Top 10 couplets of Bhartendu Harishchandra

aa jaa.e na dil aap kā bhī aur kisī par

dekho mirī jaañ aañkh laḌānā nahīñ achchhā

aa jae na dil aap ka bhi aur kisi par

dekho meri jaan aankh laDana nahin achchha

ye chaar din ke tamāshe haiñ aah duniyā ke

rahā jahāñ meñ sikandar na aur na jam baaqī

ye chaar din ke tamashe hain aah duniya ke

raha jahan mein sikandar na aur na jam baqi

na bosa lene dete haiñ na lagte haiñ gale mere

abhī kam-umr haiñ har baat par mujh se jhijakte haiñ

na bosa lene dete hain na lagte hain gale mere

abhi kam-umr hain har baat par mujh se jhijakte hain

ruḳh-e-raushan pe us kī gesū-e-shab-gūñ laTakte haiñ

qayāmat hai musāfir rāsta din ko bhaTakte haiñ

ruKH-e-raushan pe us ki gesu-e-shab-gun laTakte hain

qayamat hai musafir rasta din ko bhaTakte hain

kisī pahlū nahīñ chain aatā hai ushshāq ko tere

taḌapte haiñ fuġhāñ karte haiñ aur karvaT badalte haiñ

kisi pahlu nahin chain aata hai ushshaq ko tere

taDapte hain fughan karte hain aur karwaT badalte hain

jahāñ dekho vahāñ maujūd merā kirshn pyārā hai

usī kā sab hai jalva jo jahāñ meñ āshkārā hai

jahan dekho wahan maujud mera kirshn pyara hai

usi ka sab hai jalwa jo jahan mein aashkara hai

but-e-kāfir jo tū mujh se ḳhafā ho

nahīñ kuchh ḳhauf merā bhī ḳhudā hai

but-e-kafir jo tu mujh se KHafa ho

nahin kuchh KHauf mera bhi KHuda hai

ġhāfil itnā husn pe ġhurra dhyān kidhar hai tauba kar

āḳhir ik din sūrat ye sab miTTī meñ mil jā.egī

ghafil itna husn pe ghurra dhyan kidhar hai tauba kar

aaKHir ek din surat ye sab miTTi mein mil jaegi

masal sach hai bashar kī qadar ne.amat ba.ad hotī hai

sunā hai aaj tak ham ko bahut vo yaad karte haiñ

masal sach hai bashar ki qadar neamat baad hoti hai

suna hai aaj tak hum ko bahut wo yaad karte hain

chhānī kahāñ na ḳhaak na paayā kahīñ tumheñ

miTTī mirī ḳharāb abas dar-ba-dar huī

chhani kahan na KHak na paya kahin tumhein

miTTi meri KHarab abas dar-ba-dar hui