مجھے زنجیر کر رکھا ہے ان شہری غزالوں نے

نہیں معلوم میرے بعد ویرانوں پہ کیا گزری

سو سو ہیں التفات تغافل میں یار کے

بیگانگی سے اس کی کوئی آشنا نہیں

عمر فریاد میں برباد گئی کچھ نہ ہوا

نالہ مشہور غلط ہے کہ اثر کرتا ہے

خلوت ہو اور شراب ہو معشوق سامنے

زاہد تجھے قسم ہے جو تو ہو تو کیا کرے

تصور اس دہان تنگ کا رخصت نہیں دیتا

جو ٹک دم مار سکتے ہم تو کچھ فکر سخن کرتے

مصر میں حسن کی وہ گرمئ بازار کہاں

جنس تو ہے پہ زلیخا سا خریدار کہاں

اگرچہ عشق میں آفت ہے اور بلا بھی ہے

نرا برا نہیں یہ شغل کچھ بھلا بھی ہے

اس اشک و آہ میں سودا بگڑ نہ جائے کہیں

یہ دل کچھ آب رسیدہ ہے کچھ جلا بھی ہے

چشم تر پر گر نہیں کرتا ہوا پر رحم کر

دے لے ساقی ہم کو مے یہ ابر باراں پھر کہاں

یہ وہ آنسو ہیں جن سے زہرہ آتش ناک ہو جاوے

اگر پیوے کوئی ان کو تو جل کر خاک ہو جاوے

سریر سلطنت سے آستان یار بہتر تھا

ہمیں ظل ہما سے سایۂ دیوار بہتر تھا

حق مجھے باطل آشنا نہ کرے

میں بتوں سے پھروں خدا نہ کرے

دوستی بد بلا ہے اس میں خدا

کسی دشمن کو مبتلا نہ کرے

کیا بدن ہوگا کہ جس کے کھولتے جامے کا بند

برگ گل کی طرح ہر ناخن معطر ہو گیا