har ek raat ko mahtāb dekhne ke liye

maiñ jāgtā huuñ tirā ḳhvāb dekhne ke liye

har ek raat ko mahtab dekhne ke liye

main jagta hun tera KHwab dekhne ke liye

ye aur baat ki āñdhī hamāre bas meñ nahīñ

magar charāġh jalānā to iḳhtiyār meñ hai

ye aur baat ki aandhi hamare bas mein nahin

magar charagh jalana to iKHtiyar mein hai

apnī tasvīr banāoge to hogā ehsās

kitnā dushvār hai ḳhud ko koī chehrā denā

apni taswir banaoge to hoga ehsas

kitna dushwar hai KHud ko koi chehra dena

ġhazal kā sher to hotā hai bas kisī ke liye

magar sitam hai ki sab ko sunānā paḌtā hai

ghazal ka sher to hota hai bas kisi ke liye

magar sitam hai ki sab ko sunana paDta hai

rāsto kyā hue vo log ki āte-jāte

mere ādāb pe kahte the ki jiite rahiye

rasto kya hue wo log ki aate-jate

mere aadab pe kahte the ki jite rahiye

ye alag baat ki maiñ nuuh nahīñ thā lekin

maiñ ne kashtī ko ġhalat samt meñ bahne na diyā

ye alag baat ki main nuh nahin tha lekin

main ne kashti ko ghalat samt mein bahne na diya

purāne ahd meñ bhī dushmanī thī

magar māhaul zahrīlā nahīñ thā

purane ahd mein bhi dushmani thi

magar mahaul zahrila nahin tha

kisī ke aib chhupānā savāb hai lekin

kabhī kabhī koī parda uThānā paḌtā hai

kisi ke aib chhupana sawab hai lekin

kabhi kabhi koi parda uThana paDta hai

tamām-shahr meñ kis tarah chāñdnī phailī

ki māhtāb to kal raat mere ghar meñ thā

tamam-shahr mein kis tarah chandni phaili

ki mahtab to kal raat mere ghar mein tha

naqsh miTte haiñ to aatā hai ḳhayāl

ret par ham bhī kahāñ the pahle

naqsh miTte hain to aata hai KHayal

ret par hum bhi kahan the pahle

ḳhud-kushī ke liye thoḌā sā ye kaafī hai magar

zinda rahne ko bahut zahr piyā jaatā hai

KHud-kushi ke liye thoDa sa ye kafi hai magar

zinda rahne ko bahut zahr piya jata hai

vo tāza-dam haiñ na.e sho.abde dikhāte hue

avaam thakne lage tāliyāñ bajāte hue

wo taza-dam hain nae shoabde dikhate hue

awam thakne lage taliyan bajate hue

kabhī qarīb kabhī duur ho ke rote haiñ

mohabbatoñ ke bhī mausam ajiib hote haiñ

kabhi qarib kabhi dur ho ke rote hain

mohabbaton ke bhi mausam ajib hote hain

ajab junūn hai ye intiqām kā jazba

shikast khā ke vo paanī meñ zahr Daal aayā

ajab junun hai ye intiqam ka jazba

shikast kha ke wo pani mein zahr Dal aaya

sambhal ke chalne kā saarā ġhurūr TuuT gayā

ik aisī baat kahī us ne laḌkhaḌāte hue

sambhal ke chalne ka sara ghurur TuT gaya

ek aisi baat kahi us ne laDkhaDate hue

is rāste meñ jab koī saaya na pā.egā

ye āḳhirī daraḳht bahut yaad aa.egā

is raste mein jab koi saya na paega

ye aaKHiri daraKHt bahut yaad aaega

log yuuñ kahte haiñ apne qisse

jaise vo shāh-jahāñ the pahle

log yun kahte hain apne qisse

jaise wo shah-jahan the pahle

ḳhud apne paañv bhī logoñ ne kar liye zaḳhmī

hamārī raah meñ kāñTe yahāñ bichhāte hue

KHud apne panw bhi logon ne kar liye zaKHmi

hamari rah mein kanTe yahan bichhate hue

vo taḌap jaa.e ishāra koī aisā denā

us ko ḳhat likhnā to merā bhī havāla denā

wo taDap jae ishaara koi aisa dena

us ko KHat likhna to mera bhi hawala dena

huā ujālā to ham un ke naam bhuul ga.e

jo bujh ga.e haiñ charāġhoñ kī lau baḌhāte hue

hua ujala to hum un ke nam bhul gae

jo bujh gae hain charaghon ki lau baDhate hue

palaT chaleñ ki ġhalat aa ga.e hamīñ shāyad

ra.iis logoñ se milne ke vaqt hote haiñ

palaT chalen ki ghalat aa gae hamin shayad

rais logon se milne ke waqt hote hain

ye bhī rahā hai kūcha-e-jānāñ meñ apnā rañg

aahaT huī to chāñd darīche meñ aa gayā

ye bhi raha hai kucha-e-jaanan mein apna rang

aahaT hui to chand dariche mein aa gaya

merī ḳhāmoshī pe the jo ta.ana-zan

shor meñ apne hī bahre ho ga.e

meri KHamoshi pe the jo tana-zan

shor mein apne hi bahre ho gae

ye masḳharoñ ko vazīfe yūñhī nahīñ milte

ra.iis ḳhud nahīñ hañste hañsānā paḌtā hai

ye masKHaron ko wazife yunhi nahin milte

rais KHud nahin hanste hansana paDta hai

vo jis ke sehn meñ koī gulāb khil na sakā

tamām shahr ke bachchoñ se pyaar kartā thā

wo jis ke sehn mein koi gulab khil na saka

tamam shahr ke bachchon se pyar karta tha

aaj shahroñ meñ haiñ jitne ḳhatre

jañgaloñ meñ bhī kahāñ the pahle

aaj shahron mein hain jitne KHatre

jangalon mein bhi kahan the pahle

mujh ko bhī jāgne kī aziyyat se de najāt

ai raat ab to ghar ke dar-o-bām so ga.e

mujh ko bhi jagne ki aziyyat se de najat

ai raat ab to ghar ke dar-o-baam so gae

shikastagī meñ bhī kyā shaan hai imārat kī

ki dekhne ko ise sar uThānā paḌtā hai

shikastagi mein bhi kya shan hai imarat ki

ki dekhne ko ise sar uThana paDta hai

aaj bhī shām-e-ġham! udaas na ho

maañg kar maiñ charāġh laatā huuñ

aaj bhi sham-e-gham! udas na ho

mang kar main charagh lata hun

javānoñ meñ tasādum kaise ruktā

qabīle meñ koī būḌhā nahīñ thā

jawanon mein tasadum kaise rukta

qabile mein koi buDha nahin tha

apne āñchal meñ chhupā kar mire aañsū le jā

yaad rakhne ko mulāqāt ke jugnū le jā

apne aanchal mein chhupa kar mere aansu le ja

yaad rakhne ko mulaqat ke jugnu le ja

chaurāhoñ kā to husn baḌhā shahr ke magar

jo log nāmvar the vo patthar ke ho ga.e

chaurahon ka to husn baDha shahr ke magar

jo log namwar the wo patthar ke ho gae

jahāñ zideñ kiyā kartā thā bachpanā merā

kahāñ se lā.ūñ khilaunoñ kī un dukānoñ ko

jahan ziden kiya karta tha bachpana mera

kahan se laun khilaunon ki un dukanon ko

maiñ jise DhūñDne niklā thā use pā na sakā

ab jidhar jī tirā chāhe mujhe ḳhushbū le jā

main jise DhunDne nikla tha use pa na saka

ab jidhar ji tera chahe mujhe KHushbu le ja

nayā ḳhuuñ ragoñ meñ ravāñ kar diyā

ġhazal ham ne tujh ko javāñ kar diyā

naya KHun ragon mein rawan kar diya

ghazal hum ne tujh ko jawan kar diya

javān ho ga.ī ik nasl sunte sunte ġhazal

ham aur ho ga.e būḌhe ġhazal sunāte hue

jawan ho gai ek nasl sunte sunte ghazal

hum aur ho gae buDhe ghazal sunate hue

ghar se kis tarah maiñ niklūñ ki ye maddham sā charāġh

maiñ nahīñ hūñgā to tanhā.ī meñ bujh jā.egā

ghar se kis tarah main niklun ki ye maddham sa charagh

main nahin hunga to tanhai mein bujh jaega

is kār-e-āgahī ko junūñ kah rahe haiñ log

mahfūz kar rahe haiñ fazā meñ sadā.eñ ham

is kar-e-agahi ko junun kah rahe hain log

mahfuz kar rahe hain faza mein sadaen hum

sab dekh kar guzar ga.e ik pal meñ aur ham

dīvār par bane hue manzar meñ kho ga.e

sab dekh kar guzar gae ek pal mein aur hum

diwar par bane hue manzar mein kho gae

un ke bhī apne ḳhvāb the apnī zarūrateñ

ham-sā.e kā magar vo galā kāTte rahe

un ke bhi apne KHwab the apni zaruraten

ham-sae ka magar wo gala kaTte rahe

ham-asroñ meñ ye chheḌ chalī aa.ī hai 'az.har'

yaañ 'zauq' ne 'ġhālib' ko bhī ġhālib nahīñ samjhā

ham-asron mein ye chheD chali aai hai 'azhar'

yan 'zauq' ne 'ghaalib' ko bhi ghaalib nahin samjha

karne ko raushnī ke ta.āqub kā tajraba

kuchh duur mere saath bhī parchhā.iyāñ ga.iiñ

karne ko raushni ke taaqub ka tajraba

kuchh dur mere sath bhi parchhaiyan gain

tamām shahr se bad-zan karā diyā shah ko

musāhiboñ kā ḳhudā jaane thā irāda kyā

tamam shahr se bad-zan kara diya shah ko

musahibon ka KHuda jaane tha irada kya

kyā rah gayā hai shahr meñ khañDarāt ke sivā

kyā dekhne ko ab yahāñ aa.e hue haiñ log

kya rah gaya hai shahr mein khanDaraat ke siwa

kya dekhne ko ab yahan aae hue hain log

ab mire ba.ad koī sar bhī nahīñ hogā tulūa

ab kisī samt se patthar bhī nahīñ aa.egā

ab mere baad koi sar bhi nahin hoga tulua

ab kisi samt se patthar bhi nahin aaega

tārīḳh bhī huuñ utne baras kī moarriḳho

chehre pe mere jitne baras kī ye gard hai

tariKH bhi hun utne baras ki moarriKHo

chehre pe mere jitne baras ki ye gard hai