Best Tea Shayari

zarā sī chaa.e girī aur daaġh daaġh varaq

ye zindagī hai ki aḳhbār kā tarāshā hai

zara si chae giri aur dagh dagh waraq

ye zindagi hai ki aKHbar ka tarasha hai

aaj to jaise din ke saath dil bhī ġhurūb ho gayā

shaam kī chaa.e bhī ga.ī maut ke Dar ke saath saath

aaj to jaise din ke sath dil bhi ghurub ho gaya

sham ki chae bhi gai maut ke Dar ke sath sath

cigareteñ chaa.e dhuāñ raat ga.e tak bahseñ

aur koī phuul sā āñchal kahīñ nam hotā hai

cigareten chae dhuan raat gae tak bahsen

aur koi phul sa aanchal kahin nam hota hai

aaj phir chaa.e banāte hue vo yaad aayā

aaj phir chaa.e meñ pattī nahīñ Daalī maiñ ne

aaj phir chae banate hue wo yaad aaya

aaj phir chae mein patti nahin Dali main ne

chhoḌ aayā thā mez par chaa.e

ye judā.ī kā isti.ārā thā

chhoD aaya tha mez par chae

ye judai ka istiara tha

ka.ī jhameloñ meñ uljhī sī bad-maza chaa.e

udaas mez pe daftar ke kāġhzāt kā dukh

kai jhamelon mein uljhi si bad-maza chae

udas mez pe daftar ke kaghzat ka dukh

bikhartā jaatā hai kamre meñ cigaretoñ kā dhuāñ

paḌā hai ḳhvāb koī chaa.e kī pyālī meñ

bikharta jata hai kamre mein cigareton ka dhuan

paDa hai KHwab koi chae ki pyali mein

tujh meñ kas-bal hai to duniyā ko bahā kar le jā

chaa.e kī pyālī meñ tūfān uThātā kyā hai

tujh mein kas-bal hai to duniya ko baha kar le ja

chae ki pyali mein tufan uThata kya hai

ghī misrī bhī bhej kabhī aḳhbāroñ meñ

ka.ī dinoñ se chaa.e hai kaḌvī yā allāh

ghi misri bhi bhej kabhi aKHbaron mein

kai dinon se chae hai kaDwi ya allah

qumqumoñ kī tarah qahqahe jal bujhe

mez par chaa.e kī pyāliyāñ rah ga.iiñ

qumqumon ki tarah qahqahe jal bujhe

mez par chae ki pyaliyan rah gain