جشن ریختہ 2022: گرینڈ مشاعرہ

مجھے شراب پلائی گئی ہے آنکھوں سے

مرا نشہ تو ہزاروں برس میں اترے گا

کچھ نہ کچھ بولتے رہو ہم سے

چپ رہو گے تو لوگ سن لیں گے

جس کو ہر وقت دیکھتا ہوں میں

اس کو بس ایک بار دیکھا ہے

لگتا ہے کہیں پیار میں تھوڑی سی کمی تھی

اور پیار میں تھوڑی سی کمی کم نہیں ہوتی

بجھی بجھی سی یہ باتیں دھواں دھواں لہجہ

کسی عذاب میں اندر سے جل رہے ہو کیا

اسی خطا پہ بجھائے گئے چراغ مرے

میں جانتا تھا بہت کچھ ہوا کے بارے میں

سوال تھا کہ جستجو عظیم ہے کہ آرزو

سو یوں ہوا کہ عمر بھر جواب لکھ رہے تھے ہم

پہلے ڈالی ترے چہرے پہ بہت دیر نظر

عید کا چاند تو پھر بعد میں دیکھا میں نے

تیرے رونے کی خبر رکھتی ہیں آنکھیں میری

تیرا آنسو مرے رومال میں آ جاتا ہے

زندگی سے محبت کرو ٹوٹ کر

موت کا کام دشوار کرتے رہو

جس صدی میں وفا کا چلن ہی نہیں

ہم بنائے گئے اس صدی کے لئے

دیوانگی کا سبب پوچھا جا رہا تھا مری

میں چپ تھا اور ہجوم اس کا نام لے رہا تھا

اس وقت کے صدموں نے مجھے چاٹ لیا ہے

جو وقت ابھی میں نے گزارا بھی نہیں تھا

آسماں کی نظر سے بچتے ہوئے

اک ستارہ اٹھا لیا میں نے

ہمیں بھی وقت کے طوفان مل کر کھا گئے آخر

ہر اک کشتی کو مل جاتا ہے ساحل ہم بھی کہتے تھے

وقت ہوتا ہے بے وفا یارو

آدمی بے وفا نہیں ہوتا

خاموش تم تھے اور مرے ہونٹ بھی تھے بند

پھر اتنی دیر کون تھا جو بولتا رہا

اداسی اکیلے میں ڈر جائے گی

گھڑی دو گھڑی کو خوشی بھیج دے