آج کا کام نہ رکھو کل پر

ایک دفعہ کسی گاؤں کا چودھری سودا لینے شہر میں آیا تو دیکھا، کسی جگہ لوگ ایک وکیل کی بڑی تعریف کر رہے ہیں کہ وہ تو سو سو روپے کی ایک ایک بات بتاتا اور ہزار ہزار روپے کا ایک ایک نکتہ سمجھاتا ہے۔

چودھری نے دل میں کہا۔ ’’ہم بھی چل کر اس کی کوئی بات سن آئیں تو بہت اچھا ہو۔‘‘ یہ سوچ کر وہ وکیل کے مکان پر پہنچا اور کہا۔ ’’وکیل صاحب! میں نے آپ کی باتوں کی بہت تعریف سنی ہے۔ کوئی بات مجھے بھی سنا دیجیے۔‘‘

وکیل نے کہا۔ ’’ہم تو ایک بات کی فیس ایک اشرفی لیا کرتے ہیں۔‘‘

یہ سن کر چودھری کا شوق اور بھی بڑھا اور اس نے پندرہ روپے نکال وکیل صاحب کے سامنے رکھ دیے۔

روپے لے کر وکیل صاحب نےایک کاغذ کے پرزے پر یہ مصرع لکھ گیا؎

’’آج کا کام نہ رکھو کل پر‘‘

چودھری واپس آیا تو مزدوروں نے کھیت کاٹ کر بہت سا غلہ نکال رکھا تھا۔ شام کو وہ چودھری سے مزدوری لینے آئے تو اس نے کہا۔ ’’اس اناج کو گھر میں پہنچاؤ گے تو مزدوری ملے گی۔‘‘

مزدوروں نے کہا۔ ’’اب تو وقت گزر چکا ہے کل دن نکلتے ہی رکھوا لینا۔ دوسروں کے اناج بھی تو سب باہر ہی پڑے ہیں۔‘‘

چودھری بولا۔ بھائیو! میں نے تو آج ہی پندرہ روپے دے کر یہ بات سیکھی ہے۔ پس میں تو اسی وقت رکھواؤں گا۔‘‘

آخر مزدوروں کو اناج گھر میں رکھنا ہی پڑا۔

اتفاق سے اسی رات اس زور کی بارش ہوئی کہ سارے گاؤں والوں کا غلہ پانی میں بہہ گیا یا خراب ہو کر رہ گیا۔ مگر چودھری کا غلہ بالکل بچا رہا اور بیچتے وقت اسے اتنا نفع ہوا کہ ایک اشرفی کے بدلے بیسیوں اشرفیاں وصول ہوگئیں۔