زیر نظر کتاب"اثبات و نفی"فاروقی صاحب کے چودہ تنقیدی مضامین کا مجموعہ ہے۔یہ مضامین اردو شاعری کے کلام کے محاسبے پر مبنی ہیں یہ مضامین فاروقی صاحب نے 1977 سے لیکر 1984 کے دوران لکھے تھے ، جو کہ اکثر رسائل میں چھپ چکے ہیں۔ پہلے تین مضامین اقبال کے کلام کے تجزیے سے متعلق ہیں ،جن میں فاروقی صاحب نے اقبال فہمی کے لیے نیا انداز اپنایا ہے اور اپنے نظریہ نقد کے مطابق اقبال کے کلام میں موضوع کی اہمیت کے بجائے ان کے لفظیاتی نظام کی کارکردگی کو بروئے کار لانے کی کوشش کی ہے۔چوتھا مضمون نظیر اکبر آبادی کی کائنات کے عنوان سے ہے،پانچواں مضمون میر انیس کی شاعرانہ اہمیت پر ہے جس میں مصنف نے اس بات کے ثبوت فراہم کیے ہیں کہ کہ انیس کا اثر اردو شاعری پر متعدد پہلوؤں سے نا گزیر ہے۔"دستور الاصلاح اور اصلاح الاصلاح" میں فاروقی صاحب نے سیماب اکبر آبادی کے اس رویے کو نمایاں کیا ہے جس میں سیماب نے کہا تھا کہ اردو میں دلی اور لکھنو اسکول کے علاوہ آگرہ اسکول بھی تھا۔کتاب میں شامل مضمون "جانثار اختر اور نیا استعارہ " جانثار اختر کی ترقی پسندی سے الگ، نئے استعارہ کا شاعر قرار دینے کی سعی پر مبنی ہے۔اس کے بعد چھ مضامین جدید اردو شاعروں پر ہیں ۔