا ہے، ایسی فضول باتوں سے تعلق رکھنے نہیں۔ تمیز سے کالج جایا کرو اور تمیز سے واپس آیا کرو۔ خبردار جو یونین بازی میں پڑے اور ان خطرناک لوگوں کے منہ لگے۔ نوید بھائی یہ جھڑکی سن کر خاموش ہونے کی بجائے اور زور زور سے بولنے لگے تھے۔

’’یہ بدمعاش لوگ ہیں۔ جس طرح انھوں نے جنید کی ٹانگیں توڑیں، ان کی بھی ٹوٹنی چاہئیں۔ انکو جنرل ضیاء کی شہ ہے۔‘‘

ایک بار پہلے بھی ابا کے دماغ میں خطرے کی گھنٹی بجی تھی، جب نوید بھائی نے کہا تھا کہ وہ طالب علموں کی ایک بڑی جدت پسند اور جمہوریت پسند خفیہ تنظیم میں شامل ہونے والے ہیں، لیکن تب ابا نے انھیں بس ہلکا سا جھڑک دیا تھا اور کہا تھا کہ جنہوں نے ڈاکٹر بننا ہوتا ہے وہ ایسی فضول باتیں نہیں کرتے۔ یونین بازی خلاف قانون ہے لہٰذا خوامخواہ مصیبت میں پڑنے کی ضرورت نہیں ہے۔

پتا نہیں جنید کون تھا، جس بیچارے کی ٹانگیں ٹوٹ گئیں اور مجھے تو یہ بھی نہیں پتہ تھا کہ ’’یونین’’ کیا چیز تھی۔ لیکن جب ابا اور نوید بھائی نے زور زور سے بحث کی تویہ پتہ چل گیا، کہ کچھ خطرناک لوگ تھے جو ایک سیاسی جماعت کی طالبعلموں کی تنظیم کے کارکن بن کے کالجوں، یونیورسٹیوں میں منڈلاتے رہتے تھے۔ جس جماعت کی وہ ذیلی تنظیم تھے وہ خود کو مذہب کی ماہر اور علمبردار سمجھتی تھی۔ ابا اور نوید بھائی کی باتوں سے یہ بھی پتا چلا کہ یہ کارکن لڑکے مار پیٹ کے اور ڈرا دھمکا کے طالب علموں سے عجیب عجیب باتیں منوایا کرتے تھے: لڑکے لڑکیاں سڑک پہ اکٹھے نہ چلیں؛ اگر اشد ضرورت کی بنا پر کسی لڑکے کو لڑکی سے بات کرنی پڑ جائے تو دونوں میں سے کوئی ہر گز ہنستا نظر نہ آئے؛ ایسی اشد ضرورت کبھی نہ پڑے؛اور اس قسم کی مزید لایعنی باتیں جو ان کے عجیب و غریب دماغوں سے اکثر نکلتی رہتی تھیں۔ فیضان کے منہ سے نکلی قے کی طرح۔ انھوں نے بس ہمیشہ اسی قسم کی باتیں کی تھیں، اس کارٹون کی شکل والے بدمعاش جرنیل کے ایما پر اور کبھی کوئی قابل تعریف بات نہ کی تھی، جیسے اس بےحیا جرنیل نے کبھی نہیں کی تھی۔

جب نوید بھائی کی زبانی جنید بیچارے کی ٹوٹی ٹانگوں کا سن کر ابا اور زیادہ گھبرا گئے تو انگلی اٹھاکر، یعنی جیسے کسی بات پہ زور دینے یا تاکید کرنے کے لیے انگلی سے اشارہ کر دیا جائے، انھوں نے کہا کہ خبردار ان چکروں میں ہرگز مت پڑنا۔

سو اس روز پانچ بجے تک نوید بھائی نہ لوٹے تو ابا نے پہلے تو مصنوعی بے پرواہی ظاہر کی اور کہا کہ کوئی بات نہیں، آ جائےگا، مگر جب آدھا گھنٹہ اور گزرا تو انھوں نے کہا کہ کالج جاکے دیکھتے ہیں۔ نوید بھائی عام طور پہ ایسی غیر ذمہ دارانہ حرکتیں نہیں کرتے تھے۔ زیادہ سے زیادہ کبھی کالج سے کسی دوست کے ہاں چلے جاتے تھے، مگر تب بھی ہمیں ٹیلیفون کر دیتے تھے۔ 50924 ملاکر، جس کے ملانے سے ہمارے گھر میں فون کی گھنٹی بجتی تھی اور میں بہت خوش اور متجسس ہوتا تھا کہ نہ جانے چونگے کی دوسری جانب کون ہے جو یوں تاروں کے ذریعے اپنی آواز کو ہمارے فون کے چونگے تک بھیجنے کے لیے سرگرم ہے۔ ساڑھے پانچ بجے امی نے ٹیلیفون کی کاپی کھولی اور اس میں نوید بھائی کے جن جن دوستوں کے نمبر لکھے تھے، انھیں فون کرنے شروع کئے۔ یہ وہی کر سکتی تھیں کیونکہ فون کی ڈائری میں نمبر وہ اپنے ہی حساب سے لکھتی تھیں۔ حبیب بنک کے منیجر کا نمبرH’’‘‘ کی جگہ ’’M‘‘، یعنی ’’M’’سے منیجر، پہ تھا اور ان کے درزی رمضان کا نمبر R’’‘‘کی جگہ T’’‘‘پہ تھا۔ T’’‘‘سے ٹیلر۔ لیکن اس میں شکایت کی کوئی بات نہیں تھی کیونکہ وہ خود اس ڈائری میں سے بہت برق رفتاری سے نمبر ڈھونڈھ لیا کرتی تھیں۔ کبھی کبھی ابا کو نمبر ڈھونڈنا ہوتا تو وہ ان سے جھنجھلا کے کہتے کہ یہ کیا مصیبت ہے، آپ صحیح جگہ کیوں نہیں لکھتیں نمبر؟ امی تنک کر کہتیں کہ صحیح جگہ وہی ہے جہاں میں نے لکھے ہوئے ہیں۔ جب ابا کچھ بحث کرتے تو وہ کہتیں کہ آپ اپنی ڈائری الگ بنا لیں اور اس میں سب صحیح صحیح لکھیں اور مجھے میری یہ غلط ڈائری دے دیں۔ میں مرتے دم تک ایسے ہی لکھوں گی اور اگر بعد از مرگ کوئی ایسی زندگی ہوئی جس میں فون کی سہولت میسر ہوئی اور فون کی ڈائری کا کوئی دخل ہوا، تو تب بھی یہی کروں گی۔

امی نمبر ملاتی جاتی تھیں اور ساتھ ساتھ کہتی جاتی تھیں کہ خدا خیر کرے۔ خدا خیر کرے۔ ابا نے امی سے کہا کہ ڈرامائی نہ بنیں اور فی الحال صرف فون کریں۔ پھر مجھے کہا کہ میں ان کے ساتھ آؤں تا کہ ہم دونوں کالج سے کچھ پتہ لے کے آئیں۔ میں نے پوچھا کہ کیا بندوق اور کارتوس بھی لے لیں جس پر ابا نے مجھے خفگی سے دیکھا اور کہا:

’’چلو گاڑی میں بیٹھو‘‘ اور بڑبڑا کے ’’idiot’’ بھی کہا۔

۔۔۔۔۔۔

جب ہم کالج پہنچے تو اندھیرا چھا رہا تھا اور کالج کے بڑے گیٹ کے اندر ٹین کی چھتوں والے کار پارک میں ایک چوکیدار کرسی پہ فارغ بیٹھا تھا۔ ظاہر ہے کہ اس کا دماغ رفتہ رفتہ خراب ہو رہا تھا کیونکہ جب تک کوئی چور ڈاکو یا اور جرائم پیشہ افراد کالج پر حملہ آور نہ ہوتے اس کو کچھ نہیں کرنا تھا اور محض فارغ بیٹھنا تھا اور فارغ بیٹھنے والوں کے دماغوں میں عجیب عجیب خیالات آتے ہیں جس کی وجہ سے ان کے دماغ خراب ہونے کا خطرہ پیدا ہو جاتا۔

ابا نے گاڑی باہر کھڑی کی اور مجھ سے کہا کہ میں چھوٹے گیٹ سے اندر جاکر چوکیدار سے پوچھوں کہ کالج میں کوئی طالب علم ابھی تک موجود ہے کہ نہیں؟ چوکیدار نے بتایا کہ کافی دیر ہوئی سب جا چکے ہیں اور اگر کبھی کسی طالب علم کو کسی وجہ سے دیر تک کالج میں رہنا ہو تو چوکیدار کو اس کے بارے میں پہلے سے بتایا جاتا ہے۔ پھر اس نے یہ بھی کہا کہ اگر کوئی طالب علم چھپ کر اندر رہ گیا ہے تو اس کے بارے میں وہ کچھ نہیں کہہ سکتا البتہ اگر ایسا ہوا تو وہ طالب علم ضرور پکڑا جائےگا اور جب وہ پکڑا جائےگا تو اس کے ساتھ بہت ہی برا سلوک کیا جائےگا۔ یعنی عبرتناک اور سبق آموز سزادی جائےگی۔ یہ بات اس نے دانت پیس کر کہی تھی، غصے میں، یوں کہ جیسے کوئی طالب علم ابھی ابھی پکڑا ہی گیا ہو جو سب سے چھپ کر، چوکیدار سے خوف کھائے بغیر اندر کالج کی عمارتوں میں جان بوجھ کے رہ گیا تھا۔ کالج کی عمارتیں زرد زرد سی تھیں جن پر بہت عرصے سے روغن نہیں ہوا تھا اور ان کی دیواروں کے بیرونی نچلے حصے، جو زمین کے نزدیک تھے اور اوپر کے حصے، جہاں بارش کے پانی کی نکاسی کے لیے پر نالے لگے تھے، کائی زدہ تھے۔ ان عمارتوں میں لمبی لمبی اونچی چھتوں والی راہداریاں تھیں اور بڑے بڑے ہال کمرے جن میں آوازیں گونجتی تھیں اور تب تو بہت ہی گونجتی ہوں گی جب کالج انسانوں سے خالی ہو۔ ایسے ڈراؤنے کالج میں کیوں کوئی طالب علم جان بوجھ کر اکیلا رہ جائےگا؟ سب سے چھپ کے۔ بالکل لغو بات تھی جسے سوچ کر وہ چوکیدارخواہ مخواہ طیش میں آ رہا تھا۔ صاف ظاہر تھا کہ فارغ رہنے کی وجہ سے اس کا دماغ خراب ہو رہا تھا۔

ہم گھر لوٹے تو امی نوید بھائی کے ہر ممکن دوست کو فون کر چکی تھیں اور کسی سے کچھ پتا نہ چلا تھا۔ آصف نے انھیں بتایا تھا کہ تین بجے، سب کلاسوں کے بعد، نوید بھائی کالج سے نکل کر بس سٹاپ کی طرف روانہ ہو گئے تھے۔ یہ سن کر امی نے بڑے ترش لہجے میں کہا تھا کہ آپ کیسے دوست ہو؟ آپ کو بھی اس کے ساتھ ہی بس پر بیٹھنا چاہیے تھا۔ آصف نے بتایا کہ وہ بس پر نہیں بیٹھ سکتا تھا کیونکہ اسے روزگھر سے گاڑی لینے آتی ہے۔ امی نے جواباً ناگواری سے ’’ہنھ‘‘ کہا تھا اور فون بند کردیاتھا۔

کم از کم مجھے بالکل یاد نہیں تھا کہ پہلے کبھی یوں ہوا ہو کہ نوید بھائی اس طرح سارا دن گھر سے باہر رہے ہوں اور اندھیرا ہو جائے اور ہمیں معلوم نہ ہو کہ وہ کہاں ہیں۔ امی فون کے نزدیک ہی بیٹھی تھیں مگر ان کو کچھ سوجھ نہیں رہا تھا کہ اب کسے فون کریں۔ اسماعیل نے شام کی چائے رکھتے ہوئے کہا کہ وہ جاکے مارکیٹ میں دیکھ کر آتا ہے، کہیں نوید بھائی وہاں نہ ہوں۔ میں اس پر بہت حیران ہوا۔ مارکیٹ میں کیوں ہونا تھا انھوں نے؟ نوید بھائی شاید کبھی ہفتے میں ایک آدھ بار مارکیٹ چلے جاتے ہوں گے۔ کوئی ایسی شے خریدنے جس کے بارے میں اسماعیل کو سمجھانا مشکل ہو، مثلاً بجلی کی دوکان سے کوئی خاص قسم کا پلگ۔ ہاں، اسماعیل ایسا ضرور کرتا تھا کہ ایک چیز لینے بھیجو تو آدھا گھنٹہ لگا کے مارکیٹ سے واپس آتا تھا۔ بلا وجہ۔ پھر بھی امی نے کہا کہ ہاں، جاؤ، دیکھ کے آؤ۔ مگر جلدی آنا۔

امی نے شور مچانا شروع کیا کہ کتنی بری بات ہے کہ ابا کسی بھی ایسے اثر و رسوخ والے شخص کو نہیں جانتے جس سے اس وقت بات کی جا سکے اور کہا جائے کہ کچھ مدد کرے۔ ابا نے کہا کہ ابھی ایسی نوبت نہیں آئی۔ امی نے کہا کہ خدانہ کرے کہ ایسی نوبت آئے۔ اللہ بہتر کرے اور نوید بھائی خود ہی گھر واپس پہنچ جائیں، مگر یہ کہ وہ جانتی ہیں کہ اللہ ان کی مدد کرتا ہے جو اپنی مدد خود کرتے ہیں اور اگر کسی وجہ سے نوید بھائی گھر نہ پہنچے تو وہ جانتی ہیں کہ ہم کچھ نہ کر پائیں گے۔ ابا نے بس اتنا کہا کہ کھوئے ہوئے لوگوں کو ڈھونڈ نکالنا پولیس کا کام ہے۔ پولیس کو جاکے بتائیں گے تو وہ ڈھونڈ نکالے گی۔

یہ سن کر امی نے مایوسی سے آہ بلند کی اور فون کی طرف ہاتھ بڑھایا تاکہ آنٹی ارشد کو بتا سکیں کہ نوید بھائی کا کچھ پتا نہیں چل رہا اور ابا کیسی کتابی اور بیکار باتیں کررہے ہیں۔

آنٹی ارشد بھاگی بھاگی آن موجود ہوئیں اور آتے ہی کہا کہ یہ سب اس چڑیل کا کیا دھرا ہے اور امی کی غلطی ہے کہ انھوں نے آنٹی ارشد کی بات پر اس وقت کان نہ دھرا جب نوید بھائی کو ایسے اعلیٰ درجے کے کالج میں داخلہ ملا تھا۔ نوید بھائی کے داخلے کے موقع پر آنٹی ارشد نے امی سے کہا تھا کہ وہ گھر میں عورتوں کی دعوت کر کے قرآن خوانی کروائیں تاکہ جو جو لوگ حسد کی آگ میں جل رہے ہیں اور نوید بھائی کی اس کامیابی کے خلاف ٹونے اور دیگر جادوئی عمل کرنے میں مشغول ہونے والے ہیں، ان کی ایک نہ چلے اور یہ بھی کہا تھا کہ گھر میں یوں طرح طرح کی عورتوں کو بلا کے ان سے قرآن شریف پڑھوا کے ایسی مکروہ کوششوں کو ناکام بنا دینا ضروری ہے۔ ابا نے کہا تھا کہ یہ بالکل غیرضروری ہے اور آنٹی ارشد صرف دعوت اڑانا چاہتی ہیں۔ اگر کلام پاک پڑھنا ہی مقصود ہے تو امی خود پڑھ سکتی ہیں۔ آنٹی ارشد نے بتایا تھا کہ نہیں، جو بات ان کی تجویز کردہ عورتوں کے پڑھنے میں ہے وہ ایک بیچاری امی کے پڑھنے میں نہیں ہو سکتی۔

ابا اس بات پر بھی چڑے تھے کہ آئے روز لوگ کالجوں میں داخل ہوتے ہیں، اس میں ایسی کیا خاص بات ہو گئی ہے کہ آنٹی ارشد ایسی تجویز دے رہی ہیں۔ سو انھوں نے ویسی قرآن خوانی منعقد نہ ہونے دی جیسی آنٹی ارشد چاہتی تھیں۔ آنٹی ارشد تب بہت بڑبڑائی تھیں اور اب اس موقع پر انھوں نے ابا کی طرف دیکھ کر کہا:

’’ویکھیا؟ اوس چڑیل دا جادو کم کر گیا اے۔ ہائے توں میری گل نہیں منی نا۔ میں اینا کہیا سی۔ بھاویں توں صرف نان حلیم تے کشمیری چائے رکھ لیندی۔ پر لیڈیز نوں بلانا بڑا ضروری سی‘‘(4)

ابا کو غصہ آنے لگا۔ انھوں نے آنٹی ارشد سے کہا کہ وہ فضول باتیں نہ کریں کیونکہ ابھی ایسا کچھ نہیں ہوا جس کی بنا پہ ایسی آہ و بکا کو یوں بلند کیا جا سکے۔ پھر انھوں نے مجھے اپنے ساتھ آنے کے لیے کہا۔ تھانے۔

اندھیرا مکمل چھا چکا تھا جب ہم اپنے ماڈل ٹاؤن کے تھانے جانے کے لیے نکلے جو میں نے آج تک کبھی اندر جاکے نہیں دیکھا تھا مگر اس کی دیوار کے اوپر سے ایک بار کچھ عرصہ پہلے جھانک چکا تھا جب ادھر سے گزرتے ہوئے مجھے اور عاقب کو وہاں اندر سے کسی کی ہولناک چیخیں سنائی دی تھیں۔ تب، جب ہم دونوں نے اپنے دونوں ہاتھ دیوار پر رکھ کے اوپر اچک کے اندر جھانکا تھا تو دیکھا تھا کہ پولیس والے ایک آدمی کو زور زور سے اپنی چھڑیوں سے مار رہے تھے اور وہ کہتا جاتا تھا:

’’آئے لا۔۔۔ آئے لا۔۔۔ آئے لا جی۔۔۔‘‘

یعنی کہ ’’ہائے اللہ۔۔۔ہائے اللہ۔۔۔ہائے اللہ جی۔۔۔۔‘‘

مجھے اس دن سے یہ اچھی طرح معلوم تھا کہ میرے دل میں ایسی کوئی تمناّ نہیں کہ میں اس عمارت کے اندر جاؤں، جو گھر نما تھی اور زرد رنگ کی، جس کا مطلب ہے کہ یہ عمارت بہت پرانی تھی کیونکہ پرانی زرد زرد عمارتیں عام طور پہ وہ تھیں جنھیں ہندو اپنے زمانے میں تعمیر کرکے گئے تھے۔ ہندوؤں کے زمانے سے مطلب ہے لگ بھگ وہ یا اس سے پہلے کا وقت جب ابھی یہ سب، لاہور، کراچی،سرگودھا وغیرہ پاکستان نہیں بلکہ ہندوستان ہی میں تھے۔یہ بات نہیں کہ اس زمانے میں یہاں مسلمان ہوتے نہیں تھے، کیونکہ مسلمان تو بہت عرصہ پہلے مناسب موقع دیکھ کے یہاں ہندوستان میں آن موجود ہوئے تھے، مگر یہ کہ تب ان علاقوں میں ہندو بھی بے شمار ہوتے تھے کیونکہ وہ یہاں بہت پہلے سے قیام پذیر تھے۔ ان میں سے کئی یہیں ہمارے ماڈل ٹاؤن میں بھی رہتے تھے۔ بٹوارے کے وقت تک۔ یعنی اس وقت تک جب ابھی ڈاکٹر صاحب کے ایک خواب دیکھنے کے نتیجے میں پاکستان وجود میں نہیں آیا تھا۔ ڈاکٹر صاحب، یعنی علامہ محمد اقبال، جن کے بارے میں بے شمار کتب اور رسائل میں یہ صاف صاف درج ہے کہ وہ ایک اعلیٰ درجے کے شخص تھے اور ان کی تحریر کردہ کتب پڑھ کے یہ فی الفور معلوم ہو جاتا ہے کہ وہ دیگر علمی اور دینی باتوں کے علاوہ انتہائی اونچے درجے کی شاعری میں مہارت رکھتے تھے۔ گویہ اور بات ہے کہ اب میں کسی بات کا، کسی بھی بات کا یقین نہیں کرتا، چاہے وہ کسی کتاب میں لکھی ہو یا رسالے میں، جب تک خود اس بات کا تجربہ نہ کرلوں اور تب بھی اکثر سوچتا ہوں کہ کہیں یہ تجربہ کسی شعبدے کا نتیجہ نہ ہو۔