صبر اور دیانتداری

ایک دفعہ قحط کے زمانے میں کسی قصبے کا رئیس ہر روز صبح کو سو دو سو روٹیاں پکوا کر سامنے رکھ لیا کرتا۔ گاؤں کے بچے جمع ہو جاتے اور اپنے ہاتھ سے ایک ایک روٹی اٹھا کر چل دیتے۔ ان میں سے اکثر لڑکے اتنی جلدی کرتے کہ کسی کے پاؤں پر پاؤں رکھ دیتے اور کسی کے مونڈھے پر سوار ہو کر آگے بڑھ جاتے مگر ایک چھوٹی لڑکی خاموش کھڑی رہتی۔ جب سب لڑکے روٹی لے چکتے تو اس بےچاری کے حصے میں وہ روٹی آتی، جو سب سے چھوٹی ہوتی۔

امیر دو دن لڑکی کی اس شرم و حیا کو دیکھتا رہا۔ تیسرے دن بھی وہی کچھ ہوا لڑکے بڑی روٹیاں لے گئے اور چھوٹی روٹی اس شرمیلی لڑکی کے لیے رہ گئی۔

مگر اس روز جب لڑکی نے روٹی گھر لے جا کر ماں کے حوالے کی اور اور اس نے لڑکی کو آدھی روٹی دینے کے لیے اس کا ٹکڑا توڑا تو اس میں سے دو روپے نکل آئے۔

لڑکی کی ماں نے دیکھتے ہی دونوں کے دونوں روپے لڑکی کو دے کر رئیس کے پاس بھیج دیا کہ ’’غلطی سے آٹے میں گر کر مل گئے ہوں گے۔ آپ اپنے روپے لے لیجئے۔‘‘

رئیس لڑکی کے صبر پر تو پہلے ہی خوش ہو رہا تھا۔ اب اس کی ماں کی دیانت داری سے اور بھی خوش ہو کر بولا۔ ’’بیٹی! یہ دو روپے کل میں نے تمہارے صبر سے خوش ہو کر خود چھوٹی روٹی میں رکھوا دیے تھے۔ تم ان کے کپڑے بنوا لینا اور یہ تین روپے لے جاؤ۔ یہ اپنی ماں کو دے دینا کہ یہ اس کی دیانتداری کا انعام ہے۔‘‘