محسوس ہو رہا ہے کہ میں خود سفر میں ہوں

جس دن سے ریل پر میں تجھے چھوڑنے گیا

خوشی کی آرزو کیا دل میں ٹھہرے

ترے غم نے بٹھا رکھے ہیں پہرے

اک برس بھی ابھی نہیں گزرا

کتنی جلدی بدل گئے چہرے

آج کچھ ایسے شعلے بھڑکے بارش کے ہر قطرے سے

دھوپ پناہیں مانگ رہی ہے بھیگے ہوئے درختوں میں

سرد جذبے بجھے بجھے چہرے

جسم زندہ ہیں مر گئے چہرے

ہم آج کچھ حسین سرابوں میں کھو گئے

آنکھیں کھلیں تو جاگتے خوابوں میں کھو گئے

تنہائی کی دلہن اپنی مانگ سجائے بیٹھی ہے

ویرانی آباد ہوئی ہے اجڑے ہوئے درختوں میں

تنہائیوں کو سونپ کے تاریکیوں کا زہر

راتوں کو بھاگ آئے ہم اپنے مکان سے

آج پھر شاخ سے گرے پتے

اور مٹی میں مل گئے پتے

کیفؔ کہاں تک تم خود کو بے داغ رکھو گے

اب تو ساری دنیا کے منہ پر سیاہی ہے

خدا معلوم کس آواز کے پیاسے پرندے

وہ دیکھو خامشی کی جھیل میں اترے پرندے

کیفؔ یوں آغوش فن میں ذہن کو نیند آ گئی

جیسے ماں کی گود میں بچہ سسک کر سو گیا

وہ خود ہی اپنی آگ میں جل کر فنا ہوا

جس سائے کی تلاش میں یہ آفتاب ہے

چمن میں شدت درد نمود سے غنچے

تڑپ رہے ہیں مگر مسکرائے جاتے ہیں