راستے بھر مری ہم سفری کا دم بھرتے رہے

اپنی منزل پہ پہنچتے ہی پرائے ہوئے لوگ

وہ دیواروں میں چنوانے کا منظر اب نہیں دکھتا

محبت پر مگر بندش جو پہلے تھی سو اب بھی ہے

مفلسی تھی اور ہم تھے گھر کے اکلوتے چراغ

ورنہ ایسی روشنی کرتے کے دنیا دیکھتی

سرد مہری آپ کی رشتے میں حائل ہو گئی

ورنہ ہم وہ عاشقی کرتے کے دنیا دیکھتی

راجا کا بیٹا راجا نہیں بنتا بنتے ہم

بس اس لئے کہانی میں مارا گیا ہمیں

ایسا نہ ہو کہ دوستی بھی جائے ہاتھ سے

ہم ہاتھ میں گلاب لئے سوچتے رہے

ذرا سا وقت جو بدلا تو ہم پہ ہنسنے لگے

ہمارے کاندھے پہ سر رکھ کے رونے والے لوگ

یہی اک بات اب دونوں کی پیشانی پہ لکھی ہے

مجھے تیری ضرورت ہے مجھے تیری ضرورت ہے

اس پرائے شہر میں اے کاش کوئی یہ کہے

رات کا کھانا ہمارے ساتھ کھانا ہے تمہیں

ہم جون ایلیاؔ کے زمانے میں دوستو

غالبؔ کا انتخاب لئے سوچتے رہے

لوگ ہم سے سیکھتے ہیں غم چھپانے کا ہنر

آؤ تم کو بھی سکھا دیں مسکرانے کا ہنر

ہجرتوں کے کرب کو ایسے چھپانا ہے تمہیں

کوئی جب بھی حال پوچھے مسکرانا ہے تمہیں

شکستہ ناؤ سمجھ کر ڈبونے والے لوگ

نہ پا سکے مجھے ساحل پہ کھونے والے لوگ

آنکھوں میں اپنی خواب لئے سوچتے رہے

جیسے کوئی کتاب لئے سوچتے رہے

کیا غضب ہے تجربے کی بھینٹ تم ہی چڑھ گئے

تم سے ہی سیکھا تھا ہم نے دل دکھانے کا ہنر