آسماں کے روزنوں سے لوٹ آتا تھا کبھی

وہ کبوتر اک حویلی کے چھجوں میں کھو گیا

حجاب آ گیا تھا مجھ کو دل کے اضطراب پر

یہی سبب ہے تیرے در پہ لوٹ کر نہ آ سکا

زرد پھولوں میں بسا خواب میں رہنے والا

دھند میں الجھا رہا نیند میں چلنے والا

فاختائیں بولتی ہیں بجروں کے دیس میں

تو بھی سن لے آسماں یہ گیت میرے نام کا

چراغ بانٹنے والوں پہ حیرتیں نہ کرو

یہ آفتاب ہیں، شب کی دعا میں شاد رہیں

آدھے پیڑ پہ سبز پرندے آدھا پیڑ آسیبی ہے

کیسے کھلے یہ رام کہانی کون سا حصہ میرا ہے

دھوپ پھیلی تو کہا دیوار نے جھک کر مجھے

مل گلے میرے مسافر، میرے سائے کے حبیب

سرد راتوں کی ہوا میں اڑتے پتوں کے مثیل

کون تیرے شب نوردوں کو سنبھالے شہر میں

کوئی نہ رستہ ناپ سکا ہے، ریت پہ چلنے والوں کا

اگلے قدم پر مٹ جائے گا پہلا نقش ہمارا بھی

غبار شہر میں اسے نہ ڈھونڈ جو خزاں کی شب

ہوا کی راہ سے ملا، ہوا کی راہ پر گیا

کسی کا سایہ رہ گیا گلی کے عین موڑ پر

اسی حبیب سائے سے بنی ہماری داستاں

اتنا آساں نہیں پانی سے شبیہیں دھونا

خود بھی روئے گا مصور یہ قیامت کر کے

مختصر بات تھی، پھیلی کیوں صبا کی مانند

درد مندوں کا فسانہ تھا، اچھالا کس نے

بستیوں والے تو خود اوڑھ کے پتے، سوئے

دل آوارہ تجھے رات سنبھالا کس نے

وہ شخص امر ہے، جو پیوے گا دو چاندوں کے نور

اس کی آنکھیں سدا گلابی جو دیکھے اک لال