رونے لگے تو کون ہمیں چپ کرائے گا

سو اس کی احتیاط ہے ہم رو نہیں رہے

تم کو افسوس تمہیں ٹھیک بنایا نہ گیا

اور اک ہم کہ ابھی چاک پہ رکھے نہ گئے

اگر ہوتا تو خود کو پھر بناتا

مگر افسوس کوزہ گر نہیں ہوں

یہ گلہ ہے کہ ہارتا بھی نہیں

بیچ میں کھیل چھوڑ دیتا ہوں

اس جنگل کے پیڑوں سے میں واقف ہوں

گر جاتے تھے جس پر سایا کرتے تھے

اپنے آنگن میں پرندے دیکھ کر

جسم کی ٹہنی سے اڑ جاتے ہیں ہم

ہوش میں آتے ہی ہو جاتے ہیں چپ

اور بے ہوشی میں چلاتے ہیں ہم

کوئی قصہ نہیں سنانے کو

کیسے بہلاؤں گا زمانہ کو

اک سدا آسماں سے آتی ہے

اور میں دھیان تک نہیں دیتا

سوچتا ہوں کہ تجھ کو مجھ سے کوئی

حادثہ ہی بچا کے لے جائے