دل اور زبان

کہتے ہیں جب لقمان حکیم پڑھ کر فارغ ہو چکے تو استاد نے کہا۔ ’’لقمان! آج ایک بکرا ذبح کرو اور اس میں جو سب سے اچھی چیز سمجھو، ہمارے لیے پکا لاؤ۔‘‘

لقمان نے بکرا حلال کر کے اس کے دل اور زبان کو خوب اچھے مسالوں کے ساتھ بھون بھان کر استاد کے سامنے رکھ دیا۔ استاد نے چکھا تو تعریف کر کے کہا۔ ’’لقمان آج تم آدھے پاس ہو گئے۔‘‘

دوسرے دن استاد نے فرمایا۔ ’’آج پھر ایک بکرا ذبح کرو اور اس میں جو سب سے بری چیز پاؤ، وہ ہمارے لیے تیار کر لاؤ۔‘‘

انہوں نے بکرا ذبح کر کے اب بھی پہلے دن کی طرف صرف دل اور زبان ہی کو چن لیا۔ مگر اب کے اس ترکیب سے پکایا کہ زبان میٹھی پکائی اور دل کڑوا۔ اور پھر دونوں کو ملا کر استاد کے سامنے لا رکھا۔ استاد نے چکھا تو بدمزہ پا کر پوچھا۔ ’’لقمان! آج کیا پکا لائے؟‘‘ لقمان نے عرض کی۔ ’’حضور! وہی دل اور زبان جو آپس میں موافق نہیں۔‘‘ استاد نے فرمایا۔ ’’جاؤ اب تم بالکل پاس ہو گئے۔‘‘

حکیم لقمان نے دونوں دفعہ کیسی اچھی چیزیں چنیں۔ سچ مچ ایک جیسے دل اور زبان سے بڑھ کر کوئی نعمت لطیف اور لذیذ نہیں اور نہ ایک دوسرے سے مخالف دل اور زبان سے زیادہ کوئی چیز بری اور بدمزہ ہے۔ جس آدمی کا دل اور زبان ایک ہو، دنیا بھی اس کی عزت کرتی ہے۔ خدا بھی خوش ہوتا ہے اور جس کی زبان دل سے موافق نہ ہو دنیا بھی اسے اچھا نہیں سمجھتی۔ خدا بھی ناخوش ہو جاتا ہے۔ بلکہ وہ خود بھی خوش نہیں رہتا۔