جشن ریختہ 2022 کے نوجوان شعرا

تم اس کے پاس ہو جس کو تمہاری چاہ نہ تھی

کہاں پہ پیاس تھی دریا کہاں بنایا گیا

میرے علاوہ اسے خود سے بھی محبت ہے

اور ایسا کرنے سے وہ بے وفا نہیں ہوتی

وہ صاف گو ہے مگر بات کا ہنر سیکھے

بدن حسیں ہے تو کیا بے لباس آئے گا

دکھاوا ہی کرنا ہے تو پھر بڑا کر

تو شاعر نہیں خود کو عاشق کہا کر

آئیے پاس بیٹھیے میرے

مل کے کچھ فاصلے بناتے ہیں

تمہارے خط میں نظر آئی اتنی خاموشی

کہ مجھ کو رکھنے پڑے اپنے کان کاغذ پر

انھوں نے اپنے مطابق سزا سنا دی ہے

ہمیں سزا کے مطابق بیان دینا ہے

صرف شکوے دکھ رہے ہیں یہ نہیں دکھتا تجھے

تجھ سے شکوے رکھنے والا تیرا دیوانہ بھی ہے

میری تو جان ہی نکل گئی جب

دوست کہہ کر مجھے پکارا گیا

غموں سے بیر تھا سو ہم نے خود کشی کر لی

شجر گرا کے پرندوں سے انتقام لیا

بے فکر رہو یارو میں آج بھی ہوں برباد

دن پھر گئے ہیں میرے افواہ اڑی ہوگی

سچ نہیں ہے اناج کی قلت

یار فاقے یہاں ضمیر کے ہیں

اب کے ملی شکست مری اور سے مجھے

جتوا دیا گیا کسی کمزور سے مجھے

وہ خوش ہوا کہ اس کو خسارا نہیں ہوا

میں رو رہا تھا میرا سہارا چلا گیا

میں ابھی ہنستا اٹھوں اور چہکنے لگ جاؤں

پر یہ مشکل ہے مرا یار نہیں مان رہا

کوزہ جیسے کہ چھلک جائے ہے بھر جانے پر

کوئی آنسو ہی بہا دے مرے مر جانے پر