EID KE CHAAND:NA JAANE KABSE TERA INTIZAAR THA

pūchhā jo un se chāñd nikaltā hai kis tarah

zulfoñ ko ruḳh pe Daal ke jhaTkā diyā ki yuuñ

puchha jo un se chand nikalta hai kis tarah

zulfon ko ruKH pe Dal ke jhaTka diya ki yun

eid kā chāñd tum ne dekh liyā

chāñd kī eid ho ga.ī hogī

eid ka chand tum ne dekh liya

chand ki eid ho gai hogi

vo chāñd kah ke gayā thā ki aaj niklegā

to intizār meñ baiThā huā huuñ shaam se maiñ

wo chand kah ke gaya tha ki aaj niklega

to intizar mein baiTha hua hun sham se main

jis taraf tū hai udhar hoñgī sabhī kī nazreñ

iid ke chāñd kā dīdār bahāna hī sahī

jis taraf tu hai udhar hongi sabhi ki nazren

id ke chand ka didar bahana hi sahi

dekhā hilāl-e-eid to aayā terā ḳhayāl

vo āsmāñ kā chāñd hai tū merā chāñd hai

dekha hilal-e-eid to aaya tera KHayal

wo aasman ka chand hai tu mera chand hai

mujh ko ma.alūm hai mahbūb-parastī kā azaab

der se chāñd nikalnā bhī ġhalat lagtā hai

mujh ko malum hai mahbub-parasti ka azab

der se chand nikalna bhi ghalat lagta hai

māh-e-nau dekhne tum chhat pe na jaanā hargiz

shahr meñ eid kī tārīḳh badal jā.egī

mah-e-nau dekhne tum chhat pe na jaana hargiz

shahr mein eid ki tariKH badal jaegi

ai kaash hamārī qismat meñ aisī bhī koī shaam aa jaa.e

ik chāñd falak par niklā ho ik chāñd sar-e-bām aa jaa.e

ai kash hamari qismat mein aisi bhi koi sham aa jae

ek chand falak par nikla ho ek chand sar-e-baam aa jae

iid ke ba.ad vo milne ke liye aa.e haiñ

iid kā chāñd nazar aane lagā iid ke ba.ad

id ke baad wo milne ke liye aae hain

id ka chand nazar aane laga id ke baad

lutf-e-shab-e-mah ai dil us dam mujhe hāsil ho

ik chāñd baġhal meñ ho ik chāñd muqābil ho

lutf-e-shab-e-mah ai dil us dam mujhe hasil ho

ek chand baghal mein ho ek chand muqabil ho

dekhā hilāl-e-īd to tum yaad aa ga.e

is mahviyat meñ iid hamārī guzar ga.ī

dekha hilal-e-id to tum yaad aa gae

is mahwiyat mein id hamari guzar gai

tū aa.e to mujh ko bhī

iid kā chāñd dikhā.ī de

tu aae to mujh ko bhi

id ka chand dikhai de

muddatoñ ba.ad kabhī ai nazar aane vaale

iid kā chāñd na dekhā tirī sūrat dekhī

muddaton baad kabhi ai nazar aane wale

id ka chand na dekha teri surat dekhi

chhup gayā eid kā chāñd nikal kar der huī par jaane kyoñ

nazreñ ab tak Tikī huī haiñ masjid ke mīnāroñ par

chhup gaya eid ka chand nikal kar der hui par jaane kyon

nazren ab tak Tiki hui hain masjid ke minaron par

tū na aa.egā to ho jā.eñgī ḳhushiyāñ sab ḳhaak

iid kā chāñd bhī ḳhālī kā mahīna hogā

tu na aaega to ho jaengi KHushiyan sab KHak

id ka chand bhi KHali ka mahina hoga

shaam ke saa.e bālishtoñ se naape haiñ

chāñd ne kitnī der lagā dī aane meñ

sham ke sae baalishton se nape hain

chand ne kitni der laga di aane mein

merī to por por meñ ḳhushbū sī bas ga.ī

us par tirā ḳhayāl hai aur chāñd-rāt hai

meri to por por mein KHushbu si bas gai

us par tera KHayal hai aur chand-raat hai

kyuuñ ishāra hai ufuq par aaj kis kī diid hai

alvidā.a māh-e-ramazāñ vo hilāl-e-īd hai...

kyun ishaara hai ufuq par aaj kis ki did hai

alwidaa mah-e-ramazan wo hilal-e-id hai

nikle haiñ ghar se dekhne ko log māh-e-īd

aur dekhte haiñ abrū-e-ḳhamdār kī taraf

nikle hain ghar se dekhne ko log mah-e-id

aur dekhte hain abru-e-KHamdar ki taraf

usī kī shakl mujhe chāñd meñ nazar aa.e

vo māh-ruḳh jo lab-e-bām bhī nahīñ aatā

usi ki shakl mujhe chand mein nazar aae

wo mah-ruKH jo lab-e-baam bhi nahin aata

chheḌā hai ek naġhma-e-shīrīñ bhī kū-ba-kū

dil ne hilāl-e-īd kī tā.īd ke liye

chheDa hai ek naghma-e-shirin bhi ku-ba-ku

dil ne hilal-e-id ki taid ke liye

chāñd niklā hai ba-andāz-e-digar aaj kī shaam

bārish-e-nūr hai tā-hadd-e-nazar aaj kī shaam

chand nikla hai ba-andaz-e-digar aaj ki sham

barish-e-nur hai ta-hadd-e-nazar aaj ki sham