آنسو

چلو

تمہاری آنکھ کے گوشے میں آخرش اک اشک

مقیم ہو ہی گیا جاگزین ہو ہی گیا

یہ اشک ایسا ہے

جیسے کہ منجمد بلور

نہیں ہے جس کی دمک بہر زینت عالم

یہ وہ ہے

جو ہے صداقت کا اک نمائندہ

تمہاری ذات میں ضم کر چکا ہے اپنے تئیں

یہ اشک وہ ہے کہ جو تم سے ہی ہے وابستہ

ہمیشہ ساتھ تمھارے ہے پاسباں کی طرح

ہنسی خوشی میں بھی شرکت ہے اس کی غم میں بھی

تمہارا ساتھ نبھاتا ہے کتنا مخلص ہے

ہزاروں یادوں کو لاتا ہے سامنے اکثر

تمہارے ساتھ ہی رہتا ہے تم نہیں تنہا