ek anokhe din me.n vaardaat-e-qatl

jis ghaḌī vo chalā

tausan-e-vaqt kī piiTh par baiTh kar

teġh ek haath meñ

dūsre haath meñ le ke

jis ghaḌī is vatan ke dar-o-bām meñ

kunj-e-zindāñ kī hasrat bharī shaam meñ

vo havā.eñ chalīñ

jin meñ shāmil the imkān ke nāma-bar

us ghaḌī muntahī

apnī ḳhushiyoñ ke chāñdoñ se jholī bhare

sū-e-dasht-e-falak apne ghar se chalī

ye batāne ki ab zindagī ke har ik kohna andāz kī ho chukī intihā

ye batāne ki ab ho rahī hai na.e daur kī ibtidā

us ke kamre meñ us kī thakī māñdī maañ

be-ḳhayālī kī phailī huī dhund ke darmiyāñ

us kī darsī kitāboñ ke aurāq se khelte khelte

ḳhud-kalāmī meñ thī

merī nūr-e-nazar

dushmanoñ kī nigāheñ bahut tez haiñ

un se karnā hazar

us kā ye vasvasa be-haqīqat na thā

vāqa'ī is ghaḌī ḳhanjar-e-bad-guhar

us kī nūr-e-nazar ke ta'āqub meñ thā

us ke hulqūm par thī 'adū kī nazar

sub.h-dam jis ghaḌī

us ke lāshe ke chehre se chādar haTī

to gulāboñ kī mahkār vahshī huī

aur chādar tale surḳh phūloñ ke daste huvaidā hue

aur darsī kitāboñ ke aurāq meñ

jur.at-o-āgahī ke vo saare sabaq

jo ki mahzūf the phir numāyāñ hue

be-hunar aur saada varaq kī jabīñ

in hadoñ kī lakīroñ se raushan huī

jin kā naqsha 'adū ke siyah haath se

paarā paarā huā

us kī chādar schōloñ meñ paltī huī

naujavāñ ārzūoñ kā parcham banī

jo khulā aur phir

az-nazar tā-nazar phailtā hī gayā

sāhilī bastiyoñ ke farāzoñ pe chhātā huā

tund-ḳhū shāh-rāhoñ pe bojhal daraḳhtoñ pe saaya banā

khiḌkiyoñ meñ gharoñ kī chhatoñ par

dukānoñ ke shelfoñ pe zāhir huā

aur yuuñ muntahī dekhte dekhte

ūñche sāhil pe bikhrī huī bastiyoñ ke dar-o-bām par

āsmāñ kī tarah ḳhema-zan ho ga.ī

muntahā laash hai par use qatl kis ne kiyā kab kiyā

kaun hai jo kahe maiñ ne maarā use

use kaun maslūb kartā ki jo

sū-e-dasht-e-falak

ghar se naqsh-e-fanā le ke ruḳhsat huī

apnī ḳhushiyoñ ke chāñdoñ se jholī bhare

ye batāne ki ab zindagī ke har ik kohna andāz kī

ho chukī intihā

ye batāne ki ab ho rahī hai na.e daur kī ibtidā

jis ghaDi wo chala

tausan-e-waqt ki piTh par baiTh kar

tegh ek hath mein

dusre hath mein le ke

jis ghaDi is watan ke dar-o-baam mein

kunj-e-zindan ki hasrat bhari sham mein

wo hawaen chalin

jin mein shamil the imkan ke nama-bar

us ghaDi muntahi

apni KHushiyon ke chandon se jholi bhare

su-e-dasht-e-falak apne ghar se chali

ye batane ki ab zindagi ke har ek kohna andaz ki ho chuki intiha

ye batane ki ab ho rahi hai nae daur ki ibtida

us ke kamre mein us ki thaki mandi man

be-KHayali ki phaili hui dhund ke darmiyan

us ki darsi kitabon ke auraq se khelte khelte

KHud-kalami mein thi

meri nur-e-nazar

dushmanon ki nigahen bahut tez hain

un se karna hazar

us ka ye waswasa be-haqiqat na tha

waqa'i is ghaDi KHanjar-e-bad-guhar

us ki nur-e-nazar ke ta'aqub mein tha

us ke hulqum par thi 'adu ki nazar

subh-dam jis ghaDi

us ke lashe ke chehre se chadar haTi

to gulabon ki mahkar wahshi hui

aur chadar tale surKH phulon ke daste huwaida hue

aur darsi kitabon ke auraq mein

jurat-o-agahi ke wo sare sabaq

jo ki mahzuf the phir numayan hue

be-hunar aur sada waraq ki jabin

in hadon ki lakiron se raushan hui

jin ka naqsha 'adu ke siyah hath se

para para hua

us ki chadar schoolon mein palti hui

naujawan aarzuon ka parcham bani

jo khula aur phir

az-nazar ta-nazar phailta hi gaya

sahili bastiyon ke faraazon pe chhata hua

tund-KHu shah-rahon pe bojhal daraKHton pe saya bana

khiDkiyon mein gharon ki chhaton par

dukanon ke shelfon pe zahir hua

aur yun muntahi dekhte dekhte

unche sahil pe bikhri hui bastiyon ke dar-o-baam par

aasman ki tarah KHema-zan ho gai

muntaha lash hai par use qatl kis ne kiya kab kiya

kaun hai jo kahe main ne mara use

use kaun maslub karta ki jo

su-e-dasht-e-falak

ghar se naqsh-e-fana le ke ruKHsat hui

apni KHushiyon ke chandon se jholi bhare

ye batane ki ab zindagi ke har ek kohna andaz ki

ho chuki intiha

ye batane ki ab ho rahi hai nae daur ki ibtida