dekhiye tark-e-adab kī kyā milī ta.azīr kal

piiTh hai sū-e-haram muñh hai sū-e-but-ḳhāna aaj

dekhiye tark-e-adab ki kya mili tazir kal

piTh hai su-e-haram munh hai su-e-but-KHana aaj

ri.āyat chāhiye aisī ki zebā.ī ho ma.anī kī

urūs-e-sher kā ai 'bahr' zevar ho to aisā ho

riayat chahiye aisi ki zebai ho mani ki

urus-e-sher ka ai 'bahr' zewar ho to aisa ho

aa.e bhī to khaa.e na gilaurī na malā itr

rokī mirī dāvat mujhe mehmāñ se gilā hai

aae bhi to khae na gilauri na mala itr

roki meri dawat mujhe mehman se gila hai

takiya agar nasīb ho zānu-e-yār kā

maiñ aisī niiñd so.uuñ ki sābit ho mar gayā

takiya agar nasib ho zanu-e-yar ka

main aisi nind soun ki sabit ho mar gaya

kyā hai mujhe dete ho gilaurī

chūne meñ kahīñ na sañkhiyā ho

kya hai mujhe dete ho gilauri

chune mein kahin na sankhiya ho

vo kūcha sher-o-suḳhan kā hai tañg-o-tār ai 'bahr'

ki sūjhte nahīñ ma.anī baḌe zahīnoñ ko

wo kucha sher-o-suKHan ka hai tang-o-tar ai 'bahr'

ki sujhte nahin mani baDe zahinon ko

mire qatl par tum ne biiḌā uThāyā

mire haath kā paan khāyā to hotā

mere qatl par tum ne biDa uThaya

mere hath ka pan khaya to hota

āshiq se nāk-bhauñ na chaḌhā o kitāb-rū

ham dars-e-ishq meñ ye alif bhī paḌhe nahīñ

aashiq se nak-bhaun na chaDha o kitab-ru

hum dars-e-ishq mein ye alif bhi paDhe nahin

nahīñ jī chāhtā milne ko subuk-vaz.oñ se

kyā kareñ ham jo mizāj apnā girānī māñge

nahin ji chahta milne ko subuk-wazon se

kya karen hum jo mizaj apna girani mange

zālim hamārī aaj kī ye baat yaad rakh

itnā bhī dil-jaloñ kā satānā bhalā nahīñ

zalim hamari aaj ki ye baat yaad rakh

itna bhi dil-jalon ka satana bhala nahin

muḳhtār haiñ vo likkheñ na likkheñ javāb-e-ḳhat

sāhab ko roz apnā arīza report hai

muKHtar hain wo likkhen na likkhen jawab-e-KHat

sahab ko roz apna ariza report hai

yaar ko dekhte hī mar ga.e ai 'bahr' afsos

ḳhaak merī koī āñkhoñ meñ qazā kī jhoñke

yar ko dekhte hi mar gae ai 'bahr' afsos

KHak meri koi aankhon mein qaza ki jhonke

mire baġhair na ik-dam use qarār aatā

zarā bhī zabt jo mujh be-qarār meñ hotā

mere baghair na ik-dam use qarar aata

zara bhi zabt jo mujh be-qarar mein hota

dikhāyā us ne ban-Than kar vo jalva apnī sūrat kā

ki paanī phir gayā ā.īne par dariyā-e-hairat kā

dikhaya us ne ban-Than kar wo jalwa apni surat ka

ki pani phir gaya aaine par dariya-e-hairat ka

choTī guñdhvā.ī huī yaar ne khulvā Daalī

rahm aayā koī mahbūs-e-rasan yaad aayā

choTi gundhwai hui yar ne khulwa Dali

rahm aaya koi mahbus-e-rasan yaad aaya

zāhid sunā.ūñ vasf jo apnī sharāb ke

paḌhne lageñ darūd farishte savāb ke

zahid sunaun wasf jo apni sharab ke

paDhne lagen darud farishte sawab ke

ronā binā-e-ḳhāna-ḳhārābī hai misl-e-sham.a

Tapke jo saqf-e-chashm ho to qasr-e-tan ḳharāb

rona bina-e-KHana-KHarabi hai misl-e-shama

Tapke jo saqf-e-chashm ho to qasr-e-tan KHarab

koī phal pā.egā kyā tuḳhm-e-mohabbat bo kar

is amar-bel meñ to barg-o-samar kuchh bhī nahīñ

koi phal paega kya tuKHm-e-mohabbat bo kar

is amar-bel mein to barg-o-samar kuchh bhi nahin

apnī añgiyā kī kaTorī na dikhāo mujh ko

kahīñ Tharre kī havas meñ na ye mai-ḳhvār bañdhe

apni angiya ki kaTori na dikhao mujh ko

kahin Tharre ki hawas mein na ye mai-KHwar bandhe

teġh-e-irfāñ se ruuh bismil hai

haal par apne haal aatā hai

tegh-e-irfan se ruh bismil hai

haal par apne haal aata hai

ḳhush raho yaar agar ham se ho bezār bahut

dil agar apnā salāmat hai to dildār bahut

KHush raho yar agar hum se ho bezar bahut

dil agar apna salamat hai to dildar bahut

pūchhe rindoñ se koī in muftiyoñ kā jhuuT sach

do dalīloñ se ye kar lete haiñ da.avā jhuuT sach

puchhe rindon se koi in muftiyon ka jhuT sach

do dalilon se ye kar lete hain dawa jhuT sach

kisī gul ko jo apnā turra-e-dastār samjhe ham

to barsoñ Tokrā sar par uThāyā sargirānī kā

kisi gul ko jo apna turra-e-dastar samjhe hum

to barson Tokra sar par uThaya sargirani ka

kyā kyā na mujh se sañg-dilī dilbaroñ ne kī

patthar paḌeñ samajh pe na samjhā kisī tarah

kya kya na mujh se sang-dili dilbaron ne ki

patthar paDen samajh pe na samjha kisi tarah

mujhī par qat.a huī hai qabā-e-dil-sozī

havā se aa ke chhupe mere pairahan meñ charāġh

mujhi par qata hui hai qaba-e-dil-sozi

hawa se aa ke chhupe mere pairahan mein charagh

qatl par biiḌā uThā kar teġh kyā bāñdhoge tum

lo ḳhabar apnī dahan gum hai kamar miltī nahīñ

qatl par biDa uTha kar tegh kya bandhoge tum

lo KHabar apni dahan gum hai kamar milti nahin

pyaar kī aañkh se dushman ko bhī jo dekhte haiñ

ham ne aise bhī haiñ allāh ke pyāre dekhe

pyar ki aankh se dushman ko bhi jo dekhte hain

hum ne aise bhi hain allah ke pyare dekhe

āñkheñ na jiine deñgī tirī be-vafā mujhe

kyuuñ khiḌkiyoñ se jhāñk rahī hai qazā mujhe

aankhen na jine dengi teri be-wafa mujhe

kyun khiDkiyon se jhank rahi hai qaza mujhe

zulf-e-dū-tā do-rāha-e-islām-o-kufr hai

zāhid idhar ḳharāb udhar barhaman ḳharāb

zulf-e-du-ta do-raha-e-islam-o-kufr hai

zahid idhar KHarab udhar barhaman KHarab

ḳhuub chaltī hai naav kāġhaz kī

ghar meñ qaazī ke maal aatā hai

KHub chalti hai naw kaghaz ki

ghar mein qazi ke mal aata hai

maiñ haath joḌtā huuñ baḌī der se huzūr

lag jā.iye gale se ab inkār ho chukā

main hath joDta hun baDi der se huzur

lag jaiye gale se ab inkar ho chuka

vā.izo ham riñd kyūñ-kar kābil-e-jannat nahīñ

kyā gunahgāroñ ko mīrās-e-pidar miltī nahīñ

waizo hum rind kyun-kar kabil-e-jannat nahin

kya gunahgaron ko miras-e-pidar milti nahin

qaazī ko jo riñd kuchh chaTā deñ

masjid kī baġhal meñ mai-kada ho

qazi ko jo rind kuchh chaTa den

masjid ki baghal mein mai-kada ho

duniyā meñ 'bahr' kaun ibādat-guzār hai

saum-o-salāt dāḳhil-e-rasm-o-rivāj hai

duniya mein 'bahr' kaun ibaadat-guzar hai

saum-o-salat daKHil-e-rasm-o-riwaj hai

kāñToñ pe misl-e-qais kahāñ tak ravāñ-davāñ

lailā-e-jāñ hai jism kī mahmil se dil uchāT

kanTon pe misl-e-qais kahan tak rawan-dawan

laila-e-jaan hai jism ki mahmil se dil uchaT

merā lahū chaTā.egā jab tak na teġh ko

qātil ko dahne haath se khānā harām hai

mera lahu chaTaega jab tak na tegh ko

qatil ko dahne hath se khana haram hai

ġhair par kyuuñ nigāh karte ho

mujh ko is tiir kā nishāna karo

ghair par kyun nigah karte ho

mujh ko is tir ka nishana karo

be-tarah dil meñ bharā rahtā hai zulfoñ kā dhuāñ

dam nikal jaa.e kisī roz na ghuT kar apnā

be-tarah dil mein bhara rahta hai zulfon ka dhuan

dam nikal jae kisi roz na ghuT kar apna

kamāl-e-tālib-dūñ-e-dūñ hai pīr-e-haram

ḳhudā ke ghar meñ hai lekin ḳhudā se bāhar hai

kamal-e-talib-dun-e-dun hai pir-e-haram

KHuda ke ghar mein hai lekin KHuda se bahar hai

juutā nayā pahan ke vo panjoñ ke bal chale

kapḌe badal ke jaame se bāhar nikal chale

juta naya pahan ke wo panjon ke bal chale

kapDe badal ke jame se bahar nikal chale

chillā rahā huuñ qulqul-e-mīnā-e-mai kī shakl

de jaam ke laboñ se mujhe sāqiyā javāb

chilla raha hun qulqul-e-mina-e-mai ki shakl

de jam ke labon se mujhe saqiya jawab

ek bosa mirī tanḳhvāh mile na mile

aarzū hai ki na qadmoñ se ye naukar chhūTe

ek bosa meri tanKHwah mile na mile

aarzu hai ki na qadmon se ye naukar chhuTe

abr-e-bahār ab bhī jachtā nahīñ nazar meñ

kuchh āñsuoñ ke qatre ab bhī haiñ chashm-e-tar meñ

abr-e-bahaar ab bhi jachta nahin nazar mein

kuchh aansuon ke qatre ab bhi hain chashm-e-tar mein

hogā zarūr ek na ik din mubāhisa

rizvāñ se aur kū-e-sanam ke muqīm se

hoga zarur ek na ek din mubahisa

rizwan se aur ku-e-sanam ke muqim se

kab tālib-e-rāhat hue zaḳhmī-e-mohabbat

marham kī jo hājat huī tezāb banāyā

kab talib-e-rahat hue zaKHmi-e-mohabbat

marham ki jo hajat hui tezab banaya

na niklegā dil us ke gesū meñ phañs kar

ye kaalā kabhī man ugaltā nahīñ hai

na niklega dil us ke gesu mein phans kar

ye kala kabhi man ugalta nahin hai

hai nagīna har ek uzv-e-badan

tum ko kyā ehtiyāj zevar kī

hai nagina har ek uzw-e-badan

tum ko kya ehtiyaj zewar ki

vaa.iz kā jhuuT bolnā tāsīr kar gayā

dam meñ namāziyoñ kī huī anjuman ḳharāb

waiz ka jhuT bolna tasir kar gaya

dam mein namaziyon ki hui anjuman KHarab

bhalā huā ki na haath aayā jāma-e-pur-zar

gazī ke kapḌe badalte to ham badal jaate

bhala hua ki na hath aaya jama-e-pur-zar

gazi ke kapDe badalte to hum badal jate

merā dil kis ne liyā naam batā.ūñ kis kā

maiñ huuñ yā aap haiñ ghar meñ koī aayā na gayā

mera dil kis ne liya nam bataun kis ka

main hun ya aap hain ghar mein koi aaya na gaya