تجھ سے کہا تھا میں نے کل اے بے_نظیر_خوش_لقا

تجھ سے کہا تھا میں نے کل اے بے نظیر خوش لقا

اے رشک سے تیرے فلک پر چاند دہرا ہو گیا

امروز تو جو کچھ بھی ہے حاجب تھا تو سلطاں بنا

تو یوسف کنعاں بنا تو حسن نور مصطفیٰ

امشب ستائش میں نے کی کل ہوگی برتر اے پری

کل یہ زمین و آسماں تعریف میں ہوں گے فنا

امشب غنیمت ہے مجھے نوکر ہوں میں چاکر ترا

ہوں گے فرشتے حمد خواں کل عرش پھاڑے گا قبا

ناگاہ صرصر آئے گی یہ بام ہوگا اور نہ در

مٹ جائیں گے سب بد نفس کیڑے مکوڑوں کی طرح

آندھی چلے گی جب تری تابندہ اس میں ہوگا تو

ہر ذرہ ہنستا پائے گا اس نور میں شمس الضحیٰ

وہ دلربائی پائیں گے پہلے نہ تھی ان میں کبھی

تعلیم ذرے پائیں گے اے آفتاب خوش لقا