Top 10 couplets of Aziz Hamid Madni

jo baat dil meñ thī us se nahīñ kahī ham ne

vafā ke naam se vo bhī fareb khā jaatā

jo baat dil mein thi us se nahin kahi hum ne

wafa ke nam se wo bhi fareb kha jata

merī vafā hai us kī udāsī kā ek baab

muddat huī hai jis se mujhe ab mile hue

meri wafa hai us ki udasi ka ek bab

muddat hui hai jis se mujhe ab mile hue

ḳhuuñ huā dil ki pashīmān-e-sadāqat hai vafā

ḳhush huā jī ki chalo aaj tumhāre hue log

KHun hua dil ki pashiman-e-sadaqat hai wafa

KHush hua ji ki chalo aaj tumhaare hue log

Tilism-e-ḳhvāb-e-zuleḳhā o dām-e-barda-farosh

hazār tarah ke qisse safar meñ hote haiñ

Tilism-e-KHwab-e-zuleKHa o dam-e-barda-farosh

hazar tarah ke qisse safar mein hote hain

ḳhudā kā shukr hai tū ne bhī maan lī mirī baat

rafū purāne dukhoñ par nahīñ kiyā jaatā

KHuda ka shukr hai tu ne bhi man li meri baat

rafu purane dukhon par nahin kiya jata

vo log jin se tirī bazm meñ the hañgāme

ga.e to kyā tirī bazm-e-ḳhayāl se bhī ga.e

wo log jin se teri bazm mein the hangame

gae to kya teri bazm-e-KHayal se bhi gae

kah sakte to ahvāl-e-jahāñ tum se hī kahte

tum se to kisī baat kā pardā bhī nahīñ thā

kah sakte to ahwal-e-jahan tum se hi kahte

tum se to kisi baat ka parda bhi nahin tha

baiTho jī kā bojh utāreñ donoñ vaqt yahīñ milte haiñ

duur duur se aane vaale raste kahīñ kahīñ milte haiñ

baiTho ji ka bojh utaren donon waqt yahin milte hain

dur dur se aane wale raste kahin kahin milte hain

shahr jin ke naam se zinda thā vo sab uTh ga.e

ik ishāre se talab kartā hai vīrāna mujhe

shahr jin ke nam se zinda tha wo sab uTh gae

ek ishaare se talab karta hai virana mujhe

diloñ kī uqda-kushā.ī kā vaqt hai ki nahīñ

ye aadmī kī ḳhudā.ī kā vaqt hai ki nahīñ

dilon ki uqda-kushai ka waqt hai ki nahin

ye aadmi ki KHudai ka waqt hai ki nahin