چھوڑ اب یہ اگر مگر مرے دوست

چھوڑ اب یہ اگر مگر مرے دوست

عشق کرنا ہے کر گزر مرے دوست

وقت کا فیصلہ اٹل ہوگا

وقت کے فیصلے سے ڈر مرے دوست

شکریہ حال چال پوچھنے کا

ہو رہی ہے گزر بسر مرے دوست

کس طرف ہے تری وفاداری

صاف صاف آج بات کر مرے دوست

ایک مدت سے رابطہ ہی نہیں

دے کوئی خیر کی خبر مرے دوست

لڑکھڑانے لگے ہیں تیرے قدم

میرے شانے پہ ہاتھ دھر مرے دوست

برف کے بت بنائے گا کیسے

گرم کمرے میں بیٹھ کر مرے دوست

نیند آنکھوں سے اب جھٹک عاصمؔ

دیکھ ہونے کو ہے سحر مرے دوست