Best Minnat shayari

dard minnat-kash-e-davā na huā

maiñ na achchhā huā burā na huā

dard minnat-kash-e-dawa na hua

main na achchha hua bura na hua

kartā rahā maiñ minnateñ kam kī na kuchh duā

hāsil huā na kuchh to ḳhudā be-asar lagā

karta raha main minnaten kam ki na kuchh dua

hasil hua na kuchh to KHuda be-asar laga

vahshat meñ bhī minnat-kash-e-sahrā nahīñ hote

kuchh log bikhar kar bhī tamāshā nahīñ hote

wahshat mein bhi minnat-kash-e-sahra nahin hote

kuchh log bikhar kar bhi tamasha nahin hote

minnat-o-ājizī o zārī-o-āh

tere aage hazār kar dekhā

minnat-o-ajizi o zari-o-ah

tere aage hazar kar dekha

har nafas minnat-kash-e-ālām hai

zindagī shāyad isī kā naam hai

har nafas minnat-kash-e-alam hai

zindagi shayad isi ka nam hai

fanā hone meñ soz-e-sham.a kī minnat-kashī kaisī

jale jo aag meñ apnī use parvāna kahte haiñ

fana hone mein soz-e-shama ki minnat-kashi kaisi

jale jo aag mein apni use parwana kahte hain

haa.e us minnat-kash-e-vahm-o-gumāñ kī justujū

zindagī jis ko na paa.e jo na paa.e zindagī

hae us minnat-kash-e-wahm-o-guman ki justuju

zindagi jis ko na pae jo na pae zindagi

maiñ ne minnat kabhī kī ho to batā deñ zāhid

kaun se roz sifārish ko gunahgār aayā

main ne minnat kabhi ki ho to bata den zahid

kaun se roz sifarish ko gunahgar aaya

kab ye dil o dimāġh hai minnat-e-sham.a khīñchiye

ḳhāna-e-dil-jaloñ ke biich dāġh-e-jigar charāġh hai

kab ye dil o dimagh hai minnat-e-shama khinchiye

KHana-e-dil-jalon ke bich dagh-e-jigar charagh hai

ḳhushāmad tābedārī minnat-o-ḳhidmat sujūd-e-husn

azal se dīdanī hai bebasī-o-ājizī-e-ishq

KHushamad tabedari minnat-o-KHidmat sujud-e-husn

azal se didani hai bebasi-o-ajizi-e-ishq