mire laboñ kā tabassum to sab ne dekh liyā

jo dil pe biit rahī hai vo koī kyā jaane

mere labon ka tabassum to sab ne dekh liya

jo dil pe bit rahi hai wo koi kya jaane

koī samjhā.e ye kyā rang hai maiḳhāne kā

aañkh saaqī kī uThe naam ho paimāne kā

koi samjhae ye kya rang hai maiKHane ka

aankh saqi ki uThe nam ho paimane ka

chashm-e-sāqī mujhe har gaam pe yaad aatī hai

rāstā bhuul na jā.ūñ kahīñ maiḳhāne kā

chashm-e-saqi mujhe har gam pe yaad aati hai

rasta bhul na jaun kahin maiKHane ka

kaun jaane ki ik tabassum se

kitne mafhūm-e-ġham nikalte haiñ

kaun jaane ki ek tabassum se

kitne mafhum-e-gham nikalte hain

dar-e-mahbūb hai apnā to kinārā 'iqbāl'

be-sahārā hue to Duub ke jaanā hogā

dar-e-mahbub hai apna to kinara 'iqbaal'

be-sahaara hue to Dub ke jaana hoga

kahīñ be-tark-e-kudūrat bhī mile haiñ do dil

dar banānā hai to dīvār ko Dhānā hogā

kahin be-tark-e-kudurat bhi mile hain do dil

dar banana hai to diwar ko Dhana hoga

'iqbāl' hamārā josh-e-talab kyā jaane kidhar le jā.egā

nikle haiñ talāsh-e-manzil meñ aur rāhguzar mā'lūm nahīñ

'iqbaal' hamara josh-e-talab kya jaane kidhar le jaega

nikle hain talash-e-manzil mein aur rahguzar ma'lum nahin

ham ko tajdīd-e-mulāqāt se kab hai inkār

lekin ab pahle unheñ haath baḌhānā hogā

hum ko tajdid-e-mulaqat se kab hai inkar

lekin ab pahle unhen hath baDhana hoga

mumkin ho to ik lamhe ko zarā taklīf-e-tabassum kar liije

ham meñ se abhī tak kitnoñ ko mafhūm-e-sahar mā'lūm nahīñ

mumkin ho to ek lamhe ko zara taklif-e-tabassum kar lije

hum mein se abhi tak kitnon ko mafhum-e-sahar ma'lum nahin